2013年1月30日(星期三)
三日前…幫毛毛洗面嗰陣發現佢右眼好多眼屎，眼白部分有紅根仲留眼水，但平日冇見毛毛擦眼…我估應該係冇乜事。
但紅眼情況持續咗兩日，我擔心…尋日就帶毛毛去見醫生，醫生用醫學電筒檢查毛毛對眼同時做咗幾種試紙測試…結果係 : 冇乜大外，只係右眼角有少少發炎，要搽藥膏，好快會好番…大約兩日。醫生話可黎散步嗰陣有啲污槽野入咗眼，又或者洗白白嗰陣沖涼液入咗眼(毛毛星期五沖咗涼)，最有可能係幫毛毛用嚟抹眼嗰條毛巾仔唔乾淨。
最後…醫生表情嚴厲說話帶教訓嘅唔氣同我講 : 眼情係好重要咖，你日日幫狗狗清潔眼情係好啱，但唔可以求其同大意咖。
2013年1月30日(星期三)
散完步行返屋企嗰陣…一路行就發覺週圍都一陣陣惡臭…好大陣狗屎味(行過巴士站嗰陣好多人望住我)。
入到電梯陣味仲勁 ，我檢查毛毛又檢查自己…最後，嘩…發現自己件衫Hi晒好多狗屎，梗係抱毛毛嗰陣Hi到…原來毛毛後腳踩咗屎。搞到我成身屎味…唔怪得知行過管理處嗰陣阿叔打雀咁嘅眼掃描我全身啦…真丟架。
毛毛 : 好對唔住呀毛爸...但你今次丟架我覺得好爽(乜仇都報晒)..
毛爸 : 毛仔...使唔使咁呀？前幾日我打你係我唔啱...對吾住囉...
毛毛 : 咁..............
2013年1月28日(星期一)
噚日陪太太去UA睇王家衛道演嘅作品電影「一代宗師」，太太既好多同事口中對呢部影片讚不絕口，所以太太十分期待，我對於武術功夫片係好熱愛…如果你抱住睇好激嘅打鬥片去睇…咁…會令你好失望。
但我發覺部影片俾我另一個驚喜…就係畫面氣氛、畫面角度、光暗位、人像構圖、風景構圖、物件構圖…簡直係一絕，如果將畫面換成係一張張嘅硬照…一定會係出色極品嘅相片，鍾意影相嘅朋友值得去睇睇…
2013年1月27日(星期日)
尋日我同毛爸玩擔毛巾遊戲，我搶到毛巾…毛爸就好嬲冇端端狂鬧我仲打我，我吾開心我唔彩毛爸咖喇。
我由BB開始屋企人從來都未打過我嘅，上次我拉跌部相機(支18~ 200m m鏡頭報消)毛爸都冇打我仲鬧都冇鬧過我。
今次毛爸冇體育精神…我嬲你…除非…
2013年1月27日(星期日)
噚日發生咗一件值得諗一諗嘅事，尋日晏晝搞清潔…我將啲毛巾、界刀、萬用刀、較剪、鑼絲批…擺晒喺食飯檯做野。
