每朝6點幾我就帶毛毛出街散步。
太太:肥仔你咁夜訓,又一早起身,休息唔較對身體唔好架。使乜咁早帶毛毛出去啫…
肥仔:晏左出去毛毛會好急,仲會有好多狗狗喺街…毛毛會狂呔人地架…
太太:肥仔你唔可以逃避問題架…
今朝7點幾太太第一次同我一齊帶毛毛出去散步,毛毛一出到街就尿尿、又搶繩、又週圍聞,太太就猛咁扯條狗繩。毛毛去到樓梯又唔肯行,但係落樓梯就行得好快。見到啲狗狗就不停狂吠。太太見到就好緊張:“嘩”毛毛咁惡架仲咁曳添,肯定係你縱壞左佢啦…
每朝6點幾我就帶毛毛出街散步。
太太:肥仔你咁夜訓,又一早起身,休息唔較對身體唔好架。使乜咁早帶毛毛出去啫…
肥仔:晏左出去毛毛會好急,仲會有好多狗狗喺街…毛毛會狂呔人地架…
太太:肥仔你唔可以逃避問題架…
今朝7點幾太太第一次同我一齊帶毛毛出去散步,毛毛一出到街就尿尿、又搶繩、又週圍聞,太太就猛咁扯條狗繩。毛毛去到樓梯又唔肯行,但係落樓梯就行得好快。見到啲狗狗就不停狂吠。太太見到就好緊張:“嘩”毛毛咁惡架仲咁曳添,肯定係你縱壞左佢啦…
小西係日本人,喺AV部做外勤主管,佢為人豪爽性格火爆,不過佢係一個好拍檔而且我地仲係好朋友。
小西或者佢屋企人去旅行買手信例必有我份,對上一次小西爸爸喺日本帶左包極品綠茶俾我(非常名貴)。今次世伯去台灣,又買左啲太陽餅俾我做手信。
喺呢度正式向小西同世伯講聲多謝…多謝…
尋晚返到屋企毛媽就向我告狀,毛毛咬爛左自己件衫,連啲“迫鈕”都食左落肚,都唔知係隻乜野狗黎架。
今早好凍,氣温得11度,毛毛就換左件厚外套出街散步。落到街離遠又見到阿叔同佢兩隻白松鼠,毛毛搶繩兩隻腳企起身向前衝同狂吠,BB狗都狂吠回應。見到阿叔“咋咋霖”兜過對面馬路,阿叔仲拎拎頭...
毛毛...人地怕左你喇百厭仔...
今朝好大風,幫毛毛裝完身就出街散步。我知毛毛好尿急,所以我抱住佢到街先放佢落地。
毛毛好快就尿尿完,但係佢視線一直望實對面街,仲自已走上天橋樓梯同落樓梯,原來有個阿叔拉住兩隻雪白嘅松鼠狗喺度散步 (一隻大狗一隻BB狗)。毛毛一落樓梯衝埋去狂吠啲狗狗,大嗰隻冇理毛毛,隻BB狗就同毛毛對吠。阿叔就對住毛毛講:喂…同BB做好朋友好唔好?點知毛毛就走埋去咬隻BB狗,嚇到BB狗狂吠,好在冇咬親BB狗。
阿叔講:“嘩”隻惡狗黎架...。毛毛你好唔聽話,失禮死毛爸喇...
前晚毛毛幾乎成晚都喺度狐叫,地盤啲狗狗都吠唔停,都唔知發生乜野事。毛媽就成晚都好忙(唔知係唔係毛毛唔舒服,又驚毛毛嘈到人地),冇覺好訓。
尋晚臨訓前同毛毛講:你今晚乖乖地訓喇毛毛…
今朝毛媽同我講:肥仔你尋晚扯鼻鼾好大聲,你知唔知呀?
