抱歉

“興趣”呢樣野講起上黎好可怕，如果將佢放o係心裏面咁佢只係一個標題。如果欏出黎實踐咁你就要作出犧牲，包括時間、金錢、親情、感情，係唔係好可怕呢?

我o既“興趣”係旅行、槍、影相，呢o的野好o徒時間同錢喎!

呢一期o既興趣係買相機同影相，我將全部零用錢都花晒o係買相機，搞到我今個月經濟拮据，唔怪得知人地話“興趣”等於敗家喇。玩物喪志…依家食飯都係太太接濟我咋………好抱歉呀太太…

太太多謝妳呀…興趣…嗚嗚………

放寬

今日成日都心緒不靈，工作唔順利，成日都勁冇心機做野，成日都掛住太太同等收工。

返到屋企食飯都冇心機，好在飯後有榴槤食，心情都好o的…希望樣樣事都能夠得到“放寬”處理就好喇!!!!

便飯

四月份第二日放假，公司工作氣氛唔好，搞到壓力好大。阿BOY走左屋企又平靜番。今日太太有飯局我成日都係一個人，所以約左阿強中午食飯。由於時間關係我提議阿強黎屋企作客，佢好開心一口應成。我準備左燒豬手、秘汁豆角、豬骨時菜湯、白飯任裝、生果、飲品、烏龍茶、任飲任食。

中午一點阿強上到黎我地就開飯。飯、菜、湯、茶全部掃晒，食飽飯傾左一陣偈，阿強話要返工。走喇！臨走同我講：余生下次食飯叫埋阿宏，佢都係o係呢邊做野架。

余：好呀…

強：余生好耐都冇一齊咁開心食飯喇…(我覺得佢開心左，冇左工作上o既憂慮)

余：我經常都叫你同我食飯啦。

強：其奇實我係話我好耐都冇食過住家飯喇。多謝呀，余生…

余：便飯啫…鐘意就下次再黎o羅。

我日日夜晚o個餐都返屋企食住家“便飯”……同屋企人一齊食飯，好幸福呀!!!!

送狗

第八日，最後一日。今朝一早我車左太太同阿BOY去橋頭大草原散步。阿BOY好開心，連我叫佢都唔理我，搏晒命係咁跑 (可能未去過咁空擴o既地方) 。Calvin打左電話黎話接阿BOY走，今日我就少左層樓同少左個狗朋友喇。

記得有首歌係咁唱o既：送“狗”…拉住“狗”雙手…我點都唔願放丫放佢走…只有望佢早…回歸…唔好讓我為…“狗”愁 (內容係講生離死別o既)。

如果當時係對親人唱o既，咁當事人一定好唔開心。好在我當阿BOY係好朋友，宜家佢係返屋企o者，下次有機會再黎度假一齊玩o羅。

“送狗”再見喇!阿BOY拜拜…

好野！唔使日日咁早起身喇！唔使執狗屎喇！有番多o的時間睇野同寫野喇！好開心呀！............呀............呀

 

---

• 留言者: Angcat
• Email: angelachan98@yahoo.com
• 網址:
• 日期: 2008-05-04 23:05:00

你和太太都很有愛心啊，對朋友的狗狗都這樣好﹗
[版主回覆05/05/2008 20:01:00]你好! 我是Blog主的太太，我先生的Blog其實是由我幫他管理的，所以我可以在這裡回覆你。我也時常看你的Blog，你拍的照片每一張都很美。我去曼谷時光顧的Crispy & Co.也是從你的Blog參考的。

---

• 留言者: IENG
• Email: cheongieng@yahoo.com
• 網址:
• 日期: 2008-04-29 17:37:00

聽講你太太好想養狗喎,不過養之前請: 停一停, 諗一諗. 因為養寵物要付出無比愛心&耐性,唔怕污"租"(執CC了了),一養就十幾年,到佢又老又病時要照顧佢,仲要有心理準備係十幾年之後某日佢會離你而去. 想兩公婆去遊埠又要將佢托比人照顧....三思

要求

第七日，阿BOY開始對我地有要求。佢要成日都陪佢玩，尋晚散完步鎖佢入籠，佢乍嬌，要我放佢出黎玩。後來我同佢影左好多相，玩左一陣。

阿BOY知道我同太太都好關心佢，或者佢主人對佢冇咁關心。冇辦法啦，人地先至係佢真正主人。

今朝一早我一個人帶左阿BOY出去散步。今日係星期六，太太放假，同平時一樣瞓晏o的先起身安排買餸買早餐食。返到屋企就放阿BOY出黎玩，可能阿BOY玩得太開心 (過左龍)，居然對太太不敬，好惡咁大聲狂吠。我都係鎖佢入籠，佢又“狐”叫喇，真可憐。

