交易

太太同我一齊做左個重大o既決定就係“養狗”(我係o係壓力之下決定o既)。自己有一種好似做戲咁o既感覺，個男主角為左達成太太個願望，要同主宰大自然o既統治者來一個交易。個合約時間幾長同得到o的乜？未知。依家得到o的乜？係欲望、開心、快樂。代價係要付出o的乜？未知。唔想知，其實我地會唔會係因為與生俱來心靈上要滿足操控生命o既欲望呢？又或者精神上需要將愛心寄託o係第三者身上呢？我希望呢一項交易係明智o既投資。至於…代價…我諗我要分期攤還喇…

亮相

前晚太太同個狗賣家MSN，收到消息星期四o的狗BB到步，最快約星期六下晝可以見狗BB。太太非常開心同期待，但狗BB要o係賣家屋企住兩個星期隔離期，先可以返新主人度架。賣家傳左好多張相過黎俾太太先賭為快。我睇過晒o的相，部相機同影相o個位同志o的技術都係麻麻，都評估唔到狗BB o既體形同精神狀態。我都係等三個星期後o既主角狗BB“啤啤”正式亮相。

研究

每做一件事或要完成一個計劃，我都會去了解、研究、搜集資料。要掌握對件事同計劃o既認識，呢樣係我做事o既作風。我買左本叫“玩貝貴婦狗全攻略”o既書做參考，貴婦狗好有來頭架，原產地本來德國，後尾變左法國，狗種有幾百年歷史架。本書好詳細介紹狗o既性格、特質、教導、訓練方法、注意事項…資料好齊架，我要讀熟先得喇，仲要物物色狗精品、食品同獎品…頭又開始痛喇…

改名

尋晚訓得好，今日狀態零舍唔同。

尋晚太太好有興趣咁講開狗BB o既事…

太太：肥仔，隻狗改乜野名好呀？MINI？妹妹？Miu Miu？BB？…

肥仔：叫 Bear Bear 啦，英文名o既意思係熊仔，葡文名o既意思就係 BB 咁解。

太太：肥仔，要圍個地方俾佢自由活動架 (理由係狗BB好細隻，係啡色，同地板顏色一樣驚佢匿埋搵唔到佢)。

肥仔：要買個籠幾大架？

太太：同阿BOY個籠一樣咁大 (理由係貴賓狗體積細隻，俾多o的地方佢活動)，有乜  問題呀？我約左Calvin星期六去大陸買個籠。如果Calvin唔幫我，一個人搞唔掂。

肥仔：我要知個size幾大，因為要搵地方擺個籠。但係屋企既地方改革進度好慢，達唔到預期後果，又係大問題黎架…諗諗下，頭又開始痛喇…呀…呀…

重任

今朝寫完日誌之後仲有少少時間，唔覺意睇左一本叫“新手養狗”o既書，入面有十條題目要養狗人士一定要理解同遵守o既，另一條就係自問必答題。我睇完之後先知養狗係一項 “重任”黎架，自己都唔知可唔可以堅持到底。

聽講帶番黎o個隻係貴賓狗BB黎架，我地首先要面對o既問題係佢食野，書話每日要俾三至四餐佢食架。時間上好難就，太太一早要返工，我九點三就出門，如果九點鐘俾佢食第一餐咁第二餐最快都要六點鐘先有得食 (工人阿美下晝六點鐘先返工)。中間格左成九個鐘，唔知隻狗BB頂唔頂得順呢，又怕餓親隻狗BB。係大難題黎架…要諗下點安排…好頭痛…呀…呀…呀…呀…呀…(難題一)

---

• 留言者: IENG
• Email: cheongieng@yahoo.com
• 網址:
• 日期: 2008-05-29 10:10:00

唔駛頭痛,食三餐就夠啦, 你將狗bb既食野時間跟隨住你地返工時間轉,比d時間佢適應, 例如:7:00, 9:00(呢餐份量少d), 18:00, 22:00. 慢慢佢生理時鐘適應左就會ok. 另外仲有去便便既訓練都好重要架, 你小心佢無聊得滯會食番自己d便便. 大把難題, 初為狗父母者, 睇黎你地有排頭痛. 不過狗狗會帶比你地無窮既開心&快樂 記住影多d靚相. 呢本書唔錯架 (狗狗食得天然) http://www.oic.hk/books.htm

