2013最後一日

2013年12月31日（星期二）

大家會唔會想起今年難忘嘅事？2013年最後一日⋯「人」年紀大咗就會經常＂想當年＂⋯

回望2013年發生嘅事特別多⋯老爸入醫院、毛毛做手術、囡囡做手術、自己不停受傷、毛爸毛媽毛毛豬日誌平台搬家、跑馬拉松、毛媽整餅考到証書⋯好多好多開心、傷心、唔如意嘅事...

能令自己一一咁渡過係靠心中嘅信念，自己深信「不幸、不如意嘅事一定會過去，幸福、開心嘅事始終會降臨」。

2014年⋯毛家祝各位好朋友＂平安幸福、身體健康、事事如意、新年快樂＂

毛家 : 2014年祝願大家多福...新年進步！

挑戰寒風

2013年12月29日（星期日）5：40 黑嘛嘛 大寒風  9 度

今朝恢復操練，凌晨開始裝備，今日要加衣⋯今早好凍但毛毛都拖住被出廳陪我。

一落到街已經寒風吹面，冬天運動係有啲難度⋯身體好快會凍、熱身出汗又會覺得凍，寒風凍到手、腳、腰都麻痺哂，都幾辛苦。

有時真係覺得自己好奇怪亦都想唔出一個理由⋯點解自己會做孤身對擴寒流踩車嘅行為，今日大逆風，係踩車大考驗⋯踩30幾公里要花成兩個鐘⋯

毛爸 : 宜家體驗到...「理想」同「夢想」點樣令人爆發恆心同耐力...

毛毛 : 毛爸，咁凍今朝不如休息啦，好唔好？如果你堅持...我都撐你...但最好帶埋我去啦。

毛爸 : 毛仔係其中推動我嘅一個力量...

毛爸 : 呢一帶燈飾非常華麗...每次踩車經過...都忍唔住停低影番張相...

毛少發啷厲喇！

2013年12月29日(星期日)

呢排因傷患影響睡眠…噚日朝就瞓過龍，由於要煲湯俾老爸…非常趕時間，一直都冇埋毛毛，毛毛都算乖…一路跟出跟入。

我就繼續忙洗尿板、準備家人同毛毛嘅早餐、跟住冲凉…毛毛開始失去耐性(我冇發覺)，喺冲凉房好失望行番出去(其實係發脾氣仲擔咗嚿海棉出廳)...

當我梳洗完出廳…嘩 ~ 成地都係海棉…

毛爸 : 嘩 ~ 毛少，你搞乜野呀........

毛毛 : 毛爸，唔好望實我呀...係你唔理我咖...

毛爸 : 毛毛小朋友，你點可以亂發脾氣咖...

毛毛 : 唔 ~

又寒又凍，我要抱抱

2013年12月27日（星期五）

今早聽天文台講⋯最低氣溫 10度，唔知點解硬係覺得好寒好凍，毛毛就唔願出㕔⋯我唯有抱住佢落街散步。

街道好寒抱住毛毛去到老地方⋯毛毛好快咁＂咇＂完幾粒便便又扭抱。

今朝出奇咁大風⋯由其係街口轉角位，吹到毛毛個様變晒型⋯毛毛直頭坐低唔行⋯結果⋯

毛爸 : 結果...就係喺街抱住少爺毛抱到返屋企...仲好似好委屈咁...

毛毛 : 毛爸，你抹黑我...

開心嘅Boxing Day 2013

2013年12月26日（星期四）

今日係一個開心嘅日子，除咗小朋友外大朋友都會一樣咁開心。

因為今日係Boxing Day拆禮物嘅日子，今年我買咗好多份禮物⋯都係送俾小朋友同毛毛，至於太太嗰份就唔知買乜野禮物而冇準備，但太太亦都唔知送乜野俾我而欠奉⋯

咁⋯真係唔知好事定壞事，但我會向好方面諗⋯我同太太心靈相通，非常有默契咁作出同一樣嘅行動⋯神奇。

毛毛 : 今年有玩具呀...多謝媽咪...

毛毛 : 全部都係新口味...好正(我食過試食版)...多謝毛爸...

