我地屋企附近朝早有好多賓姐賓哥放狗架,啲種類最多係金毛尋回犬、約瑟爹利、臘腸狗、北京狗、八哥、唐狗、史納莎,梗係仲有我地隻貴婦毛毛啦(朝朝都好似参賽咁)。
毛毛開始鍾意出街,我覺得毛毛今朝好開心,一出門就跑,完全唔駛停,仲好快就便便。今朝我同毛毛跑左同行左好遠......
我地屋企附近朝早有好多賓姐賓哥放狗架,啲種類最多係金毛尋回犬、約瑟爹利、臘腸狗、北京狗、八哥、唐狗、史納莎,梗係仲有我地隻貴婦毛毛啦(朝朝都好似参賽咁)。
毛毛開始鍾意出街,我覺得毛毛今朝好開心,一出門就跑,完全唔駛停,仲好快就便便。今朝我同毛毛跑左同行左好遠......
星期日太太參加左狗狗訓練講座,仲約埋姨仔、盈盈同佢地隻牧羊狗一齊去。聽太太講個講座好實用,仲學識好多野。
原來姨仔都有上黎屋企坐,毛毛喺佢地頭梗係“恰”人地啦。啲玩具只有佢玩唔俾人玩、仲猛咁吠人添,搞到Mona要“哩”埋。毛毛真係羞家,都唔識招呼啲貴客真失禮。
睇番太太影啲相同短片,見到盈盈、毛毛、Mona都玩得好開心…Mona比想象中大隻同靚,盈盈小朋友就高左。講起盈盈小朋友,我已經好耐無見佢喇,宜家仲有啲掛住佢添…
上個星期日收到文文個電話有事同我商量,原來佢要買電腦(主要係我俾錢)。
文文:DADDY我有啲野同你商量,我要買手提電腦,星期三趕住用…
肥仔:妳想要啲乜野級數嘅電腦…好貴喎…
文文:我同同學喺高士得過,大約五仟九佰九…XX牌(說話帶有壓力)…
肥仔:“嘩”!好貴呀…女,妳宜家講緊係六仟蚊,我即刻邊有咁多錢呀?
文文:DADDY連你都唔幫我…我冇野講…(好晦氣)
肥仔:我唔係咁嘅意思,因為我冇咁多現金,我公司都有電腦賣,可以喺公司買。
文文:是但喇,咁幾時呀?你宜家得唔得間呀?
肥仔:就算妳宜家買都要隔一日先有得攞喎,新電腦要安裝軟件先用得架。
文文:咁我聽日揾你啦…拜拜
我發覺呢一代後生仔女都唔識得自己想辦法去解决問題,淨係識得向父母施壓。冇左青年人嗰種排除萬難,勇往直前嘅精神…
喺電梯內有個姐姐問:你隻黑色狗仔呢?呢隻好得意呀。
肥仔:同一隻狗黎架,佢細隻嗰陣成身都係黑色架。
個姐姐好似唔係幾相信。出到街毛毛都幾乖,不過都仲係冇乜自信。途中有個靚師奶走過黎話:你隻狗仔好得意呀,啲毛咁”攣”叫乜野狗呀?可唔可以同佢影相呀?
肥仔:係貴婦狗。影相…可以可以…
個靚師奶影左三張大頭相就走左。真係幾搞笑…毛毛都有人讚…
天文台9:30改掛3號風球,又係大家趕番工嘅時候。外面仲係橫風橫雨,滿街都係雜物,好多大型嘅戶外廣告牌全部都爛哂,仲到處水浸。睇黎今朝唔可以同毛毛出去散步喇…
今朝同毛毛落街散步,毛毛醒目左好多,起碼全程唔洗我抱佢。
毛毛宜家迷上左執波仔遊戲,主要因為有零食獎佢。
又打風喇…風名叫 “黑格比”,又係辛苦嘅開始。
呢輪病左,啲外勤柯打堆積如山。下晝天文台發報會改掛更高風球,由於我唔舒服,公司特准我提早收工。
又返屋企瞓覺喇!
