改變

今朝我訓到好晝先起身，外面落緊雨，咁o既天氣令人覺得做乜都冇興趣。起身喇!要返工喇!返到公司先知有o的同事已經辭職，有o的病左冇返工(阿宏)。原來今日係三月最後o既一日，由聽日開始人事上有新安排。

今日因為落雨成個貨場都冇人好靜，我成個下晝都o係度睇CANON鏡頭o的資料，生意一毫子都未做過，今日又要俾人插喇。但係結果出人意表，老闆不但無乍形，仲張o的貨品改價錢、改策略、做速銷。我都估佢唔到。可能四月份公司人事上大改變，搞到佢對我o既態度都有好大o既改變。

蛇王

今日用左 “感冒” 呢個大話同公司請病假。早上陪太太去街市買菜買早餐。想起有時間不如去探老豆，順便拎o的豬肉乾、書同生果俾佢老人家。睇黎老豆佢氣色唔錯，但精神上流露出寂寞o既神情，見到我探佢，梗係好開心喇。同我講好多野，又問我好多野，咁o既情況只係一個問題，老人家成日流流長無乜世藝，心景自然空虛(我年紀大左可能同老豆佢一樣咁)。

晏晝太太約左o的同事去打高爾夫。剩番我一個人o係屋企 “煲碟”同休息，但係當太太出門後，心入面就湧出一種失落o既感覺(o個種感覺好可怕)，我身邊呢個人對我實在太重要喇。其實我應該努力工作搵錢，為退休安排新生活，唔好成日掛住 ……“蛇王”。

開心

不停咁返工返左兩個星期，今日終於放番日假。今朝我同太太搭十點十五分班船過香港，今日天氣好好，陽光普照，氣溫有二十一度。但海上有霧，o的船要慢駛，我地遲左到步。

先到銅鑼環食午餐(大碌竹食墨魚丸、墨魚頭河)，食飽就去商務印書局睇書，我買左兩本有關單鏡相機o既書。按我地o既計劃到宜家訂傢俬，由於我地要寄運到澳門要收費，照公司規定最低消費五佰大元及五千以上收百分之十，但我地訂o個三件傢俬總值只係一千一百八十八蚊(兩個書架、一張台)，如果俾五佰蚊運到澳門係好唔化算，唯有放棄。

下一站時代廣場，離遠已經見到幾米作品模型《向左走向右走》，附近人山人海，每人都手握相機或電話，舉高雙或單手……嚓…嚓…嚓…你擋我、我擋你，你左、我右，不停換位，太太見到就即刻加入行動(我都係)。一樓有一個平台展覽幾米系列，場中有一個叫《月亮忘記了》的大模型，造形十分可愛，可惜唔俾影相。其實o係二樓可以影到，但我部機做唔到(太太我地係唔係買部單鏡機呢?)。我地兩個都好忙，又前又後對焦影相，呢一刻我知我地係好開心架………

最後剩返o的時間就去掃貨，收穫都唔錯，我買左鮮桃汁係俾太太o既、肉干係俾老豆o既、八安士裝可樂同D&G香氛係俾自己o既，太太買左件衫、耳環同幾米o的圓形砌圖，認真大豐收。返屋企喇…開心…開心…好開心呀呀呀………

藉口

今晚老闆放完假返澳門，聽日就正式返工，又係受難o既開始。各部門主管都滿懷心事，因為呢幾日生意成績好差，好難同老闆交代，唔知點應付(我都係)。

返工放工，每日都要返工，壓力好大。今日勁冇心機做野，搞到我返到公司好似隻死屍。放工放工仲要等十二個鐘，我頂唔順提早收工，接太太一齊出去食飯鬆一鬆。聽日放假同太太過香港，暫時放低公司o的野，等老闆冇機會搵“藉口”插我。

商量

鐘點女傭阿美病o左(因感冒)，屋企冇煮飯，唯有同太太商量一齊出街食飯(台灣菜)。我o地叫o左好多菜，鹵肉飯、擔仔麵、泡菜肉絲、醉雞、蟹粉小籠包、仲有豆漿(例牌菜每次去食都係叫o個o的)。肥仔你淨係識叫呢o的，俾太太狂寸。

等食期間我o地商量星期六過香港，其實o係想同太太去睇幾米巡迴展覽，順便去宜家訂傢俬。今晚我o地食飯食得好開心，埋單只係“一夜夫妻”……佰…貳…蚊

靜靜靜

零晨已經開始落緊毛毛雨，一直到今朝，天氣又轉冷喇。一早起身天色陰暗，心情都覺得冷冰冰，感¦覺一o的都唔好。(街外好靜)