聖誕節大餐2013

2013年12月25日(星期三)

每年聖誕節都會食聖誕大餐…以前太太會特登喺某大餐廳訂定位慶祝。

自從太太對烹飪有興趣之後開始…每到聖誕節就會親自下廚為家人煮大餐喺屋企慶祝，咁…係好窩心、好幸福、好興奮、好開心嘅事。

重點...唔係份餐幾豐富幾好味，而係太太花咗兩日去偏餐單、買食材、準備…肯花時間去為屋企人煮大餐慶祝…呢啲先叫做「錫屋企人」。

毛爸 : 呢味係主菜...燒春雞...係我至愛...

毛爸 : 南瓜湯、愛心麵包、薯容、雞蛋布甸、水果...呢餐心靈同食欲都非常滿足...

真希望往後嘅聖誕節都能較有咁嘅口福...

壓傷肋骨變成骨膜炎

2013年12月25日(星期三)

上星期尾做防水程嘅時候…唔小心壓嚫左邊肋骨(自己唔覺傷咗)，之後左邊肋骨由忍忍作痛…直至星期一極痛去見醫生，証實傷處嘅痛由骨膜發炎引起...

聽醫生講一般受傷後唔正確處理傷處…兩三日傷處就會發炎極痛。

噚日食晒啲止痛…開工嗰陣傷處痛感己經開始不受控…噚晚仲痛到難以入睡，今朝…情况變差…唯有請假在家休息，過不一樣嘅「聖誕節」。

毛爸 : 世事往往都係咁奇怪...唔知整定或者系巧合...因受傷可以同家人一齊過聖誕節...

毛毛心聲…聖誕節2013

2013年12月25日(星期三)

今日係「聖誕節」我毛毛祝大家聖誕快樂！

往年今日毛爸毛媽會帶我出去玩…有好多零食，有聖誕節大餐食，非常開心滿足。

毛毛再祝各位朋友仔今日有得大飲大食大玩大收禮物…過個開心快樂嘅聖誕節…

毛毛 : 祝大家聖誕快樂！

平安夜2013

2013年12月24日（星期二）

平安夜⋯聖善夜⋯

根據《聖經》記載平安夜係耶穌誕生嘅嗰個夜晚，耶穌來到人間，是要作人世間的皇，因此天使便透過這些牧羊人把消息傳給更多的人。後來，人們就仿效天使，在平安夜的晚上，到處傳講耶穌降生嘅消息...報佳音。

而今晚毛家亦都將最好嘅祝福傳俾大家⋯祝大家平安幸福聖誕快樂⋯

毛爸 : 祝各位平安夜...平安幸福、聖誕節有個愉快難忘嘅假期...

毛毛 : 祝各位姨姨、叔叔、哥哥、姐姐...有個快樂嘅平安夜...祝各位狗狗好似我咁有爸爸媽媽陪...超歎...

毛毛凍到流鼻水

2013年12月24日(星期二)

今朝氣温 11度比前幾日已經暖番…但都唔知點解毛仔仲係好唔想出街散步，今朝早都幾大風…吹到我同毛仔都流晒鼻水舉步維艱(我因為排骨骨莫炎行路都痛)。

平日呢啲温度毛毛會好活躍…但今日行路慢動作仲猛咁流鼻水…都唔知毛毛發生乜野事…擔心。

毛爸 : 毛仔，你冇事丫嗎？

毛毛 : 頭先因為好大風又凍又肚餓咋...而家食咗餐我冇事喇，獎我多啲零食啦...

冬日萬花筒球形花展覽

2013年12月23日（星期一）

喺澳門氹仔龍環葡韻⋯每年都有幾次花花展覽，每次都用一種好靚又吸引嘅花品種做主題。

而主場內每次都有美麗而精彩嘅大形插花藝術展品，每次花展覽都會吸引眾多攝影發燒友、市民、遊客參觀⋯而我同太太、毛毛每次花展覽必到。

今次以球形花做主題雖然品種唔多⋯但都靚到令人眼前一亮...

毛爸 : 好似湯丸嘅球形花...

毛爸 : 扎成花球...應晒主題...

毛爸 : 呢種花係其中一個主角...

毛爸 : 個主題牌設計都非常靚...

毛爸 : 主場入口...有座又大又靚嘅插花藝術品...

