2011年4月1日(星期日)
都唔知幾時開始…毛毛變得好現實。出騎樓便便同尿尿、入門口前坐低、喺電梯度要坐低…等等呢啲動作毛毛都做得好，屋企人就用小食作為獎勵(即係讚毛毛)。但不知不覺就產生另一個問題，毛毛每每一做完就等領獎…有陣時入屋企大門口毛毛就坐低等我地入晒屋都仲坐喺度，冇小食獎就唔起身入屋，情况好搞笑。咁…係唔係毛毛好傯明同聽話呢？定係我地嘅態度同方法有問題呢？
2012年3月29日(星期四)
話說前晚食飽飯，毛毛陪毛媽坐喺梳化睇電視…突然間…
毛媽問我 : 肥仔你聞唔聞到有陣怪味呀？
毛爸 : 吓~不明氣體？
但陣怪味好快無左，過左一陣又有番啲怪味，而且仲越黎越濃，啲味好似來自毛毛嗰度，當毛媽查証聞吓聞吓嘅時侯…毛毛突然發出 “呠”一聲…原來不明氣體係毛毛放屁(毛媽中獎)。
毛媽 : 嘩~衰仔你連媽咪都玩…
毛毛 : 我控制唔到咖....
2012年3月28日(星期三)
過左嘅星期日係家庭樂嘅日子…今日要洗白白、按摩、又有得加餸、去海洋同師兄弟佢地玩…真係忙到癲。由於今日姬詩放假所以我地遲左出門，去到海洋已經好多老友喺度玩緊…嘩~好齊狗呀…除左見到師兄弟之外仲有好惡嘅Happy仔，更估唔到見到毛毛B(佢地搬左屋好少黎海洋玩)…………
2012年3月25日(星期日)
尋日食中午飯…喺堆舊報紙度睇到一編 “點樣幫狗狗按摩”嘅介紹，原來按摩對啲過度活躍同唔鍾意做運動嘅狗狗有唔同程度嘅益處咖。按摩…首先由頸肌開始…前腳肌肉、腳掌…後腳大脾肌肉、後腳掌順序輕輕力推拿按摩，聽講經常同狗狗按摩係對佢地嘅肌腱舒緩同安定情緒好大作用咖，由於主人對狗狗經常按摩同親蜜接觸…狗狗覺得得到獎勵會乖啲咖….
2012年3月23日(星期五)
尋日朝等麵包舖開門嗰陣又遇番個妹妹，由於毛毛俾舖頭嘅鐵閘聲嚇嚫狂吠，個妹妹驚到呢埋一邊…。今朝我地晏左落街散步(因為要煲湯)，行到麵包舖見個妹妹企喺度(佢己經買左麵包)，原來佢已經企左一陣係度等毛毛…跟住問毛毛叫乜名就走左，睇黎妹妹好鍾意毛毛…
2012年3月22日(星期四)
今朝一起身行出廳嗰陣毛毛就一直跟住我…同毛毛裝身出去散步，發覺毛毛肚仔發出 “咕碌咕碌…”咁嘅聲，今次斃喇！(擔心毛毛腸胃唔舒服)，落到街毛毛便便同尿尿都正常，但毛毛肚仔仲係有 “咕碌咕碌”聲，有考慮過要毛毛禁食…但最後都俾毛毛可憐嘅眼光打動，毛毛食左餐之後肚仔就冇左聲…呀~原來毛少係好肚餓呀…….
2012年3月19日(星期一)
今朝帶毛毛散步去麵包舖買早餐，見有個妹妹(約12歲)買左麵包後行出門口企定定望住毛毛，睇得出佢好想同毛毛玩又好驚，毛毛坐喺麵包舖門口等，我地喺門口等攞麵包同俾錢，妹妹亦都喺度等…當我同毛毛走佢就跟住我地行，妹妹終於忍唔住問我毛毛係乜野狗…我答佢 : 貴婦狗。妹妹好R頭同好好奇咁講 : 乜唔係 “富貴狗”咩？佢好可愛呀…我好怕狗咖…拜拜喇。個妹妹一面童真其實佢仲可愛….
毛毛 : 我毛毛不嬲都咁可愛咖啦...有乜咁出奇...
