2012年2月29日(星期三)
毛毛喺屋企自由行左一段時間，情况都幾理想，宜家連廚房都有限度開放。初初毛毛都好守規舉…近排就挑戰我地既底線，毛毛由BB開始至現在都唔准入廚房，廚房喺毛毛黎講係神秘嘅地方….
2012年2月25日(星期六)
尋日去下環街市凍肉擋買駝鳥肉行經魚擋…Peter仔、Peter仔(我以前個朵)有人叫我(魚擋老闆何生我以前熟客)，好耐冇見你喇…買魚？買蝦？我有啲交洒店呢嘅大蝦…攞啲返去食啦。你推我讓咁何生質左3隻大蝦(每隻四両幾)俾我，我堅持俾錢，何生求其收我百二蚊。我煮左味泰式大蝦俾屋企人食…結果大讚好食仲食得好開心…
毛爸 : 我記得我第一次煮呢味餸俾太太食係好耐以前嗰陣我地仲泊緊拖...
2012年2月25日(星期六)
呢排天氣勁潮濕(濕度最高98%)又大霧又落雨，毛毛都少左出街散步只係行停車場。呢幾個月天氣都偏凍毛毛一直保持長毛(平時6星期剪一次毛)，但有發覺近期毛毛經常R耳R頭全身啲毛又好立(由其呢個禮拜)，屋企人擔心毛毛皮膚病復發，毛媽好緊咁卜左星期日帶毛毛去剪裝….
毛爸 : 各位家長要多啲留意，呢啲天氣好易感染皮膚病咖...
2012年2月23日(星期四)
同我地一齊生活嘅寵物(狗狗)都識得生活流程咖，毛毛餐後會飲湯(如果食魚餐嗰日就會冇湯飲，毛毛識分)，所以每次食左餐就會乖乖地坐喺度等飲肉湯。今日食雞餐，毛毛食晒之後….一直跟住我跟出跟入，我去洗手間佢仲會坐喺門口等我，我停低嘅時候佢就用好可憐嘅眼光望住我…奇怪…哦…原來我忘記左俾肉湯佢湯…… 毛爸 : 毛爸年紀大冇記性...對唔住...
2012年2月21日(星期二)
生活上己經習慣左陪伴外甥仔、女成長。今日開開吓工收到一個短訊由銘銘傳黎 “我走na，我會比心機讀書ga na”，我忘記左今日銘銘搭機返澳洲讀書，真係有啲唔舍得(我成個下晝都冇心情做野)，小朋友長大左就會有佢地自己嘅想法、自己嘅生活方式、跟住就離開你，你已經唔使再花機去照顧佢地擔心佢地 ，咁係好事…佢地開始勇闖人生路，創做成就，有美好嘅將來，而我地亦開始迴憶佢地以前成長中嘅開心事，發掘自己記憶中嘅寶藏….
銘銘、銅銅嘅成長過程...就好似一殺那間，我地要珍惜眼前...
2012年2月19日(星期日)
尋日帶左毛毛去氹仔運動場迴旋處打 “狂犬病”疫苗，(2月18日)嗰度有個政府狗房流動服務站，為氹仔區嘅市民服務。服務有為寵物新牌登記、續牌、打疫苗針…,毛毛今年要打 “狂犬病”疫苗，毛媽好擔心…聽好多人講啲疫苗藥力好強有啲狗狗受唔住，姑娘又話有啲狗狗對疫苗過敏反應…總知傳聞好負面，而且毛毛最怕打針(童年陰影)，但毛毛今次好叻……………
唔使驚咖，我地都係第一次打...
毛毛 : 媽咪唔打針得唔得呀~
2012年2月16日(星期四)
今日係一個特別日子太太生日，好似一剎那…我地就一齊生活左二十幾年，過去妳嘅生日我都花盡心思送禮物俾妳，但今年就欠奉…咁唔係我冇心，我只係將啲錢投資喺我地未來嘅生活，過去嘅我對妳唔知係唔係做到最好，但我有信心未來我係會做到更好，無論將來係點我有生之年都希望能夠親口同妳講 “祝妳生日快樂、我永遠愛妳”！
2012年2月14日(星期二)
今朝開左FB就見到由朋友轉載嘅拍相片…內容係一隻黑色小狗，小狗由頭到身嘅皮膚爆裂潰爛、右眼反白失明、左前腳傷到冇晒皮膚，由於傷口太多連身體嘅顏色都變左…我唔係好相信係有人咁狠心將隻狗狗惡意虐待成咁，啲人點解係咁殘忍？啲人點解咁唔識專重生命？啲人點解肯花時間去虐待生命？而佢地又得到啲乜野呢？我見到張相第一個反應非常震撼對眼不斷咁流出眼淚…我哭了。
2012年2月13日(星期一)
我地好友聚餐係3個家庭7位成員…要約齊全部成員其實難度幾高咖，大家嗰日幾點食、去邊度食、食乜嘢菜？咁艱辛嘅任務就由太太團决定喇。今次大家嘅話題係年尾一齊去旅行，仲達成初步共識，為飯局增加開心高興嘅氣分，今次飯局食材非常豪華有原隻鮑魚、鵝掌、魚、特色肉餅、菜…糖水，到走嗰陣湯生仲爭住埋單找數。由於飯局可以盡情咁食大家都食得非常開心…我除左食得狼之外仲打包埋返屋企，我係唔係過份左少少呢？….
