毛爸毛媽毛毛豬: 3月 2015

2015年3月31日星期二

俾「木棉無罪、英雄無涙」嘅標題吸引

2015年3月31日（星期二）

每年呢段時間就係木棉花盛開嘅時期，木棉樹周圍都木棉花海非常壯，當木棉樹結滿果實成熟爆開棉絮紛飛又係一個奇景⋯

期間花粉、花蜜、果實都係鳥類、蜜蜂、蝴蝶、蟲⋯嘅食糧，民間流傳乾木棉花有解毐、清熱、驅寒、祛濕嘅藥用價值，係大自然恩賜。

有報導木棉花粉同花絮易引起敏感，若嚴重敏感人士吸入有機會引致死亡，但投訴人士數字不詳⋯若然冤屈木棉真係英雄無涙。

毛爸：木棉花永遠高高在上開花

盛放

團結

孤獨

落花

回歸...

2015年3月29日星期日

幸福的黃昏散步

2015年3月29日（星期日）

黃昏時間好少一家出去散步⋯因為呢個時間要準備家人同毛毛嘅晚餐。

噚日開始狂咳家庭醫生話我患「流感」仲有「低燒」骨骼痛得要命，今日瞓咗大半日身體變得更疲勞，今晚唔使煮餐⋯嚫機會帶毛媽毛毛出氹仔橋頭散步，今個黃昏好開心遇番好多相熟狗狗朋友⋯行過有好多落花嘅小徑⋯一家人慢慢散步⋯此時自覺身處福中...

但願自己感冒快啲好番。

毛爸：毛毛上車己經開始興奮狐叫...落到地更開心到不得了...

帶狗狗出街散步要開心又要守法係有一定嘅難度。以毛毛活躍八卦到處都聞到處放低幾两⋯便便1～2次丶尿尿3～4次丶尿尿假動作3～4次為例⋯我要準備10張廚房紙、1包紙巾（後備）、12單張報紙⋯每次散步要照顧毛毛⋯要印乾尿尿丶要執便便丶仲有毛毛最要命嗰種舉高後腳又冇尿尿嘅假動作（離遠離睇毛毛尿咗我冇善後）⋯令我疲於搞衛生。

毛毛係小型狗都帶俾我咁麻煩⋯如果係大型狗就更加不敢想象，睇嚟開心散步要搵工人做善後先得喇⋯

毛毛：我便完尿完同做完假動作都要坐低等毛爸搞一輪衛生先可以繼續散步架...

毛爸：帶毛毛散步係好忙嘅事...

2015年3月28日星期六

momo心聲...毛爸俾人當變態佬

2015年3月28日（星期六）

今朝毛爸一早就帶我落街散步⋯我一出門口就走去巴士站垃圾桶旁邊尿尿，尿完之後毛爸叫我坐下⋯毛爸先用廚房紙印乾啲尿尿用報紙執起然後用漂水噴洗又再用廚房紙印乾再用報紙執起放入垃圾桶，雖然一早巴士站人唔多⋯而全部人嘅目光都帶奇異眼光望實毛爸嘅行為，佢哋嘅眼神俾我覺得喺度講緊毛爸「呢條友係唔係痴線咖！」，我忍唔住狂吠佢哋一輪先行開繼續散步⋯

毛毛：啲人真係冇品...最慘係毛爸俾人當痴線佬咁睇...

毛爸：毛仔，唔使咁勞氣咖，唔關嗰啲人嘅事，但...最緊要自己守法...

2015年3月26日星期四

民署職員跟住狗主

2015年3月26日（星期四）

聽網友講⋯民署便衣職員會離遠靜靜跟著狗主，當狗主不案照官方嘅方法去善後，民署 2 位便衣就會一勇而上將你撿控，由於狗主覺得備「裝彈弓」嘅感覺⋯好多都驚動警察到場⋯最後民署職員好大壓力咁開出「吿票」而狗主擺出誓要報仇嘅態度深深不份咁離開。

好想問民處點解要花人力同時間去執行控告狗主？而當局者所講「狗狗在家便便尿尿完⋯外出就唔會便溺」有冇真實証明？⋯待續。

毛爸：毛仔，落街嗰陣你就要醒目喇，見可疑嘅人就唔好便便尿尿喇...

毛毛：收到...嘩～宜家去便便尿尿啫...都好似做賊咁...無奈...

