夜晚十一點幾啱啱到澳門,第一時間趕返屋企睇毛毛。返到屋企毛毛就俾工人阿美督背脊,話毛毛亂咁咬野,連電話線都咬斷埋。唔知係唔係寂寞無聊,咬野發洩呢?
我地要正視咬電線個問題,真係可大可小…毛毛,一唔住你就曳曳喇…
- 留言者: IENG
- Email: cheongieng@yahoo.com
- 網址:
- 日期: 2008-11-02 22:52:00
夜晚十一點幾啱啱到澳門,第一時間趕返屋企睇毛毛。返到屋企毛毛就俾工人阿美督背脊,話毛毛亂咁咬野,連電話線都咬斷埋。唔知係唔係寂寞無聊,咬野發洩呢?
我地要正視咬電線個問題,真係可大可小…毛毛,一唔住你就曳曳喇…
有好多日冇見過毛爸同毛媽喇...唔知佢地去左邊,好似失蹤咁...唔知幾時先返黎...
好彩有美姐陪我,唔係我都唔知點算...不過美姐好忙架,冇乜時間同我玩,成日都鎖我入籠怕我搞搞陣左住佢搞清潔喎...
由尋日開始美姐就一直陪住我,連夜晚都留低喺度,不過毛爸同毛媽都係冇返過黎,唔知佢地去左邊?
其實我好想問美姐但係我唔識講英文,美姐又唔識聽我講狗狗話...真係唔知點算...好掛住毛媽...毛爸...愛心早餐...雪梨...
毛媽毛爸...尋晚冇返黎,午餐同晚餐都係美姐照顧我...
太太經過好幾個星期同好多個夜晚努力去準備去日本東京自由行,聽日就起程,好多安排都進入最後嘅階段,準備接受新挑戰。
百厭仔毛毛就交俾阿美照顧喇,我 都知 太太會掛住毛毛架。臨出發之前同毛毛沖番個涼、買番啲狗狗零食。雖然阿美都好錫毛毛,但係太太都會有少少唔放心。
呢兩日毛毛啲行為有變。我同平時一樣同毛毛散完步返黎就玩執波波,不過佢玩完之後就好安靜咁扒喺度休息(平時自動逗你玩,玩到你煩都唔肯停)。到食野時間個表現都懶懶閒 (平時一到有野食就會發狂)。真係唔知毛毛變乖左定係鬧情緒...我有啲擔心...
女女:Daddy你有冇同我留周杰倫隻新CD呀?係乜野版呀?
肥仔:有呀,係鐵盒精裝版...
女女:你點知我鍾意特別版架... 呢一刻我真係太愛你喇,多謝Daddy... 聽日過黎揾你...
第二日........
女女:Daddy今日揾你唔係淨係黎攞碟架,係特登拎手信俾你,仲有張咭...
肥仔:多謝! “咭” 乜野咭?生日咭?
女女:Daddy我記得你生日架,你要我用十蚊紙折個心俾你,用港紙得唔得...
肥仔:得得... 有心就得la... 咁抱抱錫錫先...
從尋晚至今朝早街外啲狗不停咁吠,好似好不安咁,毛毛當然有份啦。
今朝散步到街口,毛毛又開始不停咁吠,原來對面街有隻肥金毛喺度便便。我同毛毛一直行到對面,毛毛就搶繩狂吠,但隻金毛好靜,只係慢慢行過黎想聞吓毛毛。個主人係我啲熟客陳生,識嘅。
陳生:早晨…乜係你呀Peter,隻狗好Q喎,幾大呀?嘍人玩喎。
肥仔:早晨陳生,毛毛七個月大,佢好曳架…隻金毛好大隻,啲毛好靚呀。
陳生:Silva六歲喇,佢少運動宜家肥左…
Silva猛咁聞毛毛,毛毛就一路避開…之後毛毛變得好安靜,一直返到屋企都冇吠…唔知點解…真R頭…
唔驚唔覺帶毛毛出街散步嘅習慣已經成個月,細心觀察變化都幾大。
呢排毛毛散步,便便同尿尿要分開兩次唔同嘅地方(即係度度放低啲啲)。書講呢啲係霸地盤嘅行為,係正常嘅。
毛毛對於聲音非常靈敏,聽到啲陌生嘅聲音就會吠。至於吠人同其他狗狗,書講係因為毛毛要保護主人作出攻擊準備…唔知係唔係真嘅呢?
