毛爸毛媽毛毛豬: 5月 2015

2015年5月31日星期日

太累了⋯

2015年5月31日（星期日）

已經超過一星期冇寫日誌，因為⋯趕工、上有關工地課程⋯忙到身體也誇了，攰死。

前晚深夜⋯身體唔舒服，原來係身體＂發燒＂仲燒到 38 度幾，全身肌肉同關節痛得要命，清晨去咗氹仔鏡湖急診見醫生，雖然食藥同瞓床 36 小時，但身體發熱一直保持＂高燒＂（38．9度），今朝再去見醫生...

醫生建議如無改善就要抽血做「流感病毒測試」，如果係流感⋯起碼要 4天至一星期先完全好番⋯今次大劑。

毛爸：啲藥好難食，但...唔食仲辛苦...

2015年5月22日星期五

可惡的毛毛

2015年5月23日（星期日）

呢排朝早經常落雨，前幾日帶毛毛散步⋯遇到兩隻狗狗（啡色貴賓同小松鼠）由非籍工人帶住，而兩隻狗狗都友善活潑，大家相遇毛毛表現出奇地安靜，當貴賓狗同毛毛聞鼻鼻打招呼嗰陣⋯毛毛發爛咬對方咀咀⋯令對方狂叫，事發太突然⋯對方好快帶一對狗離。

事後我擔心⋯毛毛有冇咬傷對方？呢幾日都冇見佢哋散步⋯會唔會出咗事？

毛爸：毛毛，你咬人家...同人打交？失禮呀...

毛毛：毛爸，你唔好抹黑我呀...我只係熱情同佢Kiss咋...

毛爸：你作大...而家都唔知人地有冇事...

2015年5月19日星期二

以前⋯做零售業店務主管，每逢落雨、落大雨⋯對鞋濕咗少少件衫濕咗就覺得好慘⋯仲要面對場面冷清生意差⋯老闆就會黑面⋯心情慘上加慘。

今日大雨不斷⋯而有一批物料要運入地盤工地，一班手足連同老闆一齊被迫在大雨中工作，雨水、汗水令衫褲全濕，我更不幸跌落污水糟令雙褲腳同鞋都載滿臭到作嘔嘅污水⋯雖然情況咁差，大家都濕住身繼續工作⋯連續7小時（冇放飯，個個都係超人連老闆都係），到放工時候⋯我唔敢同大家一齊行⋯因為除咗全身濕透之外仲全身臭氣沖天…

毛爸：原來濕住身開工係好辛苦咖...由其係對腳...

老闆建議我買番對"靚"嘅安全鞋...嘩～有機會著名牌安全鞋返工喇...

2015年5月17日星期日

毛毛的新鞋子

2015年5月17日（星期日）

狗狗氣球式嘅腳套鞋仔毛毛好耐之前已經有一套⋯係橙色，呢啲腳套有防水防滑功能。

但討厭俾人搞腳仔手仔嘅毛毛⋯幫佢著腳套就有啲難道，毛毛會發爛兇人⋯令毛媽怕怕，冇幾耐之前腳套出咗黑色特別版，毛媽忍唔住手買咗一套⋯俾毛毛雨後散步用⋯

毛爸：黑色好襯毛毛...

毛爸：好型呀...

2015年5月12日星期二

令人憂心嘅毛毛...新防蚤工具

2015年5月12日（星期二）

毛毛兩次嘅蚤患⋯除咗令家人擔心之外⋯更令毛媽對現時所用嘅防蚤水、防蚤粉、蚤帶⋯開始信心動搖。

今次毛媽搵咗一種叫防蚤金牌俾毛毛帶作為防蚤之用，而呢一種金牌嘅防蚤方法係點發生作用呢？我好好奇，不過為家人為毛毛有效防蚤⋯乜野方法我都願意嘗試⋯

毛爸：毛媽特別買咗一條純銀鏈俾毛毛配帶防蚤金牌...

Queen后座的午餐

2015年5月12日(星期二)

今日向公司請一日假去醫院做常規身體檢查，中午到老友開嘅「Queen后座」食飯。

我點咗...食店推薦由店主親自煮嘅 “叉燒飯” ，份餐十分精緻有兩件叉燒、蛋、菜、炸物…對於我嚟講非常有驚喜，由其係好軟熟一層肥一層瘦嘅叉燒…好住家菜嘅味道，令我好滿足。

最可惜係老闆曾先生唔喺舖頭，如果唔係…以我同曾生嘅交情關係可以將份餐升級為土豪版。

毛爸：今日唔使勞動...餐嘅份量啱啱好...

毛爸：要食住家飯嘅味道...后座係一個選擇...

因為有個膠兜

2015年5月12日（星期二）

晏晝⋯我坐喺梳化做緊工作報告⋯毛毛喺騎樓尿尿完之後坐喺尿板旁邊望著我唔過嚟攞零食，我仲發現尿板旁邊有一大灘尿，正當我想鬧毛毛亂咁周圍尿尿嗰陣⋯就見到有個膠兜喺尿板中間，係毛媽嘅育苗盒⋯應該係俾風吹鉄落嚟，毛毛為咗被開⋯所以尿尿喺尿扳外面...

