皇家

今朝毛毛第一次o係屋企騎樓便便同尿尿。原本構思係要毛毛o係騎樓解決架，今次算係成功。

晏o的要送毛毛去皇家獸醫診所聞蒸氣。準備個袋時，毛毛有特別反應 (狐叫同心急)。唔知係唔係連續幾日都用個袋帶佢出街，所以今日我攞個袋出黎開左個口，毛毛就自動鑽入裏面，叫佢都唔出番黎。

去到診所就驚到震，o的賓哥哥同姑娘叫都唔應人 (冇o的禮貌)。姑娘同毛毛磅體重，1.8kg，又重左喇…咁落去屋企一定又多個“肥仔”……哈哈哈哈哈…

開片

今早我出到廳見到毛毛個籠入面好似落大雪咁，毛毛將尿墊撕開一片片，佢成身都係白紙屑。我放左毛毛出籠，弊喇！佢週圍咁走，搞到o的紙屑成屋都係。毛毛今次尿尿失準，屙o係報紙邊邊，仲好大督 (唔知獎佢定罰佢)。

毛毛今朝仲要去聞蒸氣，今次就要太太接送喇。下晝毛毛返到屋企，傍晚o個餐唔肯食野 (可能仲好飽)。聽太太講，診所o的姑娘俾超多野o的狗狗食架 (份量同次數俾我地平時多一倍架)。醫生話蒸氣劑對毛毛治療效果好好，聽日要聞多一劑。太太聽日一早要返工，毛毛去診所就要由我送喇…

開刀

今日下晝終於放低工作去探爸爸 (做好手頭上o既野已經6點)。去到醫院病房見到爸爸o係度聽收音機，精神唔錯，見到我黎佢好開心 (我都係)。爸爸話住院好悶，每日傍晚7點就訓覺，零晨3點就醒，等天光。

講返爸爸治療方法，有食藥同開刀兩種，我同屋企人都反對開刀治療 (風險好大)。爸爸聽我意見先食藥觀察…我陪左爸爸成個鐘先走…唯一唔開心o既係我架車俾警察叔叔抄牌要罰3舊水架…

沖涼

今朝10點要同毛毛去覆診，所以太太一早起身趕住去買菜、食早餐。外面天氣差又落大雨，要早o的抱毛毛過診所。o的書講狗BB黎到屋企頭兩個禮拜係好關鐽架 (因為轉環境會對健康有o的影響架)。

毛毛覆診結果：佢有少少傷風未好番，上次開o的抗生素要繼續食，醫生開左兩次蒸氣劑俾毛毛聞 (今日同聽日) 等佢易o的吸收快o的好番。

今次磅體重有1.7kg，重過上次 (遲o的要改叫肥毛喇)。

毛毛會o係診所沖埋涼同聞完蒸氣先返屋企 (佢就嘆喇)，下晝仲要叫工人阿美專程去接毛毛返屋企…

丫問漏左有關毛毛皮膚痕同發牙痕添…

痕癢

近兩日發現毛毛經常R痕 (頭部同耳仔)，經常亂咁咬野，仲有經常用力呼氣。本來星期三太太帶毛毛去覆診，因為天氣壞，改左約星期六去見醫生，所以呢幾日毛毛o既健康評估唔到究竟正唔正常。

今朝我同毛毛檢查o的手仔腳仔，發覺腳仔個傷口已經好番晒，但係o的毛長得好快要同佢修剪下。我著左把電剪，毛毛一聽到o的…o的…聲就猛咁跳 (以為係同佢玩)。我用左好多心機同好多時間先修剪好四隻腳。我都有同毛毛檢查皮膚，冇發現o的乜野紅疹同蚤，至於大力呼氣太太話可能係咳嗽，另外亂咁咬野可能係換牙仔發牙痕，真正原因都係星期六問醫生先知……

---

• 留言者: SakiChe
• Email: wasabi_che@yahoo.com.hk
• 網址:
• 日期: 2008-06-28 21:05:00

亂咬野....想令你地多注意佢地呢..!!
貴婦,,,5~6個月先開始換牙GA

---

• 留言者: SakiChe
• Email: wasabi_che@yahoo.com.hk
• 網址:
• 日期: 2008-06-28 21:03:00

透大氣係正常...我家TT都成日係咁..一緊張就透大氣GA喇..
咳嗽同透大氣唔一樣呢...XD"   努力哦..!!!'
而且...玩得太耐..都會透大氣GA...

