毛爸毛媽毛毛豬: 6月 2014

2014年6月30日星期一

他媽的！那不文明的 "傳統" ...「狗肉節」

2014年6月29日（星期日）

參加完 6 • 22 遊行當晚⋯無意咁睇到某大陸電視台正探討「虐畜」、「狗肉節」嘅節目。出席嘅嘉賓有台灣學者、國際愛護動物代表及某知名人士⋯內容討論到中國推行「動物法」困難重重，法例只係喺起草階段⋯其中與＂傳統＂同＂民族習慣＂有關。

節目內播出一段片段對女肉販嘅訪問，肉販：「我哋老祖宗、爺爺⋯已經有「狗肉節」，呢啲係「傳統」，「習慣咗」點可以廢除呀。」台灣學者都講台灣花近20年先立法修訂禁止食狗肉，亦指出狗肉冇檢疫食用係風險好大。

動物保護組織指出一斤狗肉只售 20 元，以經濟價值計算係唔化算，但點解銷售店仲開到成行成市呢？因為狗狗嘅來源全部都係偷返嚟唔使成本。

先進國家⋯如美國、德國⋯將狗、貓寵物喺人類社會層次提昇到「友伴」關係，更受到「特別法律」嘅保護。（注：友伴解－好朋友、陪伴者）

我個人意見⋯如果冇必要、殘忍咁大量屠殺生命來維持所謂嘅「傳統」係唔文明同野蠻嘅⋯

我哋國內啲領導人經常講：我國要緊貼國際先進潮流、走向文明。呢番說話唔通係⋯齋吹～

毛爸：好多謝毛毛免費（零食）支持及親自做「毛豆」...

2014年6月29日星期日

纖滅(蚤)行動…

2014年6月29日(星期日)

喺毛毛身上仲發現有蚤…今日準備大開殺戒，噚日開始工人將全屋嘅窿窿罅罅用吸塵機吸乾淨、再喺牆邊灑防蚤粉，到深夜安排好毛毛聽日用嘅防蚤沖涼液、護毛素、噴灑液…等...聽日作戰用。

今日目標行動幫毛毛沖涼捉蚤、用熱水清洗毛毛嘅用品、用自制檸檬液噴灑毛毛嘅籠…。

雖然咁大規模全面追殺蚤…但我哋必須要接受事實…我哋發現嘅蚤極可能已經喺屋企災難性咁繁殖，要纖滅佢哋係需要時間、需要持續咁殺戮…

毛爸：可憐嘅毛仔要承受十五分鐘防蚤沖涼液沖洗...大半小時毛媽幫佢捉蚤...

真係非常震驚...頭頂、鼻樑一共捉咗 6 隻蚤...實在太過份了...小朋友飽受滋擾...

雖然毛媽今日批準煮三文魚餐、牛柳餐俾毛毛做補償...但毛仔也太累了...

毛爸：我與你誓不兩立...我會將你纖滅...

2014年6月28日星期六

西灣湖畔散步

2014年6月29日(星期日)

今日係好特別嘅日子…

一早煮好三文魚餐俾毛毛食…再帶毛毛去西灣湖畔玩，毛毛好開心…其實我哋都好開心，雖然我帶定玩具波波準備同毛毛玩…但由於毛毛啱啱食咗餐所以毛媽下令唔可以玩激烈運動，今朝好熱…毛媽做足準備帶定食水同噴水壺俾毛毛降溫…

今日心情出奇哋平靜…

毛爸：一家人一齊行晨運...簡單嘅幸福

毛媽：行到攰...一齊坐低休息下....

毛毛：毛爸，幫我影番張「招牌相」先...禾需布需（注：我帥不帥。國語音）

毛毛：毛爸，你影得未呀？好曬呀！你使唔使抖陣先？

毛爸：我曾經到頂上一遊...

毛毛：毛爸又想當年...又係唔怕悶既...

毛媽：毛仔，等陣...等媽咪影張風景相先行...

毛毛：等我都擺個靚「鋪屎」先...毛爸，咁得唔得？

毛毛：睇真啲「雞蛋花」原來係咁靚仲好清香...自己從來冇發覺...真失敗...