位置

第六日，我發覺阿BOY有明顯改變，佢已經唔係好似初初黎到咁興奮同對環境o既好奇，宜家開始安靜落黎。我今朝o係氹仔有外勤，10點幾先出門。但我發覺9點幾佢已經完全平靜，我同佢玩佢都好似無心機 (平時我9點幾鎖佢入籠就返左工)，獎佢食野都無興趣。個樣好可憐咁o既眼神望住我 ，o係個度踱黎踱去 (我好肯定我唔適宜養狗)。

今朝我幫阿BOY層樓搞衛生，o係佢o的私狗物件中發現重有其他零食，我忍唔住就獎左兩羹佢食，原來佢好鐘意食架 (太太一定有意見，實鬧死)。

“人”好奇怪，當你同對方建立左感情，你就自自然然o係個心度俾個位置佢。我身邊o既太太、囡囡、妹妹、BB、銘銘佢地對我實在太重要。我係唔係應該係心裡面留番多o的“位置”俾佢地呢。

安靜

第五日，今朝同平時一樣咁早起身，阿BOY又o係個籠度狐叫。前o個幾日我一起身就放佢出黎，依家我同太太換好衫出去散步先放佢(怕阿BOY又o係屋企小便)。

太太提議：肥仔不如o你o係騎樓舖晒報紙等阿BOY大小便(樓下有好多野狗，太太好驚)，以上個方法都係辦法。

今朝太太返工後我就入左書房寫日誌，冇同阿BOY玩同冇理佢，阿BOY係廳“安靜”我發現原來佢o係度咬報紙。

阿BOY已經適應哂我地o既生活，我臨出門口照樣獎o的零食俾佢。但好奇怪，佢匿入梳化底唔出黎。我將食物放o係地板佢都唔岀黎食，氹左佢好耐先出黎。佢知道我要走同捉佢入籠，個樣好凄涼又狐叫添。

日記

第四日，尋日傍晚屋企停電，我特別提早收工返去睇下發生乜事。原來電錶跳製，而因為工人唔識搞所以call我。

返到屋企黑麻麻，阿BOY狂叫，我開番電製有番電之後就帶阿BOY出街散步。

今朝早阿BOY o係廚房小便,俾我同太太發現，佢就知道自己做錯，一支箭咁標入梳化底，叫佢都唔肯出黎，因為太太要打佢。

我地樓下一早一晚都有好多人帶狗散架，我地朝早散完步返到屋企就整野俾阿BOY食，佢食飽我同佢玩左一陣就返工(阿BOY又抗議，仲“狐”叫得越黎越大聲)。聽太太講傍晚阿BOY o係走廊小便，俾太太打佢。諗真阿BOY都幾慘架，要隔12個鐘先有野食同大小便。如果係你，你估你得唔得呀?

出去散步o個陣阿BOY好勇架，大狗佢好驚但好奇心爆棚，見到o的細狗就衝埋去聊事鬥非，o係屋企就好鐘意同我玩。我每日都有同阿BOY影相架，或者遲o的寫“阿BOY日記”o的相有用。

習慣

第三日，阿BOY開始習慣我地o既生活節奏，但我對自己生活o既改變仲有少少唔慣。其實阿BOY係幾熱情同得意o既，但佢好細膽同百厭架，最好係唔識怕人，所以連我地o既工人都有同佢玩。

尋晚帶阿BOY到樓下散步，遇到兩隻大狗狂吠，阿BOY同太太都驚到匿埋o係我後面，後來轉去第度散步(有時都唔明太太鐘意狗但又怕狗,係唔係好奇怪呢)。

今晚出去散步我都要帶番o的裝備先得喇。

變化

第二日，阿BOY黎左屋企已經第二日喇，尋日佢表現唔錯，平時幾乖，夜晚都好安靜。今朝六點四十五分太太同我帶佢出街散步，八點食第一餐，跟住今晚八點先至有得食晚餐。我返工就鎖佢入籠﹝佢又投訴﹞。