嚴格執行公共地方寵物便溺規章

2015年3月26日（星期四）

民署執行罰則⋯聽太太講好多狗狗家長帶狗散步狗狗便便尿尿完嗰陣冇照民署專家建議善後而檢控「中招」。

民署喺電視廣告片中建議家長教育狗狗在家便便尿尿完先出街散步，如果狗狗在街上便便就要事先用報紙墊好⋯完後將便便包好再投入垃圾桶、如果狗狗尿尿⋯先用紙將尿處印乾用 1 比 99 漂白水沖洗再次用紙印乾。

我案照官方建議...今朝帶毛毛去散步用咗⋯2 包紙巾丶2 支水丶9 張報紙⋯呢種方法會令人發癲⋯待續。

毛爸：啲「屎」碌出界啲「尿」索唔乾都會有機會收「告票」...

毛爸：頂...成條街都冇垃圾桶...宜家我成個袋都係屎尿包...

2015年3月24日星期二

變番正常嘅毛毛

2015年3月24日（星期二）

旅行回歸已經一段時間⋯毛毛嘅行為習慣都慢慢正常番，連體重都升番以前嘅水平，只係某啲行為變化就有少少意外⋯

每日朝早我一落床毛毛就會跟實我，以往毛毛有賴床嘅習慣。

每當我哋坐梳化⋯毛毛就會喺我哋身邊瞓覺，仲會瞓到「且鼻寒」，以往毛毛瞓番自己個位唔理我哋好有個性咖⋯

毛爸：毛仔瞓喺我哋身邊...自覺十分安全，瞓得十分安心...

毛爸：有時覺得痴身嘅毛仔令我好感動...

2015年3月23日星期一

令毛毛打「乞痴」嘅花

2015年3月23日（星期一）

每年春天氹仔電信大樓同消防大樓之間嘅韶關街嗰 9 棵大樹會一齊開花⋯由淡淡嘅香氣慢慢至到濃烈花香充滿整條街。

自己好享受呢種花香，呢段期間帶毛毛散步必經嘅街道，但毛毛行過呢條街就有啲擴拒⋯有時仲會不停咁打「乞痴」⋯

毛爸：毛仔，啲花係唔係好香呀？

毛毛：嘩～毛爸，你浪漫完未呀？啲花味好攻鼻呀...乞痴...

毛毛：毛爸，我哋再唔走...我會暈低咖...救命呀....

毛爸：毛毛小朋友你識乜野丫...

2015年3月22日星期日

單車日誌...追霧變追雨

2015年3月22日（星期日）6：00 天陰微雨 21度

運動呢樣活動好奇怪⋯如果習慣經常運動⋯有日停咗⋯你就會有種周身不自在心思思要做運動嘅心引。

今早落到街見路面濕心知不妙，因為今早架單車冇安裝防水沙板，而白濛濛嘅現象係由雨粉粉做成，本來今朝準備出去影霧景，而家⋯維有早去早回⋯

今朝除咗全身濕晒之外成背脊都你沙泥水...

2015年3月21日星期六

補慶祝生日帶毛毛出去玩水

2015年3月22日（星期日）

今早我踩完單車返屋企都仲落緊雨粉粉，幫毛毛著好雨褸就落街散步。

但落到街⋯又好似停咗雨，由於冇雨落⋯我同毛毛又著咗顏色鮮豔嘅雨褸⋯行過巴士站有好多人都望實⋯我哋嘅行為非常出位，連回收場嘅唐狗離遠就狂吠我哋。

我諗住補慶祝毛毛生日帶毛毛出去玩雨⋯真係世事無常⋯未必事事順心。

毛爸：毛仔我哋出去玩水...好唔好？

毛毛：讚成...好野呀...出動...

毛毛：落完雨...冇水玩...黑仔...

毛爸：毛仔，唔使冇心機...我哋食大餐補番數...

單車日誌...單車親子樂

2015年3月21日（星期六）17:30 陰天微風 21度

今日下晝先出去踩單車，習慣上呢啲時間我都會去單車徑踩單車，原因係⋯少人少車。

但今日就好熱鬧（忘記咗今日係星期六）⋯好多父母帶著小朋友到單車徑踩單車同學踩單車，見到好多父母滿頭大汗⋯大聲疾呼：阿B小心呀！唔好踩咁快呀！而小朋友就面紅紅⋯好似聽唔到爸爸媽媽叫咁搏命向前衝。

我好想信呢班係好幸福嘅小朋友，我好响往嗰種幸福嘅感覺更响往小朋友嗰種勇敢向前唔怕受傷嘅精神，今日基本上係陪住啲小朋友踩單車。

毛爸：平日水靜河飛...假日水洩不通....