今朝要提早返公司，有外勤工作要安排。街上行人好少，變得冷清清。公司由開門一直到下晝只係開o左九張單，外勤工作都唔順利，生意好差，o的主管個個都心情沉重，因為受生意影響。(貨場好靜)

人唔知係唔係年紀大o左，對於價值觀同身邊發生緊o既事有另一種睇法呢。可能人老o左先識得珍惜身邊o既人同追求心景平靜……………

試陣

月初見寫字樓入面o既白板圈o左25、26、27、28四日，當初都唔知點解，原來老闆自己放假去旅行。唔怪得知幾日前叫班同事出去消消夜，收買人心喇。

依家公司裏面正式有實力o既人唔多，短期內只剩番呢o的人手。老闆採用組合形式(強+弱)配搭，睇o下可唔可以做到成績。今日正好老闆自己、阿強、小西、車手同另外兩個同事放假，係試陣o既好機會……

我呢幾日都好積極o係書房構思及量度位置，睇o黎我都要…“試陣”…喇!

等…

早幾日等個老友秦先生拎部二手佳能EOS30D單鏡機俾我試玩、同考慮買唔買。經過好辛苦決定我都係放棄部機(同價錢有關)。

我對相機又愛又恨，愛佢可以將快樂時光保留、重要時刻o既見証、美好回憶既來源，恨佢價錢好貴(我需要的機種)，我已經擁有四部相機，全部都係傻瓜機，SONY、NIKON、富士。係早期設計功能上已算過時，有效像數只有四百幾萬。

要影低自然o既形態同難忘影象就要靠自己o既功力，開機要等、對焦要等、儲存要等………依家決定買佳能最新形號EOS450D單鏡機…不過…都係……要…………“等”……

嘗試

阿強離職己經係鐵一樣o既事實，老闆呢輪經常叫o的同事出去消夜穩定軍心。不過無用，管理同行政都係以佢自己利益出發，點叫人為你賣命呀。治標唔治本。

佢咁多年來都無嘗試檢討o下點解，咁多有用o既人才入職後都用盡所有方法同理由離開公司。佢搞到自己身邊冇一個親信或得力助手(好可憐呀)。

依家有好多時都o係書房寫日誌，發覺地方好亂、太太又存o左好多寶物o係房度，電腦檯又太大佔o左好多地方。心目中要加多兩個書架，換過張新電腦檯，加多幾個膠箱等太太o的寶物歸一放埋一齊，其實我都應該“嘗試”重新改變書房o既擺設，等太太同我多o的空間用。

能力

我地層兩個部門請o左兩位同事，一個做CD部女同事，一個做AV外勤部男同事，佢o地兩個處事、作風、語言能力都好有問題。

女o既同客、同自己人溝通都唔得，無記性、英文唔識(見到鬼佬呢埋)，無作風、唔嘗試自己解決問題、淨係識依賴上司(即係我)。語言方面流俐廣東話、走音o既普通話，至於英文佢好似未學過…呢份工根本唔o岩佢做(佢點會留低呀)。

男o既o係貨場唔知到自己做緊o的乜，淨係識得望住部電視，作風係鐘意表現自己(但係有關AV乜都唔識)。語言……淨係識廣東話，唔知佢可以留幾耐。

講到語言能力就想起同 “BB”o既對話……

太太 : 妳叫什麼名字?   “BB”: 我的名字叫陳煦銅。(純正普通話)

余 : What is your name ? “BB”: My name is NARA。

余 : NALA?          “BB” : No is N…A…R…A NARA。(非常流俐英文)

我諗應該同佢地o的資質有關唔應該懷疑佢o地o既“能力”。

回味

今早終於有心情整理去旅行o既手尾，相片、日誌總結。精彩片段輯錄如下：

大會依家要頒o既係開心旅行策劃獎金獎，2008年度開心旅行策劃獎金獎o既得主係……心兒…恭喜妳…“嘩”好野！

大會 : 心兒、請上o黎領獎……(音樂)……

心兒 : 好開心呀，o係呢度我要多謝我爸爸、我媽媽，冇佢o地…就冇我。仲要多謝肥仔一直咁默默地支持我，就算我唔俾佢食呢o的o個o的，佢都冇怨言全力支持我。好多謝你呀，肥仔，多謝……(眼都紅哂)…

