2012年5月31日(星期四)
呢幾日返工特別時間…深夜3 :00、4 :00、5 :00…日日唔定真係人都癲，都幾影響屋企人嘅生活節奏，由其係太太同毛少。太太就掛住我煮嘅早餐，毛毛呢我一起床佢就跟我出廳直到我出門返工，聽太太講我出咗門之後毛毛都留喺廳唔肯返入房瞓…
2012年5日31日(星期四)
前日喺大佬耀度攞咗個新防潮櫃返屋企用。原因係用左好多年嘅防潮箱壞左，壞咗幾耐？居然自已都唔知…咁…大件事就發生咗…前一排攞咗支騰龍鏡70~200 2.8俾大佬檢查，發現支鏡發毛發得好犀利，之後將自己所有鏡頭(4支佳能3支騰龍)都攞去檢查...騰龍鏡全部都發晒，好彩佳能鏡就冇事，但咁都令我荷包大出血。喺呢度温馨提示各位影相發燒嘅朋友…多啲留意吓自己放心愛器材嘅防潮箱(櫃)儀錶度數是否正常…以免做成荷包大出血。
2012年5月29日(星期二)
尋日收工返到屋企…姬詩第一時間同我講 : Sir毛毛R到個傷口紅咗仲好似有出血。姑娘都有提醒我地手術傷口十日至兩禮拜埋口嗰陣狗狗會R傷口叫我地多加注意，有時對啲小朋R傷口嘅動作完全禁止係好難，真係要打雀咁眼望到實先得…但一日流流長睇漏一眼就出事，尋晚毛媽漏夜同毛毛嘅傷口影相電郵俾醫生睇…等醫生覆
2012年5月28日(星期一)
毛毛嘅皮膚健康一向都係弱項經常都出現問題…毛囊蟲、酵母菌、發炎、毒瘡…都試過，最近仲出現皮膚腫瘤。好耐之前主診醫生建議俾魚油毛毛食…魚油可以增強皮膚同毛色健康，但毛毛食咗魚油因腸胃受唔住屙軟便所以冇繼續食，今次醫生建議毛毛食另一種魚油丸…
2012年5月27日(星期日)
過去一星期為咗要照顧手術後嘅毛毛…全家人嘅注意力集中喺毛少身上。平時嘅星期日…毛媽會整麵包、愛心小食俾屋企人食，我就會做司機車屋企人去行山車毛毛去跑草地...然後煮晚飯俾屋企人食。呢兩日毛毛回服生猛大家都放心晒，本來安排好節目可惜今日要返工唯有收工後煮飯俾家人食…為咗慳時間今晚整咗個快又簡單嘅蕃茄湯飯同粟米豆腐羹…
2012年5月27日(星期日)
屋企人今日放假…但今日我就要開工，所以一早起身…除左同毛毛散步外仲要整早餐俾屋企人食。今朝整辣魚三文治夾餅，用上次喺超市買嘅 “黃色罐葡國辣沙丁魚”(傅统老牌係紅色罐，黃色罐係植物油制)加啲檸檬汁胡椒粉搓爛做饀…毛毛梗係好心急等出爐啦，出爐啦…麵包熱辣辣香噴噴麵包邊脆卜卜..
012年5月26日(星期六)
化驗報告已經証實…毛毛後頸割出嚟嘅肉粒…係腫瘤…仲係惡性第二級。醫生話呢啲腫瘤喺狗狗身上好常見，醫生仲講毛毛頸後嘅手術已經將腫瘤週圍組織都割清，本身腫瘤0.6cm大割咗1.5cm出嚟，現在只係要等傷口服原，都唔使太擔心。呢個報告令毛家非常震撼，呢年幾毛毛尾部、後頸、鼻樑都有腫瘤出現實在令家人十分擔心…
2012年5月25日(星期五)
呢兩日毛毛一到五點零鐘就會好乖咁跟到我實，我一停低毛毛就好乖咁坐低望實我(個百厭星要我帶佢出街)。旁晚落咗街散步…突然間毛毛搶繩標前扎恆馬出力狂吠，原來毛毛見到死對頭黑白唐狗，我即時本能反應拉實毛毛制止佢吠(平常心)…幾秒之後我先記得毛毛肚仔做咗手術…毛毛太用力谷腹肌可能會有爆線嘅危險，咁…我先開始驚，呢啲狗狗自然反應現階段令我非常擔心….
