呢排太太成日都同毛毛講 “呢頁”（講緊嘅係英文LEAVE IT），原來太太教毛毛玩。抛個玩具出去叫毛毛執番返黎，毛毛好快就學識〈其實做岩有獎架〉。
http://www.youtube.com/watch?v=fPMcOdU_Hxs
毛毛玩得好投入，有時仲玩番毛媽轉頭添。就係毛毛擔住啲玩具走去毛媽面前，毛媽以為俾佢，但毛毛就擔番個玩具走左去，毛媽就追毛毛追到索哂氣。好搞笑…好似毛毛o係度訓練緊毛媽咁…
肥仔毛爸：毛毛，毛媽做得咁好，有冇獎毛媽呀？
毛毛：肥仔毛爸，你唔好屈我呀，無啲咁嘅意思。毛媽，唔好信毛爸呀，佢屈我…
今日行程非常緊湊，朝早起身先同mo爸去街市買餸，返到屋企擺抵d野又要餵momo，之後到我地食早餐。
食完早餐mo爸就出發去返工，我就跟佢車去做facial。做完facial都成一點，我食完晏就去裁縫到攞番件連衣裙，條裙做左成個月都有架喇，今日先至得閒去攞。跟住就去娘家探老豆同阿媽，順便攞埋我妹幫我o係台灣買o既狗狗冷衫書同埋佢送俾momo o既衫仔。
坐左一個鐘左右就打道回府喇。
返到屋企抖左一陣等亞美黎幫我染髮，呢個工序每六個星期就要做一次，冇法啦…鬼叫我咁多白頭髮咩。
染完髮就整野俾momo食，今晚就整餐南瓜雞肉醒momo啦。
Momo食完就輪到我地出去食喇…我等到mo爸放工番黎就一齊去食泰國菜。食飽飽就去超市入貨，之後就返屋企沖涼覺覺豬。當然瞓覺前少不得要幫momo抺身先啦。
P.S. 睇下momo著左件蜜蜂衫仔幾搞野。個衰仔著左件衫之後，勁唔鐘意，不斷咁咬件衫，搞左好耐先至影到兩張相咋。
尋日毛毛嘅意外我勁擔心，成日都無心機做野，唔知毛毛隻耳仔仲有冇流血呢？有冇成日R耳仔同fing頭呢？
好唔容易先到收工時間…返到屋企見到毛毛非常生猛，放心番晒，希望唔好再發生尋日嗰啲可怕嘅意外喇。
今朝出廳見毛毛喺個籠度好平靜，毛毛都幾醒架，知道就算我一早出廳都未必放佢出黎，除非佢好急（急佢會狐叫架）。
毛毛一出籠就要我同佢玩，又要我抱佢…直至太太起身（太太啲咳仲未好清，我都好煩）。今日禮拜六，要陪太太去買餸…
由於老闆出埠，呢個禮拜啲人手同工作都非常緊張，每日做到夜晚十點幾先收得工。返到屋企都十一點幾，根本無時間陪病左嘅太太同毛毛….好難過好無奈。唯有多啲關心太太，早啲起身同毛毛玩。
今朝同毛毛修剪腳仔毛同耳仔毛，同以往一樣毛毛都唔係好合作，到修耳仔毛嘅時候就出事喇。因為毛毛亂咁郁….我…我剪親佢隻耳仔，流血…仲…仲流好多呀（流濕成張紙巾）。毛毛猛咁fing個頭fing到啲血成張報紙都係，對唔住呀…毛毛…對唔住呀。痛唔痛呀…
毛媽大嗌：毛毛整親邊度…緊唔緊要…流血呀？肥仔，快啲用雲南白藥同毛毛止血先啦………..
自己又係衰大意….係我錯…我錯！
毛毛：毛爸，我隻耳仔好痛啊...
今日見返個老友路依我好開心，路依係我識好多年嘅老友，一齊打WAR GAME嘅隊友。雖然我宜家仲有繼續打WAR GAME同IPSC，但心態同態度完全唔一樣。
我以前去過打WAR GAME嘅地方有松山防空洞、青州修道院、皇朝停車場、白馬行銀座地下停車場、路環石礦場、水壩、氹仔林屋、炮竹廠，創造左好多開心嘅回憶….