肥仔 : 心兒，妳得到獎我都好開心呀…鳴…鳴…好感動呀。

唔使講都明幾期望下一次旅行喇。“咦”下次去邊度呢…

忙忙忙

今朝返工途中老闆娘打電話俾我，要我同佢準備一部NDS、遊戲、機套，佢趕住要聽日去旅行(同阿MI全家一齊去)。

返到公司開工原來今日好多同事都放假，下晝AV組有外勤要出車，我都係一個人做O野喇。

今日好靜無生意、成個晏晝都O係度睇CANON EOS30D 既網頁，因為有部二手機好想買(係秦振華幫我塭O架)。機身連標準鏡成五仟一蚊O架價錢好貴，如果四仟蚊淨機身我都會考慮，唔係就放棄，好想買呀…………

下晝因跨部門事件，又同老闆口角(噚日O既事佢心心不忿)，好悶呀………講O下講O下又夠鐘收工、收工、收工，又夠鐘收工………

反擊

今朝八點幾出門、去澳門大學行政大樓幫公司收票。再返公司開門等勝哥o黎洗泠氣。做好場面清潔洗完冷氣就開門做生意。

電話響老闆打o黎...余 : 老闆早晨。老闆 : 喂早晨余德慶你今日有幾多單野要出? 余 : 一共有五單，依家送緊兩單..........

老闆 : 余德慶呢頭講呢頭散，噚日單o野你擺明係跣個新同事，阿國華係新人，件事係打擊佢信心。依家好難請人你知唔知呀?個新人肯學肯做你就好好教佢，請佢返o黎係幫你跟你學o野o架，你又唔去了解佢、又唔理佢，o的人點會留低o係度呀?

余 : 我無特登跣佢。每一個新人跟我，我都教佢地好多野，我每日都好努力將o的工作安排得好o的，等大家做得開心o的。

老闆 :余生你唔親自教同跟個新人佢做唔長o既。

余 : 老闆你同我講呢番說話即係打擊我，o的同事走唔係因為我.(我好大聲講.)....

老闆 : 唔..................咁無野o勒...........唔.....

適應

由二零零八年三月十七日起我轉用電腦記錄我的生活點滴........新的方式要時間去習慣。個網誌係我太太幫我起架，係佢教我架(太太妳好叻啊!)。

今朝一早起身，一口氣睇晒四日O既報紙(旅遊O個幾日無睇)。太太今日晏晝要返工所以都起左床，同太太一齊食早餐之後我就返工。好享受同家人食早餐，係福氣O黎架。

返到公司就一直都好忙，因為要星期五前交份存貨報告同貨品存量俾老闆，超忙不過我今日已完成，註明要我親手交俾佢.....又俾機會佢插我。一見面老闆就話 : 余生單ORDER點安排架，客O既地址O係新苗倉附近，你叫兩個同事搵手推車推過去都得喇(我O地根本無人手)，O個附近又無車位，依家俾人抄左牌你話點搞O勒(司機係新人)，余生你檢討O下喇。

公司人手問題檢討O既應該係老闆佢自已，我無同佢講野放低手頭上O的工作就走。收工......

第一日返工。。。。。。。

今日要返工喇!假期完左喇!但仲未識應一朝要返工。一返到公司即刻同班主管開會、聽o下呢幾日有乜事發生、居然聽到一個轟動既消息(唔知算好定壞)、我助手阿強辭職(做到三月尾)

對公司o黎講一定有影響，壞o既、我無o左個好拍檔，好o既、就可以俾o的新人上位。對我o黎講應該開心、好似佢咁後生屈就o係公司一日做十四個鐘完全無晒私人時間，捱o左幾年收入又唔多早走早著喇。另外種睇法阿強搵到份比依家更加好o既工到外面發展(我身為佢上司應該恭喜佢同祝佢前程無限)。同佢合作o左咁耐始終都有o的唔舍得。

噚日開始阿宏又唔舒服見到佢好似好辛苦咁......o的氣氛好差、搞到我勁無心機.........阿強努力呀! 俾心機呀!

