香港寵物節2017

2017年2月25日（星期六）

香港大形嘅國際寵物用品博覽會，係每年我哋必去掃貨嘅地方，雖然年年展覽嘅產品都係差不多，每屆亦有好多寵物用新產品勇現，個別嘅產品好前衞⋯先進、天然、健康、人性化⋯⋯。

入場最開心嘅事除左「喪拼」之外梗係遇到班老友啦（毛毛B嘅家長、格格媽、熊爸⋯⋯），在我嚟講入場主要目的係為了解狗狗生活最新嘅配套（淨水器、GPS定位器、寵物保險、寵物善終服務⋯）、經驗交流，為毛毛選購主糧、零食、藥物、生活用品、衣服、玩具⋯⋯等等...

入口大海報...

呢個攤位超豪華...貓迷朝聖嘅好地方...

玩具攤位...俾毛毛見到一定開心到不得了...

呢個牌子嘅狗狗頸帶係我哋嘅至愛...毛毛、Coffee都用緊...

舊年( 2016年 )寵物展就遇到老友Laughing同菠蘿仔...(相片，毛媽、Laughing)

今年有免費票入場...

我偶像...臺灣訓狗師...熊爸...

開心到此一遊...明年再見...

又濕又凍

2017年2月25日（星期六）

呢幾日返風氣溫下降，清晨氣溫跌到 10度以下，今早氣溫只有 8度仲落雨...凍上加凍。

唔知幾時開始毛毛怕凍，呢兩日毛毛都瞓喺被竇度唔肯活動（平日會瞓喺梳化度），有零食都吸引唔到佢，俾玩具佢玩...佢就擔去被竇度收埋，情況就好似唔舒服咁，行為令我亂想，可能氣溫嘅急降毛毛未能習慣...

我差啲以為毛毛失蹤...

原來係維珍喺梳化做咗個被竇俾毛毛...

毛毛同維珍關係極好

2017年2月23日（星期四）

新家務助理維珍為毛家服務咗已經兩個幾月，毛毛同維珍相處得非常好，維珍有時間都會陪毛毛，每日維珍到來毛毛都熱情歡迎佢，由於毛毛會用雙後腳企高（咁會對腰椎帶嚟推壓，會令腰部受傷嘅危險）⋯又太興奮而唔聽指令⋯搞到維珍照顧毛毛好有壓力...

毛毛亦都好聰明識將相處關係分得好清楚，佢同維珍嘅信任低線只係⋯食同玩，維珍日常幫毛毛抹手抹腳、清潔咀仔毛毛就⋯全部反擴...

毛毛：有零食俾我食又同我玩...梗係好朋友啦...

跑⋯路上的另類驚喜

2017年2月22日（星期三）

過去⋯一直操練嘅地點都係氹仔單車俓，除咗偶然有太太陪伴之外⋯都係一個人跑。

今日跑路上遇上家務助理陪契媽散步⋯令我意外及驚喜，冇聽過契媽講佢經常到單車俓散步...

令我意外嘅係⋯契媽講佢次都行畢單車俓（6 公里 ，大約萬幾步）...

令我驚喜開心嘅係契媽有精神同體力能應付到，咁⋯即係健康同狀態都非常好。

令我感動嘅⋯係契媽無微嘅關心：阿慶，你唔好咁搏呀，你頂唔頂得順呀？身體緊要，小心身體呀！

長輩嘅關心只係簡單嘅幾句話...令我感動暖心...

當期時會反問自己...自己對長輩會唔會咁有心？

毛毛路不拾遺食

2017年2月21日（星期二）

屋企人公認毛毛係「為食豬」，過去有壞習慣⋯喺街執野食，經過行為訓練同嚴勵責罵之後就改善咗，毛毛初初都會受到食物引誘而忍唔住，經過日常提點⋯「執野食」嘅壞習慣改正咗。

今早⋯我帶毛毛出街散步⋯行入電梯⋯毛毛周圍聞⋯有個角位聞得特別耐⋯之後仲好乖咁坐低⋯我無為意。

散完步⋯行入電梯⋯毛毛喺同一角位坐低，我覺奇怪細心一望⋯先發現有嚿麵包喺角位，毛毛淨係望住冇執嚟食（執死雞）呢種服從表現對於某啲狗狗未必有難度，但對毛毛嚟講就係一大進步⋯⋯

毛毛雖然係百厭星，但有時毛毛嘅行為令家人相信佢係「叻仔」...

懷緬過去⋯常陶醉...

2017年2月18日（星期六）

最近⋯整理啲相嘅時候⋯俾我發現一張好珍貴嘅相，毛毛同師兄弟一衆影嘅相。

張相唔肯定邊一年影，但好清楚記得當時每個週末、日傍晚，毛毛都會同班師兄弟、一大班朋友仔喺海洋花園前面嘅草地玩追波波，家長會帶啲零食俾小朋友食，嗰陣⋯小朋友同家長都好開心玩到唔捨得走⋯⋯

由左至右 Mad Mad、荳 B、毛毛、大介...