尋日因為仲有咳再去醫生,返到屋企同太太講今次西醫…
太太:你去睇醫生咩…有冇開消炎藥俾你呀?(盤問)
肥仔:有呀。醫生話我咽喉敏感發炎要食消炎藥…(無奈)
太太:肥仔你食消炎藥成個月喇,停吓又食吓…咁樣對你個身體有問題架(發火)。睇中醫淨係睇一次邊會好架…中醫幫你清底…要睇幾次架(教訓)。
肥仔:我唔舒服先醫生啫…我都唔想架(反擊),又駛左好多錢,又食左好多藥都唔好返我都好辛苦架…妳應該支持我…唔係鬧我(好委屈)。
其實太太(大家)太緊張,個個都係為我好我知架,大家都好有心,有時事情要大家商量先完滿解決架…(大家要冷靜)。
太太執行李發覺旅行喼唔較大,太太話淨係執左啲日常用品同幾套衫咁個喼就滿左。
以往有個習慣,去旅行執啲衫褲基本上都全部唔要,喺旅行途中買番。有時因個人嘅習慣唔同,自己嘅方法未必個個人都適合,太太就係個類人。我自己就旅行回程先會…迫爆箱。
尋日飯局有蘭茜全家、湯太、我同太太,湯生缺席但氣氛仍然温馨,愉快心情延續到今朝。
離出門旅行嘅日子越來越近,仲有一個星期,太太忙住做事前準備,而我自己仲係唔舒服,換左四個醫生(兩個中醫,兩個西醫)都唔斷尾。我宜家除左煩之外仲令身邊啲親人、同事擔心我健康…自己真冇用。
老友湯生借出旅行喼,尋晚仲親自車個喼過黎,湯生熱心幫忙十分感激,喺呢度同湯氏夫婦講聲多謝。
尋日毛毛過生日真係多野食囉,出街散步我獎左好多零食俾毛毛,早餐有通粉食,下畫阿美整魚飯,生果有毛毛最鍾意嘅雪梨。毛毛好開心呀!
今晚約左班好朋友食飯,能夠相聚一起係開心嘅事,我覺得自己有班好朋友喺身邊好幸運。
今日毛毛啱啱七個月大,照體格進度又高左同重左。生活嘅規律上毛毛都改變左,可以去街街、可以食生果、可以食毛媽愛心餐(魚、雞、牛肉南瓜飯)、毛爸愛心早餐(白烚通心粉)。
平時除左我地返工之外,毛毛可以好開心喺廳度自由活動(早上兩個鐘傍晚五個鐘)。
毛毛宜家大個仔喇,仲越黎越百厭(都係BB仔嗰陣聽話啲),經常令毛媽激心。毛毛帶黎嘅熱鬧同開心我地會珍惜…………… “生日快樂”呀!毛毛豬
今朝未出到廳已經聽到毛毛喺度狐叫(好似喺度講早晨喎)。裝好身就同毛毛出街散步,個百厭仔好開心,一直豎起條尾向前跑(好有自信),好快就便便同尿尿。
途中見到隻中型臘腸狗,毛毛例牌吠到人地怕左佢走開先肯唔吠。返屋企經管理處,個阿姨見毛毛就話:阿皇帝仔返屋企喇… 毛毛望吓阿姨就走開。阿姨:“嘩”好招積喎…
咳…咳…咳,一早起身就不停咁咳。太太好擔心,晚晚燉川貝雪梨水俾我飲,太太真係勞心勞力…但自己就唔爭氣。我已經好努力介口同聽醫生建議…唔食煎炸熱氣野、凍野、汽水生冷野、唔好再冷親同攝親,要多啲食指定嘅水果…太太顧慮係有理由嘅,因為就黎出門去旅行喇…我要再積極啲…
太太終於都忙完行程編排,見到佢咁辛苦我都有少少心痛。宜家開始第二階段…執野。
要評估吓帶啲衫要用幾大個喼(因為天氣凍左要帶啲厚衫)、要統計吓買幾多手信、行程上嘅細節地方要詳細研究吓、另外重要嘅安排亞美點樣照顧毛毛…
今日放假,毛毛今日特別醒目,我地去左公園影相。聽講有啲無良同無聊人放啲毒粉喺路邊等啲狗狗聞左就有事,太太好緊張因為毛毛一出到街就周圍聞,怕毛毛中招。
喺公園撞到班姐姐:妳隻狗狗好得意呀,灰色架,佢幾大呀?