不過我地屋企o既日常生活就起左變化，太太比平時早起身帶阿BOY散步，整早餐，照顧阿BOY。我發覺佢好投入同好開心。其實咁係危機黎架，當同阿BOY建立左感情同友情而佢一旦離開，o個種別離o既心情好難去面對﹝我自問就承受唔到喇﹞。唔知人同寵物o既關係會產生乜野變化呢？

貴賓

今朝六點已經起身，今日放假本來打算晨早出去影相但天氣唔好、天色好灰，無奈放棄。同平日一樣沖壺靚茶睇報紙睇書，一直到九點我出門去買早餐，太太就起身喇。當我返到屋企，太太同我講：肥仔Calvin帶緊阿BOY過黎，就到喇!

肥仔：下!!!太太電話響：咁快？....跟住太太落去接Calvin…我開門之後見Calvin一手拎住阿BOY一手拎住層樓好輕鬆咁行入黎，Calvin：PETER早晨…肥仔：Calvin早晨… 跟住Calvin拎晒阿BOY o的飲品食品仲有獎品出黎詳細講解照顧阿BOY o既方法同過程，起埋層樓就走左。當時我感覺太太好開心又話帶阿BOY去公園影相同行街。阿BOY都算乖同唔怕生保，起碼唔會搞野喇。我地去左星星公園影相，我幫太太同阿BOY影左好多相，仲好靚添(要晒番張送俾Calvin)。

到下晝我要同太太去八佰伴買野、換禮券、食午餐、仲要去百佳超市入貨，要留阿BOY o係屋企，我地出門時候見佢好失落呀(真陰功)。唯有傍晚帶佢出街補番數喇! 阿BOY我地出街喇，一話出街佢好開心(太太係無經驗照顧阿BOY架)。我地仲打算食左晚飯再帶阿BOY出去散步(我出去影夜景)。

我地o既“貴賓”阿BOY來頭唔小架…………

註：BOY係隻好靚o既松鼠狗仔。

註：Calvin係狗主人(太太同事朋友)。

風球

今日星期六同以往唔同，外面仲掛緊三號風球落緊毛毛雨，同太太出去買菜(搭巴士去)。買齊就一直返屋企(平時會買埋早餐返去)，o係巴士度為左邊個整早餐同食乜早餐就同太太鬧交。

返工喇!同平時一樣安排好外勤工作就開門做生意，阿宏返早今日有好多同事幫手，天文台o係十二點話個半鐘頭後會改掛八號風球，咁即係話我要點半前要返屋企，但公司無任何特別指示，老闆電話又打唔通，真係無所適從(維有自己決定返屋企)。西環大橋好大風呀，又好大雨呀，無驚無險到埗。

太太o係書房好忙咁睇緊電腦，同我講 ：我未食野等埋你一齊食，你食乜野?

我地決定食麵但係邊個煮o既問題又同太太鬧交。

因八號風球工人黎唔到煮飯，太太又有意見：肥仔冇人煮飯，我地今晚食乜?

肥仔：等我煮喇。(我真係唔想早、午、晚餐都要同太太鬧交)原來屋企都會……掛“風球”架。

敗家

由尋日開始天文台就掛左一號風球，一直到今日黃昏又改掛三號風球。咁o既天氣用黎形容女人o既行為就最岩喇!........又同太太鬧交喇!

今早經過美心攝影，見到阿耀順便問價同找相機數(450D我欏左好耐喇)，套裝機連鏡 + EF50mm f/1.8II + SD咭4GB兩張共MOP$7685(有MOP$2500系阿MI贊助o既) 。我仲訂左把手、閃燈同線控。但宜家仲未正式出去外影已經洗咁多錢喇，真係“敗家”。

沉默

我讀書少無乜學識，每日寫日誌長期以來都係太太幫我做校對同執漏，真係好感激(我可以娶佢做我太太，感到好幸福)。

今晚太太有飯局，今日又係做“凡人”o既日子，本來打算出去影夜景，但天氣唔好而放棄。今日工作都唔順利，人事上行政失當，有好野一經公開就會引起動盪，所以做人要識得適當時候保持“沉默”。