2011年2月11日(星期六)
每年大大細細嘅花展我都會揪時間去吓影相，除左自己鍾意影相之外仲好鍾意花(太太都好鍾意花嘅由其係蘭花)，喺花展會遇到啲名師傅、前輩、師兄、龍友、老友，敘埋一齊吹水交流技術心得，自己就獲益之多，後生仔就嚫機 “蘇”吓啲名貴相機…頂級配件，真係賞心樂事。今年花展啲蘭花數量同往年左唔多，但啲花就特別靚聽啲前輩講同天氣有關…
2012年2月9日(星期四)
話說今日下晝一點…我收工返到屋企毛毛非常熱情開心咁歡迎我，我照例獎芝士餅一粒，之後就好忙咁做自己野。做做吓野發覺…毛毛瞓喺個皇座度好冇心機咁望住我，而且叫極佢都唔過黎，原來毛毛出左騎樓尿尿完…仲走埋我身幾次我冇理佢冇獎佢所以好失望…宜家發覺自己已經做左個幾鐘頭野，唔怪得毛少發皮氣…
毛爸 : 啲小朋友真係要俾啲時間去關心吓佢咖...
2012年2月8日(星期三)
毛媽喺寵物展買左支天然鹿角俾比毛毛平時玩，毛毛勁鍾意玩，咬到流晒牙血都唔肯放，搞到毛媽好擔心同夾硬搶番支鹿角。新年期間由於毛毛勁食連體形都明顯大隻左，前日忍唔住同毛毛磅 一磅…嘩…7kg(15磅，毛毛體重上限係13磅)，屋企人即時反應係開心同擔心，開心嘅係毛毛健康所以肥左、擔心嘅體重過肥要減磅嗰陣…
2012年2月5日(星期日)
今日卜左四點送Coffee去DOL剪裝，Coffee小朋友好少外出…屋企人又對佢過份愛護，做成Coffee一離開屋企就會好緊張、唔係好肯食野、仲會發惡咬人。今次Coffee就有啲唔同冇發皮氣，仲識問我攞野食，以住對香蕉、橙、蘋果都冇興趣，今日就照單全收。剪完裝接Coffee嗰陣…日本姐姐親自抱Coffee俾我仲同我講 : 今次Coffee好乖女，好低錫….
毛爸 : Coffee繼續乖落去就好喇...
2012年2月4日(星期六)
今日一早過香港會展睇 “第七屆國際寵物用品博覽”，每年都有過去睇吓有乜野平貨執。有成幾百個展位可以慢慢睇，同場仲有 “情人節冠軍貓展”、狗狗服從、美容比賽、全犬種冠軍狗展…大會仲設有專車俾寵物同主人免費乘搭，所有寵物免費入場非常熱鬧。今次毛媽 “喪拼”收獲豐富同高興，更開心嘅係我地有緣遇到Blog友Momo Yip一家….
2012年2月4日(星期六)
呢兩個禮拜我除左變自由行之外…毛爸毛媽仲輪流放假陪我間中仲有表哥表姐陪，雖然天氣時好時壞冇得日日出去玩，但喺屋企都好開心…媽咪經常開左暖風機吹到屋企好暖，我瞓喺媽咪旁邊好舒服，仲不停咁有好多零食同生果食，體重…唔使講梗係變 “肥豬”啦，宜家毛爸成日都話屋企多左隻 “為食爛瞓豬”…
2012年2月3日(星期五)
過兩日(新十五)就係媽咪農曆生日，我拜托毛爸用我啲利是錢買份禮物送俾媽咪…毛爸帶埋我一齊去嗰間舖頭…舖入面嘅盛仔哥一早已經留左部機俾毛爸。毛爸話份禮物好貴但可以大家一齊夾份，到埋單嗰陣毛爸反口…又話用晒我啲利是錢都唔夠，仲話要我賣身…
2012年2月3日(星期五)
呢倫毛毛好唔願意出騎樓尿尿(強忍)，我細心留意毛毛…發現佢出騎嗰陣好緊張好似去探險咁，毛媽都因為咁勁鬧毛毛同大發牢騷(擔心毛毛忍出病)。呢排日日都見有蜜蜂飛入屋企，毛毛好似好怕佢地咁，而且騎樓都經常有…毛毛一見蜜蜂就走返入廳，睇黎毛毛係驚蜜蜂唔肯出騎樓…之前唔知毛毛發生過乜事呢？ 
毛毛 : 唔...出面唔知有冇小蜜蜂呢？