執野

每次放假都落雨。今朝約左阿忠剪頭髮，所以一定要出去。落雨另人好狼狽，下晝唯有o既屋企執野。每次執野都遇到同一個問題，就係o個o的野太太仲有冇用呢？使唔使留番佢呢？每次計劃都唔成功(今次都係一樣)…

堅持

好多事情o既成功、失敗都係建基於堅持。太太堅持嚴格管制我o既食物種類，榴槤、蛋、葡國腸全部都要小食同禁食 (成功)。每個月o既農曆初一同十五都堅持守齋 (成功)。我鐘意影相，為左保証相片有好o既質數，所以堅持買部高性能o既相機 (成功)。但係背後我付出經濟拮据代價 (犧牲好大，失敗)。我想太太明白要養狗係要付出好大o既代價，金錢、時間、愛心、耐心、傷心、犧牲、自由、失望，仲有生活習慣…希望太太能夠“堅持”到底…太太o既決定我會全力支持。(太太話：好多謝你呀老公，我好感動呀。)

已決

太太決定養狗呢個係事實，作為反對者o既我，反對唔到只好配合安排。首先要解決環景問題，要將地面及牆邊 (六寸以下) 徹底清潔，包括櫃底、枱底、椅底、收拾好騎樓 (要搬好o的膠箱同雜物)，書房擺設重新安排…睡房、廚房、客、飯廳…呢o的行動要放棄好多…我都要下定決心先得。

平平

今日一切都很平靜，生活平靜，生意平靜，屋企也很平靜...可能係暴風雨前夕...

司長

今朝有個好重要o既外勤柯打要親自做，送部SONY  KLV46X300A  LCD電視機去工務運輸司司長屋企安裝。呢單野公司要我親自執行，司長方面由我o既好朋友蘭茜負責。同蘭茜合作，工作非常方便、順利、愉快 (麻煩晒妳呀蘭茜)。

蘭茜：PETER 唔該晒你、麻煩晒，食飯…一隻雞。

肥仔：好…好…我地約時間啦…

蘭茜：o的天線訊號同有線盒要今日下晝三點先安裝，到時我打電話俾你上黎較機。PETRE…我私人叫o既…

肥仔：下！妳要我親自上黎…

蘭茜：唔……

肥仔：收到…我明白。

蘭茜：PETER…兩隻雞。

養狗

今日太太好認真咁同我講：肥仔我有o的野同你商量。

肥仔：商量o的乜?

太太：我要養狗，玩具貴婦狗。

肥仔：下…我反對，隻狗又唔知乜野樣。

太太：細隻架，好啦…俾我養啦…求下你啦…

肥仔：如果要養我就養金毛尋回犬。

太太：嘩！咁大隻…唔得我要玩具貴婦狗。

肥仔：我地邊有時間照顧佢，我地都要返工，就甘留低佢係屋企，又要同佢散步…

太太：唔使帶佢出街架，放佢出騎樓度咪得囉…Eric佢都唔帶隻狗出街啦…

肥仔：隻狗返黎做 “PRISON BREAK”咩，隻狗成日都鎖住佢會變成呆呆地架。

太太：唔得，我要養狗…

假設我贊成養狗o既話，咁就要搞好多野喇。騎樓、書房、廳同飯廳、仲有…

橋樑

今早毛毛雨，令人o既反應同思維都慢晒。阿宏病左，尋日已經冇返工，今日發個短信過黎，話今日都未好番要請多一日假。用電話做橋樑發短信溝通，係一個好方法。對於我黎講溝通方法係好重要，更重要o既係橋樑。

其實阿BOY係我地o既溝通好橋樑。因為佢，我同太太有同一個話題，太太同我一樣咁關心阿BOY，佢帶俾我地開心、擔心、熱鬧同麻煩，我地都一一接受。

好多謝你呀!狗狗朋友阿BOY…

人同人溝通得好o既話家庭就會變得和諧、生活就變得幸福……

十五

(今日農曆十五守齋日) 今早夢中驚醒，自己訓晏左，望下個鐘早上六點二十分。“嘩”要起身喇…諗一諗…米住…阿BOY尋日走左啦，仲以為要帶阿BOY出去散步 (傻左)，一切都回復正常。