Mad Mad 大師兄已經移民去澳洲...

令人憂心嘅毛毛...急急⋯四步

2016年2月17日（星期五）

兩日前⋯⋯由於我好晏先收工⋯跟著同太太出去食晚飯，冇帶毛毛落街散 步。

我食飽飯返到屋企，毛毛就一直跟著我⋯跟出跟入，行為仲有啲古怪。

於是我帶毛毛出去散步，一落到街⋯毛毛第一時間⋯一個箭步一督大尿尿，再一步一大堆便便，又再一步又一督尿尿，最後一步又一堆便便，毛毛一連四步尿尿便便之後...好似完成仼務咁...就趕著返屋企，原來毛毛三急仲死忍爛忍⋯

咁嘅情況⋯真係驚毛毛忍出病來。

屋企騎樓有尿扳有鋪報紙俾毛毛便便同尿尿...但毛毛依賴落街去廁所...

我工作超時了⋯

2017年2月16日（星期四）

昨日⋯在室內工作跟進手機收發訊號⋯查咗好長時間都未維修好⋯唯有收工⋯但已經做到好晏都冇發覺（返到屋企 8：00）。

由於我係屋企嘅大廚⋯所以要趕時間返屋企煮飯，返到屋企⋯全家人都用奇異眼光望著我（包括毛毛同工人），有人仲冷言冷語咁講：宜家先煮飯⋯聽朝先有得食啊 (我知番說話係形容等好長時間絕冇惡意)。

但當時⋯呢番說話實在今我難受，我明白大家等我等到好肚餓了，我自己都係...好難過好無奈。

夜了...

毛毛祝媽咪生日快樂！

2016年2月16日（星期四）

每年2月16號係毛毛嘅大日子，大家唔好諗錯隔離呀（我毛毛下個月16號先牛一呀）...

實情今日係毛媽生日嘅大日子，毛毛：祝媽咪生日快樂、身體健康、心想事成⋯⋯

毛毛：媽咪，生日快樂呀！

澳門民政總署

2017年2月15日（星期三）

自從冇喺白馬巷返工之後⋯就冇去過民政總署同議事亭前地（前後已經七年），聽講嗰兩個地方每逢大節日都布置得好靚同夜晚仲有好靚嘅燈飾。

前一排因為要喺附近開工經過，忍唔住影咗輯相⋯⋯

議事亭前地...

春節燈飾...

民署內庭

大挑花...

庭園走廊...

內庭樓梯...

入口走廊...

春節財神陣...

展覽大廳...

龍首...

大花燈...

前地廣場...

聖殿...

聖殿走廊...

元宵節素食嘉年華

2017年2月13日（星期一）

四年前開始⋯每年農曆新十五(元宵節)由佛光青年團主辦單位舉辦嘅「傳統遊戲暨素食文化祭慶祝元宵素食嘉年華」今年踏入第五屆，今屆同往年一樣喺三盞燈圓形地及光復街舉行，特別嘅係今年一連舉行（正月十五、十六）兩日。

開幕禮由釋覺仁法師、政界、文化界嘉賓⋯聯合主持，當日活動節目有傳統遊戲、魔術、流行曲、經典金曲、粵曲、武術、醒獅、舞蹈表演、祈福法會、猜燈迷、派發結緣禮品及大抽獎⋯場面溫馨熱鬧，另外光復街設有超過20檔素食攤位⋯檔檔有特色。

今次活動非常成功⋯有賴佛光青年團、各位師兄、師姐⋯義工們同專業技師們無私嘅付出，佢哋實在有功有勞，要俾個讚。

今界嘅舞台...

觀音菩薩...善信可以上花...

財神爺...

粵劇大佬官...

街坊們排長龍攞結緣禮品(暖手器、素麵、水、文具、佛刊...)

猜燈謎區...

三盞燈圓形地路邊燈飾...

祈福法會用嘅蓮花燈...

父女拍檔表演經典金曲...

推薦超級好味小食...素春卷、芝士雞蛋仔、橙味蛋糕...

我好開心能夠有缘參與攝影師義工...

冰冷的早晨

2017年2月12日（星期日）

天氣凍咗幾日⋯連毛毛都賴床，過去嘅兩個星期日都因為天氣不佳而冇帶家人行山晨運。

今早⋯天氣雖然有啲凍⋯毛毛一早就起床，跟住我行出行入，好似知道我會帶佢一齊出去行山、玩又或者聞到今朝我煮三文魚餐俾佢食⋯而變得興奮、開心、即極...

對於毛毛小朋友嚟講食同玩嗰種吸引嘅動力⋯非同小可⋯⋯

毛毛：早晨呀！各位老友...