曼谷四日三夜食玩Hea之旅 - Day 4

諗起尋日"馬殺雞"好舒服，非常享受。今朝早餐後去酒店泳池游水、影相。基本上我地係包場，因為一個人都冇，可能太早d水又好凍。o個度o係酒店o既Facilities Floor，有3個池，一個大泳池、兩個按摩池，露天架，3個池我都有玩。我地逗留左個幾鐘就走，順便o係周圍影相。呢層仲有閱讀室、小朋友遊戲室、小型影院可以俾人睇DVD、Tea Room、Mini Mart，地方好靜好靚。

影完相就返上房收拾行李。嘩! 我地買左好多野，大部份係送俾人o既手信，裝滿一個細喼、一個背囊、一個手提袋(我帶去d衫褲係舊o既，全部唔要，所以有個"吉"喼裝手信)。執好行李後我地去大堂辦退房手續，將行李寄存o係酒店，跟住就出去行街食飯。太太提議去Central World作最後衝刺，我地上左6樓同7樓。行下行下發現左Zen呢個商場(同Central World相連) o既6樓有好多得意擺設賣 (有包裝成好似蛋糕o既毛巾、人形膠公仔"樹"起個"古古"要黎掛野、仲有d木刻熊公仔手腳都可以360度轉架)。太太話我地今日先發現呢個地方，唔夠時間睇野。

Central World o既7樓就係 Foot Court 叫做 Flavour，有好多野食。我見到一檔係賣豬雜o既，手法好特別，師父由大鍋"撈"d豬雜上鉆板，左手拎义右手拎刀，將肉切片斬件然後擺上飯面，d味好香、賣相又好，仲好多人排隊，我要趕時間所以無試。我買左兩客泰式雜錦肉醬麵、一客芒果糯米飯、一杯飲品、一枝水，太太買左一客泰式肉丸米粉。埋單280銖約70蚊港紙，好抵食。

之後我地返酒店拎行李出機場，Bell Boy同我地叫左部的士講好話用meter行高速公路，公路費(60銖)要我地俾。到左機場咪錶顯示257銖，司機開口要300銖，我俾左320銖佢(太太叫我做"大水魚")。

入到機場o係E區做登記，排隊d人除左有十幾個澳門人外，幾乎全部都係內地人(佢地排隊打尖、講野大聲又嘈、又隨地咁坐、爭先恐後)。太太因為咁俾架行李車撞親隻腳，仲腫左，好彩冇事。排到櫃位登記先知班機延遲一個鐘先飛，即係17:20入閘17:50起飛。由於咁我地多左時間周圍睇野，宜家先至發覺曼谷機場好大架，係用鋼材玻璃結合而成o既圓隧道長形建築，好特別。我地o係間叫Mango Tree o既餐廳食下午茶，休息一陣就入閘。

又見到o個班內地人，佢地排排坐個姿勢一樣，"朗"起隻腳好有節奏地"銀"，好齊架，太太話佢地隻腳好似裝左摩打，簡直係"奇景"。等左大半個鐘開始入閘，d人又爭位，我地有得優先揀位所以唔使排隊入閘。點知上到架接駁巴士，d優先客同普通客都o係同一部巴士(收到料都係要同人爭位架)，我心諗拎住d行李拖住太太邊夠人爭，上到機d服務員已經留左前排o既位俾我地d優先客。

班機18:30起飛，其實遲左差唔多個半鐘，飛左兩個半鐘到澳門，本地時間差唔多十點。開心o既假期完喇。舟車勞頓左大半日要早d休息。

下面係我地今次o既收穫。

曼谷四日三夜食玩Hea之旅 - Day 3

開心既時間過得特別快，今日係第三日。食完早餐後出發去Siam Ocean World參觀，入場費每位750銖包入場、坐玻璃底船、一杯飲品同睇4d電影。入面有好多野睇，有個好大o既魚缸，d魚好大條，其實個缸係弧形，有放大o既作用。d鯊魚、海龜好大隻仲有企鵝、海狸等等，好得意，d蜘蛛水母好特別。之後坐玻璃底o既船睇水底o既魚類。本來仲有4d電影睇架，但我地要花時間去搵食飯o既地方所以淨係睇完d魚就走。

我地食Lunch o既餐廳叫Crepes & Co.，地點唔算難搵，要坐BTS o係Asok站落車，經過Time Square o係Soi 12轉入去，最後要行到身水身汗至到。如果唔同你講一定唔知係間餐廳，因為佢係用園林做主題，入到去裡面好多樹，d座位o係d樹旁邊。餐廳本身成間全部用木做，用竹手藝品裝飾，好特別。個侍應帶我地去樹旁張枱坐低，天氣好熱又行左咁多路都幾辛苦架，後來我地轉左入去餐廳裡面坐(太太話外面有好多蚊咬佢)。我地點左兩客特色可麗餅主菜再加香蕉朱古力班戟同埋飲品，埋單成九百幾銖。佢地張單拎埋黎個陣係放o係個竹製既細盒入面，好特別架。

