萬聖節2014

2014年10月31日(星期五)

唔記得幾時嘅「萬聖節」…只係記得毛毛細個嗰陣…當時捉住毛毛扮鬼扮馬影相應節…毛毛就極力反抗…點都唔肯，最尾仲走返入籠…點氹都唔肯出嚟，毛毛好似俾我哋嚇嚫咁…搞到全家鬼咁擔心，恐怖相從此欠奉，嗰年嘅萬聖節認真應節…怕毛毛有事全家都驚餐死。

今年我使咗好多零食獎勵毛毛... 佢先求其擺個「鋪士」俾我相兩張相應節…

毛家祝各位「萬聖節」快樂…哈咾喂！

毛毛：我毛毛為食豬嚟...零食一定冇得剩...

毛毛：毛毛代表毛家祝各位叔叔姨姨哥哥姐姐親友朋友老友...萬聖節快樂！

哈咾喂～

復操

2014年10月28日（星期二）

前排連日加班開工到深夜⋯踩單車同慢跑操練都停咗，除咗影響自己狀態之外連太太都陪我停止操練。

呢排唔使再夜工所有又可以同太太一齊繼續操練⋯咁⋯梗係由踩單車開始，辛苦嘅操練係為咗⋯要令身體適應不斷重複話動嘅節奏，増強肌肉組織承受能力，減少受傷嘅機會⋯享受比賽嘅過程。

毛爸：好身休息、勤力操練...

原來自己最冇耐性

2014年10月28日（星期二）

毛毛有個壞習慣⋯每次我哋食晚飯毛毛會行埋食飯枱企高要求我哋俾食物佢食，每次指令毛毛「坐低」雖然佢好聽話但好快又企番高再犯（搞到大家好勞氣）。

大半年前開始每次食晚飯就會將毛毛「上繩」，直到最近我哋用分段獎勵方法瞓練毛毛，宜家⋯每逢晚飯毛毛變得好乖咁坐喺飯枱邊一直等到我哋食飽飯為止，呢種情況嘅改變關鍵係⋯方法、堅持同包容。

當細心想想⋯自己以往嘅失敗係欠耐性同包容，原來最冇耐性嗰個係自己⋯

毛爸：毛毛宜家唔再學以前咁搞搞震...而越來越有耐性...

但面對食物始終忍唔系到...

霜降

2014年10月28日（星期二）

老人家話過咗傳統嘅氣節「霜降」天氣就會變凍，告誡我注意保暖小心唔好冷嚫氣管（我最弱嘅器官），老人家嘅關懷令我感動暖暖在心。

今朝除咗天氣變涼仲好大風，落街等於同風先生對抗⋯散步期間毛毛都好合作⋯好快就尿尿便便完一齊趕返屋企，今朝⋯我同毛仔都做咗「風中趕路人」。

毛毛：嘩～好大風呀...吹到耳仔都飛起...

北京女遊客

2014年10月29日（星期三）

今朝帶毛毛散步返屋企⋯我抱住毛毛過馬路途中遇到兩位由北京嚟澳門旅遊嘅女士，俾兩位女士窮追到行人路，原來兩位要同毛毛打招呼，佢哋係愛狗人士老家有養狗。

女士：你的狗（毛毛）很美，灰色的我沒有見過，他幾歲？

毛爸：佢六歳喇（我放低毛毛⋯指令佢坐低）。

毛毛：狂吠～（打招呼）。

女士：狗狗你乖呀，他頸上的牌是甚麼牌？

毛爸：係狗牌（女士想抱抱毛毛）。

毛毛：狂搖尾⋯吠～

女士：在這裏養狗要領許可証⋯是嗎？你的狗狗很有趣⋯（好唔捨得咁轉身慢慢離開不停咁回頭望）

毛爸：再見喇！（毛毛安靜落嚟望住女士離開）。

周圍行人啲眼光好似話我知嗰位女士先至係毛毛真正主人。

毛爸：毛仔，你好冇禮貌呀！失禮我哋澳門人呀！

毛毛：佢哋唔識得同我交流啫...我都好想同佢哋做朋友咖...

香薰

2014年10月28日（星期二）

屋企人對於「香氣、香味」好受落包括我仙遊嘅母親大人，屋企人有用香水同點「香薰」嘅習慣。

記得細個嗰陣母親經常買花返屋企插⋯茉莉花、白蘭花、米仔蘭、薑花，我最愛係薑花，呢種白色花帶有一種神秘香氣⋯一聞令人念念不忘。

過去嘅二十年每年六月至十月…幾乎每星期都會買薑花返屋企插⋯每次一大軋，花檔檔主當初覺得我係一個奇怪嘅人⋯到今日檔主會留定啲靚花俾我⋯還可以「簽單」遲啲先找數。

毛爸：薑花...可惜花期只有 3～4日拾蚊全屋都充滿香氣...