嘩～毛毛好叻呀...有時真係好難理解毛毛係唔係咁醒目...

毛毛：毛爸，我知嗰個係媽咪嘅玩具...所以我冇整污糟呀...我係唔係好醒呀？

毛爸：叻喇叻喇...

2015年5月9日星期六

母親節2015

2015年5月10日（星期日）

今日係「母親節」祝福所有母親「母親節」快樂！

記憶中好多年嘅母親節都落雨⋯雖然母親大人仙遊多年，到每逢「母親節」都十分想念母親。當自己年紀大又為人父母先明白⋯當年自己覺得母親無理嘅限制同嚴勵嘅家規⋯實情係溺愛子女同為子女嘅將來著想...

祝大家有個快樂嘅母親節假期...

毛毛心聲...媽媽 I love you！

2015年5月10日（星期日）

今日係「母親節」⋯祝毛媽同全世界嘅媽咪「母親節」快樂。

講開又講⋯媽咪經常都搞我手仔腳仔同耳仔（毛媽係幫毛毛檢查同清潔）令我十分不滿⋯我會狐叫甚至咬媽咪，但媽咪只會大聲鬧我唔乖之外⋯依然咁愛我...

我搗蛋嘅行為係我自然反應同本性⋯請妳原諒我，媽咪我愛妳⋯母親節快樂！

毛爸：毛仔，我哋夾份買嘅禮物...你估毛媽鍾唔鍾意丫？

毛毛：包到咁靚應該OK卦...我已經用晒啲零用錢...好彩有你包底啫...

毛毛：毛媽，小小意思...母親節快樂！

嬲怒嘅阿伯

2015年5月8日（星期五）

今朝行經天橋低由於修路⋯路邊加咗圍欄⋯只能緊緊讓兩個人通過，毛毛就喺通道中間便便⋯當指令毛毛坐好我執緊便便嘅時候⋯有位阿伯一手拎著麵包一手拎著報紙擦身咁行過，毛毛就突然狂吠阿伯，我除咗拉實毛毛之外即時向阿伯道歉，雖然冇任何身體或物件上接觸⋯阿伯就十分嬲怒及不滿。

實情係阿伯行經毛毛嘅時候雙手擺動姿勢好似想用報紙打毛毛⋯所以毛毛本能反應「還擊」，阿伯你原諒毛毛啦，大家吾會啫。

毛毛：我無心咖，係阿伯想用報紙打我...我係自我保護反應咋...咁都有錯？

毛爸：吾會啫...唔使咁大反應嘅毛毛...

2015年5月4日星期一

春季熱帶蘭花展2015

2015年5月5日（星期二）

春季蘭花展⋯由5月1日開始，今次喺氹仔龍雲葡韻舉行，今次花展極具規模有⋯花藝展、熱帶蘭花、罕見蘭花⋯等等...多年來蘭花展都會喺盧廉若公園舉行，而內容以國蘭同洋蘭一齊展出。

龍雲葡韻每年都會舉行幾次嘅花展⋯以熱帶蘭花為主提又咁大型今次係第一次。

呢種蘭花第一次見...聽講叫「蛇蘭」產地係中國...

拖鞋蘭...

呢朵蘭花好多人等住影佢...唔知點解...

紫色蘭花太太最鍾意...

呢種蘭花嘅花朵只有黃豆咁大...以前我見過...開到咁靚我係第一次見...

姿態似跳舞嘅蘭花...

呢種蘭花顏色好靚...但唔知叫乜名..

當大量花朵同一時間開花...令觀者心醉...

好以鳥類嘅花...

平頭裝

2015年5月4日（星期一）

毛毛近期⋯蚤患、皮膚出紅點、擦損腳掌⋯

毛媽帶毛毛去寵物店剪裝，毛媽同美容師講：要幫毛毛全身嘅毛都剪到最短，方便幫毛毛檢查同容易打理。

但當哋去接毛毛嗰陣⋯發覺毛毛除咗身短毛之外連頭頂啲毛都好短⋯平頭裝⋯個樣好搞笑。

毛毛：嗱～毛爸唔好醜化我...唔好影呀...

毛毛：係要影...就等我擺好甫士先...

毛爸：毛仔，真係幾靚仔喎...

2015年5月3日星期日

好勝嘅毛毛

2015年5月3日（星期日）

本來今日凌晨出去踩單車，由於唔知原因自己雙手發麻⋯所以取消。今早帶毛毛去海邊散步⋯毛毛呢個小朋友一去到海邊就會好忙⋯每個石柱都要聞一聞每棵樹都要走去尿尿，毛媽由開始散步就一直鬧毛毛污糟要拉住毛毛行，毛毛表現搶繩不滿...

最後我哋諗住抱起毛毛行⋯但毛仔要自己行仲要行喺我哋前面，我哋急行毛毛就跑⋯點都唔俾我哋超前快過佢⋯