以前後生打WAR GAME楂住支槍亂咁開槍，以殺敵同殺人為樂，好似好英雄…其實正式係大傻瓜黎架……
宜家年紀大左，對槍同WAR GAME就有一個正面嘅認識。槍…唔可以將槍口對準唔係摧毀嘅目標或物件。WAR GAME…係一種合作嘅遊戲。我宜家打WAR GAME好享受勝利、殺敵、被殺、失敗嗰種感覺，更重要嘅係學識信任同團隊合作精神，珍惜身邊嘅拍檔……
註：U69係我打WAR GAME嘅隊名。
今朝毛毛好似無乜心機（平時我放毛毛出籠佢非常生猛），成日都要痴住我，俾玩具佢玩佢都擔埋我身邊先玩，同埋成朝都喺騎樓望住街猛咁吠（唔知佢吠乜野）。
太太抱左毛毛一陣…當太太出門返工，毛毛跟埋出去走廊，叫佢都唔肯返入屋。
平時一定要我陪佢玩，今朝成朝都爬上梳化扒喺我大脾休息…奇怪…
我返工前鎖番毛毛入籠…佢就開始狐叫（唔知係唔係唔舒服呢）……個樣好惨同好嗲，我唔忍心又放番佢出黎仲抱左佢半粒鐘…最尾安靜番……但係我自己就返工大遲到…
四年一度嘅奧運會尋日閉幕，我係運動迷所以感到有啲失落。見到攞獎牌啲運動員佢地行上頒獎台嘅一刻都眼濕濕（嗰種激動嘅眼神我睇到都想喊）。佢地背負國家嘅榮耀、自己嘅夢想，付出寶貴嘅時間汗水、淚水同克刻苦練習，就係為左四年一次嘅奧運會呢一刻，佢地真係英雄。
奧運精神重點，係志在參加同享受過程。呢個口號係好多落敗嘅運動員都係咁講，但係佢地都係付出同樣嘅代價…..佢地都係英雄…
星期四我帶左毛毛去橋頭大草原，原意係等毛毛見識外面嘅世界。毛毛嘅個性係好細胆架，平時又成日都喺個籠度，我驚佢會自閉。毛毛好怕去啲陌生嘅地方，同冇自信。
由於毛毛未打晒防疫針，怕佢感染病毒，太太嚴重反對現時帶毛毛出街。我怱視左件事嘅重要性，咁可能會引起嚴重嘅後果，我真係不智…..我帶左毛毛出街，太太知道左，大發雷庭…結果…又嗌交收場………
太太睇醫生食左藥病情好轉，我都唔洗咁擔心。
今日太太放假喺屋企休息，夜晚去睇音樂劇，今日要煮定啲粥俾太太食。今早我抱住毛毛落街買早餐，佢對週圍都好好奇，有人喺隔離行過佢就想哄埋人地度，差啲整親人。
去到買早餐度啲人手指指咁話：隻狗仔好Q呀！毛毛就猛咁搖尾，好似同人地好friend咁。
當買完早餐返屋企，毛毛就拼命掙扎，佢仲想落地玩，我都知個百厭仔鍾意出街架喇，不過等佢下個月生日先啦…
今日八月十六號係我五個月大嘅生日，毛爸同毛媽好似忘記左。今次嘅生日願望係毛爸毛媽帶我出街玩，今日我好開心毛媽成日都陪住我，唔知係唔係因為我生日呢?
夜晚我喺騎樓便便完，我坐喺毛爸面前等獎勵，但毛爸好似唔知我便便完…毛媽出騎樓收毛巾嘅時候就……
毛媽：肥仔，我踩中地雷呀….
毛爸： “哈”，唔係吓！住十幾樓都踩中地雷真係奇聞…哈哈哈…毛毛好野...
我搞到毛媽俾毛爸笑，好對唔住呀毛媽….( “咦”毛爸同毛媽好番喇，真好)
肥仔毛爸：毛毛，我點會唔記得你生日呀， “生日快樂，開心成長”呀，毛毛。
肥仔毛爸同毛媽尋晚又嗌交，因為毛爸呢排好夜先訓。毛爸好早起身架（六點幾），目的係放我出騎樓同埋同我玩。但係毛爸健康問題唔適宜夜訓架，所以嗌交。
我聽到肥仔毛爸同毛媽對話……….
毛媽：肥仔，你咁夜都唔訓…仲搞緊啲相呀？聽朝先搞啦…..
毛爸：得喇…得喇…我訓着左，到妳入房時候又俾妳嘈醒，我好難再訓返着架…
平時毛爸十一點度訓先，毛媽十二點幾先至入房….
毛媽：點會呀…我入到房你已經扯晒鼻寒…仲嘈住我訓添…
毛媽病左，佢咳咳呀…我知到肥仔毛爸好擔心，我都係呀…毛媽妳快啲好返啦...
見mo爸寫blog寫到咁過癮，等我又試下寫先，希望唔好俾mo爸講中我新c坑三日香啦。
今日同mo爸去左香港shopping，其實係因為上次o係香港買左件衫，當時未有得攞，所以今日要特登過去，順便搵個藉口去shopping。
以下係今次o既戰利品：
白色同黃色o個兩件polo裇係o係ceu買o既，唔知點解呢期鐘意著polo T。黑色o個件褸就係今次特登過去拎o既。
呢對鞋係今次shopping既精華。對鞋成2.5吋高，我平時o既極限係2吋，但呢對鞋實在太靚喇，仲係原價$999減到$399，真係抵到爛。個sales仲話對鞋係李嘉欣設計架。
仲有o係Bioderma買左保濕控油面霜、潔面啫哩同埋旅行套裝。
今次梗係有食我地至愛o既榴槤布甸同榴槤班戟啦。
我尋晚睇奧運開幕式，場面壯觀，情緒高漲，當時非常激動，感動到想喊。
太太：肥仔，你知唔知毛毛出左新牙仔呀？
肥仔：係咩…可能出新牙仔所以又亂咁咬野喇。
肥仔：“咦”唔係下，毛毛甩牙又咬野，出新牙又咬野…咁幾時先唔會亂咁咬野呀?
工人阿美因為祖家屋企有事要即刻請一個星期假 (祝佢順順利利辦完事啦)。
毛毛就慘喇，又要捱餓喇…毛毛你頂住呀，一個禮拜啫，我支持你…
毛毛：肥仔老豆，又唔係你捱餓，你梗係咁講啦。我咁胃食，慘喇…好“想喊”呀…