平日屋企做任何事毛毛都會績極參與搞搞震今次都唔例外，當我做到入晒神嗰陣…毛毛突然將檯上條毛巾拉落哋，連帶工具通通都拉晒落哋…現實情況非常嚇人…把萬用刀差啲咁多就插到毛毛隻眼(我以為插中咗…嚇破胆)，當時毛毛都嚇到唔敢旭，我即時抱起毛毛檢查…好彩冇事，咁…我就開始狂鬧毛毛…激心之下仲打冇佢Pat Pat一下(唔係用力但動作好激)，由於我反應過激嚇到毛毛走返去佢皇座度呢埋…表現好驚仲唔彩我。
實情有小朋友嘅家長喺做每件事嘅時候有冇細心想想工作某啲環節對小朋友會構成危險？小朋友本性係貧玩…只係當呢件事係遊戲唔識分有冇危險。
2013年1月21日(星期一) 15 : 30 烈日當空 無風 18度
近排因為屋企長者健康問題令我非常擔心，而且健康情況唔樂觀…最大問題係自己又幫唔到手…令自己有好大壓力，有專家講要減壓…運動係其中一個好方法。
今日踩車太陽猛烈，如果係夏天一定會中暑…吾知點解自已好似有一股用唔完嘅爆發力一直唔停咁向前踩…踩…踩，踩咗兩個鐘，返到屋企先發覺…攰到企吾到。
2013年1月21日(星期一)
呢幾日毛毛週不時都Lam佢對後腳仔…初初以為係平常事，到前日朝早落街散步嗰陣毛毛行行吓就會停低Lam隻後腳…咁嘅行為動作重覆咗幾次。
返到屋企洗腳檢查發現…對後腳流晒血，睇清楚個情況好似係過度磨擦傷咗咁(但嗰個位置冇可能係咁)，我哋又懷疑天氣乾燥引起爆擦。
而家用藥膏同潤皮膚膏作治療…
2013年1月21日(星期一) 5 :40 黑嘛嘛 風平浪靜 16度
尋日朝早我用工程車運咗部單車過澳門西灣湖踩車，由於冇風氣温又唔凍路面又少車…踩車超爽。
原來我哋生活緊嘅哋方日頭同夜晚啲景觀係好大分別咖，日頭凡忙熱鬧…到夜晚靈靜神秘…
2013年1月16日(星期三)
今朝雖然唔係特別凍但有啲風，吹到我對耳仔飛起…由於咁…巴士站啲哥哥、姐姐同啲地盤佬都讚我有型，我啱啱剪完裝嗰日媽咪接我返屋企嗰陣都有好多人讚我靚仔咖，咁多人讚我媽咪同毛爸梗係好開心啦，如果有人讚我毛爸靚仔我都會好開心咖…但我好似從來都未聽過…
毛毛 : 啲哥哥姐姐係街度經常大聲叫我做靚仔咖...
毛毛 : 冇聽過有人讚毛爸靚仔喎...淨係嗰次有人話毛爸似特務...毛爸嗰晚就開心到狂切蘋果食...得益者梗係我毛少啦。
2013年1月15日(星期二)
以前有個想法貴婦狗身上啲毛咁密咁長天氣熱就會好辛苦…如果俾太陽曬仲可能會中暑。
毛毛由於皮膚病醫生建議多啲曬太陽之後…發覺毛毛原來好鍾意陽光咖由其係冬天，當太陽光射入屋企嗰陣毛毛就會又打橫、又打直咁跟住啲陽光除地曬，有時啲陽光射住對眼都照瞓，都好擔心毛仔會曬嚫對眼…
毛爸 : 睡姿非常豪邁不羈嘅少爺仔毛毛...
