2013年2月28日(星期四)
今日由於工程上要等塲主做最終决定所以停工可以返屋企On Call。
喺屋企嗰陣留意到帶咗頸圈嘅毛毛，無論飲水、行過食飯檯、出騎樓、跳上梳化同R耳仔…都受到好大嘅限制，難怪毛毛冇晒心機。
我檢查毛毛大俾傷口己經結咗焦，復康進度良好，我見嘅喇叭頸圈搞到毛毛冇覺好瞓…我心軟…所以幫毛毛除咗頸圈鬆一鬆…
2013年2月27日(星期三)
毛毛大俾傷口雖然有成1.5cm咁長但唔算深，尋晚幫毛毛剃毛、消毒傷口 、搽藥膏…，可能傷口又痛又痕毛毛成日都Lam大俾，毛媽即時執行「帶喇叭頸圈行動」…毛毛就要帶住頸圈瞓覺，我知毛毛唔開心…今朝都冇走嚟床邊叫醒我，到幫佢除咗喇叭頸圈帶佢落街散步先「生猛」番。
2013年2月24日(星期日) 新十五
尋日佛教禪淨中心喺三盞燈圓形地同封咗一條街舉辦「元宵節素食嘉年華」，食品、飲品、賣物、遊樂攤位共二十三個及一個舞台。
個場地嘅搭建係由民處、警察廳、交通部及禪淨中心多個義工隊單位由早上八點幾至下晝三點限時完成。
嘉年華係三點至九點半舉行，到散場後場地設備要喺夜晚十一前拆清及運走，咁大形嘅活動、咁多單位義工一齊趕工我都係第一次，好幸運能較參與…但之後超攰。
2013年2月24日(新十五)
首先祝各位 “元宵節”快樂，合家幸福吉祥。
元宵節係我哋中國農曆新年嘅第一個月圓之日，家家都會煮湯丸嚟慶祝，寓意家庭團圓幸福吉祥。
諗起有前輩講過元宵燈節吾單只係慶祝愛情仲有係親情、友情…。
我借呢個「元宵節」祝：有情人 戀愛成功，祝 ：家人 幸福平安，祝：朋友 友情永在。
2013年2月21日(星期四)
黃昏…毛爸帶我出橋頭公園散步，去目的地嗰陣已經覺得有啲奇怪…有好多警車、巡邏電單車喺我哋格離經過。
當我哋去到橋頭公園泊好車…好快就有兩架警車一架泊喺我哋車前面一架泊喺我哋車後面，仲有好多警察哥哥落車「就位」…佢地睇嚟係等緊我毛少落車，好明顯係保護我「毛大少」…米住…乜我係「大人物」咩？
2013年2月21日(星期四)
呢兩日聽到網友講佢隻狗狗(三水)唔肯食野…真係令人擔心。
狗狗除咗食飽咗、對嗰樣食物冇與趣…唔食野之外…如果由健康原因引起嘅話…係一個好大嘅問題。
記得上次Coffee嚟渡假嗰陣…我煮野俾Coffee食，毛毛一聞到 “住家菜”嘅味就唔肯食狗糧，搞到毛媽非常擔心以為毛毛唔舒服，嗰餐毛毛點都唔肯食狗糧…最尾食咗餐 “住家菜”…屋企人先至放晒心。
2013年2月20日(星期三) 17 :00 冇陽光 微風 19度
膊頭傷痛己經好轉所以近排嚫年假頻頻踩車…但今次因吾小心拉傷右邊膊頭舊傷患(痛到標眼淚)。
事原…我將單車用小貨車運到目的地…當將單車由小貨車瀉落地下時單車架由左手滑脫…自然反應右手就用力幫一把出事，今次咁大意一定成為家人嘅眾矢之的…
2013年2月17日(星期日)
記得細個陣嫲嫲一早就起身「蒸飯」同「蒸肉餅」俾我哋做早餐…啲飯好軟熟加埋肉餅嘅香…味道好夾，而呢種「好味道」嘅感覺因為離開嫲嫲…就變成一個回憶。
我經常朝早食飯做早餐尤其係喺冬天，好自然咁選擇一盅盅嘅蒸飯…而意識上係去揾番嗰種「味道」。
今次嘗試「蒸飯」十分成功，可惜嘅係未能配合「蒸肉餅」一齊食…
2013年2月17日(星期日) 17 :10
本來尋日己經計劃好今朝晨早五點出去踩單車…但唔知點解會瞓過龍…瞓到七點幾先起身(呢兩年都未試過瞓到咁晏)，咁…踩單車就取消。
到下晝毛媽帶毛毛出去散步嗰陣我順便一齊出去踩車，我用貨車仔車毛媽毛毛同運架單車出橋頭公園，經過單車徑…只見人頭湧湧之外，付近 單車徑、海洋花園、橋頭公園所有泊車位都爆鵬…
2013年2月12日(星期二) 大年初三
埋年嗰時屋企廚房超熱鬧蒸年糕、蒸蘿蔔糕…真係由朝忙到晚，細個嗰陣老媽就年年都會蒸糕，太太就唔知邊一年開始加入蒸糕嘅行列。
蒸糕一早就要準備定材料切臘腸、蝦米，浸乾貝、刨蘿蔔同開粉…整一底糕由準備至出爐要兩個半小時…即係話要整幾底咁就會忙成日，老媽堅持年年都蒸糕寓意係食過年糕年年步步高升…
毛爸 : 全家人都迫入廚房...熱鬧又溫馨...
2013年2月11日(星期一) 大年初二
早晨！今日係大年初二，毛家向各位拜年祝大家 身壯力健、萬事如意、恭喜恭喜。
尋日接Coffee嗰陣已經發覺佢唔開心，返到屋企一直都瞓喺門口，平時最鐘意嘅零食都冇興趣。
到食晚餐(狗糧)只係望吓就算…後尾…我唯有特別為佢煮啲雞肉餐(住家菜)咁…Coffee先乖乖咁食晒，之後就連佢最鍾意食嘅蘋果、香蕉都冇食，到夜晚唔肯跟我哋入房瞓覺…睇嚟Coffee係好掛住媽咪。