毛爸 : 呢張相令人好開心...有種企喺花田嘅感覺...

毛爸 : 見到呢啲花球...聖誕節到喇...

毛爸 : 好難去形容呢啲花有乜野吸引力...但真係好靚...

毛爸 : 好鍾意呢種球形花嘅顏色...神秘...

毛爸 : 玩野作品...

毛爸 : 除咗花...啲葉都係主角...

毛爸 : 呢種花好靚...我唔記得喺邊見過...今次又見番真夠運...

毛爸 : 當時心情就好似花咁靚咁多色彩...

毛毛滴蚤水

2013年12月23日（星期一）

醫生建議⋯無論「住家狗」或者「外出狗」都要定期滴蚤水，由於毛毛日日都外出散步⋯所以滴蚤水嘅次數會密啲，毛媽都堅持用比較溫和嘅蚤水⋯怕傷害毛毛擴敏能力低嘅皮膚，亦都因為咁毛媽經常轉換牌子⋯選擇「純天然材料」制嘅蚤水。

呢次用咗好濃「香茅」味嘅蚤水⋯毛毛嘅反應⋯由以前嘅坐定定變成典嚟典去⋯

毛毛 : 媽咪，啲蚤水真係好大陣味呀...

毛毛 : 我就嚟頂唔順喇...

冬至2013

2013年12月22日（星期日）

好多長輩經常將「冬大過年」卦喺口邊，今日係「冬至」⋯每到大時大節就會有啲細個溫馨經歷嘅片段浮現眼前，細個嗰陣今日就會幫媽媽手整「湯圓」，嗰時一早起身（個天仲係黑嘛嘛唔知道幾點）唔知點解⋯嗰陣好期待，覺得好好玩好喎心。

今時今日叫啲人早少少起床佢哋都覺得好辛苦⋯整湯圓？呢個傳統好快就會淡化淡化⋯

毛爸 : 今朝煮咗通粉俾家人做早餐...

毛爸 : 仲有湯圓...毛毛梗係有份啦...想將「團圓」呢份心意帶俾屋企人..

毛家 : 祝各位冬至團圓幸福....

毛毛心聲…行星星公園、做「毛豆」

2013年12月21日(星期六)

今日係洗白白嘅日子所以…今早一定有得出去玩，目的地係星星公園，自從個公園仔唔俾狗狗入之後好耐冇去過喇，今次毛爸去影相順便帶埋我去週邊行吓。

因為有花展今朝好熱鬧…仲有好多哥哥姐姐不停咁爭住影我相，實情今朝係去做「毛豆」忙死…

毛毛 : 今朝好開心呀 ~

毛毛 : 各位哥哥、姐姐、龍友...要影相就快啲手喇...我好忙咖...

毛毛 : 毛爸、媽咪返到屋企仲要影？得未呀？好攰呀...

毛爸 : 毛毛正經啲啦...你好靚仔呀...

毛媽 : 阿仔你好似...想殺人咁咖...

低估 9 度有幾凍

2013年12月21日（星期六）6：25 黑嘛嘛凍冰冰 強冷風 氣温 9度

噚日開工可能拉傷左邊肚腩對上嘅位置⋯瞓覺轉身同呼吸都痛，令我瞓得唔好一早就起床，由於無所事事⋯就裝身出去踩單車。

今早好凍⋯所以我做足準備一件底衫吸汗、一件保暖、一件長就T恤、一件爪毛連帽衞衣，初初夠暖無問題⋯但踩車踩到出汗濕晒啲衫嗰陣就開始出現唔對勁，冷風直接吹入身⋯凍到刺骨非常唔舒服⋯

(圖片-大酒店人做雪景)

毛爸 : 我諗唔到出汗濕晒啲衫嘅情況...低估低温同冷風....喺某啲環境 9 度係好凍咖...

毛爸 : 今早都係踩咗半程(20公里)就放棄...仲好辛苦先踩返屋企...真失敗...