2013年1月15日(星期二)
堪輿學係我哋傳統中國人生活上、思想上嘅一大寶臧，就算現代科技發達都仲有一部份人對 “風水”深信不疑。
每年年尾屋企人都會請風 水 老師返嚟屋企睇風水，目的係為家宅同屋企人平安健康，每年老師臨走都有 “珍言”相贈，我都想同有緣嘅朋友分享，咁多年嘅 "珍言"歸納為以下幾點…
1. 凡事都要處之泰然吾好令自己產生精神壓力。
2 . 對身邊嘅人多多包容吾好令自己成日勞氣同發脾氣。
3 . 要有恆心做運動令身體保持健康同最好狀態。
4 . 飲食要清淡但要經常進補仲要食多啲好野。
5 . 要多做善事放下凡腦好好睡眠仲要早睡早起。
我就對老師嘅 “珍言”深信不疑…唔知有緣人同唔同意呢？
2013年1月13日(星期日)
毛媽今日送咗毛毛去剪裝，聽毛媽講宜家剪左裝到農曆新年嗰陣…毛毛個裝會自然啲同靚仔啲。
每次毛毛剪裝都要花3~4個鐘，其實諗諗吓毛毛都好辛苦喎…用暖水沖涼、用風機吹乾再企定定剪毛…俾人係咁舞幾個鐘，服侍毛毛嘅技師應該一樣咁辛苦…
2013年1月12日(星期日)
有咗愛家人呢種動力…每日就會自動自覺一早起床…帶毛毛出街散步、為家人煮早餐、煲湯…。
每到放假就會同太太帶毛毛去跑草地或者行山，今朝天色灰灰有霧又冷冰冰…太太冇響應晨運…咁…為有自己帶毛毛去單車徑玩 ，毛毛雖然冇毛媽帶住但都玩到樂極忘返…
2013年1月11日(星期五)
由於成晚都展轉反側…今朝又瞓晏咗，好彩有毛少嚟床邊Lam醒我。
但今朝毛毛行為有啲奇怪，佢好似一定要Lam到我起身為止咁，到我起身就一直跟住我，出到廳又跳上梳化坐到直一直，條尾就裝咗 "摩打"咁轉唔停。到後尾…我先明白原來毛毛出騎樓尿尿完，叫我起身係為咗 “領獎”…唉…估佢唔倒。
2013年1月10日(星期四)
上星期買左三球風信子返屋企種，我習慣用水種…當時嘅風信子仲未有花球生出嚟，咁…個工人就以為係洋葱。
每年嘅冬天我都好留意花舖有冇風信子賣，呢種 花係 太太嘅至愛，因為佢啲花散發出一種迷人嘅濃儂香氣令人念念不忘，花形優雅…吾使特別打理開花期又長，擺一球喺廳…滿屋香噴噴…
2013年1月8日(星期二)
自從毛毛轉咗食狗糧之後…雖然健康一直咁改善緊…但又帶出另一個問題 “毛毛體重亦都一直咁增加”，過去嘅半年因為膊頭痛每次抱毛毛都就住就住…所以梳忽毛毛嘅體重。
到上星期幫毛毛沖完涼梳毛嗰陣上磅 一磅…噢…不得了 7.2Kg (約15磅半) 超重了。
毛毛冇病冇痛食得瞓得就會肥，但過肥又驚引發其他健康問題，做家長嘅心態真係又喜又大驚…都唔知點搞…
2013年1月8日(星期二)
尋日媽咪帶咗一包超正嘅肉乾番嚟俾我，媽咪話啲肉乾係Ana姐姐整嘅送俾我食咖，喺呢度先多謝Ana姐姐…啲肉乾勁好口感同好味呀~
屋企自從部風乾機壞咗之後…毛爸揾唔到啱心水嘅風乾機，所以我一直都冇肉乾食，間中因為我乖(乖？毛毛作大)媽咪會喺阿Sir度特別訂啲肉乾俾我做零食，今次有肉乾食要多謝Ana姐姐。
2013年1月4日(星期五)
元旦嗰日媽咪帶咗我去狗狗公園玩，媽咪話嗰度係氹仔第一個狗狗公園，係唔使上狗繩週圍跑咖，我哋去到嗰陣已經有好多狗狗喺度玩緊，佢哋都好友善(全部都係細狗實吾夠我揪)，地方就有啲啲唔完善…草唔夠密同地方唔夠大，但媽咪就放心放繩俾我跑草地…爽死喇…
2013年1月4日(星期五)
呢個日子的確係好特別，好多人都簡今日求婚、注冊、結婚…因為日期嘅數字用國語發音就係 “愛妳一生一世”，而事實上一生人只會遇一次…值得定為特別日子(由其係呢一代後生仔女)。
話說我後生結婚簽字嗰日係…中國情人節、太太生日、結婚同一日(宜家年年一次過慶祝三個特別日子...好方便)。
無論各位點睇今日都好…我誠心祝今日成功求婚、注冊同結婚嘅幸運兒 永結同心、幸福永伴、白頭到老…
毛爸 : 201314只係一堆數字...重要嘅係你喺呢堆數字許下嘅誠諾