應份

與太太繼續冷戰，今朝無所事事有時間最好執一執個書房，但發現太太返工拎留左o的IPOD同錄音筆，輪到佢無記性，我睇太太點同佢老闆、同事交代先。

我心腸好，太太o既事唔通唔幫手解決咩。都係早o的沖涼出門，拎埋o的機俾太太先再返工。岩岩行入洗手間屋企個電話就響喇……

太太：肥仔我唔記得拎o的機返工，你可唔可以拎去公司俾我？(語氣好生硬好似發命令) (太太註：簡直係冤枉，係個電話細聲得滯所以我嗌得大聲左o的)

肥仔：得喇…得喇!我車去公司俾你喇。(好熱心咁) (太太註：完全feel唔到佢o的熱心)

太太：o係正門呀，o係外圍o個條線呀，有的士排隊o個度呀。

肥仔：我未去過正門不過我會塭，大約十分鐘度喇。

太太：到門口打電話俾我。(命令口語) (太太註：又再屈我)

…………………………

肥仔：我o係門口的士站，妳o係邊：

太太：出緊來。(把聲震震下好似好趕) (太太註：其實我o係lift度所以收得唔清)

其實太太公司正門同我停車既地方係有一段距離，可能視線受阻，太太睇唔到我。但我上前又俾個女保安趕，原來o個度電單車唔俾停架。當太太見到我既時候…

太太：你去左邊呀?又話的士站等？(好唔耐煩) (太太註：明明見到佢，又o係到走黎走去)

肥仔：…(無奈)

睇番成件事都係無記性引起，我犯就要道歉、低聲講野(太太註：好似唔覺)、仲要俾人打壓。如果太太犯，我就要幫手解決問題。聽唔到太太講“唔該”，太太o既面色好似同你講，肥仔你“應份”架………真係唔公平呀!呀!呀!!!!(太太註：永遠都係男人就女人架啦，仲有呀太太永遠是對的)

誤會

好多事件都系疏忽、溝通做成誤會而開戰，件事係由一個短訊開始。

太太：肥仔我同事俾左1,000葡紙我，麻煩你今晚拎支JNC錄音筆返屋企THX。

我收到訊息就叫o的同事欏部機俾我，順便找埋數，但當時數碼部太忙，所以無即時做。柯打放低後大家都忘記左，到收工咁我就返左屋企喇!.........一入門口

太太：肥仔，支錄音筆呢？(好緊張)

肥仔：下！唔記得左添。(好抱歉)

太大：有冇搞錯呀？我同事俾左1,000蚊我架，星期四開會要用架。(好慶)

肥仔：我俾班靚“線”，等我返去插佢地。(好慶)

太太：人地趕住用架，你無記性。(怪責)

肥仔：我都係俾人累架。(俾人打壓火滾)

太太：道歉都無句仲咁大聲。(發難渣)

肥仔：好好……

跟住大家就冷戰……以上事件有一個共通點，太太唔能夠向同事“交代”所以好火滾，我因為冇記性唔記得欏部機返屋企好難同太太“交代”，自己犯錯已經好難過，但係太太不斷打壓所以好火滾。平心諗，因自己疏忽係唔岩…太太好對唔住呀。

其實大家o既責任感作怪所以產生不必要o既“誤會”…我講事實，唔好誤會我認低威呀!

凡人

今早陽光普照，氣溫最高二十五度，天氣好人都精神o的，心情都開心o的。

太太今晚有飯局，所以今晚欏正牌要做番日“凡人”。晚餐我要食燒鴨、燒肉、芒果、飲果汁(唔係o個隻葡國牌子)、仲有肉干同薯片…哈哈…哈哈，諗起都開心。只係開心左一陣，收到太太o既短訊 ：肥仔，我今晚o既飯局取消左，你要返屋企食飯。

太太咁關心我o既健康(好感動呀!)，我睇今晚都係做番“聖人”喇!!!!.....唔

雞鴨

我自己好鐘意食雞，同雞有關o既野我都鐘意食，雞蛋、白切雞、油雞、雞蛋布甸、仲有…….好多好多，其中一個原因雞係白肉對人o既身體會健康o的。

同好朋友出街食飯一定要有雞食，屋企煮菜太太都係用雞肉做主打，其中原因係為我健康著想。其他肉類就唔同如鴨有毒、五花腩好肥、燒肉脂肪含量高、臘腸高危食物，尤其是葡國牌子，仲有...好多好多。

水果類芒果濕熱要少食，瑠璉好燥唔准食、藍莓價錢貴，對眼唔覺特別有益(其實係太太唔鐘意食)，仲有...好多好多。飲品類啤酒烈酒等於毒酒、葡國果汁高糖飲得多會病、汽水高糖飲得多會變肥仔(佢怕拖住個肥仔出街好難面對班朋友)。

以上種種問題只因太太對我愛護關心…好多謝妳呀太太!......但以上所有飲品食品都戒絕o既話......我相信自己已經係個“聖人”喇!!!