回歸要開工，仲唔知幾時受咗傷

2013年12月20日（星期五）

今日係澳門回歸日⋯由於要趕工程所以都要開工。

我哋呢個行業今年好多時候都會有「趕工」嘅情況⋯但有時得閑嘅時候⋯嘆死，趕工嘅時候⋯做死。

今日好彩天氣好⋯雖然凍同大風但有溫暖嘅太陽射住令人開工都搏命啲，通常趕工程都遇到嘅問題「唔知幾時受咗傷」⋯今次收工先發覺自己左邊排骨近肚腩嗰條骨⋯開始忍忍作痛⋯仲越來越痛⋯

毛爸 : 唔知點解同點樣令自己意外受傷...仲要收工先發覺...真無奈...

毛毛都怕凍冰冰

2013年12月19日（星期四）

氣溫進一步下降⋯聽講今早只有7點7度。連少爺仔毛毛都唔肯走出睡房，出騎樓尿尿更加唔使講，咁⋯就証明咗係幾凍。

今朝毛毛唔肯出門⋯用零食獎勵又抱抱，好勉強⋯咁先一齊去散步，落到街只係行咗一陣⋯毛毛就扭計返屋企，真係冇佢符。

毛毛 : 毛爸，外面好凍喎...不如休息一日...唔出街囉。

毛爸 : 不得呀衰仔...你又唔出騎樓便便同尿尿...

毛毛 : 毛爸強權，凍冰冰都要我落街...無奈...

毛毛 : 行停車場阿少爺你...怕黑又怕臭，出街又怕凍...阿少爺仔，你啲要求都「好高」吓喎...

毛毛罷行停車場

2013年12月18日（星期三）

前兩日晨早就開始落雨又凍⋯帶毛毛散步就改行停車場⋯

第一日毛毛都算聽話⋯但第二朝開始毛毛就有啲不滿，成日都想行出街，到當日傍晚毛毛直頭罷行停車場⋯免強兜咗兩個圈，但毛毛淨係齋行⋯都唔知佢想點⋯

到最後我投降帶咗毛毛出街⋯毛毛一出到門口就即刻便便同尿尿⋯真係俾佢吹漲。

毛毛 : 毛爸，我哋今朝係唔係出街散步呀？

毛爸 : 阿仔，唔得呀...外面落雨又凍...

毛毛 : 毛爸，又要行停車場呀？

毛毛 : 毛爸，我 行停車場"吾"唔倒咖...

毛爸 : 好啦好啦...怕咗你喇...大少...

毛毛 : 我真係「大少爺」嚟咖...

聖誕曲奇

2013年12月17日（星期二）

已經唔記得幾時⋯由「毛媽整餅」開張嗰陣開始⋯毛媽一到聖誕節前嘅星期日由朝早開始買材料準備整「手工曲奇」然後花時間包裝送俾同事做聖誕禮物。雖然一份係得幾塊曲奇⋯我睇得出毛媽背後嘅嗰份心意⋯

毛爸 : 花咗心機、時間都係想同事開心過聖誕節啫...

祝大家聖誕快樂...

凍又落雨天台開工，有苦自己知

2013年12月17日（星期二）

呢兩日氣溫急降至10度⋯今日天文台話有雨仲有機會破8度，但偏偏啲工程要趕⋯所以開工就「頂硬上」。

噚日氹仔區有個天台機站「殺科」要運走啲材料⋯由開工到收工⋯雙手戴住嘅勞工手套、對腳著住嘅鞋襪都全濕，今日澳門區有個天台機站「開波」，今日全日都落住好密嘅毛毛雨，所以今日雨中開工除手套、鞋襪、仲有外套都全濕，全身都凍到DD震。

我喺工作上從來都未試過咁極端嘅體驗，揾錢⋯真係好辛苦咖。

毛爸 : 全身都濕...手凍腳凍...嗰種凍到入心嘅感覺...令人喪志...

毛毛心聲…今晚要食罐頭餐

2013年12月16日（星期一）

噚日因為落雨冇得出去行山同玩⋯悶爆。

但唔知點解毛爸毛媽都超忙，毛爸執屋、媽咪整餅（不過唔係整俾我毛毛⋯有少少失望），佢哋一直忙到傍晚⋯連我晚餐都冇時間煮，最後⋯毛爸開罐頭餐（雞肉牛肝）俾我食⋯解決。

毛毛 : 唔知我啲「聖誕曲奇」媽咪又幾時整呢？

毛毛 : 雖然係快餐...但間中食一餐都唔錯咖...