我聽風 水 老師講2009年係艱辛嘅一年,要好努力同唔怕辛苦先會捱得過架。
我毛毛喺呢度祝各位auntie、uncle、哥哥、姐姐同佢地啲乖狗狗喺2009年事事如意、順順利利、身體健康、新嘅一年更加幸福快樂…新年進步…
太太唔知係唔係俾我傳染左,尋日開始咳同喉嚨痛,我好擔心…
今朝好凍仲落緊雨,同毛毛落到街先發覺地下嚴重積水。毛毛就掙扎落地,可能好奇走落啲水氹度玩,玩到啲腳仔手仔肚仔都濕晒,連便便同尿尿都唔正經,玩到唔肯返屋企。
返到屋企洗腳又搞到洗手間全部都係腳印…個百厭仔最鍾意搞搞震。
毛毛呢期鐘意玩擔襪仔…因為毛媽買俾毛毛玩嘅玩具全部都俾毛毛咬爛晒,毛毛一有機會就入睡房或洗手間擔隻襪仔出黎玩。如果要捉佢,佢就圍住張飯枱兜圈同捐凳底。
毛毛身手靈活敏捷,左穿右插…我就追到氣咳,毛媽見到就笑到合唔埋個咀…哈哈哈…
咦...對腳係邊個嘅呢?
哦...原來係曳曳豬毛毛嘅...
今朝瞓到好晏先起身,仲係唔舒服(唔知係唔係年紀大左,身體就唔聽話)。
今日返到公司都係不停咁咳,班同事同我講:Peter公司啲柯打我地搞得掂…你返屋企休息吓啦。好多謝班同事咁關心我… “好多謝你地呀”…
返到屋企咁啱遇到風 水 老師黎睇風水,原來太太特登請番黎同屋企改吓運…等大家順順利利,健健康康,開開心心…
前幾日可能喺公司做野時候唔小心攝親又開始咳番,一直係咁咳夜晚唔知點瞓喇。一定又俾太太閙:肥仔你梗係又唔戒口食埋啲辣野,又飲凍野又飲冰水…點會好架…
咁…嗰晚就咳到天光(嘈到太太同毛毛冇覺好瞓),太太就“則…則…”聲,連毛毛都“un…un…”聲。
到第二朝成身啲骨都好似斷晒咁,喉嚨好似爆炸…結果要請假去見李醫生…
聖誕節之後最開心嘅日子,今日有毛爸同毛媽陪我,拆禮物喇…
我收到好多禮物呀…毛爸送左零食俾我,毛媽就送骨骨玩具,仲有美姐送真皮頸帶俾我做禮物…仲有…
好多謝你地咁錫我毛毛…多多多謝謝謝…
毛毛:嘩...好多禮物啊...
毛毛:好心急啊...唔好掛住影相啦...拆得未呀?
毛毛:好嘢!拆哂喇...有3份禮物係我架...yeah...
今個聖誕節毛媽放成個星期假陪我同毛毛,毛毛一定好開心因為可以喺屋企自由行,自己就唔爭氣病左…
無論點樣,能夠同家人一齊過聖誕係好幸福嘅事…我祝各位有個 “幸福快樂嘅聖誕”…
健康都仲未完全復原,今日我選擇返工。
休息咗3日啲工作堆積如山又要搏命喇…
尋晚夜麻麻毛毛好不安咁狐叫,原來毛毛喺個籠度尿尿整濕晒件衫同肚仔啲毛。毛媽同我夾手夾腳同毛毛換左件衫、抹乾淨個身同吹乾啲毛、清潔好個籠,毛毛先肯瞓。個百厭仔仲瞓到今朝過晒鐘先起身…
成晚都咳幾乎未停過,今日同公司請左一日假喺屋企休息。阿妹好緊張一早打電話黎,下晝會同埋銅銅、銘銘過黎探我同毛毛。
3點幾有人鍾…阿妹全家都黎晒,仲帶左啲湯丸俾我地…由銅銅黎到屋企開始毛毛就好忙…又要執波波、又要手手,左手、右手。又問毛毛識唔識咁…咁…咁…突然間屋企好熱鬧…
肥仔:銅銅宜家係黎探舅父定毛毛呀?
本來今日去打game,但因病情反覆取消。契媽、阿妹打電話黎問我身體情况。
一早要同太太去買餸準備聽日過節,下晝我同太太帶左毛毛去大草原散步影相,毛毛又跳又吠又跑,太太同毛毛兩個喺大空地跑來跑去,玩得好開心。
我最開心嘅就係見到姨甥女盈盈,我好耐冇見過佢,盈盈嗰個招牌童真笑容…令我好開心…好高興見到妳呀盈盈小朋友…
呢兩日因感冒引起嘅咽喉、氣管發炎令到我夜晚咳得好犀利, 仲有 太太因為冇覺好瞓有意見,因為咁我自己都好內疚。朝早亦好晏先同毛毛出街散步,人多左車多左,毛毛一出門口就狂吠。
今日我臨返工就發現毛毛喺度猛咁lam隻腳仔,仲lam到成隻腳掌都濕晒,我同毛毛檢查但冇乜發現,最後同毛毛洗左隻腳仔同吹乾…毛毛睇黎都冇乜事喇…但我就遲晒大到喇…
同毛毛相處左半年,毛毛令到我地生活上、習慣上都有好大嘅轉變… 屋企熱鬧咗 (毛毛把聲好響亮) … 多咗啲玩具 (大部份都係毛毛嘅)… 早咗起身健康有改善 (其實係同毛毛出街散步) … 成朝起身踎低大肶有力咗 (個動作係同毛毛執便便) … 同太太溝通多咗 (為咗用乜方法教毛毛成日鬧交)… 阿美整狗狗餐做到出神入化 (經常要整大餐比毛毛食)...
總括黎講,屋企多左生氣同開心...今個月16號係毛毛9個月大嘅生日呀......
毛毛…生日快樂呀...!!!...
咦…今朝咁晏都未見毛爸出黎嘅?唔知佢記唔記得16號係我生日呢?我都係入房叫醒毛爸同我出街散步。
毛爸今朝戇居居,啲反應又好慢,同毛毛玩執波仔毛爸都好冇心機。最衰我冇零食獎毛爸,如果有零食獎俾佢,佢一定會開心啲架。
後尾先知毛爸唔舒服,唔怪得知連我生日都唔記得啦…
前日喺愛犬同樂日,毛毛一到場就狂吠,其他狗狗就冇理毛毛,喺場入面自由活動。
喺會場我地見到碧咸醫生,醫生話佢認得毛毛,仲同我地講毛毛唔可以晒咁多太陽,因為哂得耐佢眼圈就紅晒喇。
我地又見到同毛毛剪毛嘅美容師同佢地隻駐場狗七彩貴婦狗(啲美容師話毛毛同佢似兩兄弟)。
現場仲有個日藉女美容師即場示範同狗狗剪毛。
毛毛玩到好開心仲收到好多零食添…
尋日我同毛媽、毛毛参加左AAPAM舉辦嘅愛犬同樂日。我地中午去到會場見到好多狗狗己經喺廣場走來走去,有芝娃娃、八哥、史納莎、貴婦、金毛、哥基、獵腸、約瑟爹利、北京狗、雪撬、松鼠仲有好多BB狗…一次過見晒咁多種狗真係難得。
好多狗主帶埋相機去同啲狗狗影靚相,見啲狗主人咁有愛心對啲狗狗,自己心想如果人人都咁有愛心…就唔會發生遺棄寵物嘅悲劇…希望少啲咁嘅事發生啦…