壞蛋

蛋係一種食物，佢好特別，食好多會有害，食好少都會有害，要有益就要適量。

以前太太日日朝早煮一隻烚蛋俾我食，以為對身體有益(不過唔覺有害)，經過一段時間後就無日日食，懷疑過量有害(但對荷包一定有益)，禽流感爆發後就完全唔准食(因為要跟潮流)。

宜家食蛋有新標準…要申請一個星期(太太要考慮是否適當安排)，蛋要洗乾淨外殼(因為係屁股度出黎o既)，蛋要煮熟(燶左都唔怕，最緊要熟……熟唔熟呢係太太話o既)。如果你整太陽蛋食(可能受到沙門士細菌同喃嘸功攻擊)，令你身心及精神會重傷，好可怕架。

食蛋等如…………………係壞蛋…嗚嗚

高清

今朝早非常大霧，我揸車過橋返工好似進入左迷宮，成個天空之城咁。

返到公司第一件事要搬好個倉，跟住就開門做生意。今日“C”鋪唔夠人手，我要AV組同事過去幫手，我今日又係一個人開工做野喇。我發左個短訊俾阿宏問佢考車考成點，回覆：我得左… (真係好消息)。

下晝老闆返黎喇，第一時間打電話落黎：余生，頭先邊個上黎搬過倉，做乜野開晒o的燈唔閂？你知唔知？余：我今朝搬完貨就…… (其實我未講完) 閂好燈同門先落去貨場開工架，後來開燈o既事我唔知情。老闆：下！已經今朝到依家喇？余生你有冇搞錯呀？唔得、唔得，要注意下、要注意…佢有心砌我，所以對件事冇搞清楚 (我睇佢對眼應該裝番部高清解碼先得喇) …我屋企岩岩裝左高清盒，所以睇電視節目好清好清…

輕機

尋晚開始天氣大變，又熱又濕，太太已經嘈住開冷氣瞓覺。

今朝心血來潮同“葉中樹”影左幾張相，點知部機 “輕機”螢幕出現ERROR 99，要閂左部機重開先至正常番 (我懷疑係張SD咭o既問題)。

今朝好得閒，我問美心肥妹借左把特別o既交剪“cut”相用黎砌大相。但係啤膠過程出錯，失敗左 (個爐唔夠熱)……又要去晒返o的相喇。

阿宏星期五要考電單車，今日最後學車補鐘，唔知幾時先返工 (左住我收工，但我又希望佢聽日考車成功)……努力…努力…努力呀!!!!!!

忍耐

好趕時間，今朝要試下人像鏡頭o既效果，但太太又要趕，同佢影左幾張相後趕返工…趕趕趕

今日要拎部電單車去維修，所以一早要出門，順便去阿勤度拎相。阿勤九點鐘仲飲緊咖啡，佢特別返舖頭幫我拎相 (老友記唔該晒)。

老闆今日二點幾返黎公司踩場，數碼部o的同事全部受罪 (因為呢幾日o的生意好差)。今日AV部o的生意都係好差我一部機都未賣過(我自己都唔開心)，希望阿宏早o的返工咁我就早o的收工。

裝備

今朝去阿勤度揀相，o的相比想像中差，我揀o左二十三張晒2R砌大相，不過聽日先有相睇。

今朝老闆一早就返公司，佢都好耐無咁早返黎踩場喇。原來係有其他原因架，佢要我幫手揸車“tun”位，佢用過江龍撻番著架車，佢架車要揸去維修。

我同部450D添左支定焦鏡CANON EF50mm F1.8，好平咋，六百幾蚊，係影人像之首選(阿勤影樓都用緊佢)。

今日個貨場好靜，我賣左部22寸電視機之後就成日都無生意喇。公司有好多同事都放假，有o的同事突然唔返工。我今晚都要關門先收得工喇…

深造

天氣一日一日變暖，今日最高氣溫二十七度。今朝去左阿勤度晒相同燒碟，見o的相質素唔高，對自己o既技術勁唔滿意。阿勤同我先寫一隻碟用黎俾阿MI，再晒一部份o既相用黎砌大相。但係我今朝好忙，冇時間去揀相，打算聽朝再去。

