2010年10月31日(星期日)
今日放假...照平日咁帶毛毛落街散步 , 心血來潮揸車去媽閣廟附近買早餐食。
自從媽閣廟前地改健之後都未去行過 , 今朝順路過去行吓...宜家廣場種左好多大樹 , 樹下加左好多木櫈俾人坐休息。
毛毛一去到廣場就周圍放低 "幾両"霸地盤....
毛爸 : 媽閣前地鋪晒西洋式嘅石仔路...中西合碧...
毛爸 : 媽閣廟都係同以前一樣...
毛爸 : 呢個地方係展覽 "龍舟"嘅...今朝太早未開閘...
毛毛 : 嘩...我咁大個仔都未黎過呢度...要周圍霸番啲地盤先得...
2010年10月28日(星期四)
尋日我放工返到屋企...毛媽同我講 :毛毛個肚仔咕咕聲又屙爛屎 , 我個肚都唔舒服呀...
今朝毛媽一早就起身去廁所...連續5~6次...睇黎毛媽今日返唔到工要請假喇...咁...今朝返工前要煮好一煲粥同薑汁蒸肉片...仲要車毛媽去見李醫生。
經診斷結果 , 醫生話毛媽腹瀉係由病毒引起同天氣轉變有關...要食藥休息好快會好番 , 至於毛毛鬼打都冇咁精神 , 唔似唔舒服...
毛毛 : 毛媽妳要快啲好番...仲有唔好Cut我啲生果餐....
2010年10月24日(星期日)
自從上次喺澳門蛋毛毛自己跳左落水池玩水之後...毛媽嚴禁我帶毛毛去澳門蛋玩。
今次為左影番輯靚相擺Blog版面 , 打算去澳門蛋攞景...不過去到嗰陣 , 正門入口閂左閘唔俾車同人入 , 唔通...連個天都唔准我地去 ???...天呀~~~
後尾我地就去左大潭山郊野公園...
毛毛 : 陪養吓情緒先...
毛爸 : 咁...我都影吓第二啲野練習下先...
毛毛 : 毛爸我地開工啦...
2010年10月21日(星期四)
尋日放工返屋企...入門之前叫太太抱住毛毛 , 唔好俾毛毛撲過黎我度...
原因...今日有單外勤要安裝部40寸電視機 , 嗰位客人屋企有隻金毛好似有皮膚病 , 而且通屋都係狗毛同皮屑...所以我放工返到屋企第一時間衝入洗手間沖涼換衫 (我怕我啲衫褲有病菌)。
毛毛 : 巴屎閉喇.....
由我沖完涼行返出廳毛毛就冇睬過我 , 就算有生果食都唔過黎我度 (毛毛逢星期三有生果食) , 到訓覺嗰陣自己行入房唔使我抱...
第朝早毛毛走黎床邊Lam醒我 , 我以為毛少...原來只係佢要落街 "狗有三急" , 毛毛一直到食早餐先同我Friend番 , 毛少爺真係高竇...
毛毛 : 見你咁有誠意就睬番你啦....
2010年10月17日(星期日)
有人講人生能夠交上一位好朋友實在難得 ...而我身邊就有成班好朋友 , 自問十分幸運。
而且有兩位好朋友都係同我一樣十月份生日 , 所以每年嘅十月我地都相約“十月之星”飯局…同好朋友飯局傾計度過開心嘅一個晚上實在係上天嘅恩賜 , 十分期待…
今次係喺 “北京廚房”食烤鴨 , 太太仲整左 “藍莓芝士凍餅”帶去慶祝我地生日…
呢度係 "北京廚房"嘅入口 "玄關"
刀功了得嘅大廚師....
呢個火爐係烤鴨嘅秘密武器...聽講係用荔枝木日夜不停燒咖...
三款醒胃前菜...
名菜 "松鼠魚"...
好靚賣相嘅窩貼
我嘅至愛 "土雞"...
甜品...生果盤、薑汁豆腐花、雪糕、西米撈、芒果布甸...
梗係唔可以漏嘅自製生日蛋糕啦...
2010年10月17日(星期日)
今日毛爸毛媽一早就起床...整定啲早餐俾我又同我裝身...原來帶我去大草地玩。
去到梗係玩我最鍾意玩嘅執波波同喪跑啦 , 毛媽仲帶左啲我好鍾意食嘅三文魚小食獎我...
當我玩玩吓就發覺有隻狗狗望實我 , 我吠左佢幾聲...咁...就做左朋友...佢係一隻四歳大嘅西絲叫做 Isa , Isa好鍾意睇住我玩執波波同喪跑咖 , 但佢又唔敢同我玩。
到我地走嗰陣...見到 Isa個主人氣沖沖咁行過黎同毛媽講...Isa唔肯走佢好想同毛毛玩...
毛毛 : 好耐冇喺草地玩波波喇...超爽呀...爽...
Isa : 我個名叫 Isa ,你地好嗎 ?? 好高興同你地做朋友...
2010年10月11日(星期一)
由太太話事過香港行街、買野、食野...首先我地去左銅鑼環一間餐廳食 "海南雞飯" , 間餐廳望海咖。
食飽飯之後行街…幫毛毛入貨 "營養粉"、零食 "輕寵食"…然後行Time Square太太要買禮物俾同事仲要買整餅材料、用具。跟住就下午茶時間…最後去Ikea買電腦架、抹手紙架然後番歸。
咦…好似買漏左自己份生日禮物喎….
