2011年9月29日(星期四)
今日因為打風我同太太都唔使返工…咁… “毛媽廚房”又開工，有好野食啦！今次係整 “麵包”等出爐嗰陣大家都好緊張，聞到香味就知到好成功，成品非常好味。毛毛都係得益者，除左有麵包食之外…毛媽仲陪佢玩到癲，由於工人放假日常兩餐就要我親自出馬，今次倫到太太講 “有好野食啦”….
毛毛 : 好野有毛媽麵包食...
毛爸 : 毛媽又一成功作品 "麵包"
2011年9月29日(星期四)
今朝六點幾外面好大風但係就冇雨，落到街好泠清…毛毛就同平時一樣週圍放低幾両跟住就便便…遇到一位好面倩嘅女士迎面行緊過黎…仲大聲講…
女士 : 打風都帶隻狗落街散步 ?
毛爸 : 我對佢笑左一笑，毛毛就狂吠佢…
女士 : 嘩…你隻狗仔仲係咁惡喎…哈哈哈…
毛爸 : 其實毛毛係開心興奮咋…
女士 : 咁開心 ?
毛爸 : 梗係…我地落黎 「追風」呀~
2011年9月29日(星期四)
尋日開始颱風納沙入夜之後風勢越黎越強…零晨開始街外有好大嘅風聲、雜物聲同對面街消防局救護車、消防車出出入入嘅聲…毛毛就成晚不安行出行入，仲走黎床邊叫醒我兩次(毛毛由BB開始就好驚打風)，颱風對我地日常生活都做成一定嘅影響….
毛爸 : 天文台六點鐘改掛8號風球...
毛爸 : 消防車救護車不停出動....
2011年9月28日(星期三)
記得大約兩個禮拜前嘅下晝…我同毛媽帶埋毛毛去氹仔街市買生果，嗰日啱啱線喺廣場遇到一隊交響樂團喺度現場表演，由於人多我地就抱起毛毛企埋一邊睇(毛媽好鍾意睇現場表演咖)，每每樂章到打大豉嗰節…奇怪嘅事就發生喇，大鼓響毛毛狂吠…一響就吠，鼓手密密咁打鼓毛毛直頭加入伴奏，週邊啲人都笑毛毛，其實毛毛係俾大鼓啲低頻聲嚇親狂吠…
2011年9月25日(星期日)
睇新聞報道、網上流傳、都有聽朋友講過，帶寵物去美容店冲凉同剪毛…有啲寵物美容店會體罰難搞嘅狗狗，阿妹都話每次Coffee行過寵物店都表現好緊張。毛媽都好擔心毛毛會遇到咁嘅情况，而且宜家啲美容店收費一啲都唔平，都有諗過可以嘅話自己親手做仲可以增加親子關係，但對於各種技巧掌握都係一知半解。由於咁…毛媽參加左一個機本狗狗護理美容訓練，內容有同狗狗沖涼、吹毛、清潔耳仔、修甲、修毛、肛門線…工具運用各種技巧…
毛爸 : 嘩~好多種 "架生"喎.....
毛毛 : 我準備好做 "毛"喇，媽咪黎啦....
2011年9月25日(星期日)
毛毛經過5日嘅療程尋日覆診…Dr.吳檢查完話毛毛好番晒，由於毛毛日日都出街同體重有改變要即時做杜蟲(食藥)，但返屋企途中喺車上嘔番晒啲杜蟲藥出黎，醫生建議改食另一種杜蟲藥，其實毛毛2日前已經正常番食餐、大小便、行動反應...。毛毛一返到屋企又生猛番，擔拖鞋、咬褲引我地同佢玩，最後仲大搞破壞..
毛毛 : 大獲...俾人發現...好彩係毛爸啫...
