地獄(開工)見聞...機場禁區

2015年6月27日（星期六）

公司經常要到特別部門申請許可証到機場、碼頭、邊境⋯等地方工作，曾經入機場禁區工作多次，今次工程係到機場控制塔安裝「微波天線」咁嘅工程喺機場禁區係第一次，工程唔難但好多限制，花咗3日時間⋯終於完成。

毛爸：喺機場禁區揸車要有安全車帶領...

毛爸：啲飛機好似喺身邊起飛咁...嘩～好刺激...

毛爸：機場跑道唔準停車唔準步行...除非有特別許可...

毛爸：微波天線另一方安裝喺路環媽祖付附近天線塔上...有 15層樓咁高....爬咗上去...

要坐５分鐘去回到氣...

好有恆心嘅毛毛

2015年6月29日（星期一）

過去嘅一星期毛媽去旅行⋯毛毛每日每次落街散完步返到屋企⋯第一時間走入睡房撲上床邊搵毛媽，真係好好奇點解毛毛會咁做，或者⋯咁睇⋯毛毛一直都深信毛媽會喺屋企等佢⋯如果唔喺度只係未返屋企，雖然落空但⋯毛毛好樂意去做，呢位毛毛少爺除咗要讚賞佢有恆心之外仲要俾個叻佢有份堅定嘅信心。

毛毛：媽咪...去咗跑步未返嚟呀..又見唔倒媽咪喇...失望

毛爸：毛毛平日入門口第一時間去飲水...過去嘅幾日第一時間衝入房...

雖然散完步未清潔腳仔會整污糟床舖...見毛毛咁嘅表情...都唔忍心鬧佢...

地獄(開工)見聞...只怕豬一般的幫手

2015年6月25日（星期四）

我份工雖然施工簡單⋯但物料重、高空作業、凌空用力⋯所以係一份辛苦嘅工作。

由於現在施工地嘅項目面積大⋯做運材料、傳遞工具⋯嘅同事會係重要嘅拍當。

呢排上頭派一位做咗一個幾月嘅同事來幫我手，但我唔覺得減輕咗我工作同增加效率⋯反而令我好難向老闆交待。

該同事連手板眼見功夫都話唔識做，極小機會上陣工作，你開工佢只會企喺度望實你⋯態度就係"你都識做唔使我幫手啦＂對工作欠主動，維一最績極係放飯同收工，遇到啲咁豬嘅幫手⋯⋯自己做死。

毛爸：啱啱先食飽飯...又要開工搏殺喇...

臭得利害

2015年6月25日（星期四）

近日天氣熱⋯身上嘅衫基本上由朝濕透到晚而且又咸又臭，放工返到屋企第一時間換咗啲衫放出騎樓，如果放喺洗手間⋯啲臭味就會令大廳一陣味。

今日放工返屋企一開門就聞到一陣陣由廁所傳岀來嘅惡臭，心諗梗係噚日自己換咗件衫唔記得攞出騎樓，到搵出原因⋯真令人笑爆嘴，自己咁大個人仲咁冇記性真係要打手板喇。

毛爸：原來啲臭味係來自毛毛嘅便便...噚日唔記得放落垃圾桶...帶咗返屋企...

毛毛：有人冇記性做錯事...應該罰打手扳喇...

癡身的毛毛

2015年6月24日（星期三）

噚日毛毛全日表現失落⋯喺屋企都望實我跟出跟入，朝早散完步返屋企就第一時間搵毛媽，夜晚瞓覺每隔大半個鐘都會爬喺床邊睇下我係唔係喺床度瞓覺，搞到我瞓唔着。

到最後我出去廳梳化瞓⋯毛毛就跳上梳化瞓喺我腳邊，咁就⋯大覺瞓到天光，毛毛小朋友嘅行為令我難明⋯

毛毛：同毛爸一齊瞓好開心呀...

毛爸：係呀係呀...你有你瞓我有我瞓丫ma...

毛毛：毛爸，我瞓我個位啫...你唔使咁大反應嘅...

毛爸：無奈...

毛毛：媽咪去邊？

2015年6月23日（星期二）

太太幾個月前已經計劃咗同湯太去旅行⋯今日出門喇，呢幾日太太執行李⋯毛毛梗係做破壞王啦。

今早毛毛成朝喺㕔行來行去⋯好似有好多心事一直到毛媽出門。

今朝我幫太太推行李落街搭湯生部順風車（多謝湯生幫忙），推行李箱出門嗰一刻開始毛毛就狂吠⋯到我哋搭電梯都仲聽到毛毛吠，當我送走太太返上屋企⋯毛毛表現特別開心，我發現毛毛有個奇怪嘅行為，坐正喺大門口不斷咁回望同我眼神接觸⋯好似問我⋯點解媽咪仲未返來咖？

毛爸：可憐的毛毛...