熟睡

晏晝打電話俾太太問爸爸o既情況，答覆係未出得院，仲要等睇報告，你有時間就去探o下老豆喇！o係11耬北翼1196房呀。

我最後決定都係早 o的收工去醫院探爸爸。咁岩今晚要開入貨會議8點幾先收得工，去到病房爸爸已經訓左仲訓得好林 (見老豆個情況都唔差咁都放心o的)。我企左一陣就走左……

入出

爸爸入左鏡湖醫院已經三日，康復程度我唔係好清楚。老人家病除左自己辛苦外，仲有身邊o的人好擔心佢。我呢幾日公司人手嚴重唔夠，所以行唔開 (或者係藉口)，冇時間探老人家。講真我都好擔心爸爸佢 (唔黎得探你，對唔住呀老豆) 希望你快o的好番出院喇………

羊咩

毛毛俾我第一個印象 (係好重要架)…佢俾我想象中細隻，成身黑色毛成舊炭咁。表現好唔自然，一o的都唔活躍，戇居居咁，眼神一路望住地下，一o的都唔精靈 (BB狗o係陌生地方一定好驚喇)。

第一次見面佢仲週圍便便同尿尿 (佢好緊張)，印象一o的都唔好。過左一晚…睇真o的就覺得佢似隻岩岩出世o既羊咩，好鐘意訓覺 (扒o係地下o個種姿勢)，要同佢玩先肯郁，學野都算快，宜家叫佢SIT佢識點做…

毛毛：係咪sit得好正呢？

---

• 留言者: SakiChe
• Email: wasabi_che@yahoo.com.hk
• 網址:
• 日期: 2008-06-26 23:42:00

毛毛佢性格係好好玩...都ok活躍!
可是陌生人...陌生ge環境下...佢就會好驚..
佢第一日到我家...= =" 唔識郁ga!!!!  連水都唔夠譫行去飲..= ="
但係比我感覺都係黑mama...開頭仲以為佢唔郁..
有問題!!! xd" 黎左2日後...已經好好玩...
成日同我家的t打交...xd" 佢唔輸舌ga!!!
我唸佢e+ 應該都好曳ga喇都..xd" 

融入

今朝落大雨，掛左3號風球，香港就掛8號風球，澳門天文台話下晝都唔會改掛更高o既風球。其實係擔心工人阿美中午上唔到屋企餵毛毛，同今日傍晚去皇家獸醫診所覆診。

毛毛由21/6 (星期六) 到今日有好大o既轉變。陌生到融入、沉默到狐叫、初初由驚怕到宜家活潑，o的行為完全極端。毛毛知道邊個係掌權人，例如有一次佢週圍咁尿尿，俾太太嚴厲責罵同體罰。當時毛毛dup低頭同烏低身猛搖條尾，慢動作咁爬去太太腳邊表示馴服。平時多數都跟住我，可能佢知我放縱佢。由於我同太太o既訓練方法唔同，發生時時鬧交 (我就冇制度，太太就過於嚴格)，經常意見不合。毛毛宜家仲係bb，未知佢大o的會係點…

---

• 留言者: SakiChe
• Email: wasabi_che@yahoo.com.hk
• 網址:
• 日期: 2008-06-26 22:27:00

看到曚曚(momo)為你們家帶來歡樂及各種趣事..
跟他相處了半個月的我...真的好開心呢..!!!!
可以為他找到一個好愛錫momo的家....
我感受到momo他現在很幸福哦..!!!
等佢大d..有時間跟我家tt 一起玩哦..!!!
 
