2012年8月1日(星期三)
因為我成日Lam啲傷口…帶喇叭頸圈嘅時間越嚟越長…狗都癲，最慘係毛爸，我夜晚出騎樓尿尿同一早出廳…由於頸圈闊大都要Lam醒毛爸幫我開房門，平時飲水都好唔方便因為有個頸圈頂住，呢排帶住頸圈連執波波都冇得玩…慘…毛毛 : 慘喇~個喇叭頸圈都唔知要帶到幾時...
2012年7月29日(星期日) 6:30陽光普照25度微風
由於趕工程同天氣差己經成個月冇踩過單車，今個星期日佬闆准我唔使加班…今朝又可以出去踩單車。雖然打完風一個星期但路邊仲有好多樹都瞓低晒，星星公園都受到影響，今次颱風嘅破壞力極強出乎意外。打九號風球嗰晚…外面乒乒乓乓、風聲呼呼，毛毛一早就返入房呢埋入個籠度，唔敢出騎樓尿尿…
2012年7月28日(星期六)
自從手術後…條尾既嘅傷口都好唔舒服，一到我歡迎毛爸毛媽同便便(因為擺尾拉動傷口)絛尾就好痛好痕，我要就住嚟行，經常要坐地下擦傷口止痕，初初毛爸以為我乖咗(其實我唔係)，坐得多…咁…條尾嘅傷口就紅晒…
2012年7月27日(星期五)
毛毛手術前一晚我有啲壓力…瞓極都瞓唔到，毛媽特別請咗假帶毛毛去診所(我因為工程趕起貨所以冇請假)，朝早十點半毛毛開始準備全身麻醉入手術室，醫生話手術完會通知我哋接番毛毛，手術過程至毛毛清醒大約要三個鐘。我成個上晝個心都囉囉攣，今次手術四撻地方九個傷口馮啦十六針…你都唔好話唔擔心…
2012年7月26日(星期四)
今日上晝毛毛做手術…下晝去接番毛毛，醫生話手術順利毛毛好乖，我地接毛毛嗰陣毛毛一聽到我地把聲就好開心狐叫同狂吠，狀態非常好，醫生同我地講毛毛情況OK但啲傷口要小心處理，仲同我講毛毛唔覺痛咖…
2012年7月25日(星期三)
唔知係唔係心埋作用…毛毛今日好熱情，我一返到屋企就痴住我一定要我抱佢，更奇怪嘅係毛毛連工人都要嗲，連毛媽都放低手上嘅嘢抱咗毛少一陣。毛毛日日咁就好喇…聽日毛毛就要做第二次手術，今晚開始禁食連水都唔飲得…
毛毛 : 毛爸毛媽同各位朋友唔使太擔心咖，我會撑得住咖...
2012年7月24日(星期二)
澳門尋日打風「韋森持」7點改掛8號風球…對日常生活影響極大。由於施工日期合約問題我哋全組7個人都要趕工加班(一定要聽日完工)，做到夜晚10點幾先完工，收工嗰陣己經封橋…咁…我就涯義氣送澳門住嘅同事經西灣大橋下層(8點已開放)返澳門，但…回程由澳門過氹仔嗰段路…由於車極多交通非常之忙…要花2個鐘先返到屋企…無奈…
2012年7月22日(星期日)
毛媽整餅又一精彩出品 「芒果芝士蛋糕」，芒果香非常濃味嘅芝士蛋糕鬆軟香甜非常好食。原來呢隻蛋糕好多功夫咖…芒果要打蓉、芝士要打鬆、餅底要打碎(如果係人手打就…要打天光)，好彩毛媽廚房有個新成員 「多功能手提搞伴機」幫手…毛媽就輕鬆完成，毛媽手下又多一名猛將。
2012年7月21日(星期六)
好老實講我屋企人對食物嘅睇法係保守派，所有快餐、即食麵…都係冇益嘅(但我偏偏最愛係即食麵)。記得有次睇到一個電視節目叫「食物大搜查」係講即食麵，原來即食麵本身係OK最有問題冇益嘅係包味粉，大部份啲味粉鹽份都超標，即係話食晒碗麵飲晒啲湯…咁你就中晒招。我睇過一位才子專欄作家寫佢點樣整一碗即食撈麵…我一試就愛上…
2012年7月19日(星期四)
前晚帶毛毛去診所見醫生睇驗血報告…一般嘅檢驗結果都正常，但白血球數值就偏高，咁…即係話毛毛嘅身體同啲病毒大戰緊又或者身體某部份有發炎情况，手術己經决定咗月尾做，醫生就開咗12日嘅消炎藥療程…惨喇…少爺仔又要啪丸仔喇… 
毛爸 : 毛少要涯成十幾日...慘喇...
