狄狄轉食脫水生肉糧

2018年５月1日(星期二)

狄狄回家第三日～2018年3月3日(星期六)今日要做義工幫彿光中心元宵節活動做影相佬，全日都開工...難免對小朋友們掛心。

觀察咗兩日...狄狄對新環境充滿好奇，怕孤獨、活躍又要同毛毛大哥哥玩，但毛毛就覺得狄狄好煩經常狐吠警告佢。狄狄返嚟屋企第二日就開始轉糧，有啲擔心狄狄會唔會唔習慣？我雖然全日都外勤但都想抽時間返屋企照顧毛毛、狄狄，今日一直忙到傍晚(代我照顧毛毛、狄狄嘅工人姐姐因為要慶祝生日而提早放工，令我更擔心)，幸好得到督導、師兄、師姐們體諒可以早啲走。

返到屋企啱啱趕及工人姐姐收工，小朋友們見到我就開心狂吠，抱狄狄到騎樓便便同尿尿...狄狄已經識喺尿板方便，但便便同尿尿都好少，算正常，有可能受新糧影響...轉糧希望狄狄腸胃盡快適應...

狄狄：我毛爸去咗邊？

我上學去⋯從新學習

2018年4月20日（星期五）

細個嗰陣⋯爸爸經常對我講：萬般皆下品 ，惟有讀書高。當時我唔明爸爸嘅意思，出到社會做事先發覺知識對事業係非常重要。

今時今日有學習支助，當時間許可又遇心怡學科（犬隻訓練及行為矯正課程）咁⋯就去報名⋯返學。我哋嘅課堂導師包Sir 為人健談風趣又係一位出色嘅犬隻訓練師。

呢個課程共有10名學生，大家都係愛狗狗同愛動物人士，我上課嘅目的係溫固知新，希望了解及掌握更多對狗狗嘅行為理解、照顧、訓練⋯等嘅新知識，應用喺毛毛、狄狄身上，令佢哋日常更健康、更快樂、更有規律咁開心生活⋯⋯

從拾做學生嘅感覺......累。

狄狄：我陪毛爸返學呀！

毛毛、狄狄身上發現蚤屎⋯

2018年4月25日（星期三）

毛媽幫毛毛、狄狄做日常親子檢查發現⋯身上有蚤屎，今次估計狄狄先惹上蚤患再傳俾毛毛，因狄狄有個惡習每次散步到唔願行或受驚⋯嗰陣就會瞓喺地下唔肯行⋯好大機會係咁惹上蚤患。

實情⋯毛毛、狄狄每日早晚都會落街散步，而防蚤程序包括金牌、蚤帶、防蚤噴霧、醋開水抹淨身體手腳，幾乎應做盡做（所以每日每次散步同散完步我就好忙），但都係難免中招...真係好無奈。

現在屋企人已經嚴陣以待⋯準備同蚤開戰⋯⋯

兩兄弟好難得齊影相...

肯定⋯毛毛係乖寶寶

2018年4月12日（星期四）

狄狄嚟到余家已經6個星期六，家人互相之間毛媽、毛毛、家務助理⋯都產生好多磨擦，呢個情況令我出乎意料之外。

毛毛嘅行為亦都好大變化，變得更乖巧更聽話，以往要用指令提醒毛毛嘅事⋯現在嘅毛毛變得自動自覺⋯照紅外線燈、裝身、抹身、洗腳、吹乾⋯⋯等都非常合作，行為更有規律，家人好肯定毛毛係超級乖仔（現在有咗狄狄做比較更顯得毛毛自律），更對毛毛大少寵愛有加...

有比較先覺毛毛係超級乖...叻寶寶

令毛毛受驚了...

2018年4月12日(星期四)

2018年4月3日（星期三）狄狄越來越反叛，經常亂跳、亂跑、橫衝直撞而且極高速，實情係狄狄百厭活潑，無時無刻要同毛毛玩，挑戰毛毛大哥地位，而毛毛就忍受唔到狄狄不斷嘅纒繞好不耐煩咁狐吠狄狄。

為阻止狄狄過火嘅行為，所以家人對狄狄時時大聲發出指令、警告、甚至用報紙棒來威嚇⋯要狄狄停止百厭行為。

但係⋯咁亦都產生連鎖反應，同時連累毛毛都無孤受驚，家人亦都發覺毛毛唔多願意同狄狄交朋友⋯經常瞓喺角落悶悶不樂。

毛毛：毛爸好惡好大聲鬧狄狄...連我都驚驚

愛跳嘅狄狄

2018年4月11日（星期三）

狄狄有自己嘅圍欄活動地區（120cm 長X 120cm闊 X 60cm高），狄狄每到興奮、激動就會立定跳，高度幾乎跳出欄外，而且係不停咁跳⋯指令及恐嚇都不能制止佢嘅行為，其實令家人最擔心嘅係狄狄會令自己受傷，現在用最消極嘅方法狄狄一失控就送佢入籠⋯困籠。

狄狄困籠先會冷靜少少...呢個小朋友難搞。

嚇我一驚嘅狄狄…令人憂心嘅狄狄

2018年4月9日（星期一）

今早我操練完返屋企⋯一入門口就見到滿地報紙碎（已經習慣了），今次又見到有新嘢，除咗紙碎仲有一噠噠紅色醬染滿地磚，當時我冇特別注意⋯準備抱起狄狄時候我就好肯定嗰啲係⋯血，狄狄受咗傷？整嚫邊度？嗰陣開始識驚，即刻幫狄狄檢查⋯⋯係後右腳掌檫損咗出血，而後左腳掌都發紅，我估有兩個可能... 1. 係今朝落街散步狂跑唔覺意整嚫受傷，2. 係俾尿扳界損...

狄狄仲係扎扎跳，所以我估佢無大外...

一入門口...滿地紙碎，一啲都唔奇怪...

咁嘅情況...你哋話係唔係嚇一跳...