                                                                by"saki

實行

毛毛到屋企已經第四日。過去，太太犧牲三日假期照顧毛毛 (我知太太好緊張)，等毛毛快o的適應屋企生活節奏。

今日開始毛毛要獨自留o係屋企喇 (我好擔心阿)。下晝兩點工人阿美會上屋企餵毛毛中午o個餐 (真係幫左我好大忙，唔該晒阿美)，跟住就要等我地收工先有得食喇。

尋晚臨訓聽到毛毛吠同狐叫，原來佢o係個籠度尿尿，仲搞到成身都濕晒，要我同太太幫佢整乾淨個身同個籠先乖乖訓覺。

早晨六點毛毛已經o係個籠度行黎行去，佢無o係個籠度尿尿，我放佢出騎樓佢都係掛住玩 (佢都唔知道我想點)，放番佢入廳好快就o係o的報紙度便便同尿尿(今次好叻仔呀)。跟住除左整野俾毛毛食之外仲同佢玩左好耐。我要返工喇…要實行番平時o既生活習慣喇…毛毛拜拜喇……

獸醫

毛毛睇完醫生個結果係，宜家佢食同用緊o的藥因為無藥名，評估唔倒係乜野藥，所以醫生叫換晒o的藥，食緊o的狗糧都換過新o既。

聽太太講毛毛去到醫務所便便同尿尿，搞到人地o的地方污糟晒 (真失禮)。毛毛仲未可以o係指定地方開大開細，岩岩黎到屋企第二日啫唔好太大期望。

今早同尋日朝一樣，毛毛已經o係個籠度尿尿。我放佢出黎佢好開心，仲跟出跟入，我攞水俾佢飲…“咦”毛毛o係走廊度…準備…我一見到即刻的佢出騎樓，毛毛個動作一樣但冇便便到 (可能我嚇親佢，可能o的便便太硬疴唔出)。

我o係騎摟成個鐘，毛毛都冇特別行動 (激死我)，唯有自己去廁所先喇。後尾同佢玩左一陣，毛毛就乖乖地o係報紙度便便同尿尿兩次潻。

要整野俾毛毛食喇，過程幾複雜架。先叮濕糧10秒、同時搵熱水浸欶o的乾糧，撈埋一齊，食晒之後仲要俾佢食營養膏……

今日我放假、太太都係，我地一齊影左一輯全家福 (好似兩公婆楂住舊炭咁)。

獸醫約左毛毛星期三25/6覆診…

---

• 留言者: 露B澄澄
• Email: lowb51320@yahoo.com.hk
• 網址:
• 日期: 2008-12-07 14:04:00

點解momo要食藥?佢身體有乜嘢唔妥?佢好精靈吖!

---

• 留言者: IENG
• Email: cheongieng@yahoo.com
• 網址:
• 日期: 2008-06-24 21:54:00

Your dog is OK, THAT MEAN BEAUTIFUL. HIS NAME IS MO  MO.THAT NAME IS NICE. HE IS  VERY CUTE.WE  WILL COME AND VISIT HIM.
BY Tiffany    
 
 
 
 
 
 
 
[版主回覆06/24/2008 23:04:00]Thank you. Ya he is cute but very naughty.
 

陌生

尋晚臨訓太太話要幫毛毛著番件衫怕佢夜晚冷親，毛毛都幾乖，o係陌生o既地方都冇不安同狐叫，可能好攰 (搞左成日唔攰就怪)。鎖佢入籠好快就自己訓覺，一直到零晨六點我出廳睇毛毛，佢已經o係個籠度疴左尿。

本來放佢出騎樓疴屎，但出到騎樓淨係顧住玩都無心開大 (俾佢激死)。

我o係騎樓同毛毛影左o的相，今次效果幾好…太太約左獸醫同毛毛檢查…唔知個結果點…

好日

今日星期六，陽光燦爛、天氣炎熱 (天文台有酷熱警告，熱到癲)。

同平時o既日子有o的唔同，今日晏晝個狗賣家送“毛毛丘”過黎屋企，順便帶埋o的附加用品 (食糧、維他命、藥品、沖涼用品)同視察環景，教授照顧毛毛o既秘訣 (個賣家都幾有責任心，可能毛毛身價好高)…太太開始敗家。

屋企增加左一個成員心情點都有o的唔同架。收工返到屋企見到毛毛第一個印像係佢好黑、唔係好活躍、有o的緊張 (極有可能唔適應環境)。太太同我講：毛毛黎到屋企週圍疴屎疴尿，可能係霸地盤呀。到食野時間，毛毛o的行為完全唔同晒，有少少失控。我同毛毛影左o的相…應該影番張全家福等毛毛有自己屋企o既感覺。

 

余毛

同太太講開幫狗狗改名o既事記錄如下….