2015年3月20日星期五

地獄(開工)見聞...對於「工業安全」嘅認識...有另一種思維

2015年3月20日（星期五）

由於工作上需要⋯每到大形地盤工地工作都要參加工地建築商提供嘅「工業安全入職課程」⋯最後仲要通過考試合格先可以入工地開工。

以往經驗⋯課程內容都係有關⋯做好個人安全裝備、安全施工⋯等等嘅常識。

今日參加咗一個全日制「工業安全」課程⋯安全導師係一位二十幾歲嘅青年人，態度惡相出位、不可一世、擺教官款，施教方法「吹水」同「講故」，但佢好明確帶出一個信息「地盤工地係一處危險嘅地方、工作上要將生命放第一位、除咗自己安全工作仲要顧及其他工友安全」，佢嘅論點同以往嘅教官唔同，原來有數據指出大多數工業意外係人維因素引起，除咗當時人唔小心或意外...絕大多數令工友受傷都係因為別人自私、大意、貪方便同唔小心做成。

自己要安全更要顧及工友嘅安全...呢種思維令我獲益良多...

教窒場地設計帶出安全信息...

雖然大部份工友都好留心聽導師喺度吹水...原因係...導師睇你唔順眼，你就唔使考試...

課窒貼滿安全海報...全部都係試題答案...

2015年3月17日星期二

濛濛仙境

2015年3月17日（星期二）

今早好大霧⋯周圍都好濕，眼見嘅前方一片白濛濛，好似仙境咁。

今朝帶毛毛散步⋯只係行咗一陣就發覺⋯頭髮、外套濕晒，連毛毛嘅頭都結咗一點點嘅小水珠。

呢啲天氣令人好攰、令人情緒低落⋯

毛爸：白茫茫

毛爸：搞到毛毛都好好奇...

毛爸：空氣好濕周圍都係水...

2015年3月15日星期日

毛毛7歲生日、祝毛毛生日快樂⋯

2015年3月16日（星期一）

生日快樂呀！毛仔。

每年嘅今日家人都為毛毛安排生日會，由於工作關係家人商量將慶祝節目改喺下星期日。

家人只係許個簡單嘅願⋯祝毛毛身體健康、快樂成長⋯

毛爸毛媽：毛仔祝你生日快樂！你又大一歲喇...要聽話要乖啲喇...

毛毛：知喇知喇....你哋好煩呀...

單車日誌...大霧又大風

2015年3月15日（星期日）7：50 大霧大風 20度

今早遲咗起床⋯準備好出去踩單車，今朝好大霧空氣好濕令身體好快進入勞累狀態⋯大逆風最後都令我放棄...只係踩咗十幾公里。

有人覺得運動係一樣辛苦又費事嘅行為⋯為咗健康而做運動嘅某一羣人⋯因為佢哋本身已經唔健康，運動為佢哋嘅身體帶來改善而堅持。

毛爸：臺灣買返嚟嘅發光水壺...令夜間同凌晨踩單車更安全...

2015年3月11日星期三

令人憂心嘅毛毛...旅行之後嘅後遺症

2015年3月10日（星期二）

旅行完返到屋企嗰幾日⋯毛毛對我哋嘅一舉一動都好緊張，期間⋯我哋入洗手間耐啲毛毛就會 R 門，佢要証實我哋喺入面。

過去嘅星期日朝早帶毛毛出去玩⋯我將食水、玩具、相機⋯準備入袋，毛毛表現唔係平日咁開心興奮而係焦慮狐叫，可能毛毛眼中我哋執野等於離開，我哋出門嘅 4日毛毛面對新工人姐姐、食同平日唔一樣嘅餐、唔可以落街散步、冇得玩、冇便便 3日、瘦咗 0.4Kg⋯難怪毛仔咁焦慮⋯陰公豬。

毛爸：毛毛宜家散步一定全家一齊行...否則罷行...

毛爸：毛毛連影相都唔聽話...

毛爸：連我工作毛毛都在旁監視...