毛爸：呢度唔俾網魚咖...啲乜野人咁冇公德？

條脷好長好長嘅毛毛「擔襪仔」

2014年6月28日（星期六）

毛毛每日最高興同失落嘅時間就係我哋換衫返工嘅時候⋯

高興～每朝必玩「擔襪仔」，唔知點解毛毛由bb開始到現在玩極都唔厭，而且越玩越斯文⋯以前必咬爛到而家自動擔番俾我⋯好聽話。

失落～我同毛媽一齊出門⋯毛毛就覺得我哋「遺棄」佢咁（我喺＂天眼＂見到毛毛⋯我哋離開之後佢要坐喺大門口一直咁望大門直到聽唔到我哋啲聲先至肯行開），而家每逢我哋一齊出門⋯我都俾零食獎勵毛⋯等佢覺得我哋返工係一件開心嘅事⋯

毛毛：毛爸，來丫...嚟追我丫...你追我唔倒、你追我唔倒...

毛爸：雖然每日短短分零鐘...但毛毛就玩到好開心...最後自動擔番俾我...仲有獎勵...

遲一兩分鐘出門對我嚟講根本冇乜影響...但呢小小時間毛毛就得到好大滿足...

2014年6月26日星期四

親子時間

2014年6月26日（星期四）

世事安排往往都係非常巧妙「蚤事件」令毛媽同毛毛更親近⋯每晚都有「親子時間」。

近排每晚食飽飯之後⋯毛媽就捉住毛毛同佢全身檢查⋯由於要指細反開手、腳、頭、頸啲毛觀察⋯毛毛覺得好唔耐煩會發脾氣，有時仲想咬毛媽。

經毛媽關心同愛心⋯慢慢令毛毛習慣落嚟，呢幾晚毛毛冇再咬人都算聽話，喺毛毛身上捉到嘅蚤累積到 9 隻⋯咁嘅數量我估係環境做成嘅交义感染，我要喺家居環境更嚴厲咁加強防蚤力度。

毛毛：而家毛毛都好乖咁同毛媽合作...

單車日誌…勞累與運動

2014年6月26日（星期四）

工作會令身體勞累繼而產生心理壓力，運動亦都會令身體勞累⋯但運動中舒展身體各部分肌肉係會令身體釋放壓力同身心舒暢。

有專家指出當你精神、身體勞累⋯要回服醒神最有效嘅方法就做啲輕鬆嘅肌肉舒展運動。

噚日天台工程殺科⋯物資、工具、垃圾⋯要收拾好準備運走，雖然唔係好忙但非常辛苦（辛苦到可用"想死"嚟形容），今朝攰到唔想起床⋯有運哋得到佬闆體諒休息一天，身體咁攰最好係踩單車舒展肌肉同身心⋯

猛烈陽光下踩單車又係另一種感覺

烈日下路面反射光同熱十分強勁...又熱又剌眼...

今朝冇帶口罩...變咗公路吸塵機...

我應該要習慣「全包」上陣，作為日後「環島」適應準備...

今日天氣勁好...

捕殺 • 蚤

2014年6月26日（星期四）

雖然屋企已經實行最高級別嘅「防蚤行動」，但仲發現毛毛身上有蚤⋯捕獵行動即時展開。

而現在最重要⋯就要追查源頭，回想三星期前我用工程車載過毛毛去玩（跑草地）完之後嘅星期就有蚤患，除咗懷疑毛毛喺戶外染到之外仲懷疑工程車有蚤（我近排車同人都出入地盤啲又濕又發霉嘅地方）⋯

以我睇⋯要對所有渠道有機會做成蚤患嘅問題都要「趕盡殺絕」，而家由工程車同我開始⋯

毛爸：蚤患真係好討厭，搞到毛仔冇覺好瞓...連毛媽都俾蚤咬...非常煩擾...

毛毛：毛爸，我個頭、頸、腳、手都好痕呀！

毛媽：毛爸，我手臂好多「蚤難」已經幾日喇，好痕呀！

毛爸：少奶同少爺仔＝立體聲＝煩死、難頂....

2014年6月25日星期三

毛毛心聲…我毛爸好冇記性呀！

2014年6月25日（星期三）

我毛爸越來越冇記性喇！今朝散步完返屋企洗完腳之後⋯毛爸就做自己野⋯唔記得同我玩，前排去參加重要嘅遊行活動影相⋯居然唔記得同相機換電又唔記得帶後備電（借口話趕時間又要照顧我），最近朝早落停車場散步又唔記得帶鎖匙（又話噚晚太攰執少咗揪鎖匙），最慘就係毛爸成日賴我唔提醒佢⋯

講真⋯我係唔知點樣提毛爸⋯所以毛爸怪責⋯我只有「硬食」⋯慘。

毛毛：毛爸，我提醒你買我啲零食同玩具呀...