太太：肥仔個賣家話狗狗個姓寫姓余定姓丘喎?

肥仔：寫姓余喇。

太太：余毛毛定丘毛毛好呢?

肥仔：唔………

太太：如果姓余咁就叫 “魚毛”囉…哈哈哈…

肥仔：如果姓丘叫叫下變“陰毛”咁仲搞笑…哈哈哈…

太太：好喇就叫 “余毛毛”啦。

我冇乜學識，原來狗狗個名係英文名黎架，咁即係話個姓係擺o係後面架。如果組合起上黎跟我姓個名變“冇餘”，嘩！大吉利是。跟太太姓就最好叫“無休”。咁緊張都係想改個好同吉利名俾狗狗啫。(以上名字要用英文發音)

換鏡

岩岩有機會將手上支CANON EF-S55~250mm f4~5.6IS鏡頭套現，心目中要買一支鏡，數據係由18~200mm有防手震功能o既，咁就可以一鏡走天涯喇。聽阿耀講適馬廠有支鏡數據同功能都岩晒我要求，宜家返左貨叫我去攞 (因為貨唔多)。價錢方面要成$3,800蚊架，同我心目中個價相差都幾遠o下……又再敗家…………支鏡我攞左都唔夠1個鐘阿耀就叫我攞番，因為佢有個客要買支鏡急用…

毛毛

呢排經常都同雨水打交道 (已經落左半個月雨喇)。尋晚太太好認真咁同我講….

太太：肥仔我今個禮拜六或者禮拜日會接隻狗狗番黎。

肥仔：下… (我未有心理準備喎)。

太太：係狗仔黎架，依家狗BB o的毛係黑色，大左就會變灰色架。

肥仔：狗狗幾大架？o係邊度出世架？有冇出世紙架？

太太：過左上個禮拜一就岩岩三個月大，個名叫 “矇矇”，北京出世架 (I...I...I...was born in Beijing)。o係屋企出世邊有出世紙架，狗狗黎到我地改佢個名叫“毛毛”好唔好呀？

肥仔：個名都OK，我要設計張出世紙俾佢。

太太：肥仔要整個籠喇，仲要墊高個籠呀，個賣家話狗狗怕潮濕好易病架。

肥仔：妳有冇常識架？個籠底有膠盤仲墊左報紙，籠入面墊毛巾，屋企鋪左木地板，我地住o係十二樓高仲邊有濕氣呀？

有時好唔明太太佢點諗野架，應該重視o個o的冇理過，無關重要o個o的就

執著到癲，見到太太咁投入都唔忍心潑佢冷水…(肥仔…你好凄涼呀)

還款

今年年初定下目標，希望年內還銀行按揭10萬蚊，原來呢個計劃令太太個經濟產生好大o既壓力 (係我一意孤行少啫，太太根本唔贊成)。心目中諗咁做係有效、有目標地儲錢 (一年要儲10萬一o的都唔容易架)。我o既目的都係希望對我地生活有好o既影響啫，點知事與願違 (好對唔住呀太太)…

返手

近日TV市度有o的起色，目標機係JNC SST37H1，好慶幸呢兩日賣出4部。但係呢款機後期o既品質唔係好穩定，今日安裝第2個柯打就出事喇。部機個TV接收器部份有問題收唔到台，要換機。呢隻貨我手上仲有15部存貨，希望順順利利出晒o的貨，唔好成日都返手換機就好喇。

正日

今日係父親節正日，安排左早收工，要安裝電腦台，另外同太太出街食飯。有時自己要剩o的時間出黎同家人共度佳節先得o既。

旁晚收到囡囡傳來o既短訊都算佢有我心。食飽飯返到屋企就搬電腦台，張台大細同擺放位置同構思一樣，不過有o的位置o既雜物就要從新安排喇。(要多謝祥哥免費同我做個電腦台面，多謝)…