食飽之後我地繼續下一個重頭節目就係去做massage喇，要去個度仲複雜過黎呢間餐廳。個booking約左4點鐘，宜家兩點所以仲有時間先去Emporium行下打發時間。個商場o係下一個BTS Phrompong站2號出口。行左一個鐘左右就出發，o係BTS站1號出口行一段大路再轉入Soi 39，o係 Coca餐廳出面搭Tuk Tuk(50銖)，架Tuk Tuk左穿右插一輪先至去到Let's Relax。間Spa係花園別墅式，外面冇乜野特別，推門入去已經有一隊人列隊歡迎我地 "拾華d給"。送上拖鞋、飲品，整個過程如下: 有員工送上多種按摩及磨沙用品任君選擇，再帶我地上三樓套房，內有兩張床、一個浴室，首先要沖涼換衫(有底褲供應)。先來半個鐘全身磨沙，再小睡半個鐘後沖涼換底褲，然後送上茶同芒果糯米飯，太太話d糯米飯非常好味。休息一陣就開始全身按摩一個鐘，按完身之後又再沖涼就完成整個過程喇。兩個按摩師全程做足兩個鐘，聽講佢地好低人工，我地見佢地做得唔錯，就每人醒左100銖做小費(小小心意啦)。最後埋單唔計小費3,240銖(係discount左架，因為我地一去到佢地就問有冇coupon，我地就俾左本旅遊書入便張coupon俾佢地喇)。

回程我地搭Tuk Tuk (50銖)返去Emporium，o係Na Ra Ya出面見到好多人圍住睇野，原來係隻小象，好得意架，仲用個鼻同我握手添(o係泰國象係好神聖o既，咁係會帶黎好運架)。

由於我想食正宗泰國餐，所以太太就改變計劃，帶我去懷舊老媽店食晚飯(Ban Khun Mae)。

食飽就行返酒店，咁又過左開心既一日。"要執野喇!"

曼谷四日三夜食玩Hea之旅 - Day 2

同平時一樣，6點鐘就醒左起身寫遊記。今朝係酒店食豐富o既自助早餐，9點出發去參觀大皇宮同玉佛寺。

天氣好熱有成32度，我地由酒店搭的士去，車費71銖，但旅遊書話要成250銖，所以我覺得好平。去到皇宮已經好多人好熱鬧呀。其中有d係本地人，佢地多數著左黑衫，原來泰皇o既家姐過左身，d人去皇宮致祭。

我地要買飛入場，250銖一位。我地o係入面逗留左兩個幾鐘，見到d建築好有特色、好高、好大，屋頂好尖，全部金色，好靚。我影左好多相同短片。好多人，個個都拎住部機係咁影。主建築佛殿俾好多獸面人身像、鳥面人身像、大象重重包圍，全部金色架。每一個出入口都放左一缸蓮花，紫色好靚架。第二邊係皇宮花園，好大個廣場，d植物同草地都經過特別修飾，好靚。建築物好高，門口有著左制服既人守衛架。

我地影完相就走，出到皇宮門口搭車就有麻煩，的士開天殺價要350銖車我地去Central Chitlom。好彩有個好心o既守衛教我地搭Tuk Tuk，車費150銖，風馳電掣咁車我地去到Central，太太有d驚因為個司機開得好快，左穿右插咁。

中午我地係Central 4/F既Greyhound Cafe食左佢地出名既單骨魚露雞翼仲有多士配蘑菇醬。

係Central逛完之後，就去位於Erawan Bangkok 2/F既Erawan Tearoom食下午茶。190銖一個下午茶set，我地仲另外叫左一份沙爹同一杯凍飲。d野食好有特色，感覺好"正"，埋單590銖。

High完Tea之後就搭BTS去Siam Paragon。我地o係佢o既Gourmet Market買左好多野，大部份都係手信，有脆豬肉乾、糖、零食等等，仲有生果、水、果汁、杯麵，要黎夜晚係酒店食消夜。另外又買左茶葉(係唔係好奇怪呢，黎泰國買茶葉)。埋單要成三千幾銖，咁大個仔都未試過係超市買野買成三千幾蚊(超豪)。我地o係G/F既Food Hall食左晚餐(當然係地道既泰式炒河、肉丸米仲有超甜超好味既榴槤啦)，之後就返酒店。

返到酒店係時候點算下d手信夠唔夠分，睇下今日d相，梳洗完就上床邊睇DVD邊食消夜。太太話 "老公，今日我地無做腳底按摩啊"。咁多地方去邊有時間做噃。

---

• 留言者: 編號
• Email: samsong_1999@yahoo.com
• 網址:
• 日期: 2008-03-17 08:59:00

點解你去greyhound 冇叫佢既凍檸檬茶....好正架喎..