毛媽:仲有幾日就七個月…。
姐姐:同我隻狗狗好似,連陣味都一樣呀,佢地至到一歲仲會大啲架,我隻係棕紅色…
毛毛俾啲姐姐圍住,其中有個姐姐仲同毛毛影相。
我地喺公園玩左好耐,毛毛同毛媽都好開心,毛毛玩到要猛咁飲水…
今日係毛爸牛一o既大日子,o係呢到我祝毛爸生日快樂、身體健康、心想事成、錫毛媽多d、錫毛毛多dd、早d放工番屋企同毛毛玩、俾多d好野毛毛食、多d同毛毛出街玩…咦…好似唔係我生日喎,點解變左好似我o既生日願望咁o既…嘻嘻嘻…anyway最緊要夢想成真...yeh...
毛爸「艾粒U」!
下畫太太靜靜雞帶左毛毛去沖涼裝身,話聽日帶埋毛毛出街同我慶祝生日喎,佢地兩個真係鬼馬喇。
聽太太講喺電梯撞到個鄰居問:你隻係乜野狗黎架?
毛媽:係貴婦狗…
鄰居:乜貴婦狗都有灰色架咩…
毛毛去到美容院俾成班狗狗圍住聞佢…後尾仲玩得好開心喎。太太就惨囉,去接毛毛全程都抱住毛毛一直返到屋企,毛毛好重呀抱住佢好似做gym咁…
仲有兩個星期就出發去東京喇!今次係我同mo爸第一次自由行去日本啊,之前o個兩次 (2003年北海道、2007年大阪京都) 都係跟團去,發覺真係好悶,雖然樣樣都有人照顧好哂唔駛擔心,但係去每個景點都限時限刻,冇自由行咁free。今次胆粗粗自己去,希望唔會失望而回啦。
經過兩個星期o既努力,我終於完成左個行程表喇,以下就係我地將會去o既地方喇:
Day 1 – Oct 26 (Sun)
澳門à香港機場à成田機場à池袋
Day 2 – Oct 27 (Mon)
池袋à新宿à原宿à明治神宮à竹下通à表參道à渋谷à東京鐵塔à池袋
Day 3 – Oct 28 (Tue)
池袋à新宿à箱根湯本à強羅à早雲山à大涌谷à桃源台à海賊船à元箱根à南風莊溫泉酒店
Day 4 – Oct 29 (Wed)
南風莊溫泉酒店à玻璃の森à箱根湯本à上野à新宿à池袋
Day 5 – Oct 30 (Thu)
池袋à淺草à高尾山視覺美術館à池袋
Day 6 – Oct 31 (Fri)
池袋à成田機場à香港機場à澳門
東京三日兩夜機票連酒店package (搭國泰機、住池袋sunshine city prince)
一晚箱根南風莊温泉酒店 (包早晚兩餐)
兩晚池袋sunshine city prince
(by mo媽)
毛毛吠人嘅壞習慣要積極教好佢先得,睇書講如果狗狗吠就拉緊條狗繩chock佢,直到佢唔吠。但係又唔可以喺狗狗吠緊嘅時候大聲鬧佢同抱佢......
可能我嘅方法唔啱,今朝毛毛又好惡咁狂吠人,我拉住條狗繩係咁chock,,但係chock到毛毛咳都係繼續咁吠。而且毛毛仲好出力咁搶繩,我唯有抱住佢。太太話我無配合佢嘅訓練方法教毛毛,慈父多敗兒。
毛毛:你吹咩...