父親

聽日就係一年一度o既父親¸節。

父親：代表一家之主，有無上o既權力。

父親：代表安全網。，對你有絕對保護能力。

父親：代表提款機，俾你任何時間都可以提款。

父親：代表教育機構，關心你前途由細開始供書教學。

父親咁偉大應該搵個日子紀念佢，祝天下o既父親“父親節快樂”。

其實做稱職o既父親係好難架……

孝順

今日農曆五月初十係父親大人o既生忌。父親在生時身為阿仔o既我都冇好好孝順父親大人，到宜家冇機會先覺得後悔實在遺憾。我亦都已為人父親，唔知我個囡囡會唔會o係我在生時好好孝順我呢？定係我會受到報應呢？

電池

尋晚o係書房攞左部I-STATION入睡房用。“嘩”點解有水滴架？原來裝左o的2A電池入去，可能擺得太耐電池漏簡，慘喇部機死梗…經過搶修，好彩部機冇事，因為發覺得早。

件事令我諗起自己有好多器材係用2A乾電池架，佛經機、遙控、門鈴、閃燈、相機。要解決辦法唯有買充電池。

我去左美心攝影買左套三洋eneloop充電器，充電電池12粒 (係o的二仟電黎架)，總共要投資成四舊水架……敗家敗家。

收信

前幾日收到個女傳來o既短訊，內容寫：DADDY父親節快樂。仲有話近期要準備考試好忙，考完試先搵我…

我都好耐冇收過個女發俾我o既短訊喇，仲話遲o的搵我添…佢咁有心我應該好高興o既…佢話遲o的搵我…會唔會係暗示我上個月未俾零用錢佢呢？

舊傷

上個星期做野唔小心整親隻右手手腕，呢個部位我後生o個陣因運動經常受傷，今次我疏忽延遲醫治，手腕腫同痛一直都唔散。今日去左文重光跌打醫館搵老友文健邦醫師睇手，阿邦話：阿慶，乜咁唔小心呀，你舊患再傷唔好好醫，手尾好長架，起馬要敷三劑………內心o既傷三劑就搞掂…咁就好囉…

難言

好難接受 bear bear已經離開我地，我又要面對呢種可怕o既感覺 (點同太太講我有幾怕，有口難言)。

世事o既野就係咁奇怪架喇，人人都平等，要接受好o既野同可怕o既。我應該咁諗，今次o既“失去”可能係下次“得到”o既交換條件。

天氣開始轉好，可惜我心情唔一樣…

死訊

尋晚訓得唔好，清晨五點幾就起左身，無所事事，寫下日誌同執下野準備晏o的過香港行街、影相。外面落緊毛毛雨，心諗落雨濕濕唔帶架相機出門喇。我地搭九點半班船，今次太太過去試食新野。間鋪叫翠華茶餐廳，食奶油豬同豬軟骨米線，o的野幾貴但好好食。本來行程去埋旺角架，後來改左，淨係行銅鑼灣 (睇野、買野、食野)。

先去商務印書局買攝影雜誌、百老匯買相機配件、SOGO睇野、時代廣場睇野，太太o係附近間L’occitane買潔膚用品。本來去埋隔離間CROCS鞋店買拖鞋，但間舖好多人，迫唔倒入去唯有放棄。仲有去無印買糖 (買俾個女同BB)。

又到食野時間，今次去大碌竹食河粉，太太就o係隔離街間MARION買班戟食。再去廣視買DVD碟、宜傢買電腦台配件…最後搭四點三班船返澳門。

到屋企後就收到個驚人o既消息，bear bear因急性心臟病…已經離開我地…呢個死訊另我好震驚、好激動、好難過同好唔開心 (用文字形容唔倒o個種心情同感受)，唔知點寫…

電腦

我改用電腦寫日誌已經一段時間，多得太太o既幫忙，要多謝佢。由於時間分配上往往同太太爭用電腦，太太開始有意見 (可能太太咁諗，o個個肥仔丫，教識佢用電腦佢就霸住部機用，阻住晒)。為左解決問題，早已準備物色一部手提電腦俾太太用。又因經濟關係暫時擱置，屋企部座台形電腦用左三年幾，期間冇做過任何保養，所以部機開始有o的唔穩定 (經常死機)。今朝一開機就出左事，我聯絡阿輝 (前助手) 佢o既意見都贊成我買手提電腦。