毛爸：毛仔，你都好醒喎...凈係提我買野俾你...

2014年6月24日星期二

被困停車場，毛毛有意見

2014年6月24日（星期二）

今朝一場大雨⋯又要帶毛毛行停車場，雖然毛毛唔多願意但都好合作好快就便便同尿尿。

當我哋要返上屋企嘅時候⋯我發覺自己忘記帶「匙卡」，開唔到停車場度門⋯唯有邊行邊等，唔知點解今朝好耐都冇人落停車場攞車⋯我哋行咗好耐好耐⋯

毛毛已經唔願行⋯最終罷行⋯最後⋯

毛毛：毛爸，要等到幾時呀？好肚餓呀...拍門求救啦...

毛爸：唔～(呢度係地厙邊有人嚟幫我哋開門丫)

毛毛：又餓又喝又攰...行唔到啦...

毛爸：我已經叫咗毛媽落嚟幫我哋開門喇...等陣啦...

毛毛：毛爸，早就應該咁做啦...自已冇記性又死要面子....

2014年6月22日星期日

虐畜法· 何時立？

2014年6月22日（星期日）

今日準備下晝參加「動物保護法立法」集會遊行⋯表達自己訴求⋯為愛狗爭取佢哋嘅基本權益。

但⋯由噚晚開始到今日中午斷斷續續時大時細一直咁落雨（真係上天都唔幫我哋？）。

到下晝 2 點半開始停雨同有陽光⋯咁就一直好天到遊行完（原來上天一直都冇放棄我哋）。

毛爸：毛媽要留喺屋企整愛心麵包俾我哋食...毛仔，我哋出發喇...努力加油呀！

毛毛有「蚤」屋企將滅蚤行動升至最高級別

2014年6月22日（星期日）

過去嘅一星期⋯毛毛瞓過嘅咕臣、床鋪、毛巾被、地毡⋯通通都要清洗消毒，梳化、地板除咗吸塵之外仲要放「防蚤粉」，毛毛要提早剪裝⋯剪短頭頂啲毛，落街散步要帶「防蚤帶」同搽「防蚤水」。

實情係咁⋯有一晚毛毛陪毛媽睇電視嗰陣⋯毛媽發現毛毛頭頂有啲細細粒嘅「黑沙」，當時以為係毛毛散步玩嗰陣帶返嚟嘅「碎沙」⋯後來証實係「蚤屎」，經毛媽全力搜索追捕⋯最终發現 2 隻蚤⋯ 1隻判"死刑"另 1 隻"逃亡"⋯

毛毛：喂～頭頂班友(蚤)聽住...快啲出嚟自首...俾你哋安樂死...唔係就要你哋身首異處...

毛毛：係唔係要我俾啲顏色你哋(蚤)睇呀？

毛爸：嘩～毛毛小朋友...乜你咁兇殘咖...

毛毛：媽咪係咁講咖，唔關我事咖...

毛毛：毛媽話要剪短頭頂啲毛...我咁靚仔嘅樣又要變身喇...

2014年6月21日星期六

動物保護法，何時會建立？

2014年6月20日（星期五）

今早喺澳廣視新聞睇到一段由政府發出嘅新聞片⋯內容係關於「動物保護法」立法⋯交立法會、討論、評審⋯（簡單啲講⋯要等），雖然政府將個波（法案）交咗俾議員們⋯最後都係要等。我哋爭取「動物保護法」立法⋯三年又三年⋯到現在都係要繼續等⋯等。

我有一㮔睇法⋯「動物保護法」對於我哋一羣愛狗人士同專重生命嘅一羣人嚟講「根本冇必要」，因為我哋視動物（狗狗）為家庭成員，專重佢哋係一條寶貴嘅生命。

我爭取「動物保護法」成立係可以用法律嚟制裁嗰啲用不法手段、不必要、不人道、殘忍、虐待動物嘅人，而嗰類人應該負上法律責任。

動物保護法嘅精神係保護同人類生存喺地球上、任由人類支配、冇能力威脅人類嘅弱勢動物，佢哋係人類嘅朋友亦都係寶貴嘅生命⋯我哋係要尊重同保護佢哋。

毛毛：我毛毛唔係好清楚乜嘢係「動物保護法」，但我知係重要嚴肅嘅問題...