今朝同毛毛散步又撞到嗰隻好大隻、好純嘅金毛尋回犬(佢叫寶寶)。我好欣賞佢,因為佢係喺街見到唯一喺狗廁所便便同尿尿嘅狗女,佢個主人唔駛用狗繩拖住佢。
講番毛毛佢就曳囉,今朝毛毛見到寶寶喺度便便就狂吠人地,寶寶見到毛毛狂吠,便便到一半就走開,個主人叫都唔停低,搞到人地好尷尬。
返屋企前喺附近買早餐,經過地盤,毛毛見到啲狗(六隻唐狗)又狂吠,直頭吠到唔停。賣早餐收錢個姐姐話 :“嘩” …你隻狗仔好惡呀…
毛毛咁嘅表現係唔好架,真係要教好佢…
(mo媽:成日話要教好隻狗,又唔見你真係教佢喎,淨係識得縱壞佢…)
呢排喺街啲人見到毛毛就會問,你隻狗狗係啲乜野狗種黎架,好得意喎。佢換緊毛呀?點解後面腳仔無毛嘅?
係呀…換毛…換毛…
我都發覺毛毛後腳左同右都有啲地方嘅毛好稀疏,我都R頭…
太太已經忙左兩個幾禮拜,我就唔舒服左幾個禮拜,真羞家。
宜家離旅行時間仲有18日,應該開始執吓野。我决定帶2部相樓、2部iPOD、1部遊戲機…
過天氣預報,日本東京平均温度18~22度,要同太太商量帶D乜野衫…
太太呢排都忙死,所以mo媽世界都冇寫左兩個禮拜。
喺屋企訓左成個晏晝,成身都又攰又痛,太太提議去星星公園散步。帶埋毛毛出去,順便影相,放毛毛去啲大草地跑吓。
毛毛去到公園對周圍都好好奇,周圍聞又唔肯行,又係要用好多零食氹佢先肯玩…玩左大半個鐘影左啲相就返閠。
太太順路到附近相熟嘅寵物店買狗狗用品,店主夫婦非常熱情好客,叫我放毛毛出黎玩。毛毛一出籠就吠人,又周圍聞仲…喺人地鋪頭尿尿…呀…呀…真失禮…毛毛你好百厭啊…
今朝好晏先起身,出到廳覺得天氣涼左,例牌帶毛毛出街散步。毛毛雖然仲係狗 “BB” 但佢好惡架,啲大狗都俾佢吠到要走開…
講到自己真係冇用喇(又病左),散完步返屋企就開始狂咳…咳到返公司,啲同事個個都叫我請假休息(佢地好有我心),我安排好手上嘅工作就返左屋企…
零晨外面好嘈,個天落緊大雨一直到今朝。今日假期我本來打算同太太、毛毛出街散步,我諗要取消lu...太太提議o係附近茶樓買點心做早餐。
當我準備出門...毛毛就好開心 (佢以為有街去...= ='''),我唔想佢失望,就同佢一齊出去...不過,全程都要抱住毛毛...因為地下好多積水同落緊毛毛雨......^^......
毛毛一早喺籠度嘈住出街,外面開始落雨,出到街發覺地下好多積水好濕,我同毛毛喺附近兜左個圈就返屋企,毛毛全程都好開心,表現好好。
下晝當我喺貨場忙緊嘅時候,隱約聽到有小朋叫PETER舅父… “嘩”原來係銅銅…梗係黎個抱抱同錫錫啦…
銅銅:我好掛住PETER舅父(BB時候教佢嘅口頭禪)。
聽到銅銅咁講冧晒,要求乜都應承。今次淨係要我DOWN NDS GAME。銅銅好開心同我傾左一陣偈…我感覺到自己都好開心…
一早聽到太太喺廳鬧毛毛,原來 毛毛阻住 太太搞清潔。
“嘩” 好晏喇,要同毛毛出街散步喇。出到街先知落緊雨,唯有喺停車塲遊盪吓,毛毛便便完就返歸。
返到屋企毛毛因為亂咁咬野,又俾太太鬧。今次毛毛冇晒心機,呢埋喺牆角,我氹佢都冇心機玩…
毛毛:我都學人地整左個passport呀...