星期六開始我同太太帶毛毛落街散步,初初留意到毛毛好似好驚,周圍聞唔肯行,對車聲、人聲、好大反應。或者毛毛仲係小朋友,而之前嗰六個月都喺屋企, 對陌生環境可能要時間適應。
另外有樣擔心嘅係怕毛毛係街亂咁擔野,因為個百厭仔好為食架。
9月20日˙星期六
今日中午去左做facial,之前本來諗住去食越南檬粉架,點知間野冇開,唯有轉去食雲吞麵啦。做完facial就去幫momo買Angels’Eyes ,呢隻野聽d人講係可以買淚痕嘅,即管買黎俾momo試試啦,我想佢變得靚仔d呀。
黃昏嗰陣帶左momo落街,佢好似好驚咁,唔係好肯行。真係要多d帶佢落去散步先得。
9月21日˙星期日
為左訓練momo,今朝我地又帶左佢落街散步。去程嗰陣佢唔係好肯行,成日四圍聞,不過回程嘅時候,唔知係咪已經行過嗰d地方,所以行得快左,仲追住mo爸添。momo…good boy…有進步。
今晚同班舊同事出去食泰國菜,呢班舊同事雖然唔係一齊做野好耐,但係大家嘅關係仲keep得好好架,差唔多個個月都有聚會,希望可以繼續係咁keep住落去啦。
唔知係咪因為今晚係「家好月圓」大結局,一到八點半突然間成間餐廳d人唔見哂,唔知係咪個個趕住番屋企追劇呢?我地食到九點幾,都快快埋單番去睇埋個大結局。
momo三個月o個陣...係咪好cute呢...
毛爸呢幾日病左,都冇心機同我玩,淨係成日都瞓覺,仲有朝早同傍晚帶我出去散步。
一落到街我覺得好唔習慣,好嘈、好多人、好陌生,我都唔係好敢行。毛爸同毛媽都猛咁鼓勵我…但係最開心都係同毛爸玩,佢獎我好多零食架。毛爸你快啲好番就好喇…
因為咳成晚又瞓得唔好,今朝起身情况更差。
今日比較特別,同毛毛出去晨運, 晏啲同 太太買餸同食早餐。不過身體情况越黎越差(年紀大左唔到你話死頂就頂得順)。今朝仲要去陳醫生度打針,醫生見到我例牌…唱歌(巴伐洛提啲歌…)
肥仔:醫生,輪到我唱歌未…今朝起身腳震震…尋日發夢傻騰騰…
醫生:肥仔,乜你咳得咁犀利,今日仲有支針打喎…有冇發燒…
肥仔:咳到週身骨痛同頭痛…好多痰…
醫生:肥仔,我加啲藥俾你…仲要去照胸片(X光)…跟住返屋企休息…
咁今日又瞓左一日…
尋晚太太大聲嗌:肥仔,毛毛好似喺地下擔左啲野食,你睇吓佢咬緊啲乜野?
我抱住毛毛,伸隻手指喺毛毛個口度扣…原來係煲過湯啲南杏…不過好臭……
跟住太太喺騎樓大叫:肥仔今次你中地雷喇…哈哈哈…睇怕你都係第一個人喺十幾層樓高,隻手指中地雷個人喇…哈哈哈…毛毛係食緊啲…便便呀…哈哈哈…
肥仔:毛毛你好野..."線"我!!!
毛毛:對唔住呀...毛爸...
尋日毛毛好平靜冇喺度搞搞震,我就喺屋企訓左成日,但係體力只恢復五成。
今朝10:00有個名牌電視機發報會要參加,幾個星期前己經報左名。唯有拖住好攰嘅身體出門。天氣仲好地地,去到澳門就落好大好大雨,我就全身濕晒。去到會場啲冷氣好凍(當時有人提議閂細啲冷氣),可能身體唔舒服,冷氣細左都係好凍。就咁坐左一個鐘(第一part完),就起身走人…
個人勁唔舒服,但仲要返公司開工,向個人極限挑戰…跟住嘅情况…不敢想像… my god…
我病左,又係老毛病有小小發燒,氣管發炎,流鼻水,有咳。去見陳醫生。
醫生:肥仔,我前幾日仲講緊好耐冇見過你…今日你就黎揾我…哈哈哈…你太太知唔知你唔舒服呀?