2012年5月25日(星期五)
毛毛經過呢排姖詩全日貼身照顧之後…宜家好痴姖詩，個情况直頭好似賣乂乂牛奶廣告咁。毛毛一見工人就當正工人係佢媽咪好緊張咁除左歡迎之外仲跟出跟入。家陣毛毛眼中工人姖詩嘅地位高過晒我地喇…
毛爸 : 係件好事嚟咖...証明姖詩係幾咁錫毛毛，難怪個百厭星咁痴姖詩...
2012年5月24日(星期四)
已經屈咗喺屋企三日啦！媽咪超緊張我啲傷口，我手術後幾日都唔可以出街散步，媽咪驚我嘅傷口會受細菌感染，又叫姖詩釘實我唔俾我R同Lam個傷口，呢幾日真係過得慢…好彩今日毛爸終於帶我出街散吓步…………
2012年5月23日(星期三)
手術後嘅毛毛由於禁食、鎮靜劑、麻醉劑影響安靜咗一日，慢慢咁服原體力，開始鬼咁生猛…產生啲問題越嚟越多，週不時R個傷口同Lam個傷口…搞到毛媽好擔心要諗辦法防止，除咗要毛毛帶腰封同帶腳套之外仲叫工人好似G4咁全日貼身睇住毛毛，工人好緊張怕整親毛毛傷口又唔識點抱佢…咁…就放縱毛毛，宜家毛毛由 “少爺”升為 “惡爺”真係惡搞…
2012年5月23日(星期三)
毛毛前日嘅手術好順利…大約做咗40分鐘，姑娘通知我地可以入手術窒抱番毛毛，醫生攞咗嚿圓形帶有血水嘅肉俾我地睇，係喺毛毛頸切割出黎…有1.5cm咁大，仲話個腫瘤生得好深，嚿野要攞去醫院化驗。醫生同我地講毛毛嘅手術傷口(頸聯左5針肚仔聯咗2針)唔會做成好痛，傷口服原要14日，唔使拆線唔使食藥唔使搽藥，但要好好護理傷口….
2012年5月22日(星期二)
尋日...18 :00…毛毛見到碧咸醫生就狂吠，醫生話毛毛狀態好。後勤人員已經做好準備…手術窒入面醫生細心檢查氧氣、氣喉管、手術器材、針筒、藥品…。碧咸醫生同我地解釋過程…先打鎮靜劑後全身麻醉…插氧氣喉…先做肚仔度嘅臍疝、然後頸後腫瘤…過程大約十多分鐘…。毛毛入到手術窒全身發震，我抱住毛毛打咗針…一直到佢安靜落慢慢瞓覺…手術開始….
2012年5月21日(星期一)
一個慢長嘅一日…手術前要禁食連水都唔可以飲，毛毛由尋晚10 :00開始至今已經18個鐘冇食野同飲水，活躍程度大大減低。毛毛每次見到我就會用好可憐嘅眼神問我攞野食同攞水食，而我就為咗毛毛做手術要禁食硬住心腸講 “No”…自己實在有講唔出嘅難過，毛毛下晝6 :00點開始做手術…只有等…宜家發覺今日嘅時鐘好似唔行咁…
2012年5月21日(星期一)
尋晚十點幾(本來八點半到)帶埋毛毛出碼頭接毛媽…因為壞天氣令航班遲降落。毛毛見毛媽出嚟嗰陣開心到發咗狂要毛媽抱，之後行落停車場、喺車入面毛毛都有輕吠同狐叫…初初以為毛毛太掛住毛媽，後尾先知毛毛好尿急…喺電梯度屙咗督好大灘嘅尿……..
毛毛 : 毛爸話今晚帶我出去 "蒲"呀~
2012年5月20日(星期日)
毛毛今日冇晒心機…成朝都呢埋喺房，今朝毛毛要冲凉…我入房抱佢嗰陣…毛毛好惡咁咬我…仲係咬住唔放口，毛毛第一次防衛性好大力咁咬我隻手，同平時玩唔同。照我理解狗狗咬人其中原因係你參佔佢嘅地盤或者令佢受驚，我冇罰冇怪毛毛，毛毛發咁大皮氣可能係…天氣勁熱、食咗啲藥、唔見咗毛媽…等等有關？我要確實咁了解吓…………..
毛爸 : 少爺仔籟皮...抱都唔起身...發晒皮氣....