開懷的午餐

2015年6月21日（星期日）

今日中午我同太太要帶毛毛去寵物店剪裝⋯順道到「后座」食飯搵曾先生傾偈，由於曾老闆親自下廚料理出品⋯所以非常忙碌，更為我哋份餐加大、特別配制飲品及甜品。

雖然午餐、飲品份量都加大⋯我哋全部食清仲食得十分開懷，多謝曾老闆親自款待。

新寵...咖哩飯，好香唔辣...味道豐富，太太食咗半碟...

名物...叉燒飯（爽粉），呢份加碼嘅叉燒配爽粉...太太食咗大半份。

曾先生為我配製嘅...黑磄檸檬水...特大杯裝

曾先生為我特別製作嘅甜品...鬆餅配四色蘚菓乳酪...一試難忘...

令人憂心嘅毛毛...慣性皮膚病

2015年6月21日（星期日）

上星期日因為毛媽發現毛毛右後腳有一粒小肉粒（懷疑係腫瘤），由於毛毛皮膚抗病能力係最弱一環，毛媽帶咗毛毛去見醫生，經醫生檢查⋯開咗藥膏俾毛毛搽一星期。

噚日再帶毛毛去診所覆診⋯醫生再幫毛毛檢查之後⋯結果⋯醫生話：毛毛右腳粒小肉粒冇增大到、冇不正常生長，可能只係普通脂肪粒，毛毛唔使再搽藥同食藥。

毛爸：搽藥一星期...期間毛毛要帶喇叭頸圈...可憐的毛毛小朋友...

父親節2015

2015年6月20日（星期六）

父親係我生命中一個非常重要的人物，係我模仿同學習嘅對象，父親更是陪育我成人同令我認識自己嘅導師。父親生前都為養家勞碌一生，而當時我亦將全部時候花在忙碌嘅工作上⋯忽略對父親孝順同關心，一直到⋯父親仙遊。

現今心中只留下遺憾，心底有句說話好想同父親講：爸爸我愛你，父親節快樂！

毛爸：祝各位爸爸...父親節快樂！

單車日誌...盡情咁踩

2015年6月20日（星期六） 4：30 未天光 微風 28度

一個星期前約咗班單車發燒友⋯如果端午節放假我就會跟佢哋上大陸踩一日單車（約110公里），但好可惜我身體不在狀態（短短一星期內輕咗 4 磅）之外近日工作又非常勞累⋯唯有放棄。

凌晨三點幾⋯醒咗瞓唔番⋯仲心思思想出去踩單車，為咗滿足心靈⋯裝身出去踩單車。

毛爸：好快呢度會變成熱鬧嘅地方「遊艇停泊碼頭」

毛爸：呢座建築物夜晚好靚...

周圍都好靜...

太陽升起之前嘅景色...

端午節 2015

2015年6月20日（星期六）

話咁快就到一年一度嘅「端午節」，毛家祝大家有個開心嘅端午節同愉快嘅假期。

每年嘅「端午節」阿妹都會送糉俾我家過節，實在非常感動同暖暖在心⋯我更將糭嘅味道銘記於心，每年端午節食糭⋯心底都會浮現出自己兒時食過嗰種嘅難忘味道⋯嫲嫲同媽媽親手包嘅糭⋯⋯

毛家：祝各位有個難忘嘅端午節假期...

地獄(開工)見聞...幸福的午餐

2015年6月16日(星期二)

返地盤開工非常辛苦…長時間全身濕透，經常要狂飲水…咁係會影響胃口咖。又其是午餐飯盒賣相非常差，飯非常硬、餸好咸…簡直令人失去食慾，由於飢餓初初格硬都食咗半盒飯…慢慢開始習慣反而覺得盒午飯好好食…仲好期待。

地盤工地文化…11 : 30放飯 13 : 30開工，呢段時間工友們最開心，好快咁食飽飯然之後瞓個 “晏覺” ，全工友都期望每日嘅午飯…感覺非常幸福。

毛爸：平日我一定唔食呢種飯盒...

雨中的音樂監製⋯三陽和諧迎端陽

2015年6月14日（星期日）

今日係澳門佛光協會主辦嘅＂三陽和諧迎端陽＂慶端午節活動，喺澳門黑沙環祐漢公園 4：00～ 5：30舉行，內容有義賣攤位、遊戲攤位、祈福環節⋯。

今日身體仲未係狀態仲有啲唔舒服⋯由於一個承諾（做義工）十二點幾就到場準備，今日唔知點解由出猛太陽變成落大雨一直咁落到三點幾⋯當大家都好失望嘅時候又再出猛太陽，今日嘅責任係監控全場音樂同表演音樂⋯希望今日事事順心。

大會佈景簡單...但好應節...