遇上開心嘅小朋友「樂樂」

2014年10月27日（星期一）

今朝晏咗帶毛毛落街散步⋯行到CTM大樓附近⋯遇到由家長帶住散步嘅樂樂（好靚嘅雪橇狗女），毛毛就用「吠爆」嘅方式同人打招呼，樂樂表現就非常「啖定」有自信，大家打完招呼後毛毛安靜落嚟...之後大家拜拜就離開。

好開心嘅相聚⋯樂樂眼神充滿活力開心，真係令人妒忌佢有個幸福的家⋯但...還有多如天上星星不幸嘅狗狗等緊大家去幫佢哋⋯

實情...我係想帶出一個訊息我哋有緣能夠幫到佢哋一把⋯對於狗狗嚟講⋯係改變狗狗佢哋嘅一生⋯

毛毛：樂樂係幾靚女咖，佢仲好想同我做朋友添...

毛爸：咁你又好大聲冇禮貌咁吠爆人哋...

毛毛：毛爸，你唔好唔會...吠人係我嘅打招呼方式、大聲唔代表我冇禮貌呀！毛爸。

毛爸：宜家啲小朋友好惡咖...無奈...

人性、獸性

2014年10月25日（星期六）

前排睇咗個電視特輯講述寵物離世主人傷心欲絕，程度有如失去子女。

有人質疑：死咗隻寵物啫⋯係唔係會咁傷心呀？（對冇養過寵物嘅人嚟講佢哋冇辦法理解）個問題係人對人類以外嘅動物、生命有唔同睇法嘅分其。

人同動物都係自然生態嘅其中一種生物，野生動物會為咗生存而殘忍殺陸⋯呢啲係佢哋嘅本質「獸性」。

人類身為萬物之靈嘅高等生物，有思想、智慧、愛心、同情心、呢啲係我哋嘅本質「人性」某程度上幾乎對所有嘅野都能支配一切⋯但好難理解仲有一部份人依然對一啲小動物、寵物施行傷害、殘殺⋯唔通呢啲人⋯係⋯仲未進化到「人類」嘅「禽獸」⋯

毛毛：我冇打算講我哋啲同類點樣俾某啲人傷害...因為我哋根本冇能力制止...

毛毛：但我相信世上仲有好多好有愛心嘅人士。喺呢度我想傳達我哋嘅心聲...

你（妳）可以唔愛我哋，但請你（妳）不要傷害我哋...

訴求「民主」佔中第...日

2014年10月22日（星期三）

自古以來爭取民主自由係要付出好大代價⋯我自問對「政治」係冷感⋯係因為搞「民主」要希生好多身邊同周圍嘅人⋯而呢啲希生付出未必係當時人嘅意願。

今次民主運動帶出學生有崇高嘅「民主自由」理念，帶出大眾市民對「民主自由」嘅訴求，而呢啲「理念、訴求」亦都產生出一啲「副作用」⋯父母為子女擔心、為大眾生活帶來唔方便、辛苦咗執法嘅警察⋯

毛爸：民主鬥士...加油吧！

毛爸：銅鑼灣嘅民主陣地...

毛爸：由於受到「運動」影響...平日熱鬧嘅銅鑼灣變得冷清清...

毛爸：民主鬥士堅持一日...執法嘅警察就要留守一天...辛苦你們了...

毛爸：旺角民主陣地...

毛爸：旺角...鬥士們堅決留守嘅精神...叫人佩服...

不一樣的生日

2014年10月21日（星期二）

自己真係好幸運有緣相識一班朋友過去嘅二十幾年⋯每年嘅整個十月都好忙咁應約老友、同事、親人⋯訂嘅飯局。

今年因為工程關係將所有朋有嘅飯局都改期，好多謝各位朋友、老友嘅生日祝福⋯願我所受嘅福氣都會降臨到各位朋友、老友身上。但近日經常要加班到深夜⋯都係好忙⋯ 

毛爸：好多謝大家嘅生日祝福...感謝...感動...

全家一早去海灘散步

2014年10月19日（星期日）

毛毛好鍾意玩水去海灘散步⋯以往毛毛行海灘毛媽都好有意見咖⋯四隻腳都係啲沙、行落海灘嗰段草地又有蚤、毛仔會衝落海玩水⋯等等，每次我帶毛毛行海灘都要靜雞雞唔可以俾毛媽知咖。

今朝毛媽主動提議去行海灘⋯我覺得有啲出奇，原來毛媽噚日參加咗「寵物讀心術班」得知毛毛好鍾意去海灘玩同散步⋯所以⋯

毛爸：毛媽同毛毛都玩得好開心...

毛爸：毛毛玩衝浪毛媽玩影相...

毛爸：我玩沙灘腳印...全家人都唔舍得走...

單車日誌...差啲凍嚫

2014年10月19日（星期日）5 ： 50 晴天 大風 25度

自己一直都有運動嘅習慣⋯熱身、保暖係常識，每當換季氣溫轉變出去踩單車自己都好留意衣著裝備。

今朝加強衣著裝備汗衫、衛衣、戰衣、長褲⋯起程途中已經衣衫盡濕，到回程又凍又大風⋯身體覺得十分寒冷，呢個時候⋯經驗話我知⋯我只有一個選擇⋯就係盡快一直咁踩返屋企⋯⋯

毛爸：今朝只係踩咗12公里又濕又凍...