2012年7月17日(星期二)
今朝唔知點解毛毛特別興奮…零晨4點幾就走嚟嘈醒我，我打發毛毛返入籠瞓…。5點幾…個百厭星又嚟Lam醒我，6點我就帶毛毛落街散步…一落到街見人就吠，連平時話毛毛乖嗰啲人都話毛毛今朝曳曳，大廈管理員都問毛毛今朝點解咁惡…毛毛今朝真係有啲失控…
2012年7月14日(星期六)
有古怪…今早出廳飲水發覺唔見咗個水兜…跟住同毛爸落街散完步，返到屋企毛爸又唔同我玩執波波，又唔見毛爸整餐俾我食(直頭冇嘢咁)，媽咪又未起身…連毛爸都冇食早餐就返工，但實實實在在好口喝同肚餓…個肚仲古古聲，唔通毛爸打錯更？宜家唔係朝頭早？
2012年7月13日(星期五)
平時夜晚媽咪都會整消夜俾我食，臨瞓前仲有我最鍾意嘅生果食。但前晚…媽咪同平時一樣入廚房整嘢食，我梗係好心急好乖咁坐喺廚房等食啦，等咗好耐…好耐…媽咪仲係好忙好忙冇理我，原來媽咪喺度整麵包唔係整野俾我食，我嬲咗媽咪走返入睡房瞓，過咗冇耐媽咪叫我出廳食野…不過我冇采媽咪…
2012年7月11日(星期三)
毛毛剪裝之後…有Lam肚仔、古古同R耳仔嘅行為。檢查之後發現肚臍附近、古古同Pat Pat之間有紅點粒粒，左耳都係…仲R到紅晒。就因呢種情况請教醫生，回覆係 : 毛毛個裝耳仔、肚仔係產到啲毛1mm，可能電剪過熱或者唔乾淨引起敏感，美容店啲剪具係共用，經常有問題發生…呢啲問題好普遍…
2012年7月9日(星期一)
當一個人遇到人生路上一啲難題嘅時候…就會坐立不安，博命去想解决方法，有啲方法妙想天開，有啲無寧兩可…一但有咗决定…又驚個决定影響深遠…唔知係唔係好嘅决定。屋企人己經决定取消7月尾8月初嘅旅行假期，安排毛毛接受手術，同工人商量加班全日照顧毛毛。毛毛宜家生活得開心、百厭、仲好鍾意豆我地同佢玩…令人羡慕
2012年7月8日(星期日)
續…做 “手術”？聽落好似好簡單，但事實唔係咁…由開始準備到原全康服係需要一個月時間，手術前同驗血前都要禁食12個小時(毛毛咁為食會涯得好辛苦)，手術後其間要食藥(毛毛好怕食藥) ，為咗唔俾毛毛R到、Lam到傷口會綁住手仔腳仔、帶喇叭頸圈(手術傷口要3星期至原全埋晒口)…慘，唔可以冲凉同落街，唔可以做強烈運動…以上既嘅情况對個小朋友嚟講係一種嚴厲處罰，係人見到都難過，由其家長更加….
2012年7月8日(星期日)
續…毛毛身上嘅肉粒醫生跟據現况同化驗報告作出最好嘅建議，聽醫生講上皮細胞瘤係分幾級咖(毛毛嗰種係第二級)，啲狗狗皮膚抗敏性弱都會加速腫瘤生長咖，而呢種腫瘤會喺身體各部位都會出現咖，但喺四歲嘅狗狗身上出現就少有，最令人擔心嘅情況如果生喺啲薄皮地方(鼻樑、頭頂、手仔、腳仔)就好有機會擴散到骨度，到時就麻凡(我哋唔敢聯想)，所以醫生嘅意見係盡快做手術，唔好俾機會腫瘤擴散……………..待續。 
毛爸 : 毛毛加油呀~
2012年7月7日(星期六)
續…好多家長都會帶自己患病嘅狗狗週圍睇醫生(我哋都係)，其實己確診係腫瘤病睇乜嘢醫生個結果都係一樣咖喇。可能啲人唔明做家長嘅心態 1.係希望醫生睇錯。 2.係揾個值得信任嘅醫生就醫。今日朝早約咗法醫生幫毛毛做全身檢查，法醫生花咗長時間去睇毛毛嘅驗血、尿、腫瘤化驗報告，檢查病患處同手術傷口康服情况，了解毛毛嘅日常糧食…最終建議…做手術……………待續。
2012年7月7日(星期六)
當一個人病…係意志薄弱嘅時候，會將簡單事件聯想成好多負面嘅可能性。自從5月份毛毛做咗切腫瘤手術…當大家都放下心頭大石嘅時候…毛媽又發現毛毛身上三度地方有肉粒(細細粒)懷疑係腫瘤。毛媽即時影低相傳送俾主診醫生診段，醫生回覆 : 呢啲肉粒有可能係腫瘤，由於腫瘤有擴散性所以一發現最好做手術割除。吓 ~ 毛毛再要全身麻醉做手術？格咗一個月啫…愁……………待續。
2012年7月6日(星期五)
尋日上晝一直都落住唔大唔細嘅雨…我就喺雨中開工，可能咁淋病咗，返到屋企煮飯煮餸唔小心俾刀切傷左手無名指，當時用藥粉、雲南白藥都唔止血(濕咗4張紙巾)…最後搽咗雲南白藥用手按住傷口先止血。今朝開工嗰陣週身骨痛…下晝佬闆放我半日假返屋企休息…大熱天時唔舒服…真大獲。
2012年6月4日(星期三)
屋企主人房同書房嘅冷氣壞咗…尋日約咗冷氣技師到屋企做維修，由技師入門口開始毛毛情緒高漲行為表現凶神惡煞，技師步步為營…到維修主人房移開毛毛個籠嗰陣…毛毛就吠到癲仲露齒跳咬技師(好彩咬唔到)，技師就好冷靜咁企定定…毛毛就平靜落嚟…..，毛毛保衛家園…好嘢！
2012年7月2日(星期一)
呢幾日啲天氣好怪就算出猛太陽都會落一場大雨，所以放假都唔敢安排戶外節目。好彩尋日朝早冇落雨，帶咗毛媽、毛毛去西環湖玩，毛毛一有得玩就精神，跑木板地、玩執波波、做 “毛豆”俾毛媽影相開心到癲，尋日朝氣温二十幾度但感覺好悶焗，毛毛就一邊玩一邊狂飲水(飲咗330ml)仲玩到唔舍得走…
毛毛 : 玩執波波係我嘅至愛...
