心靈的良藥⋯毛毛

2017年6月1日（星期四）

呢幾日太太去咗旅行⋯工人姐姐同我講發現毛毛有奇怪嘅行為⋯就係周不時對正大門口瞓到香腸咁望實度門，我同工人姐姐講咁係因為毛毛掛住媽咪。

毛毛咁嘅表現算係低調，原因係呢幾日我休息一直喺屋企陪住毛毛。

原來人同寵物喺情緒低落嘅時候都想要人陪......

我呢排因傷患背痛到＂不能入睡＂......

毛毛就掛住毛媽＂不能入睡＂⋯⋯

呢個時刻幸運哋有對方呢位心靈良藥陪伴⋯感恩

毛毛望住大門口個表情就咁奇怪...

我好多時都問自己...係我陪毛毛？定係毛毛陪我？

呢個毛毛小朋友有時用正常嘅思考係不能理解佢嘅行為...

龍舟競渡2017

2017年5月31日（星期三）

過去好多年嘅端午節龍舟競賽都好想去現場影相。但進入賽區要有「準許証」，咁多年嚟我都申請唔到，係塲外影相就要用「長炮鏡頭」特別器材（我冇），所以一直都放棄。

今次只係去嚫下熱鬧，支持一下本地文創，見一見班攝影老友⋯⋯

龍舟賽非常熱鬧

到場支持本地創作灘位...

外隊用嘅扒龍舟槳

出式嘅本地創作，龍舟賽限量毛巾

端午節...二零一柒

2017年5月30日（星期二）

祝願大家端午節快樂！

中國古代「端午節」係一個習俗，係驅除瘟疫同祭龍嘅節日，「端」字係「初始」嘅意思「午」字按曆法係「五月」，初五，即係「端午節」，有傳說如果當日正午游水(龍舟水)、扒龍舟會帶來驅病同好運。

毛毛背部有肉粒紅腫

2017年5月28日（星期日）

5月21日星期日下晝⋯因為毛毛背部嘅肉粒有損傷同紅去見醫生，原因⋯過去一星期毛毛背部患處搽藥膏都冇消退。

經醫生初步診斷係＂良性皮脂瘤＂，如果本體唔會急速長大係唔會有危險，現階段可以繼續搽藥膏治療。

又一星期過去⋯毛毛背部肉粒冇消退更紅腫發炎，醫生決定用小手術將肉粒內嘅脂肪清除⋯⋯

醫生：肉粒問題不大，唔使食藥，但...要小心護理傷口。

毛爸：呢個毛少特別令家人擔心佢，真係好彩問題不大...

毛媽去旅行

2017年5月28日（星期日）

噚晚背痛令我瞓得唔好⋯今早遲咗起身，今日毛媽出門旅行，今早要送毛媽出機場，所以時間有啲趕。

準備毛媽同毛毛嘅早餐、幫毛毛梳洗、帶毛毛落街去散步⋯⋯毛毛好似知到趕時間咁，好快便便同尿尿完，返到屋企要幫毛毛處理傷口、食早餐、檢查行李、出機場⋯⋯幸運哋所有事情都順利。

祝毛媽同湯太旅途順利愉快。

毛毛：媽咪，記得買手信俾我呀！

旅途愉快、開心、盡情...

誘惑太多

2017年5月12日（星期五）

屋企樓下好多食市⋯所以街邊周不時會有殘餘食物⋯⋯

毛毛以前偶然有街邊執野食嘅惡習，之後⋯已經改正。今時今日毛毛見到路面⋯只係聞一聞就繼續向前行（毛毛好叻仔咖）。

今早散步行過巴士站⋯路面有好多蛋糕碎⋯毛毛聞咗第一嚿就繼續行，毛毛嘅表現連迎面行過嘅姐姐都讚佢⋯乖，到第二嚿蛋糕碎毛毛就忍唔住（實在太誘惑）⋯食咗。

實情⋯狗狗喺野外求生食地面嘅食物呢種行為十分正常，但現今社會，家長要制止狗狗呢種行為嘅其中一個原因⋯路邊嘅食物可能有毒，危害狗狗嘅生命，原來人類當中有某些人立心毒剎街邊嘅動物⋯⋯

毛爸：講真...毛毛幾自律咖，但...我就鍾意毛毛百厭啲...

母親節2017⋯媽媽 I Love You！

2017年5月14日（星期日）

今日係紀念偉大母親嘅節目⋯母親節，祝願各位母親身體健康、兒女孝順、事事順心、母親節快樂！

每到母親節心情都好交雜，仔女會同母親講：媽咪我好錫妳咖、媽咪我好愛妳咖、買禮物送俾媽咪，有某啲人會咁評：平時又唔見你咁做做，到母親節先嚟講⋯即係向媽咪炸嬌、擦鞋、扮嘢。

但對於我嚟講係⋯遺憾、無機會了⋯⋯

媽媽 I Love You！母親節快樂！

祝各位母親，母親節快樂！

2017年長跑聯賽第二回合

2017年5月7日(星期日）

凌晨5點⋯開始落大雨，之後一直至9點都落住毛毛細雨。

長跑聯賽第二回合都喺雨中完成，今次賽事本會（魂跑團）有好多男、女隊友出戰參賽，雖然本土賽同年終嘅國際賽相比⋯無論人數規模都好大分别，但本土賽勝在個個跑手都熟口熟面氣氛親切熱閙...

自己嘅目標係同隊友開心相聚、享受跑嘅過程，講唔上跑一個好時間，但⋯亦都創下自己嘅新紀錄⋯本會（魂跑團）中最後一名衝線⋯⋯

賽前大合照

各位隊友都完成比賽

隊中女將...位位都跑得快過我...

包尾了...多得全體隊友幫我打氣...多謝、感動。

以上相片鳴謝Dickson師兄幫手攝影

自由的毛毛小朋友

2017年5月3日（星期三）

放假⋯最開心係可以做自己平日想做又做唔到嘅事。

放假⋯毛毛小朋友都好開心，佢好似知道家長放假一定帶佢出去玩，但好多時都會令毛毛失望，天氣⋯寒冷、雨天、高溫⋯都冇得出去玩，每當有機會出去玩毛毛就非常興奮⋯表現開心⋯⋯

晨運其中一個熱點...西灣湖

每次要返屋企...毛毛就表現失落...

魂跑團⋯五一輕鬆跑

2017年5月1日（星期一）

現代人為生活忙碌，將興趣同操練都放埋一邊，有缘能夠集合各位隊友一齊享受輕鬆跑嘅樂趣係一件開心嘅事。

5月1號由團長召集同帶領各隊員到松山環山輕鬆跑(5k～7k)，全隊約二十幾人，陣容龐大，隊員著住整齊嘅隊服穿疏人羣之中，引起衆人關注⋯⋯

大合照

完成了環松山跑３圈，隊友們露出滿足同高興嘅心情

隊中亦有女將，而且位位都係高手，曾到世界各地參加比賽...