2012年1月29日(星期日)
毛媽一星期會例行幫毛毛做一次清潔耳仔、肛門線，每兩星期幫毛毛冲一次凉、修腳仔毛，每六星期就修一次全身毛。但毛毛好冇耐性同唔鍾意俾毛媽搞佢耳仔同手仔腳仔，有時仲會反抗咬人，所以每個星期日我同毛媽都要夾手夾腳修服毛毛，有人提議揾個口罩俾毛毛帶，毛媽就買左一個試用…毛毛帶左之後變得沉默…
毛媽 : 毛毛百厭星我睇你點反抗...
毛毛 : 媽咪我選擇沉默...
2012年1月28日(星期六)
今日媽咪放假天氣又暖番又冇落雨…媽咪話旁晚會帶我去海洋花園同師兄弟玩順便同大家拜年，龍年第一次見Mad師兄、大介師弟、叮噹、洋葱、Panda、Puffy、毛毛b妹妹…場面非常熱鬧開心，毛爸仲分小食俾大家食，個個朋友仔都好高興，更開心嘅係大家仲有利是豆，喺呢度毛毛祝各位姨姨叔叔同朋友仔身體健康、事事如意、快樂幸福…恭喜。 毛毛 : 勁開心呀~我同師兄都有利是豆，利是滾滾滾而來...正。
2012年1月27日(星期五)
我最愛食潮州紫菜墨魚丸河粉，每次過香港必到銅鑼灣嗰間 “乂輝墨魚丸大皇”食個河粉先至心適，每次太太都好有意見 : 肥仔唔該你啦…我已經食到驚喇。今日由於工作行經超市，見到有賣厦門有機紫菜、江門沙河粉、臺灣北港墨魚丸、天津冬菜、桂林棘椒油、泰國魚露…咁個腦就閃出個主意…整番個特別午餐食。
最後要加啲芹菜、葱花...咁就
2012年1月26日(星期四)
今日毛爸毛媽一早就起身好忙咁準備出門，原來今日媽咪要開工喇，仲叫我乖乖地喺屋企唔好亂搞野，又話會返公司幫我豆利是。今日屋企好靜冇人，雖然我喺屋企已經自由行但由日日好熱鬧突然變得清靜…有啲唔習慣有啲失落…
2012年1月24日(星期二)大年初二
今日系大年初二祝各位 “富貴吉祥”…尋日阿妹全家要過香港拜年，而工人又例假(開工要收三工咖)所以要留Coffee一個喺屋企，過年大時大節要一個留喺屋企泠清清…咁…我就接左Coffee番黎同毛毛一齊玩，但Coffee就掛住媽咪…..
Coffee : 好掛住媽咪...
2012年1月22日(星期日)
經過我多次逃出 “走廊”之後…毛爸毛媽决定俾我自由行，原來毛爸一早就考慮唔使欄我喺走廊，係擔心我自由行會亂咁咬野搞破壞對自己做成危險，毛爸觀察左幾日…. 毛毛 : 宜家自由到點瞓都得...哈哈
2012年1月19日(星期四)
前幾日…有次發覺返屋企嗰陣毛毛己經喺大廳度歡迎我，奇怪？走廊個欄未開點解毛毛會走左出廳？跟住過幾日毛毛又成功走左出黎…後來喺裝喺屋企嘅視象鏡頭睇到…毛毛識爬攔經按摩椅落地…佢非常安全及聰明，而走出廳之後就好安靜跳上梳化瞓覺…..
毛毛 : 我係醒目仔黎咖....
2011年2月18日(星期三)17 :41有陽光16度
己經冇踩車兩個星期，因為天氣太凍同病左…所以停左，由於病左老闆特別批三日假俾我休息，而加己經服原…工作上仲有少少手尾返埋聽日就開始放年假，可以去踩車但聽天文台講又會開始凍番…都係要睇情况，而家唯有掛班部車單先…
2012年1月18日(星期三)
呢排發現毛毛經常擔啲紙碎、雜物走去佢皇座度玩，過程非常高明。一揾到啲雜物就喺個座位度玩，動作就好似Lam手仔咁，毛媽發現毛毛行為古怪走埋去檢查…毛毛抬起頭扮冇野，毛媽亦都冇特別發現，幾次情况都係咁…後尾終於都發現，古惑仔毛毛係用兩隻手仔檔住啲雜物等毛媽睇唔到，原來毛毛都識偽裝咖…
2012年1月15日(星期日)
毛爸已經三日冇返工…原來毛爸病左，聽講係氣管過敏引起發炎發燒，夜晚咳得好犀利，嘈到全屋人都冇覺好瞓(個個都有意見)。呢幾日毛爸成日都好攰咁瞓喺床或者按摩椅連電腦都冇開過，由於咁我呢幾日都係陪住毛爸…毛媽就有意見…..
毛媽 : 你唔好痴咁埋毛爸會傳染俾你咖.....
2012年1月14日(星期六)
最近毛毛嚫毛媽唔喺梳化就會跳上面瞓覺，屋企梳化位係毛媽嘅地盤。自從准毛毛晚飯後喺梳化陪毛媽，但毛毛就有心爭奪梳化座位挑戰毛媽…毛毛成功左…. 
毛毛 : 大家唔好吾會，我係和平佔有咖...
2012年1月6日(星期五)
呢兩日毛毛都好主動陪媽咪，一見毛媽去梳化坐低…就會嗱嗱林跳上梳化，而且會迫喺媽咪背後，平日毛毛好高姿態…有時叫都唔上梳化，除非佢自己鍾意。呢兩日凍多好多毛毛就好識選擇地方…
毛毛 : 有媽咪頂住好暖粒粒呀~
2012年1月2日(星期一)
毛毛零晨開始個肚仔就發出 “咕咕”聲，可能唔舒服成日都喺籠度轉身換位…所以一直到天光都 “咕咕、絲絲、擦擦…”聲。到今朝留意到毛毛都好 “生猛”咁就落街散步，毛毛一落到街就好急咁便便，跟住再行5步再扎行馬再便便，之後就好似好趕咁想返屋企。睇黎毛毛應該冇事，不過毛媽擔心左成晚….