2012年3月18日(星期日)
己經好耐冇見過陽光…近排天氣時冷時熱又非常潮濕，難得今日天氣溫暖陽光普照…最好係帶毛毛出去跑跑同曬吓太陽，下晝5:00我地出動去橋頭，毛毛一去到就開心咁週圍跑，毛媽同我就跟到索晒氣，毛毛跑完仲要玩執波波…玩到唔舍得走…照睇毛少今日玩得好盡情呀~
2012年3月17日(星期六)
自從Post左毛毛游水啲相之後…身邊好多朋友都想帶狗狗去試吓游水，前幾日己經收到風Calvin(阿Boy家長)卜左今日下晝2:00帶阿Boy去狗狗會所游水。阿 Boy幾年前上過黎屋企渡假後…我都好耐冇見過佢，今次係好機會。阿Boy係第一次游水，估唔到佢唔怕水…由教練帶左一陣…阿Boy就自己游，仲游左好耐，Calvin覺得游水幾適合阿Boy而且阿Boy又玩得好開心，睇黎呢個夏天阿Boy多左個地方玩喇………..
2012年3月16日(星期五)
今日係我毛毛4歲生日，過去4年嘅幸福生活…都係因為全家人勁錫我，由其係毛爸毛媽…毛媽每日一起身同放工後都抱我，經常整小食俾我當零食，我最鍾意毛媽R我肚腩氹我瞓覺 (除左毛媽每星期掹我耳毛同經常喝我 “唔准Lam手仔”、唔准Lam腳仔外…)。至於毛爸…我最鍾意同佢玩執波波同跑草地，我鍾意瞓喺毛爸肚腩上因為係最舒服同最安全 (當然除左毛爸成日趕我出廚房同趕我出騎樓尿尿啦…)。但毛爸毛媽就係我嘅所有…我嘅生日願望…「毛爸毛媽 “艾粒U”」…………
2012年3月16日(星期五)
今日係毛毛4歲嘅生日，梗係祝毛毛 “生日快樂、身體健康、開心成長…”啦。
4年前屋企黎左隻黑色BB狗，個樣好可憐全屋人都擔心佢…怕佢唔習慣新生話環境。狗狗開心成長亦都突出佢嘅個性聰明、活潑、熱情、百厭、為食同愛冒險。從此屋企就多左一份熱鬧同開心嘅氣氛，雖然佢有時帶俾我地麻煩同擔心，但全家人都係咁勁錫佢…佢就係我地屋企嘅少爺仔 “毛毛”…祝你生日快樂….
毛爸 : 毛毛BB、1歲、2歲、3歲嗰陣...................2012年3月13曰(星期二)
毛媽一直都好肯定游水係會對我健康有益，由其我係水獵犬。己經唔記得上次游水係幾時，所以毛媽某程度上有少少唔放心…落水之前要冲淨凉，著救生衣由教練陪同落池游水，初初落水我太緊張只係游左兩個塘就要上水休息(其間俾Boy Boy寸我泳術差)，啲姐姐用毛巾包住我喺池邊休息(怕我冷親)，之後再落水就輕輕鬆鬆咁游左幾個塘跟住上水，冲凉同吹毛都有個姐姐服侍真爽….