雞年新十五⋯元宵節

2017年2月11日（星期六）

中國農曆法⋯今日係正月十五（新十五）元宵節，亦都係燈會節同情人節⋯⋯祝大家元宵節⋯幸福快樂！

中國情人節⋯祝有情嘅人終成眷屬、戀愛中嘅人甜甜蜜蜜、初戀中嘅人蜜運成功⋯⋯

祝大家元宵節快樂！祝太太生日快樂！

親愛的太太，祝妳生日快樂！

2017年2月10日（星期五）

聽日就係太太（農曆）生日，首先祝太太...生日快樂、身體健康、心想事成...

每年呢段時間我除咗準備一份太太生日禮物之外，仲要準備多兩份禮物作為 "情人節 "同 "結婚紀念日 "...每年嘅 2 月份都心情覆雜...感恩、幸運、快樂...

感恩，過去艱難嘅人生路都有太太陪伴一齊行...

幸運，8 年前同毛毛有缘，而毛毛更成為我哋嘅家庭成員...

快樂，有心兒（太太）、毛毛（百厭星）令我哋家充滿歡笑同熱鬧...

心兒（太太）、毛毛（百厭星）我愛你哋...

今年啲禮物行貨咗少少...但最緊要有心...

心兒，生日快樂！我愛妳！

追憶⋯醒獅

2017年2月10日（星期五）

前幾日⋯⋯好多大公司開工大吉請醒獅團表演助慶⋯見到咁嘅場面心入面有種莫名奇妙嘅高興。

五十年前東南亞國家唐人街都好盛行農歷新年舞獅，細個嗰陣記憶中屋企係有一套醒獅（聖頭、鑼、鼓⋯）而套醒獅只會逢農曆新年期間先出動，由表哥、棠兄弟帶隊去唐人（中國人）屋企舞獅拜年領紅包（豆利是）⋯非常熱鬧，而當時六、七歲年紀嘅我好期待農歷新年⋯因為跟著表哥出獅⋯可以去好多地方玩、好多叔叔、阿姨好熱情咁請我哋食野、又領好多紅包、最後獅團仲可以有錢分⋯呢種筆墨形容唔到嘅新年氣氛、開心、快樂⋯只能夠回憶。

恭賀新禧、恭喜發財

我跑⋯在風雨中

2017年2月9日（星期四）

凌晨五點幾⋯⋯

喺樓下熱完身⋯就向住氹仔單車徑方向跑，跑咗 1K 就開始落雨，初初嗰 4K 都係微微細雨，跟著越來越大雨，於是決定跑返屋企，啲雨大到令我全身濕透⋯⋯

我跑經巴士站⋯啲人指指點點用奇怪嘅眼光望實我⋯感覺上：落咁大雨仲跑嗰個儍佬變落湯雞囉。

嗰種眼神令我相信係話我⋯我係癲佬。

跑...係一種信念...

毛毛受驚了

2017年2月8日（星期三）

今早我跑完步返屋企⋯唔見毛毛歡迎我⋯

原來毛毛卷埋一嚿瞓喺梳化邊，毛毛見我入咗門⋯就垂頭垂尾好慢咁行埋我身邊，我即時喺度諗⋯毛毛你喺度搞乜？毛毛你有事？⋯⋯跟著我聽到斷斷續續嘅「叮～叮叮」聲，啲聲係付近大廈消防警鐘響，咁⋯我開始明白點解。

因為毛毛童年陰影，毛毛細個受訓嗰陣其中一種工具係用「單車鈴」，而當時用嘅「單車鈴」係我自家製，由於鈴聲太高音同太響嚇怕 咗bb 仔毛毛，由嗰陣開始毛毛對所有嘅叮叮聲都好驚，由其係「單車鈴」⋯⋯

毛毛驚到雙目失魂...可憐

毛毛：毛爸，我怕怕...

毛爸：從嗰陣開始...我拆晒啲單車鈴，我所有單車都唔裝「單車鈴」...

我有你相伴

2017年2月7日（星期二）

一個長假期⋯多咗時間留喺屋企，亦多咗時間陪伴家人，原來無論人或者寵物都好怕孤獨，由其係毛毛。

毛毛近期特別痴身，因為除咗放假平日冇咁多時間相陪，佢任何時間都跟出跟入⋯我入廚房煮飯、去便便丶沖涼⋯毛毛就會坐喺門口等我，如果我去耐咗毛毛就會 R 門。

心入面一直都咁想「小朋友係需要家人陪伴咖」，但當自己放假、受傷休息、病咗瞓床、失落又或者冷靜咁停落來嘅時候⋯會發覺毛毛小朋友就喺身邊全天候咁陪伴住我......

細心想⋯唔係毛毛要我哋陪，而應該係毛毛陪伴我哋至真⋯⋯

有你（毛毛小朋友）相伴...你為我家帶來充滿歡樂嘅正能量，多謝你...

毛毛：咁...你識做啦，有乜好野食攞晒出嚟啦...快快快

毛爸：衰仔，浪漫啲唔得嘅...為食豬...