4.30的訴求

2016年4月30日(星期六)

下晝三點幾…塔石廣場敍集咗一班帶住狗狗寵物嘅主人…

雖然個天一直落住毛毛雨…都不能減退呢一班愛護動物人士走上街向議員、政府表達「動物保護法」盡快立法同時返對「23公斤犬隻於公眾場合必須強制配戴口罩」嘅法例….

大隊由塔石廣場出發行經水坑尾...

好多狗狗由主人帶住一齊參加遊行...（相中人係毛毛嘅美容師）辛苦你哋喇！

值得一提係全程都有好多警察、交通警為大隊開路及維持秩序...辛苦晒呀！

大隊到達立法會大樓附近...雖然人數太多但大家都非常守秩序...讚呀！（估計超過3000人）

其中一份重要文件係一位愛護動物人仕搜集世界各地嘅有關法例交俾立法會參考...感謝有心人

立法會代表接信...

大會主持人...

大介媽...忠實支持者...加油呀！

狗狗：你可以選擇唔愛我哋，但請唔好傷害我哋...立法...只係保護我哋啫...請大家多多支持...

上週日毛媽好勞氣

2016年4月22日（星期五）

話說⋯上星期日早⋯我帶咗毛媽、毛毛去西環湖晨運，毛毛由毛媽帶住行，但⋯毛毛全程都搶繩、周圍聞、見到人走近我哋身邊就狂吠。

咁嘅情況⋯毛媽由一開始就鬧毛毛不是、百厭⋯⋯十分激心（近排因為工作忙同病都冇陪毛毛出去玩，可能今次有得出街⋯太興奮），太開心令小朋友失控係經常會發生嘅事⋯⋯毛媽實在太執著了。

毛爸：毛毛今朝實在太開心喇...

令人心灰嘅天氣

2016年4月19日（星期二）

今朝帶毛毛出街散步⋯落到街⋯街上好冷清、好大風、雨粉粉，經過回收場、地盤都唔見流浪狗狗。

心想⋯今日周圍濕濕、大風又冷冰冰⋯會令平日搵食艱難嘅流浪狗狗更為辛苦，想像到呢種畫面自己感覺好難受，自問好即極捐錢同支持義賣⋯最後感覺都係能力有限，今早嘅天氣令人聯想到失望灰心⋯⋯

毛爸：今早心情極失落...

自私的狗主

2016年4月15日(星期五)

今早喺下環街三層樓附近…見到一位阿叔帶住隻淺奶茶色貴賓狗狗散步，狗狗係放繩好聽主人話好乖，狗主都帶住全副武裝(報紙、紙巾、水壺) ，人、狗行到街角…狗狗就便便…狗主行前咗十步先發現狗狗便便完跟上，狗主立即攞出紙巾…呢一刻我以為佢執便便搞衛生…實情…係幫狗狗抹PatPat，地下嘅便便就當睇唔到咁行咗去…當時我嘅感覺…呢啲就係「害群之馬嘅狗主」囉… 

希望狗主自律...有自知之明啦...

工人通知話：毛毛唔舒服

2016年4月14日(星期四)

噚日傍晚…收到工人通知…毛毛好唔開心…好似係好唔舒服，之後又收到工人通知…毛毛嘔。

當時我同毛媽都好擔心，毛毛會唔會食錯野？或者亂食野中毒？到我哋放工返到屋企發覺毛毛非常「生猛」同「開心」…先放心。

原來毛毛因為消化不良，嘔咗一大嚿好硬嘅肉乾出嚟之後就好番，毛毛呢個小朋友食野好心急，經常都唔咬碎啲食物就吞…所以今次出事…

毛毛：毛爸，我嘔...係唔係要禁食呀？

毛爸：你都冇事...但要晏啲先有得食...

毛毛：咁都好啲...

毛毛今次剪嘅裝…滿意

2016年4月13日(星期三)

毛毛每次剪裝都令家人煩惱，又要考慮...揾有誠信嘅舖頭同有愛心有技術嘅美容師，自從幾年前兩位日本技師離澳返國之後…到今時今日都仲未遇到滿意嘅美容師幫毛毛剪裝。

今次毛毛剪嘅裝算係近期最滿意…

毛毛：澳門有愛心同有技術嘅美容師實在太少....

最近…毛毛的生活

2016年4月12日(星期二)

四月初…毛媽出門去旅行期間，有3日我去咗做義工…由朝早9點出門至深夜12點返歸，毛毛嗰幾日唔肯喺屋企騎樓便便、唔肯自己入睡房瞓，嗰幾日我凌晨帶毛毛去散步，喺大廳嘅梳化床瞓 (因為毛毛一定要瞓喺我隔離) ...先解決問題。

一般人嘅想法…狗狗唔係佢要乜你俾乜去滿足佢咖…，但…我嘅想法有啲分別…你每日只係花30分鐘 (時段由你定)同佢散步(自己都得益) 、每晚只係準佢瞓喺你附近(位置由你定) ，咁…狗狗己經覺得滿足，實情對我嚟講係小事。

嗰幾日我問自己，日常抽30分鐘空閒時間會唔會真係咁艱難？

你家嘅小毛孩都好期待你／妳嗰 30分鐘...

小病尚未好清

2016年4月11日(星期一)

感冒…呢個小病真係好討厭…己經大半個月，咳嗽、疲累、肌肉痛…仲未完全好清。

可能年紀大咗…經常都好容易感冒…一病就會發燒，一燒就幾日，由於醫生開嘅藥都會「服後有思睡反應」…(我份工係需要駕駛汽車)所以被迫請假在家休息。

我請假會帶俾老闆同手足極之麻煩，有時都唔知…點同老闆、班手足解析交代，我希望以後能夠經常保持身體健康…咁...以後就唔使作出啲乜野交代。

祝各位身體健康...

銅銅…祝妳生日快樂呀！

2016年4月11門(星期一)

四月十日係銅銅生日…佢細個嗰陣每逢生日都會搞大食會、燒烤…嚟慶祝生日。

今年就... 喺自己屋企簡單咁食飯切蛋糕慶祝生日...

每當我參加自己人嘅生日會都心情覆雜…銅銅BB嗰陣有次唔舒服喊到面都青晒…問佢邊度唔舒服…佢又唔識講，當時好想佢快啲長大識得表達自己，今日…銅銅己經大個女…又叻又乖…自己發覺時間過得太快…成受不了…

生日快樂呀！銅銅