2012年3月12日(星期一)
尋日晏晝帶左毛毛去位於觀音堂街新開嘅「狗狗會所」游水冲凉，嗰度嘅地方分兩層，地層係接待處、小賣部同泳池，泳池係暖水嘅有專人陪住狗狗游水，家長可以喺池邊睇住狗狗游水、影相、拍片。下層係玩樂層，狗狗可以放繩自由跑同玩遊戲(可以包場)，駐場都係青年人同澳洲籍既PR狗boy boy。毛毛今次游水表現初初好緊張…之後就……
2012年3月11日(星期日)
尋日下晝同毛毛散步行到街口轉角…突然間有班人(6~7個哥哥姐姐)一齊大笑，毛毛好似嚇親咁對住佢地狂吠，原來班人喺度食煙吹水，班姐姐都俾毛毛狂吠嚇親尖叫，我即時叫毛毛坐低冷靜，雖然毛毛仲有吠幾聲但都停左，我獎毛毛零食。班哥哥姐姐見毛毛坐喺度就好多野問 : 呢種狗叫乜野狗呀？好少見灰色嘅喎？仔定女呀？佢叫乜野名呀？佢幾多歲呀？…最後讚毛毛聽話(其實係我狂獎毛毛零食，所以佢乖乖地)。
2012年3月11日(星期日)
今朝帶毛毛散完步…行去茶樓買點心俾屋企人做早餐，見番一班老街坊(6 :30~7:15嗰段時間先喺度)，大家打招呼傾幾句，有位阿姐講 : 隻狗仔大隻左好多呀，你日日都帶佢行街，你真係好錫佢。有位街坊對住毛毛就話 : 早晨呀BB我睇住你大咖…咦…今朝你咁靜嘅？，呢頭講完毛毛就狂吠佢(真失禮)，搞到班街坊大笑…………
2012年3月9日(星期五)
今朝一早就落街散步，行去麵包舖頭嘅方向…迎面有隻地盤唐狗行緊過黎，即時毛毛狂吠…吠到唐狗兜出馬路行，呢個時候麵包舖姐姐、巴士站嘅叔叔哥哥都望住毛毛話 : 隻狗仔咁狼嘅。我制止左毛毛吠…但毛毛仲係深心不份，獎小食都唔食，回程街頭街尾街中再遇到三隻唐狗…毛毛狂吠嘅作風…街頭街尾唐狗掉頭走街中間嗰隻狗停喺度等(本黎唐狗行出馬路但當時好多車)毛毛行過先繼續向前走…好惡嘅飛仔毛。
2012年3月6日(星期二)
最近屋企全面開放自由行…毛毛都覺得自己「上左位」，有幾次我地發覺返到屋企…毛毛冇衝過黎大門口歡迎我地，仲瞓喺梳化擔高頭啤一啤我地然後繼續瞓，朝早就瞓到晏一晏都仲籟床，我開廚房閘入去煮早餐…毛毛就跟住大搖大擺咁行入黎，睇黎毛毛好即極挑戰我地嘅底線…..
2012年3月5日(星期一)
星期六見吳醫生嗰陣…順便同吳醫生講毛毛食左杜蟲藥就成晚都唔肯瞓，醫生話啲狗狗食左杜蟲藥會肚仔有啲唔舒服咖，醫生話啲蟲同啲藥打緊交，所以會搞肚、咕咕聲、仲會放屁添…唔怪得知毛毛通頂唔瞓喇，原來肚仔唔舒服….
2012年3月4日(星期日)
今日旁晚帶左毛毛去海洋花園同班師兄弟玩，收到Sunny Sir托Mad媽轉交俾我地嘅一份名貴手信，首先好多謝Sunny Sir咁有心，仲有唔該晒同麻煩晒Mad媽。份手信係早排阿Sir去日本旅行帶返黎咖，聽講份手信係阿Sir特別挑選咖…係盒包裝精美嘅名貴日本抹茶，喺呢度再次多謝Sunny Sir………
2012年3月4日(星期日)
上個月毛媽喺銅鑼灣大超市揾雞心豆粉…問注店職員…佢地唔識。毛媽終於喺地鉄站揾到但係粒裝(要自已打成粉)，原來係整餅仔俾毛毛做零食，聽講雞心豆粉整嘅零食(平時係用麵粉)係對狗狗健康啲 ，由打粉、蒸蕃薯、搓粉…完成喇，今次係 “熊仔”形…
2012年3月3日(星期六)
毛毛體重已經升到7Kg(15.4磅)，咁係超標15%...醫生建議毛毛體形最佳體重係6Kg(13磅)，毛媽亦都開始嚴格管制毛毛既食量同食材份量(減飯同通粉)。雖然毛毛過重好彩仲係好健康，今日要帶毛毛去診所打一年一次嘅防疫針…到時問吓吳醫生嘅意見同毛毛瘦身方法…
2012年3月1日(星期四)
毛毛尋日食左杜蟲藥之後就…喺毛媽旁邊瞓左一陣，跟住就好以食左興奮劑咁，到夜晚唔肯入籠瞓覺，瞓瞓吓就走出廳跳上梳化玩Lam手，毛媽同我輪流抱番毛毛入籠…係咁出出入入一直到三點幾…最後我地放棄，毛毛就喺廳行黎行去跳上跳落左成晚，樓下嘅住客多得毛毛唔少………. 毛毛 : 我都唔知點解咖...肯定係唔想 瞓...