由今日開始又要適應番平靜o既日子，不過我仲未習慣，今日成日魂遊太空，個人冇晒計劃。天氣唔好，外面又落緊雨，心情…十五…十六…

珍惜

黎緊個禮拜因工作關係，我將假期編左今日放假。有時間應該多o的陪家人同身邊o的好朋友。祖國四川地震死傷慘重，所有中國人都心痛。原來人係好脆弱架，其實我地最寶貴o既野係身邊o的家人同朋友。

今日阿BOY o既行為有o的失常，變得非常百厭。佢今日好自由 (平時要鎖入籠)，又有下午茶食 (平時個個要返工，冇人獎佢食零食)，又有人陪佢玩 (平時晏晝冇人陪佢)，全部都係因為我放假。

下晝我同太太帶左阿BOY去星星公園散步同影相，我地見到有好多人都同埋隻狗去公園散步架，o的狗主見到阿BOY就指手劃腳o係度笑。阿BOY o的行動好奇怪，見到o的狗都冇睬佢地，掂行掂過 (可能俾人笑，自卑呀)，連影相都唔望鏡頭。

Calvin打電話黎講今日五點接阿BOY走 (好突然本來約左星期一)。世間上o既野就係咁架喇，當你以為眼前o既野還可以擁有o既時候，一瞬間就會一無所有。返到屋企執好阿BOY o的行李、同佢玩左一陣就送佢走。阿BOY拜拜喇!......事情變化得咁快，連唔開心都黎唔切。我應該更加珍惜眼前o既擁有……

自卑

前幾日阿BOY病左，我地都唔敢通知Calvin，怕佢擔心，而且o係旅行途中都做唔到乜野。好彩阿BOY好番冇事 (事後先同Calvin交代啦)。

今日星期六太太有o的唔舒服，我冇打算叫太太出去散步 (等佢訓晏o的)。阿BOY一早已經o係個籠度“狐叫”…BOY Come on Go Go Go…我地出街街…

o係樓下有個阿叔問：你隻狗剪左毛喎，咁剪一剪要洗幾錢呀？肥仔：三佰幾蚊架。阿叔：嘩…佢地咁好賺。

有幾個後生仔女行過：哈…哈…睇下隻狗仔個頭幾似你個髮型…哈哈。

返屋企經過管理處，個女管理員見到阿BOY就講：你隻狗好靚喎…點解個身…以前…

肥仔：我隻狗剪左毛，未剪之前仲靚，妳見過啦。

原來狗剪左毛係會俾人歧視架，唔知阿BOY會唔會自卑呢…

阿BOY用精靈o既眼神同我溝通。

阿BOY：肥仔契爺，你寫個牌俾我掛o係條頸度出街啦。

肥仔：咁寫o的乜野呀?

阿BOY：同我寫“我以前好靚仔架，我宜家剪左毛乍”。

生猛

我俾阿BOY o既狐叫聲嘈醒，原來已經早上六點二十分。我、太大同阿BOY出去散步，途中遇到隻金毛尋回犬好大隻呀，阿BOY望左一望就繼續行好似睇唔到咁 (可能佢驚大狗)。見到另一隻鬆獅狗行過，阿BOY就狂吠 (都唔知佢同人打招呼定係挑戰人地)。

我返到屋企，好忙咁清潔個籠，因為有o的地方未整乾淨。前日阿BOY o係個籠度嘔左幾次，搞到個頭同條尾都係嘔吐物 (好臭)。尋日應該同佢沖涼，但怕佢仲未好番晒。今朝見佢咁生猛，都係同佢沖涼喇。今次佢好百厭 (可能今朝我冇同佢玩)，同佢沖涼以為同佢玩，搞到成個沖涼房都係水，好辛苦先捉番佢同佢吹乾o的毛。