2012年5月20日(星期日)
由於天氣同工作關係己經個幾星期冇踩過單車，今朝五點幾嚫毛毛未起身又唔使煮早餐俾太太食就出去踩單車同影相。經過運動場迴旋處見到啲好大棵樹開滿晒紅色花…，每年喺呢啲時侯呢一帶嘅樹就會一齊開花，好似約定咁…超靚…雖然過去嘅幾年都有影呢啲花但唔知佢地叫乜名….
2012年5月19日(星期六)
尋晚毛毛一直都瞓喺櫃邊(近毛媽瞓嘅位置)冇返入自己個籠度瞓，今日下晝落大雨行雷聲令毛毛更不安。旁晚出街散步毛毛都冇乜心機，行左好耐先便便同尿尿，本來見毛毛冇乜狀態諗住行耐啲…無奈個天又落雨，唯有返歸。毛毛一返到屋就衝入睡房、書房、冲凉房、廚房兜咗個轉…好似揾人咁…但…失望。
2012年5月18日(星期五)
400ml大約兩杯水，毛毛自從食藥療程之後每日飲成兩杯水(唔計早晚嘅肉湯)，我都覺得有少少離普。平時毛毛唔即極飲水咖，所以毛媽諗到用肉湯嘅高招要毛毛飲多啲水。醫生都講啲藥會令毛毛飲多水，第二個禮拜開始會減藥嘅份量，但毛毛都仲係飲咁多水…唔知消炎藥定類固純藥影響呢？
2012年5月18日(星期五)
我俾毛爸抹黑呀~其實我經常晚飯後都陪媽咖，一直陪到食晒宵夜同生果先入房咖，不過…最近因為天氣太熱所以入房凉冷氣…記得前一排大廳都仲涼浸浸咖，唔知點解宜家越嚟越熱，我呢入房…我都唔想咖….
2012年5月17日(星期四)
今日毛少習慣咗好多，冇成日揾毛媽，夏天平時食咗飯就會走入房歎冷氣，好少留喺廳陪我地，唔知係唔係屋企少咗一個人嘅關係呢，今晚毛毛就好乖咁留喺廳陪我睇戲，如果平時咁乖留喺度陪毛媽…毛媽一定勁開心。
2012年5月16日(星期三)
今朝毛媽搭十點半船過香港赤鱲角機場，今朝執行李嗰陣毛毛己經冇乜心機咁坐埋一邊，以住毛毛會好熱心幫我地一齊執行李(我地擺入行李箱毛毛就擔番出嚟)。毛媽推行李出走廊毛毛就開始狂吠直至毛媽入電睇為止，毛毛好似知到毛媽要出門咁…
2012年5月16日(星期三)
我本人都幾擴佢食藥，自細就有個觀念…唔舒服先食藥、啲藥超難食、食藥產生嘅副作用令人好唔舒服。每每家人病咗要食藥嗰陣都鄧佢地辛苦，毛毛今次療程要食14日藥，初初擺落啲糧度毛毛會自動食咗，近呢幾日毛毛簡晒啲藥出嚟唔食，俾個百厭星毛毛激死……….
毛爸 : 啲藥好苦，毛毛食過一次之後就簡晒出嚟唔食...真醒....俾佢激死...
2012年5月14曰(星期一)
呢兩日毛毛表現好攰，已經兩日冇主動同我玩，仲有經常狂飲水同尿尿。可能過去嗰幾日天氣極悶熱或者同食咗啲藥有關，就呢幾個情況有當面問姑娘…得到嘅回覆係 “正常反應”唔使太擔心，原來毛毛食嗰啲藥係會飲好多水咖，加上天氣勁熱會令狗狗更攰，見毛少冇晒心機咁…毛媽後日出門飛韓國…一定係好唔放心。
2012年5月13日(星期曰)
呢一排毛媽投訢屋企有蚊，我都有發覺…。我開始檢查花樽、花盆都冇大發現，廚房係重災區，但用殺蟲水我有保留，我怕對毛毛有危險。宜家廚房開放咗毛毛經常入去探險…聽講狗狗嘅心絲蟲病係由蚊傳播嘅，真係有啲擔心…要諗吓辦法喇。
毛毛 : 返入冷氣房...又涼又舒服仲邊會有蚊丫...供巴娃。
2012年5月13日(星期日)
母親節啦！我毛毛喺度祝各位偉大嘅媽咪 : 母親節快樂呀。梗係仲有祝我媽咪母親節快樂啦，每年嘅母親節都有得出街有得玩…仲有得加餸，呢啲節日有多幾日就好喇…你地話係唔係？媽媽艾凹UUUUUUUU….