下晝阿SAM黎公司搵我 (公司問佢借車用)，我順便俾左隻碟佢。

成個晏晝都上網睇人地o的攝影作品 (人地o的相超靚呀!)，人地得我無理由唔得，現階段我又俾太太寸：肥仔人地女仔影o的相都好過你多多聲啦…失敗睇黎我要從低學起…好好深造。

壞消息：我屋企o既蝦家庭前幾日有一隻成員失左蹤 (可能已成蝦餃)。

好消息：我屋企o既蝦家庭今日多o左三隻新成員好熱鬧呀 (唔知幾時玩失蹤)。

守齋

尋晚o既開心心情一直伸延到今朝。六點幾已起床過到書房寫野。太太今日約左同事過香港行街買野，順便探舊同事“仙姐”。搭九點半船，o的同事o係碼頭等一齊落船。但今朝起身走出露台已經發覺好大霧，原來太太到香港都受濃霧影響好遲先上到岸。我出門都趕時間，如果唔係我會拎部相機去試下影霧景。

因為今日初一所以準時八點收工，臨收工收到太太發來o既短信，話搭七點十五分班船返澳門，仲通知我工人已經煮好飯，叫我返屋企食飯………唔係…今日守齋日………食齋先至岩…

生日會

今朝同平時o既星期六一樣，陪太太買菜買早餐。一早有外勤送貨，所以九點幾我已經返到公司安排工作，一切尚算順利。心情好，時間過得特別快(如果日日係咁就好喇)。今日早收工去參加 “BB”o既生日會。

晚上七點我去緊格蘭酒店途中，阿MI打電話來：阿哥，你o係邊呀？你依家仲未到o既？快o的黎喇。余：我黎緊，就到喇。

地方o係酒店三樓餐廳食自助餐。同往年一樣請自己人，姨丈姨媽、契媽契爺、表哥表妹、mimi全家、阿D全家、阿智夫婦、阿祺、謠謠、阿SAM班朋友同“BB”o的同學仔。

 “BB”今日扮到好靚，有好多小朋友一齊，好熱鬧、好開心(如果我o地大人日日係咁就好喇)。

自助餐唔算多野食但氣氛好好，因為安排小朋友玩踩波同紅綠燈遊戲。佢地玩得好投入同好開心，我影左好多相，但有好多相都唔得，而且效果唔理想，真失敗。

原來部450D唔係萬能o既……其實真正原因係自己o的技術差。

試機

收到喇…哈哈…收到喇！我部CANON EOS450D相機，支鏡防手震o架，價錢唔係好貴。太太話我 ：肥仔你貪慕虛榮。

冇心機寫野，趕住去………試機。

上場

等左好耐o既CANON EOS450D今日有貨喇，可惜我無時間去拎，唯有聽日先喇。部機到貨o既時間岩岩好，“BB”後日就生日會，兩件事都令我好開心。

星期六可以帶住部450D上場影靚相喇…………哈哈…哈哈哈……

收早

尋晚收到阿MI電話，通知我四月五號星期六晚上七點“BB”開生日會，o係格蘭酒店食自助餐，到時要影短片。呢樣野令我好頭痛，我要去借機但未必借到，其實我諗住淨影相咋。

今日成個下晝都落毛毛雨，貨場好靜，不過我做左幾單生意。同老闆有傾有講，針對問題解決難題，交通方法有進步希望保持落去喇。

“BB”生日我都唔知買乜禮物俾佢，年年都封利是好老土啫，如果借唔到攝錄機，我影相就算喇。不個最緊要都係返公司寫低白板度星期六收早。

DNA

人係一個非常複雜o既動物，有獨立o既思想同行為，唔可以單獨生活，若果合群o既話，要同聲同氣先至開心，所以發展出個別性格。

凡事都做指揮者、凡構思都要做領導者、凡思想都要做指導者、凡行動都要做發命令者、凡對自己有利益o既都要自己決定、若影響利益難以取捨o既就由你決定、對於你衣食住行有益定有害由佢決定，有以上性格行為o既男、女各半，如果你自己o既性格係咁，唔使驚，你唔係有病，全部都係祖先遺存。如果你太太性格係咁就恭喜你喇!……我行運喇…我屋企有一位…嗚…嗚…嗚……(受害者大狐自白)。