觀察

尋晚成晚都訓得唔好，唔知阿BOY點呢？使唔使帶佢去睇醫生呢？一直到朝早，我見阿BOY情況好轉先放心少少。我放左佢出去騎樓小便，反應就慢左o的，眼神冇尋日咁呆滯，我決定帶佢出去散步。可能佢尋晚嘔左好多次所以冇乜力，行路都慢左。太太話今朝淨係俾雞肉佢食，仲要份量好少。

到太太出門返工阿BOY又想跟住出去 (佢開始復原喇)。當我閂好門回頭一睇，見阿BOY又o係按摩椅旁邊小便 (今次算喇我冇打佢)。之後都好安靜咁訓o係廚房門口 (除左阿姨派報紙o個陣佢狂吠左一輪)，直到我返工鎖佢入籠，佢都冇反抗、冇狐叫 (阿BOY你好反晒未呀？好擔心你呀！)。

部車壞左，要勞煩祥興行大偈肥仔特登黎公司拎部車去修理，修好後親自送番俾我 (十分感激)。淨係換零件都成二仟幾蚊，由宜家到月尾又要太太接濟喇 (太太好對唔住呀)。

今晚好夜先收工，返到屋企門口已經聽到阿BOY o係度叫 (咁即係話佢已經好番啦)。我同太太帶左阿BOY出去散步，o係街度遇到一隻灰色史立沙，阿BOY直頭忘我咁撲埋去，好在我拉住佢，最後仲想兩隻腳企起彈過去 (飛仔本色)。

返上屋企後阿BOY纏住我要我同佢玩，佢好鐘意咬我褲腳同玩“捉衣因”。照我觀察，阿BOY已經好番晒仲好生猛添。太太聽人講o係阿BOY o的食物度加飯同波菜撈埋俾佢食可以快o的好番，仲會健康o的…

宜家好夜喇…聽朝要一早出去散步…訓覺喇…

病左

今朝由我地起身開始，阿BOY就一直“狐叫”，催我地換衫帶佢出去散步。戴好狗帶開左個籠，阿BOY隻腳好似裝左彈弓咁又彈又跳，一路彈出走廊 (入到電梯都係咁彈，唔知係唔係尿急呢)。出到街阿BOY度度都放低幾兩 (霸地盤)。

阿BOY淨係顧住玩都冇理太太出門返工，到我返工時候，阿BOYo既行為就有o的唔同。佢靜靜雞匿入梳化底，我幾乎見佢唔到。當我鎖佢入籠o既時候，阿BOY個眼神好慘咁，連食零食都冇心機食。對唔住喇！我要返工喇！

到收工返到屋企門口按鐘，但入面好靜好奇怪。太太開門第一句同我講阿BOY病左，我見阿BOY佢匿o係梳化底目光呆滯....

太太：阿BOY嘔左幾次呀，佢o係騎樓屙左尿同屙左屎...

肥仔：唔知佢乜野事呢？

太太：可能消化不良，我問過我個妹，佢話我地唔應該俾粟米阿BOY食…

肥仔：上一次食左都冇事，點解會咁架？

太太：我問緊我個妹拎醫生電話… (佢個妹咁幫手唔該晒)

臨訓我鎖返阿BOY入籠，佢又o係個籠度嘔。我抱佢出黎發覺阿BOY全身無力，仲o係度震，太太就清潔個籠。太太都好擔心阿BOY架睇得出，我同阿BOY影左幾張相做記錄，佢個樣好病呀…

呢晚我成晚都訓得唔好…

醒目

六點二十五分，鬧鐘響，要起身出去晨運喇！今朝帶阿BOY出去散步，佢淨係小便冇開大 (唔知係唔係留番o係屋企先開呢。返到屋企我整野俾佢食，食飽之後我同佢玩左一陣就坐o係廳度寫日誌。好奇怪阿BOY一路“狐叫”好唔安靜，我知佢好攰，一路恰眼訓。