跟住就吟吟尋尋咁…前晚就毛毛,尋晚就肥仔,你地兩個一擔擔嘅…我就冇覺好訓…
每逢星期六或者星期日都同太太去氹仔街市買餸,氹仔街市係一座兩層高嘅建築,地方唔大有好多檔口都買慣買熟。
魚檔個老闆最老實均真(口頭禪:唔係好野唔介紹俾你),豬肉檔個老闆最親切(口頭禪:阿哥阿嫂早晨),生果檔個老闆娘最豪爽(口頭禪:阿哥計你平啲)。
呢排咳,到宜家都仲未好清,老闆娘就介紹燉新鮮無花果…可以止咳喎…
屋企有好多熊仔擺設,毛毛就成日都想攞黎玩,有好多次自己走上梳化擔啲熊仔黎玩,俾毛媽大聲鬧。
工人阿美見毛毛咁鍾意熊仔,特登送左隻啡色嘅俾毛毛,個百厭仔梗係開心啦,不過玩半日就將熊仔咬爛左…都唔知點形容呢個破壞份子…
今早帶左毛毛去橋頭公園散步,我一時大意忘記左先放毛毛去尿尿,咁去到大草原我架車就濕晒毛毛腳仔、肚仔都濕晒。不過毛毛就好開心,對週圍個環境一啲都唔陌生,尤其是對於草同樹特別有興趣,玩到唔捨得走,到最尾要强行捉佢上車返屋企沖凉。
返到屋企附近見到寶寶喺度便便,毛毛喺架車度都要吠到人地走,百厭仔本色…毛毛今次洗白白就好乖可能啲熱水温度啱啱好…
今日陪太太入大陸行街買野(同毛毛換季)。
我對於珠海印像好差,係受到好多負面報導影響,例如有同事講關口有好多扒手,每日過關返工都心驚膽跳。因為曾經被多次打荷包,有次還被爛褲袋,錢同証都冇晒,一個星期返唔到工。翻版影碟、遊戲光碟同啲A貨、對我地嘅行業影響好大。
我呢10年只係入過大陸兩次,第一次係同蘭茜全家湯生夫婦去旅行,今日入大陸係10年來第二次…
今日要過香港辦啲私事,順便帶埋太太過去。除左上次去旅行經過香港,好耐 都冇陪 太太過香港行街散心,行過啲日資時裝店、超市見到好多商品都係日本原裝入口,我地日本旅行買啲手信幾乎全部都有得賣。
太太就話:肥仔我地咁辛苦做咕哩…真戇居。
其實我地唔使咁介意架,內心嘅一份心意先至係真正嘅手信…
天文台報告氣温會下降,朝早温度會低過17度,毛媽一早起身幫毛毛換左件籃色外套出街散步(返黎發覺尿尿整濕左)。
毛毛好生猛,經過天橋底見到有隻黑色流浪大唐狗,毛毛梗係衝埋去狂吠人地啦,對方還以顏色,互相狂吠但互相都擺尾冇打交跡象,唔知點解黑狗吠吠吓就走開左。
回程經過停車場,毛毛發現兩隻狗BB又係發狂咁吠,啲狗BB驚到走番入屋,毛毛連BB都“恰”好冇風度喎…
呢排毛毛玩完執波波之後就要人抱佢,我以為毛毛纏住我要陪佢玩同攞零食,毛毛真正目的係要我抱佢,抱住佢就會乖乖地瞓覺,或者要你喺隔離陪佢。原來毛毛經常都走上梳化要太太抱佢架,唔知係唔係因為剪晒啲毛呢…
前日毛媽番到屋企,就攞左4件好有型嘅新衫仔俾我睇。毛毛你睇吓…係我啲同事送俾你架。
嘩!有件英國名牌乾濕褸、另一件藍色外套、一件白色波衫、一件黑色冷衫 (有骷髏花架)。毛媽同我試著啲衫,話我著左上身非常有型喎。
我毛毛有咁多人關心同錫,真係有福喇!多謝兩位姐姐送俾毛毛嘅靚衫…多謝…好多謝你地呀…
旅行前聽太太講Calvin想買部Sony單鏡相機,我地去日本玩順便幫Calvin打聽下價錢同配置。Calvin突然話要玩單鏡機我都愕然...原來係用黎同阿Boy影相...
收到阿Boy最近嘅消息…聞說佢乖左好多同靚仔左,仲識喺相機鏡頭前笑同擺pose。
Calvin sent左阿Boy啲相過黎,見到阿Boy英俊左好多,不過就少左啲調皮嘅表情。講下講下唔知有冇機會帶阿Boy出黎玩呢...阿Boy記唔記得我 (肥仔契爺) 呀?有冇掛住我呀?
呢排做野做到好夜先收工,原因係要訓練新人同整理貨場,夜收工太太有意見。
我份工經常都要遲收工(好辛苦架),其實我同大眾打工仔心態一樣,如果份工可以遲返工又可以早收工又多假期…咁就最好喇(真係妄想)。我份工每日要返十幾個鐘架,需要嘅精神同體力都要好強架。不過我份工係咁,為左揾食好無奈都要頂硬上架,希望家人體諒。我都好想有多啲時間陪太太同毛毛架...