喺大雨中做監製都係第一次，幸運地有會長同師姐們支持，整個下晝都有靈芝茶、水、齋菜、米粉...等無限供應，多謝關心。

雨後的美景...工作一切順利完成，感恩。

毛毛的新玩具

2015年6月15日（星期一）

平日毛毛只有網球一種玩具，無論喺屋企或者到公園都係玩網球（執波波），清早怕嘈到樓下住戶，幾個月前開始朝早毛毛改玩繩索玩具，毛毛只係玩咗一星期繩索玩具就＂散哂＂仲經常有啲纖維卡住喺啲牙齒度⋯要毛媽幫手清理。

上次喺香港買咗件玩具俾毛毛，而呢個玩具令毛毛有種新玩法⋯一定要我哋陪佢一齊玩。

毛爸：毛毛對新玩具好有興趣...

毛爸：連毛媽都同毛毛玩到癲...

毛爸：玩具玩咗兩星期就"散散哋"，我睇好快又要報消...

我帶毛毛出去海邊散步

2015年6月14日（星期日） 

呢排因為患流行性感冒差不多有一個月冇帶毛毛出去玩。

雖然我今朝好晏先起床但狀態唔多好⋯都好想帶毛毛出去海邊玩，下定決心今早帶家人出去晨運散心⋯

毛爸：毛毛今朝開心到有啲失控...難怪...好耐都冇去海邊玩喇...

毛爸：海邊到處都係浮萍....

毛爸：到處貝殼...

毛爸：毛毛曬到眼仔紅晒都繼續衝...

令人憂心嘅毛毛...左眼好返喇

2015年6月13日（星期六）

毛毛左眼損傷搽咗幾日眼藥膏之後⋯除咗退咗紅色之外仲正常番。

下晝 6：00毛媽帶咗毛毛去另一間診所檢查皮膚順便檢查眼睛，結果⋯醫生話毛毛眼睛完全好返晒，但仲要搽多5日藥。

毛毛：我左眼好番晒喇...多謝各位關心...

令人憂心嘅毛毛...做好多種測試同檢查

2015年6月11日（星期四）

帶毛毛去到診所⋯醫生即時接見，先同毛毛檢查眼睛、用試紙同螢光劑做病毒測試、檢查耳仔、血壓、關節、體重⋯最後驗血同即時治療。

結果⋯毛毛左眼損傷而引起红腫、有少少血壓高、腳部關節有少少退化（建議食關節保健藥物），今次檢查治療過程由醫生花 45分鐘完成，醫生講毛毛眼仔基本上冇大問題...

毛毛年紀慢慢大相信健康會開始走下坡⋯實在正常，無可避免，醫生建議家長多啲留意毛毛小朋友嘅健康。

毛爸：醫生講所有檢驗數據都正常，左眼要搽藥觀察...應該問題不大，家長無需太擔心。

令人憂心嘅毛毛...左邊眼增唔開？

2015年6月11日（星期四）

呢排我聽張醫生指示停止所有運動、用腦力嘅活爭取時間休息。

噚日朝早⋯照常幫毛毛梳洗準備外出散步，發現毛毛左眼好多分泌物仲有少少紅，自己以為只係一般污糟⋯大意咗。當日我收工返屋企⋯發現毛毛對眼仔通紅左眼好多眼水，見到咁嘅情況自己先知驚⋯即時帶毛毛去（綠十字）見醫生。

毛爸：情況令我擔心，眼仔越來越紅...流好多白色眼淚...

毛毛終於得賞所願

2015年6月2日（星期二）

毛毛小朋友好鍾意痴實我哋，由其好想靜靜雞走上床陪我哋瞓，但我哋睡床係毛毛禁地⋯所以毛毛由細到大都只係喺我哋床邊瞓。

呢幾日我患感冒怕傳染俾毛媽（不幸前日已經俾我傳染咗）同毛媽分房瞓（我瞓廳梳化）。

呢幾晚毛毛嚫我瞓著就跳上梳化瞓喺身邊，每當深夜我都俾奇怪嘅聲音嘈醒，原來嗰啲聲係毛毛發出嘅＂鼻寒＂聲⋯

毛爸：我有種感覺...越對得佢（毛毛）耐...越會愛錫佢...

醫生確診我患「流行性感冒」

2015年6月2日（星期二）

由星期六開始一連三日因為唔退燒到氹仔急診見醫生，噚日張醫生確診我患「流行性感冒」，要進行一連 5 日服食「特敏福」特效藥治療，呢幾日身體非常勞累。

服食特敏福之後⋯體溫好明顯下降到 "低燒 "水平，雖然身體疲痛慢慢咁減退但藥物⋯令我產生另副作用 "失眠 "同 "頭暈 "，咁又係另一樣辛苦嘅開始，有排先返得工⋯真係大劑。

毛爸：天氣又熱又雨...最易令人生病...各位要小心呀！