毛爸 : 好好味嘅 "海南雞飯"...
毛爸 : 嗰日我地係第一檯客(包場) , 外面個景好靚...
毛毛 : 呢種零食...卜卜脆咖...好正...
2010年10月16日(星期六)
一節淡三墟...大節之後工作上又係受苦嘅開始 , 好多同事都放例假 , 人手又開始緊張 , 雖然客人少左但貨場都要維持一定嘅人手 , 由於少客啲同事全部都好清閑。
咁...公司領導就啟動網上天眼系統用電話指揮運作 ...喂...你地企晒喺度做乜野 ??出去派傳單喇 , 打電話俾貨場主管 , 話佢地唔識安排人手...做唔到好成績...俾壓力佢地...
其實係冇客 , 點樣好安排都冇用...
咁...嗰日個電話會成日不停咁響...
公司作風...你做得啱、做到好成績公司唔會讚揚你 , 公司認為你應該嘅...
就算你冇出錯只係反應慢少少...咁...你就會俾領導鬧到冇晒自專....
2010年10月12日(星期二)
今日放假...本來帶毛毛跑草地 , 但臨時改左去行松山 , 今日係幾個星期黎第一次帶毛毛出去玩...
己經過左中秋...天氣熱得有少少反常。
毛毛有得出街玩就興奮到癲 , 玩到連水都唔飲。
毛毛今日嘅行為都好特別 , 淨係吠人唔吠狗 , 途中仲俾其他狗吠番轉頭 , 毛毛玩到唔肯走 , 我地就行到出晒大汗...
毛毛 : 我識爬竹咖...
毛毛 : 毛爸毛媽...我玩多陣得唔得呀 ?????
2010年10月12日 (星期二)
每年呢個時候又係我毛毛出動嘅日子... 今日係毛爸牛一嘅大日子，毛爸同毛媽都唔駛返工，可以陪毛毛玩。咦...咁究竟係毛毛生日定係毛爸生日呢？唔理咁多lu，最緊要有得玩...
喺呢度我祝毛爸生日快樂、身體健康、心想事成、最緊要開開心心！
2010年10月12日(星期二)
今年嘅生日好特別...喺屋企太太特別整左個 "焦糖雞蛋布甸蛋糕"俾我做生日 , 我好鍾意食雞蛋布甸咖 ...實在感動、驚喜、開心...
以往10月份成個月都俾班老友排隊約食飯 , 預祝、補祝生日 , 正日梗係同家人一齊過喇。
今年九月尾十月開始啲好朋友輪住打電話黎...由於工作關係啲約會我全部都推晒 , 真係有啲唔好意思。
眾朋友對我咁有心...我好開心...多謝大家...
毛爸 : 超靚嘅焦糖雞蛋布甸生日蛋糕...睇見心都甜晒...
毛毛 : 毛爸 "生日快樂'呀...記得留番啲藍梅俾我食呀...
2010年10月10日(星期日)
今朝毛毛就不斷咁吹我落街 , 原來毛毛急便 , 當毛毛行到街口轉彎便便緊嘅時候…毛毛發現死敵黑狗同黃白狗訓喺路中心…
咁…毛毛就一邊便便一邊狂吠 , 引起嗰兩隻狗注意仲起身行過黎 , 咁啱格離座隻雪橇散步完經過加入戰鬥…我見勢色唔對拿拿聲抱起毛毛走人…
跟住就聽到雪橇個主人狂叫…唔知佢地點呢 ?
毛毛 : 我唔怕咖...係毛爸緊張咋....
2010年10月9日(星期六)
上星期日因為要等人黎裝洗衣機...今個星期日咁啱係國慶黃金週(所有員工取消假期)要返工 , 冇時間陪屋企人同帶毛毛出街玩...
毛毛呢排狀態非常活躍 , 經常主動要我地陪佢玩…
毛毛 : 真係Down...唔知今個星期日有冇得出去玩呢 ?
2010年10月8日(星期五)
每逢大節日就係受虐嘅日子 , 所有同事都要取消假期 , 公司要集中人力去應付人潮…幫公司創做高營業額目標。
招呼大量好奇、問價嘅自由行客 (註 : 好奇客…淨係睇同試玩產品不會幫襯 , 問價客…猛話我地啲價貴過大陸一直擔你時間要平俾佢)。貨場全日人頭湧湧…其中原因係成家人入黎 , 一個成員只係問價 (只係想知個價), 其他成員喺度等佢…迫爆場。
一有同事去食飯, 貨場嘅同事就叫苦連天 , 冇人手去應付啲阿叔同啲阿嬸。公司仲要啲員工喺貨場嗌口號“國慶黃金週大特價、人民幣升值、購物更超值” , 咁長嘅口號未講完個客都走左 , 有好多客唔識聽廣東話都唔會睬你…好彩大家好辛苦咁捱過左…不過公司好似對業績唔係好滿意...
呢個星期...生活喺人間地獄...做野忙到冇朋友...
2010年10月7日(星期四)
今朝諗住早啲帶毛毛去碼頭公園影相 , 順便俾毛毛週圍行吓。
但點知去到公園前地…見到有位警察哥哥喺度當更(嗰個公園係唔俾狗狗入咖 , 我諗住早啲嚫阿Sir晤喺度帯毛毛入去影相)…
咁…我地就去左海洋花園 , 喺嗰度毛毛好開心咁玩左一陣…仲識左個新朋友仔添…
毛毛 : 呢個係我新朋友仔...外國黎咖...講外文咖...