2011年9月23日(星期五)
好耐之前…我己經時時買呢種朱咕力加玩具嘅蛋俾銘銘同銅銅玩，嗰陣佢地兩兄妹好細個，但勁鍾意呢種有得食又有得玩嘅奇趣蛋，有時我都好擔心入面嘅細小玩具配件唔留意俾佢地吞左，過見佢地玩得咁開心就有乜野危險性都唔記得。宜家佢地大個仔大個女...見到奇趣蛋一樣咁開心興奮，銅銅鍾意食朱咕力銘銘鍾意砌玩具…
毛爸 : 呢隻係最新款咖，我係香港買返黎咖，宜家應該澳門有得賣....
2011年9月23日(星五)
「追月」嗰日下畫準備帶毛毛出去橋頭同Mad Mad佢地玩，我抱住毛毛行經回收場，街角有兩隻唐狗衝出黎狂吠我地，毛毛就搏命爭扎猛吠還擊，咁…我甩手毛毛跳左落地(好彩冇事)，嗰兩隻唐狗見毛毛咁兇就即刻退後走，毛毛仲猛追狂吠…今日我地「追月」毛毛就「追狗」，真係應晒主題…
毛爸 : 自已未正式影過月亮...
毛毛 : 我係蠱惑仔黎咖...
2011年9月20日(星期二)
毛毛今朝一早就起左身，毛毛健康情況進展良好，宜家仲需要嚴格控制飲食份量同次數，所以生活習慣都有啲改變。食物方面醫生建議牛肉碎、燕麥、營養湯，每日三次…至於毛毛行為由 “冇心機”變番 “百厭星”...咁亦都係我地想見番嘅毛毛，多謝各位朋友關心。
2011年9月18日(星期日)
毛毛瞓到8:00先行出黎，己經24個鐘冇食野，行路有少少好似飲醉酒咁…仲扭計要我抱佢，過左一陣就開始作嘔，嘔左啲啡色水出黎，仲嘔左兩撻…當我睇清楚啲嘔吐物就發覺有血…吓…毛毛嘔血！即刻打電話俾Dr.吳(吳醫生今日放假)…Dr.吳話診所星期日要12:30先開咖，建議我地揾注診羅醫生。等左好耐先夠鐘睇醫生，經醫生身體檢查同便便檢驗…証實係細菌引起嘅腸胃病，要打針食藥…情况唔係好大問題但我同毛媽都仲係好擔心，毛毛可以食啲流質食物同食湯，5日後覆診…
2011年9月18日(星期日)
上個禮拜日我帶左毛媽毛毛去大譚公園原本係行山，去到公園…見附近嘅草地好靚就忍唔住留低左喺度玩。一放低毛毛…佢就開始喺草地狂跑。由毛媽帶住跑，好快毛媽就索晒氣，跟住就輪到我帶…咁…大家就喺公園跑左一朝….
2011年9月18日(星期日)
毛毛瞓到咁晏都仲未起床…前晚毛媽帶毛毛散完步返黎講 : 毛毛屙左好多便便後尾嗰啲仲係爛屎呀。但冇發覺毛毛唔精神，反而同平時一樣咁為食。尋日朝早毛毛嘔(白色泡，平時耐唔耐都會嘔一次)，下晝食左月餅，旁晚毛毛就喺廳同騎樓之間行出行入，跟住就又屙(屙啲水)又嘔(嘔返晒啲月餅出黎)，毛媽即刻打電話俾Dr.吳，醫生建議毛毛要禁食觀察….毛爸 : 毛毛呢幾日嘅情况加起上黎又好似好大件事喎...毛媽抱佢一陣就瞓着左...
首先我毛毛祝各位好朋友、叔叔、姨姨、哥哥、姐姐..."中秋節團團圓圓熱熱鬧鬧快快樂樂"
，梗係要祝埋毛爸、毛媽啦，仲有姑姐姑丈、表哥表姐、Coffee、夢娜麗沙....今年第三年同毛爸毛媽一齊過中秋
，記得第一年毛媽話我仲係BB唔可以食月餅
，第二年毛爸大意唔記得訂又係冇月餅食
，今年就唔同毛媽好緊張一早就買定月餅俾我過中秋
，毛媽仲訂多左幾份用黎送俾Coffee、大師兄..... 