2012年5月12日(星期六)
每年嘅母親節都會諗番起媽媽。現代人係咁形容母親 : 母親係最大方、母親係最包容、母親係冇限額ATM、母親係專用廚師、母親係百科全書、母親係專業保母…等等，我向多樣才幹集於一身嘅母親至敬。
祝天下偉大嘅母親…母親節快樂！
2012年5月12日(星期六)
毛毛食咗幾日藥之後…鼻樑嗰粒瘡瘡消咗腫 。聽醫生講呢種「上皮瘤」可能係遺傳嘅，就算做手術切除咗都會有可能喺其他位置再生，但如果唔切除處理就有可能惡化…咁就會好麻煩。
宜家有好多都係未知之數，手術前毛毛要照胸片，睇吓會唔會擴散去個肺度…好難怪毛媽咁擔心。目前准一安慰嘅係毛毛仲係好貪食、貪玩、活潑、百厭、開心...
2012年5月11日(星期五)
醫生話毛毛手仔啲菌叫做「酵母菌」，症狀係皮膚發紅同脫皮仲會好痕，有機會會傅染上耳仔，治療要搽油性嘅藥膏、食帶淚固醇同消炎成份嘅藥，14日嘅療程。
毛毛BB嗰陣因成日R耳仔同Fing頭(感染哮呣菌)去見碧咸醫生，醫生一見毛毛就抱住毛毛聞佢耳仔同腳仔(啲菌有臭味)，毛毛就猛咁Lam醫生個鼻…由嗰時開始碧咸醫生就成為毛毛嘅主診醫生…直至佢離開澳門…
2012年5月8日(星期二)
尋日靚仔醫生專程上嚟屋企探毛毛順便幫毛毛診斷，毛毛初初唔認得醫生係咁狂吠，之後就安靜落嚟仲非常聽話任醫生舞，經醫生長細嘅全身檢查…肌肉、骨絡、體重都正常但腳仔就有 “真菌”另外更壞嘅消息係…毛毛鼻樑嗰粒瘡瘡係 “腫瘤”…
2012年5月7日(星期一)
今次毛毛剪咗個剷咀裝，原因係毛毛鼻樑嗰粒瘡瘡可能要做手術，橫掂都要剷毛所以轉咗個裝…毛媽都唔舍得…
2012年5月6日(星期日)
清晨五點幾…毛毛就嚟床邊R醒我…之後行左出廳好耐都唔返入房。我出廳睇吓乜事，見毛毛瞓喺皇座冇乜特別(硬係覺得毛毛有啲唔正常)，咁…我就喺廳陪毛毛同開電腦上網，過左一陣毛毛開始作嘔，唔…毛毛自從改變飲食習慣之後己經冇嘔過，今次嘔唔知點解？
2012年5月3日(星期四)
尋日喺天台開工而且陽光普照熱到人都癲。下晝帶毛毛出街散步…同毛毛帶頸帶時候毛毛表現慢吞吞，落到街毛毛唔願行，應該係天氣熱…毛毛又未剪毛，返到屋企毛毛第一時間狂飲水…之後就走左入房…
2012年5月2日(星期三)
原本5月1日毛爸計劃一早起身同毛媽帶埋我一齊去行山…但毛媽臨時接到 “柯打”要返工…咁嗰日嘅節目就全部取消，我唯有喺屋企幫毛爸手整櫃同層板。好彩到下晝毛爸帶左我去海邊散步，仲遇到班老友記好開心呀…可惜毛媽唔係同我地一齊丫。
2012年4月30日(星期一)
身為一個佛教徒，能夠參加今次澳門開埠四百幾年黎第一次恭迎佛陀頂骨舍利，係一個緣份，係一生嘅福份，令人非常激動。據了解今次祈福大會邀請左好多佛教界大師、主持、長老、高僧，政界首長、師長、議員，社會賢達，大眾市民親臨觀禮。我第一次見咁多高僧、尼姑，佢地由臺灣、國內、東南亞專誠包團黎澳門觀禮 (坐滿會場嘅地層)，場面非常莊嚴，一生難忘。
福田永種 佛寶重光 和諧澳門