毛爸：毛仔，你咁都知...好醒呀...

毛毛：毛爸話法例一經通過...我哋啲動物就會有機本嘅保障...唔會俾啲人傷害咖喇。

毛毛：真係有覺好瞓喇...

2014年6月20日星期五

單純嘅毛毛小朋友

2014年6月19日（星期四）

因為工作忙已經兩星期冇帶家人出去玩⋯啱啱過去嘅星期日由於都要返工⋯所以提早起身帶全家出去晨運，毛毛梗係"狂喜"啦⋯可惜⋯落雨⋯雖然毛毛好乖咁喺車度等⋯但好唔開心。

我經常講小朋友唔使憂心衣、食、住、行、唔使睇人面色、唔使俾面啲佬闆⋯鍾意同反感都即時身體語言表現出嚟。

毛毛小朋友真係單純得可愛。

毛毛：請求上天...快啲停雨...唔好再落喇...

毛爸：有時為咗達到目的...毛毛表情多多...真係好可愛咖...

毛爸：一話唔落雨可以落車玩...毛毛小朋友就即刻開心番...

毛爸：毛毛小朋友喜怒哀樂表現...毫無保留，我哋人類又有幾多個敢敢丫？

2014年6月18日星期三

614集會，嚴陣以待

2014年6月18日（星期三）

上星期六（6月14日）⋯一星期前收到一個特別「柯打」星期五、星期六全日到塔石廣場候命，同時奉命要建一個臨時電訊收發機站，老闆十分重視今次嘅「特別工程」出動戶外發電機，電訊業行家(CTM)亦都出動戶外流動控制專用車，流動Wi Fi收發車到現場⋯今次設備功能係喺同時段可以處理"過萬客"同時通電話、連接互聯網。

星期五...朝早九點半就到倉提器材到現場安裝

星期六...中午開始就要監測住啲器材同發電機(除時要為發電機入電油)

呢種WI FI流動車出動咗 3 架...訊號包圍全個廣場

星期六下午2：00開始有大批交通警察開路⋯警察、女警、防暴警察、便裝探員、消防員、救護員、警車、防暴車、巡邏電單車、救護車⋯等到現場佈防，佢哋今日嘅任務係"維持秩序防止意外發生"。

消防處防暴車現場候命...

救護車一早就到現場...

消防處曾援指揮車...

交通部派出多名交通警維持秩序同指揮交通...

交通警員由朝到深夜不斷巡邏...

我哋工作嘅地方好空曠⋯冇洗手間、冇地方買野食、買水飲、冇地方避陽光⋯每日候命11小時，真係考驗人類極限辛苦到人都癲。執法人員唔好得過我哋好多，雖然佢哋有專人送食物、可以輪流去洗手間同吸煙⋯但全程都要喺車上面候命。

由朝曬到晚...身體過熱、又肚餓、又三急、又無所事事、手提電話又用到冇晒電...

我哋聽民運人士發表意見之外...仲好心急等收工(集會完要拆器材、清場、運器材返倉)

實情只係為一個「回到民主起點，不要下一個離補」嘅集會做支援⋯下晝6：00好多軍裝警員奉命到塔石廣場巡邏，氣氛越來越緊張，時間一分一秒咁過⋯到集會完結⋯參加嘅人數只有200幾人

大會主持人

人流好少...冷冷清清

今日大家都辛苦喇，由其係維持秩序嘅執法人員同所有單位...

2014年6月17日星期二

第十四屆澳門荷花節

2014年6月17日（星期二）

澳門荷花節又開始喇！攝影發燒友又要執定長短鏡、頂級影相器材影荷花一顯身手嘅時候。

聽官方報道今次花展規模比過住大，各大、小公園、路邊、廣場都有展出，今年嘅主角荷花品種叫「香雪海」形態非常靚⋯不過感覺上佢唔似傳統嘅荷花，我個人好鍾意「香雪海」。

今年影花都係喺老地方星星公園⋯因為每逢花展都會有機會遇到麗珠契媽，今次除咗見番契媽之外⋯仲遇見單車友勤兄⋯真係有緣⋯