肥仔:佢知道就大件事喇…一定又會話唔准飲乜食乜唔准做乜做物…
醫生:你太太關心你呀…你要打一日針,我寫假紙你放假…
姑娘:醫生你寫假紙都冇用架,肥仔佢都係照返工架…徙左張紙唔環保…
睇身體情况我盡可能選擇返工,其實係人手問題,最終影響成組人…連累拍檔…
9月13日˙星期六
今日行程非常緊湊,一早起身先去買餸,喺屋企食完早餐之後就跟mo爸出澳門。先去睇中醫,然後去探亞爸亞媽,食完晏後就去剪頭髮。
去到髮型屋已經係1.30,stylist話有10個人等緊,輪到我要大概3個鐘。唉…次次剪親頭髮都要等咁耐 (最高紀錄淨係剪頭髮試過等5個鐘), 睇黎係時候要諗諗係咪轉過第個stylist。剪完頭髮番到屋企都成5點幾,咁又冇左大半日喇。
到夜晚,mo爸8點幾番到黎,我地好快咁食完飯就帶momo出去睇煙花。個衰仔出到街就成日週圍聞,有時又唔肯行,可能因為初初出街唔係咁慣。等mo爸影完一輪相之後我地就番閨喇。
9月14日˙星期日
經過尋日咁緊湊嘅行程後,今日就靜靜咁喺屋企抖抖。其實我係專登咁安排,因為我今日唔想出澳門嘛,出面又咁鬼死熱,我驚中暑呀。
我今日淨係攞左d衫去洗同埋去左pet shop幫momo買狗帶,之後就一直留喺屋企陪momo,仲整左蕃茄紅蘿蔔肉飯俾momo食。食到佢嘴lam lam呀…
9月15日˙星期一
今日要帶momo去DOL沖涼,mo爸因為有野要喺屋企附近做,所以可以揸車番黎載我地去DOL。momo一去到就想走,唉…佢真係好鬼細膽。嗰度仲有其他狗狗等緊沖涼同grooming,d職員就擺momo落去同佢地玩,仲叫我要多d俾momo同其他狗狗玩等佢有多d社交活動。我都好想,不過暫時未識到其他狗友。
兩個鐘頭後我去接番momo,嘩…佢變得香噴噴又靚仔左。俾錢嗰陣d職員同我講9月28號佢地會搞個有關訓練狗狗嘅講座,由香港請個dog trainer過黎講,問我有冇興趣參加,我梗係即刻報名啦。到時仲可以帶埋狗狗去添,但係momo好似出唔慣街咁,唔知到時帶唔帶佢去好呢?我驚佢會失禮人呀…
番屋企嗰陣係中午1點半,條街熱到屎,我就抱住momo行番去,好似抱住個熱水袋咁,一路行一路滴汗,番到屋企成身濕哂。下次都係book黃昏去沖涼穩陣d。
今朝約左11:30帶毛毛去沖涼,太太特別買左條狗繩帶毛毛出街,但係毛毛好百厭,太太搞唔佢,唯有我親自車毛毛過去。
毛毛去到接待處見到好多狗狗,就開始吠,其他狗狗又跟住毛毛吠(唔知佢地係唔係打緊招呼呢)。
聽太太講去接毛毛嗰陣,佢唔肯行, 全程都要 太太抱抱一直返到屋企…毛毛你冇甪呀!
一年容易又中秋,我就已經買定啲月餅、零食、生果(當然有我同毛毛最鍾意食嘅藍莓啦),沖定壺靚茶準備同太太、毛毛過中秋節喇….你地呢?
喺呢度祝大家同好關心毛毛嘅網友、朋友 “中秋佳節快樂”!
一年容易又中秋,喺一年一度嘅佳節,我毛毛祝好錫我嘅毛媽毛爸,中秋節快樂。另外祝好錫我嘅AUNTIE青春美麗,富貴快樂。仲有祝各位狗狗爸狗狗媽同狗狗,人狗兩團圓...“中秋節快樂”!
一聽到鎖匙聲我就知到毛爸返黎。今日毛爸好早收工返黎食飯,不過好似好趕時間咁。食飽飯之後就同毛媽吟吟尋尋跟住就執野,原來同我出街,話去唔知乜野…煙花喎。
出到街好多人呀,好奇怪個個都望住個天嘅,然後聽到就…轟…轟聲,跟住有啲好靚嘅光出現,好似朵花呀…我咁大個仔第一次夜晚出街同睇煙花…好開心呀…
我仲玩到好攰添…宜家要番屋企覺覺豬喇。