十一月十六日又係毛毛八個月大嘅生曰。
今朝玩波波獎左好多零食俾毛毛,毛媽就買左時尚新衫同埋玩具俾毛毛生日 (個玩具玩左一個下晝就咬爛左)。
毛媽仲整左啲特別生日餐俾毛毛食 (係龍脷柳、紫椰菜、黃椒、甘荀、雞蛋加原味乳酪)。毛毛和味喇…
生日快樂…毛毛…
尋日開始毛毛又有啲奇怪嘅行為,朝早出去散步,行到某啲地方就會坐喺度點佢都唔肯行,就算夾硬拖佢都唔行。初初淨係上落樓梯我以為毛毛怕高,宜家平地都係咁,唔知點解…
毛毛經過地盤就會衝埋鐵閘度狂吠d狗狗,宜家毛毛都有衝埋去不過唔再吠喇(可能啲狗狗唔理佢)…奇怪…
尋晚返到屋企太太又投訴,毛毛又咬斷左條電話線喇。今次連個插都咬爛埋(我以為毛毛百厭平時玩咬爛。原來唔係,真正嘅情况係毛毛喺個籠度用腳仔R條電話線入籠裡面咬斷),唔罰佢都唔得喇。
到瞓覺鎖番毛毛入籠,毛毛又喺籠入面R咕,R吓R吓仲除左件衫仔,毛媽見到大發脾氣:冷親你呀毛毛,激死我喇衰仔…
旅行對於好多人黎講都不離吃喝玩,但對我本人就有特別意義。旅行係放低沉重嘅工作、生活包袱、冇其他人騷擾嘅情況下同親人加深了解,享受開心假期。
今次我嘅假期同太太嗌左兩次交,自己心裡面嘅價值觀同生活作風以為太太一早認同,原來有出入架,長時間嘅相處難免有磨擦。宜家我明白就算親人,更加應該花多啲時間互相溝通了解。今次嘅旅程我發現自己要改進嘅係… “要有耐性同人溝通”。
總括今次旅程係愉快嘅...更期待下一次...
一早毛毛就喺個籠度狐叫,同毛毛裝完身出街散步,出到門口毛毛已經急不及待喺走廊尿尿,仲好大督,原來毛毛好尿急。
出到街就非常生猛,但都仲有fing頭嘅毛病(揾唔到原因但冇咁密)。仲發覺毛毛宜家唔肯行樓梯同怕高…
毛毛好似正常番,前兩日唔知係唔鬧情緒呢…
嗰日毛媽帶我去到冲凉,唔知毛媽同啲哥哥講左啲乜野,咁個哥哥就剪晒我成身啲毛喇。啲人話我好似隻獵狗,仲好靚仔喎。
返到屋企我好唔慣,成晚都冇訓。嗰晚毛媽同毛爸輪流陪我同抱我,後尾聽毛媽講,剪毛係等我出番啲新毛靚啲。
自從我冇晒毛,啲人就話我唔係毛毛,但係就讚我靚仔。我隻右前腳有胎記架…係如假包換嘅毛毛呀。
宜家毛媽同毛爸更加錫毛毛…我冇晒毛佢地都咁錫我…第日…哈哈哈…
聽太太講毛毛自從沖完涼返黎之後成日都fing頭,又唔俾人摸耳仔,太太檢查過毛毛嘅耳仔都好乾淨同冇傷。
剪完毛當晚毛毛成晚都冇瞓、不安同狐叫,喺個籠度行黎行去一直到天光。太太同我梗係冇覺好瞓喇,擔心毛毛唔舒服又或者唔習慣。
天氣涼左,太太已經用毛巾舖好個籠,幫毛毛着左衫。我今朝見毛毛都冇乜特別,帶左佢出街散步都有發現毛毛經常fing頭,fing到耳仔都紅晒。便便同尿尿就好正常。
今朝毛毛特別黐我要我抱住佢,而且發覺佢個肚仔古…古聲都唔知係肚餓定唔舒服。毛毛今朝完全無心機玩,成朝都黐喺我腳旁邊瞓,可能個百厭仔成晚都冇瞓過。宜家好擔心,毛毛可能唔舒服(阿BOY唔舒服就會係咁)…擔心。
今日要帶毛毛去寵物店沖涼,太太下晝打左個電話過黎講:肥仔,你返到屋企見到毛毛唔好笑佢呀。今次佢剪短晒成身啲毛,個美容師話毛毛全身啲毛都好軟同唔平均,最好就剷光佢等佢出過啲新毛…