九點幾，我要執野返工喇。阿BOY就跟出跟入，佢好似知道我要鎖佢入籠，佢就匿入梳化底叫都唔出黎，最後出絕招獎佢食零食。其實阿BOY好為食架，仲好醒目添。佢擔左我手上o既零食飛咁快走返入梳化厎先食，如是者來回幾次。最終我捉左佢入籠，臨出門阿BOY好靜，都冇“狐叫”。

今日我情緒低落，可能工作壓力大。今日我有兩單外勤要做特別工程 (鑽牆)，正如我所料，o的柯打出問題。本來安排最尾單柯打六點半完成，但係要做到九點。工作極唔順利，個人勁冇心機，幾經辛苦搞好o的柯打後收工。返到屋企都未入門口，阿BOY已經大叫狂吠。

因為太太需要時間為我準備晚飯，o係呢段時間就帶阿BOY去散步。行左一陣間就返上屋企食飯，一邊同阿BOY玩，差唔多十一點喇，阿BOY玩得太開心唔肯入籠休息，唯有用零食引佢鎖佢入籠。我熄晒o的燈入房訓覺，阿BOYo係度“狐叫”左好耐先安靜落黎…

假期

今個月第一次休連續兩日假期，撞o岩母親節同佛誕。原本計劃到香港度假散心，第一日天氣好差又落雨根本唔適合外遊，第二日天氣出奇地好，但係有狗友阿BOY到我家暫住 (佢主人Calvin去泰國一個星期)，只好留o係澳門歡迎佢。Calvin打電話黎話臨出機場前約十一點零帶阿BOY過黎。

今日我放假陪太太去飲早茶，之後去百佳入完貨就趕返屋企等阿BOY。為左阿BOY住得舒服，我o係騎樓圍左鐵絲網，俾佢自由活動。到喇!阿BOYo係個流動房屋度走出黎，可以用兩個感覺去形容：一、佢唔似阿BOY (因為佢頸部以下尾部以上都冇毛)；二、佢好似隻營養不良o既非洲野狗，唔係…係似Q版小鹿斑比，總知個樣係好醜同好得意啦。

佢一黎到屋企就o係廚房門口大便 (Calvin同太太都搞到手忙腳亂)，真係多得佢唔少喇。Calvin話阿BOY抓傷左條頸，所以冇同佢沖涼好耐喇。我見阿BOY傷口好番就同佢沖涼，佢出奇地乖，沖完涼之後成個生猛晒。

傍晚我同太太準備帶阿BOY去大草原散步同影相，呢個時候阿BOY就o係按摩椅隔離小便，太太例牌要打佢，阿BOY驚到走出騎樓唔肯返黎仲成身都震晒。

到大草原我地影左好多相，太太仲影左幾張代表作“日落”，好靚呀…

母親

天不造美，由尋晚開始落雨一直到今朝都未停過。今日係 “母親節”。

“母親”呢個稱號係代表…

最偉大o既：重要或生死關頭會犧牲自己幫你…

最無私o既：從來都唔會同你計較利益得失…

犧牲最多o既：將所有最好o既野全都歸你…

最博愛o既：無倫你係好孩子定壞孩子都咁愛你…

所以全世界 o既人都覺得要搵一個日子黎記念“母親”。

世上只有媽媽好，祝天下偉大o既母親“母親節快樂”。

新裝

聽講阿BOY剪左個新裝，佢咁靚仔換埋個新裝真係想象唔到係點樣。今次黎渡假仲要提供埋伙食俾佢添(工人阿美又要做多一樣野喇)。

我都要添番o的新裝用黎出去散步(黑色襪同短褲)，岩岩拎支新鏡大派用場喇。仲要買o的狗零食俾阿BOY做獎品，我呢個朋友真係巴閉，佢一黎我地o既起居生活全部都要就佢(早起、早睡、早出、早歸、出街散步)。

尋晚又發生“雞蛋”事件，情況非常嚴重，同太太開始冷戰……

狗友

尋晚太太同我講Calvin下個禮拜去泰國旅行，帶阿BOY黎我地屋企住幾日。

黎緊個禮拜我地屋企又好熱鬧喇(太太好開心)。

黎緊個禮拜我又可以同個“狗友”一齊喇(又要一早起身出去執狗屎喇)。

哈…哈…哈…嗚…嗚…哈…哈…………………

收貨

接到阿耀打黎個電話：阿慶，支CANON EFS55~250 f/4-5.6is返左貨，你黎拎啦。

肥仔：我冇錢，遲o的先拎得唔得?

