毛爸毛媽毛毛豬
你好嗎?好想寫低日常嘅生活點滴,開心、傷心、溫馨...做個實錄,作為日後寶貴嘅精神食糧...
2016年1月24日 星期日
寒流⋯3.6度⋯凍
2016年1月25日(星期一)
呢幾日好凍好大風又落雨,毛毛都唔願意落街散步,近日清早我起床嘅時候毛毛都係求其行一行出大㕔然後走返入睡房⋯當係陪咗我。
落到街更凍,寒風刺骨,毛毛行路急急腳⋯已經著咗厚衫但嘅毛毛都全身發震,想起浪浪嘅狗狗⋯咁差嘅天氣⋯一定有想象唔到嘅影響(愁)。
毛爸:街咁凍咁大風...毛毛最鍾意趕返
屋企玩遊戲同玩具...
2016年1月18日 星期一
被過一次可能發生走狗事件
2016年1月18日(星期一)
話說⋯今日好晏先收工,一返到屋企就幫毛毛裝身出街散步,當上好狗帶準備出門嘅時候⋯狗帶嘅鎖扣突然斷咗,毛毛就喺走廊走來走去。
我估⋯如果落到街先斷狗帶⋯結果可能會好嚴重。
毛爸:呢條狗帶係好多年前喺臺灣買嘅,全人手制作...
毛毛:我
唔
會走咗去咖....
毛爸:好難講...
2016年1月16日 星期六
澳門佛光協會20週年圍爐齋宴
2016年1月16日(星期六)
聽師兄、師姐們講「圍爐」呢種習慣係出自我國閩南地方,原意係一家人喺年尾圍住火爐邊一齊食餐豐足嘅晚飯閒話家常,合家送舊迎新。
今年圍爐齋宴同時慶祝澳門佛光協會20週年,今年有緣有國家政要、佛教界領袖、澳門文化司司長、議員⋯等出席令圍爐齋宴增添隆重,禪淨中心出動過百名義工安排大會流程,場面溫馨熱鬧。
大合照
師姐們辛苦妳哋喇
百幾席
醒獅表演
受旗
舞蹈團「千手觀音」精彩表演
祈福...
2016年1月7日 星期四
令人憂心嘅毛毛...肉芽
2016年1月6日(星期三)
舊年年尾⋯毛毛到診所做過一次全身檢查,當時已發現肚仔近何B仔附近有一粒長形肉芽,吳醫生講⋯呢啲肉芽好普遍⋯一般狗狗身上都會有⋯對健康冇影響。
兩星期前⋯幫毛毛例行修剪毛⋯換咗把新電剪,可能把剪太利⋯出事喇!界損咗後腳掌同肚仔粒肉芽,毛毛開始 Lam 啲傷口⋯而啲傷口就開始發炎,由其係粒肉芽又紅又腫,見咗醫生食咗一星期藥⋯
毛爸:要帶喇叭頸圈...一面無奈嘅毛毛...
肉芽己經結焦...
毛毛:毛媽好細心...幫毛毛著件嚫晒顏色嘅衫...
2016年1月6日 星期三
地獄(開工)見聞...極忙
2016年1月6日(星期三)
工程進入重要部分⋯安裝器材,由於要處理4間電訊公司嘅器材⋯GSM,CDMA,3G,4G⋯器材及配件極多⋯所以器材入場需要分成幾日,噚日⋯入器材就體會到更高層嘅辛苦,流程~到貨倉起貨般上貨車(雖然手足眾多但器材更多)~入場缷貨~分派樓層。
當日仲要處理一大貨車嘅器材(後備電源機、電磁、配件),由地盤閘口駁貨到地層存放(來回無數次)⋯勞動咗一整天⋯鞋都爛了。
糊狀爛泥同水泥漿令鞋底斷裂入水...對腳全日俾水浸濕...極之唔舒服...
2016年1月2日 星期六
下雨的星期日早上
2016年1月3日(星期日)
凌晨開始⋯就落住毛毛細雨⋯一直落一直落,今早嘅戶外活動又要取消了⋯又要令家人失望了。
毛毛換上雨褸落車場散步⋯令地層停車場響起擦擦聲⋯俾家人寵壞嘅毛毛對散步地方非常揀擇,我地行咗三層停車場毛毛都無心解決⋯到行出街(去買麵包俾家人做早餐)毛毛就走埋路邊...便便同尿尿 秒剎就完成⋯仲要搶繩趕住返屋企⋯
毛毛:毛爸,我好急但 "吾" 唔到呀...點算?
毛毛:丫~一到街就有得 "吾 " 喎...舒服晒...
泰悠行…飲飲食食
2016年1月3日(星期日)
2015年12月22日(星期二)今次泰國旅行家人對我嘅飲食⋯辛辣類(咖哩)、蛋類(糖心、炒蛋)、甜品類(雪糕、榴槤、蛋糕)、飲品類(汽水、凍飲)、份量⋯全面解放,原因係我體重跌破底線,標準 63公斤(138磅),但近期我經常不達標⋯只有 61公斤(134磅)有條件大飲大食。
我好了解同明白太太對我日常飲食嘅提示、限制⋯係為我健康著想,但我更相信我自己對身體健康、選擇食物、份量⋯係有堅決嘅自制能力⋯太太,請不要為我過份擔心⋯謝謝。
美味豐富嘅食物令我差啲失控...
2016年1月1日 星期五
新年行大運2016
2016年1月1日(星期五)
新一年開始⋯例牌對白「眨吓眼,又一年!」,今年嘅目標係「生活得更精彩」我深信我有能力比過去做得更好。
今早照往年一樣帶毛媽毛毛去單車徑行大運,只係簡單咁一齊散散步就帶俾一家人有開心快樂,呢種幸福嘅感覺非常實在⋯好似行緊運咁⋯
我哋去行大運喇...
毛毛:毛爸講大話...又話有好多好多野食...宜家只係行餐飽...索氣呀...
較新的文章
較舊的文章
首頁
訂閱:
文章 (Atom)