曼谷四日三夜食玩Hea之旅 - Day 1

早上6點已經起床，今日開始一個太太精心安排o既4日3夜曼谷之旅。

梳洗後檢查行李，食左個豐富o既中式早餐(有义燒燒肉飯、鹹蛋、蓮蓉包、排骨、鳳爪、北菇雞、鐵觀音茶)。係唔係好"正"呢?原來呢個係出發前o既安排，我地搭o個班機11點起飛1點到曼谷，機上無餐飲供應架，上機又要爭位坐(好彩太太加錢要左優先揀位服務)。d座位係3個位一排，真皮黎架。不過坐我隔離個c奶就慘d，平均每一個鐘起身一次俾我太太去廁所。其實機上有食物賣架，不過唔使講超貴(太太要支水成9蚊支)。

好快過左3個鐘，已到曼谷機場。太太o係機場換左2,000銖，我地就出機場搭的士去酒店。的士站度有counter幫旅客寫泰文地址(要收費架)，方便d司機哥哥帶你去。太太訂左間新既酒店，怕司機攪錯，就俾埋張地圖佢睇，出事喇。司機睇完地圖就同其他司機研究左一輪，太太見到個情況就走埋去解釋，用英文同司機講一輪。我地以為佢識聽，跟住司機拎張地圖過黎用泰文好詳細咁同我地解釋，佢以為我地識聽，大家個表情好似好明白對方講乜野(根本豬同鴨講"好驚")。

終於開車喇，上高速公路，車速成110米架。兜兜轉轉都係去錯左第二間差唔多名既酒店，終於花左成40分鐘先送到我地住o既酒店。車費係280銖+50銖(服務費)+65銖(公路費)。

我地入到大堂checkin，大堂唔算大但好新，我地住30樓。入到房，嘩! 係住宅開放式設計，廚房有洗衣機、微波爐、多士爐、雪櫃、抽油煙機，廁所有企缸同好大個浴缸，好靚架。電視係Sony40寸LCD，最新款式。

我地放低行李就出去行街食野，先去Central 7樓o既Food Loft，o個度有好多特色食品檔可以慢慢選擇，我地買左泰式炒河、冬陰功米粉、芒果糯米飯、香蕉班戟、橙汁，d野好好食。食飽後去左Super Rich換錢，順便探路今晚食水門雞飯。附近就係Big C超市，我地買左一部份手信，有肉乾、涼果、生果、玩具熊、化妝品。再到對面Central World買牛仔褲。新款Levis白牌511都係400幾蚊港紙，超抵! 太太同我一共掃左4條。

行到攰太太提議去做腳部按摩，我地o係Central World 6樓o既Orientist Spa做，一個鐘450銖，埋單連服務費共990銖另加20銖小費，好舒服呀"拾by拾by"。係時候去食晚飯，係旅遊書介紹o既"水門雞飯"，係大排檔式，地方唔算大，超多人。我地食左2碟大雞、4碟飯、2碗湯、2支汽水。太太食左好多(非常好味)。

食飽我地慢慢行返酒店，因為好飽，上到房休息沖涼再繼續食生果、睇DVD碟(太太帶過黎架)。開左電視o岩o岩播緊新聞，畫面講前泰國總理他信同選舉，唔怪得知機場、商場、市面上d保安咁嚴喇，尤其是機場好多特警行黎行去，個個都賀鎗實彈，但係個樣好英同好靚仔架。我地睇左一集CSI NY就訓覺。張床king size好大架，個人打直同打橫訓都唔出界架，唔講喇訓覺。

---

• 留言者: 毛爸毛媽毛毛豬
• Email: peterchee1012@yahoo.com.hk
• 網址:
• 日期: 2008-04-03 23:49:00

呢間係o係市中心o既Grand Centre Point

---

• 留言者: CHO
• Email: chocho7158@yahoo.com.hk
• 網址:
• 日期: 2008-04-03 13:50:00

這間酒店叫什麼名字?好正