收工返到屋企見到毛毛個樣一啲都唔意外…反而…覺得…毛毛好有型…你可能唔信…
日本俾我嘅感覺係世界上數一數二嘅強國,好多人都同我地一樣,想去嗰度旅遊。
東京朝早6點至8點車站迫满哂人,個個都係著西裝、著校服、著制服,全部人都趕時間。街外嘅環境好乾淨,經常睇到有好多著住背心上面寫左 “義工” 嘅人喺街執垃圾。而垃圾桶喺街係見唔倒嘅。
日本人工作態度非常專業,無論掃街、做地盤、服務員都著哂制服、帶哂襟章。最佩服嘅就係一間賣波鞋嘅sales,佢用把梯企高楂住個大聲公大聲嗌做宣傳,嗌足4個鐘非常落力。我地做嘅宣傳同佢地比,我地只係 “BB仔”。
2008年10月31日.星期五
俾太太去洗手間嘅聲嘈醒左,個鐘嗰陣啱啱6點,係時間起身喇。今朝唔知點解好掛住毛毛,梳洗完出去公園散步同寫吓野。今朝唔覺凍,可能習慣左,後尾睇天氣報告,氣温有成16度。
返到酒店太太已經喺度執緊行李,其中有上機前要飲晒食晒嘅温泉蛋、麵包、粟米湯、布甸、午後の紅茶、水晶梨。收拾好,我地就落大堂check out,今次就真係走喇。我地將行李寄存喺酒店,出去作最後掃貨。
首先同太太喺Café de Crie食西式早餐,我地叫左兩份唔同嘅特餐(一杯茶一份麵包),成80蚊港紙超貴。份早餐太太咬左一口酥皮包就豎起隻手指公話:肥仔份包好好食呀。臨走仲影左啲相添。
跟住就行Tokyo Hands諗住買野俾毛毛,後尾先醒起10點先開門架,唯有去附近7仔買啲糖俾銅銅同盈盈,仲買左盒錫紙包裝軟體香蕉啫哩…好啱食。
等左好耐終於等到舖頭開門,首先去藥房幫姨仔揾藥,咁啱冇貨…失望。再去買狗狗零食,行行吓又夠鐘返酒店攞行去搭巴士去機場。
喺巴士度食野同太太傾開偈,太太話今次睇唔到紅葉唔算數,有機會出年再黎過。好快又個半鐘去到機場第二大樓,好快辦好登機手續(因為太太做左網上check in唔使排隊…太太妳好醒呀。
跟住就去揾野食,太太唔係好肚餓,我地象徵式食啲野。今次食壽司,太太話黎到日本一定要食番一次架,我地食左5碟,平均十幾蚊一碟。有甜蝦、火灸三文魚、蛋、鰻魚,其中三文魚壽司超好食,入口溶化,好食到想嗌。當時我個表情好怪,個師傅望到我以為有唔妥,我即刻豎起隻手指公話:very good!嗰陣時個師傅笑到震,到我地走仲同個師傅影左張相。
仲有啲野食要上機前食晒嘅,温泉蛋、粟米湯、水晶梨。太太今日破例俾我食兩隻温泉蛋(我梗係好開心啦),個水晶梨…我決定搏一搏留番俾毛毛食(我驚水果唔俾上機)。
好快就入閘登幾喇,上到飛機就好想快啲返屋企,因為掛住毛毛。
飛到香港機場我地就駁船返澳門,但係班船十點先開,計一計時間都係食左飯先上船。
太太好耐冇食過中菜,我地就喺機場嗰間 “阿二靚湯” 食飯。太太叫左阿二香妃雞、海味雜菜煲、上湯浸瑤柱蝦干娃娃菜。啲餸好大碟,我地幾乎食唔晒,味道都唔錯。
襯等上船得閒,太太發左短信俾阿美問毛毛個情况點,阿美話毛毛好曳曳,咬斷左條電話線。毛毛咁嘅行為一定要教訓佢,唔係第二時咬電線就會好危險架喇…講下講下夠鐘上船…假期完喇…返屋企喇…宜家又好想繼續放假…