套現

又落雨喇！天氣對於人或者事物影響都好大。上個月中開始經濟上一直都得到太太接濟，十分感激。但係呢個情況唔可以俾佢持續落去，唯有將我擁有o既CANON EF50mm F/1.8 II人像鏡變賣套現 (冇辦法之中o既辦法)，希望改善目前個經濟情況。

擔心

零晨開始落大雨，一直都未停過。斷斷續續已經好多日，心情都變左冷冰冰。今朝想起十二號後就會接狗狗番黎屋企，諗起都好緊張。

我個女文文今年已經二十歲。我做父親o既對女兒都會有期望，由佢細細個開始教育同保護佢，付出半生o既時間、無盡金錢、無限o既耐性、想盡辦法，希望佢快樂、健康成長。但係好擔心到有朝一日，佢同你講，DADDY我大個女喇。咁即係話佢已經有自己o既想法，價值觀同理想，有自己渴望o既自由，到時佢會選擇離開你。天啊…你會好無奈覺得自己一生o既投資一時之間乜都冇晒。雖然佢已經成長，但係仍然擔心佢o既將來。其實為人父母，責任係一生一世o既…擔心…咁幾時先可以放心呀？

黃色

黃色

黃色呢隻顏色代表左好多種意思。我地中國古代皇族用o既顏色代表最高權力，現代社會黃色普遍代表色情 (負面o既)。六四遊行o的人手臂上帶左黃絲帶代表平反同自由 (正面o既)。家居主色用黃色代表溫暖、幸褔 (我屋企都用黃色做主色)。雨天黃色代表暴雨警告 (分分鐘好大獲架)。心情，黃色……………情緒低潮 (我今日就係喇)。

砌籠

尋日因為執屋同執雜物o既事又同太太發生口角 (又冷戰)，都唔明o的女性咁多雜物o既。夏天到喇，又熱又濕，如果唔執o的地方會養塵同玆生細菌架。狗狗咁細隻好容易中招架 (究竟太太唔識呀定求其，要養狗又唔明白)。

太太買左o的狗用品同狗籠，佢話要將個籠變成圍欄，入面一邊放個膠籃做床，另一邊放個膠盆做次所 (我硬係覺得有問題，如果o係個圍欄度訓同便便，第日鎖狗狗入籠，佢咪o係入面開大開細囉)。我心目中諗，返工鎖佢入籠，平時放佢出廳自由活動，訓練佢o係騎樓便便，咁o既安排係最好。

今朝我花左五分鐘睇說明書點樣砌個籠 (說明書簡單到唔使五分鐘就睇晒)，其實真係好簡單架，不過我用左成朝都未砌好仲砌錯左添，真失敗。

妹妹

前晚同太太食飯傾偈，因為狗狗o既命名而發生口角。

肥仔：我查過“啤俾”呢個名，除左解熊之外又解作承擔，熊俾人有強者o既感覺，狗狗黎到我地屋企要承擔起做橋樑o既角色，好有意思呀。

太太：人地係女仔黎架，啤啤個名咁普通又咁男仔，賣家話十隻有九隻係叫呢個名架，仲有我公司有個好乞人憎o既同事又係叫“啤”架 (o個個人咁衰格改個狗名好岩)，我諗左好耐，要同狗狗改個名叫“Mui Mui”。

肥仔：叫“妹妹”個名叫唔響架我唔鐘意，我個助手又係叫“妹妹”，個名冇意思 (俾人覺得似妹仔多o的)，唔好。

太太：咁“妺妹”個名有乜唔好呀？阿妹“梅艷芳”唔好意頭？我一早決定改 “妹妹”呢個名架喇。

肥仔：是但妳喇，我唔講喇 (冷戰開始)。

好失望、無奈、令我又想反對養狗，屋企增加個成員唔簡單架，我信唔怕生壞命最怕改錯名，而且銅銅個乳名叫阿妹。我唔想改狗狗個名太人性化，寵物或者係動物o既命名，我覺得應該改個又威又有意思o既名就最適當…