阿耀：拎左先喇，支鏡成日冇貨架，你有錢先找數啦…

肥仔：我下個月先有錢喎…

要同太太交代，都唔知點講好…

沉迷

今朝o係美心攝影見到阿耀，又係要俾錢o既時候喇。係相機專用閃燈$720(係代用品，如果係原裝佳能閃燈要$3,800架)。仲有個把手訂緊返黎，我睇仲要投資落去(現階段$8,623)。我咁算唔算敗家？我怕我會……….沉迷….落去….太太原諒我啦!!!!

著數

以下係我同車手、小西、老闆講野對答。

余生：今晚有電視機駕到，小西、車手，我會儘快安排幫二老闆個單位部電視機裝上牆。

小西：幾時裝？約左時間未？......

車手：下要鑽牆？咁我有冇錢收番呀？

余生：公司時間幫公司做野邊計錢架，你計月薪架。

車手：我應徵做楂車乍，我淨係講過識鑽牆啫，又要做多一樣野，咁我好冇著數，出黎做野都係想揾著數啫……

余生：咁我會同老闆講……………………………

余生：老闆，車手問我地同客裝電視機上牆佢有冇錢收、有冇著數喎。

老闆：佢唔係嘛？係唔係咁講野呀?

其實出黎搵食乜都要計o個o的人先至無“著數”。

駛錢

今日一早出門，因為要去交地租同買靈芝丸。我問過財政廳安先生，佢同我講地租月頭交就唔使排長龍。返到公司第一時間寫兩日假期落白板5月11、12號(星期日、一)，未知批唔批。行經美心攝影見到阿耀又係找數時候，今次係450D專用觀景器，$145又要駛錢。

今日身體狀態差，好攰同好眼瞓(年紀大左)，要好好休息喇……如果唔小心病左，又要“駛錢”喇。

五一

被譽為黃金週o既五月一號已經過去，又要等下一年。每年o既黃金週，老闆都作出銷售部署，今年無乜特別行動。其實假期上都有改變，生意唔好加上封路傳送聖火，只係旺丁唔旺財。今日要準備打包o的修理機，聽日寄走，忙左成個朝早。因為人流少，今日生意都唔好，要好努力先賣左一組機。老闆一早返黎座陣，但係都改變唔到淡市o既事實。真相係咁唔使俾人插。以後...“五一黃金週”...要改做...“五一籌賓週”...個個主管都要等住俾老闆插。

聖火

今年祖國歷史性舉辦奧運會，傳聖火岩岩傳到黎澳門，澳門政府隆重其事又封路又封橋好大陣象。今日下晝3點開始，火炬手一共120位要傳送3個幾鐘先完，地區包括澳門同離島。市民大眾都普天同慶，傳“聖火”係非常神聖同榮幸o既事。

其實每個人心內都有一團勇氣、正義、關懷、熱心o既“火”。好多人都冇將佢發輝出黎。我地係唔係應該要積極發揚呢一團內心既“聖火”呢？

巴喇...巴喇...巴喇...

今日要早o的出門，因為要去好多地方。第一先到樓下管理處交管理費、第二去中銀入數、第三去交報紙費、第四去永亨交保險箱費仲有……..

今早返公司見到鎖已經開左，老闆一早o係裏面做緊野(其實係返黎踩場)。

老闆：余生你點分配佢地做野呀?......唔得…唔得…巴喇…巴喇…巴喇…

我都費時睬佢…做野。

十三

今日五月一號，太太放假，我就要開工。街出面好多人，公司生意就麻麻，老闆又有機會插人喇。老闆：余生你淨係企o係度無用架，你要帶頭去派傳單先得架。落黎我個貨場有三種人，一種係學生(買碟)、第二種係自由行(黎睇野)、第三種係本地人(黎買機)。今日o的客全部都係第一同第二種，唔使講都知成績係點啦…

今日做左十三個鐘頭野，攰死人喇………