毛爸：踩單車經過酒店前嘅迴旋處..見輕軌支架己經安裝好...

毛爸：換個角度睇...景物完全唔一樣...我哋對「事物」應該抱呢種「態度」...

又到深秋

2014年10月18日（星期六）

一早一晚嘅溫差越來越大，空氣變得乾燥⋯早晚越來越涼但中午氣溫就極高。

今早帶毛毛去海邊散步⋯啲風好涼感覺開始凍，又見到好多樹嘅葉由上至下慢慢變紅、有啲樹就落晒葉、有啲就落晒花⋯呢啲咁嘅乾爽天氣連毛毛都感覺特別舒服。

我日日都經過海邊呢段路⋯但從未留意周圍在變天氣在變⋯紅葉、黃葉、落花⋯大自然用呢種方法話俾我哋知⋯又到深秋⋯

毛爸：成條跑步徑都係落花...

毛毛：毛爸話過馬路前要睇清楚有冇來車...

珍惜相聚一刻

2014年10月12日（星期日）

可以咁講我哋睇住mat mat小朋友成長⋯mat mat好快會移民離開澳門，mat mat家長搞咗個世紀朋友大聚會，除咗mat mat班師弟一定到之外⋯好多相熟嘅家長帶埋小朋友嚟參加非常熱鬧，今次世紀聚會連好少見嘅小朋友都到會（mat mat好有「飛士」）。

實情我哋應該重視、珍惜⋯同朋友、家人、小朋友⋯嘅相聚機會，因為人生真係好難講⋯分分秒秒都會有機會遇上生離死別。

毛爸：呢張相係世紀大合照...

格格

BOY

荳B：佢哋係我哋啲朋友仔...

毛毛心聲...相聚一刻

2014年10月12日（星期日）

我第一次見 mat師兄係喺一間出名嘅寵物美容店，當時毛媽帶我去嗰度剪裝，嗰陣有位訓犬師同師母一齊幫mat師兄帶頸帶而mat師兄極力反抗不肯就犯，表現無比勇猛⋯由嗰日開始我毛毛已經下定決心⋯大個之後要學mat師兄咁威猛。

我哋狗狗一生有幾多個一年丫？轉眼我同mat師兄相識 5 年幾⋯我哋一齊受訓經常一齊出席活動一齊玩，現在mat師兄要全家移民，今後只有喺「面書」度見面而唔可以一齊玩⋯咁⋯令我唔開心。

毛爸話凡事都要向好方面睇⋯聽師母講mat師兄住嘅地方前面有花園同泳池，周圍仲有好多索女，mat師兄可以日日跑草地、游水、溝女⋯一定生活得好幸福，我毛毛聯同荳B、大介眾師弟祝mat師兄今後身體健康、快快樂樂⋯再見喇！

毛毛：呢位係我大師兄MAT MAT

毛毛：呢位係我二師兄荳B...

毛毛：我毛毛排第三

毛毛：呢位係我小師弟大介

毛毛：後面嗰幾位梗係最錫我哋媽咪啦...

重遊龍爪角海岸徑

2014年10月12日（星期日）

自從上次之後⋯已經好耐冇嚟過龍爪角行山，深刻記得上次帶毛毛來行山遇上驚怕難忘嘅經驗。

嗰日自備嘅食水飲晒⋯毛毛支水又遺失咗⋯當時令毛毛中暑（好彩冇事）。今次帶備足夠食水同後備食物，多次檢查裝備先出發，要求做到零意外發生⋯

毛毛：上次嚟呢度玩因為太熱同冇水飲...毛爸抱住我跑咗半個山去急救...

毛爸：今朝天氣非常乾爽...行山一流...

毛爸：毛毛好似好熟路咁一馬當先...帶路...

毛爸：喺呢度望海...令人心境平靜...

龍爪角海岸徑

2014年10月12日（星期日）

星期日清早太太有好建議⋯全家去龍爪角海岸徑行山。位路環黑沙海灘入口嘅龍爪角…喺秋季風景非常靚，黃色嘅岩石、被上金光閃閃嘅藍色大海同藍色天空連成一體⋯咁嘅靚畫面令人嘩嘩聲。

海岸徑入口段路平坦易行⋯而呢段路全部用天然麻石做路面有上有落好有特色。途中有⋯袁人石、聽海軒、特別植物⋯做景點。

其實重點係你肯揪時間遠離煩忙嘅城市同家人一齊享受⋯充滿海水味嘅涼風、金色溫暖嘅陽光、大浪拍岸嗰種節拍強勁嘅音樂⋯人生難得。

龍爪角海岸徑入口...

毛毛：好大風呀...

開始一段路平坦易行舒服...

呢種植物好特別...秋天開白色嘅花仔...

筧

平日有好多玩「野外定向」嘅人士嚟呢度做練習...

好少見嘅藍色蜻蜓...

景點...袁人石

景點...聽海軒

呢個景點...聽講香港名歌聲作品「空櫈」都係喺呢度得到靈感...

途中好多路都係天然大麻石開鑿出嚟...