位置

第六日，我發覺阿BOY有明顯改變，佢已經唔係好似初初黎到咁興奮同對環境o既好奇，宜家開始安靜落黎。我今朝o係氹仔有外勤，10點幾先出門。但我發覺9點幾佢已經完全平靜，我同佢玩佢都好似無心機 (平時我9點幾鎖佢入籠就返左工)，獎佢食野都無興趣。個樣好可憐咁o既眼神望住我 ，o係個度踱黎踱去 (我好肯定我唔適宜養狗)。

今朝我幫阿BOY層樓搞衛生，o係佢o的私狗物件中發現重有其他零食，我忍唔住就獎左兩羹佢食，原來佢好鐘意食架 (太太一定有意見，實鬧死)。

“人”好奇怪，當你同對方建立左感情，你就自自然然o係個心度俾個位置佢。我身邊o既太太、囡囡、妹妹、BB、銘銘佢地對我實在太重要。我係唔係應該係心裡面留番多o的“位置”俾佢地呢。