2015年3月9日星期一

留臺北最後嘅一日

2015年3月10日（星期二）

2015年3月4日（星期三）清晨六點就已經梳洗完準備出街⋯但落到大堂先發覺外面落雨⋯唯有返上房執行李。

今日節目⋯去龍山寺食早餐、行書店、同老友食午餐、買手信、鰻魚飯做晚餐、出機場買手信、回歸。今次旅行冇特定目的只係飲飲食食行街買野，雖然太太係最大得益者，但⋯大部份都係食品⋯呢個情況我都覺好意外...

臺北今朝落毛毛雨

龍山寺花燈...

眾多善信到寺祈福...

再見臺北...

2015年3月8日星期日

令人憂心嘅毛毛...毛毛終於肯出騎樓便便

2015年3月8日(星期日)

2015年3月3日（星期二）旁晚⋯收到工人嘅短信⋯毛毛仲未便便而工人都好擔心，我估毛毛應該係冇做適當嘅運動，原來工人唔識同毛毛玩，而執波波遊戲毛媽又唔建議工人同毛毛玩⋯因為毛毛只會將個波波交俾毛爸，甚至毛媽要攞返波波毛毛都會狐叫抗議⋯其他人？更加唔可以。

今次為咗毛毛毛媽叫工人同毛毛玩執波波⋯果然毛毛玩咗一陣就自動出騎樓便便，忍咗咁耐毛毛小朋友都辛苦喇⋯

毛毛：便便完舒服晒...爽...

毛爸毛媽：辛苦你喇...毛仔...

2015年3月7日星期六

烏來

2015年3月8日(星期日)

2015年3月3日（星期二）朋友講想悠閒咁睇風景、食特色美食⋯「烏來」呢個地方唔錯⋯可以去遊覽。

烏來呢個地方⋯必遊嘅景點⋯坐特色小火車去睇瀑布、行老街試試地道特色食品。

或者⋯季節關係風景一般但美食就為我哋帶來驚喜，油炸溪魚、竹筒飯、走地雞、翠苦瓜、冰溫泉蛋、燒烤肉腸、樹上熟木瓜、巴樂⋯令我一試難忘，由我哋住嘅酒店去烏來要乘搭捷運(單程 15個站)再轉公車(單程 39個站)，來回要花2個幾小時共經百幾個車站⋯呢個情況係我第一次亦令我難忘。

搭公車到烏來總站...落車見一第一個景點...吊橋...

呢座神宮好宏偉好靚...但我唔記得佢叫乜名...

陽光普照...倒影迷人...

呢度樓梯頂係台車站...

當地原居民想盡辦法來做遊客生意...連酋長都放下身份幫遊客影相...

時令水果、烤肉腸、竹筒飯、冰溫泉蛋...呢啲地道美食必食...

離地 80幾公尺嘅瀑布、台車...係烏來嘅地標代表...

令人憂心嘅毛毛...毛毛3日冇便便

2015年3月7日(星期六)

2015年3月3日（星期二）自從我哋出咗門去旅行之後⋯每次喺天眼睇毛毛都發覺佢瞓喺按摩椅上面，幾乎日日都係咁，工人講毛毛食餐好正常⋯但問題係唔肯出騎樓便便⋯仲已經第3日，實情我都明白⋯毛毛平時每日落街散步2次，尿尿同便便都喺街解決⋯呢幾日突然間冇得落街⋯唔肯便便算係正常，不過⋯3日都唔便便未免令人擔心喇⋯

工人姐姐：少爺仔求下你啦...出騎樓便便啦...

毛毛：唔好意思...我唔習慣喎...

毛毛：唔好炸帝同我裝身...我就會出騎樓便便喎...我要落街玩...

2015年3月6日星期五

陽明山花季

2015年3月7日(星期六)

2015年3月2日（星期一）舊年曾經計畫過⋯去旅行睇紅葉同櫻花，由季節嘅關系⋯太太選擇去日本睇紅葉去臺灣睇櫻花。

今日去「陽明山」睇櫻花⋯由山腳開始已經見到櫻花樹花全開，今次賞花合時。遊完陽明山我哋搭車去第二個景點「竹子湖」，嗰度最出名嘅係海芋花田同野生山櫻，今日竹子湖好大霧好濕而海芋田亦都好梳落⋯情況令人失望。

我哋只係行咗一陣就返番臺北⋯去飲飲食食同喪拼，今日太太安排咗自助餐做晚餐，睇嚟今日除咗喪拼之外仲要喪食。