事件1：某日將自己隻皇冠牌手錶 (係信物黎架) 調較番準確時間，但大意未閂好錶冠，第日落大雨隻錶入左水，送去維修，報價換件同修理費$4000-$5000。令自己付出咁大代價，係唔係要體罸自己定係賴天氣唔好落大雨，所以令隻錶入左水？好冇理由咁就原諒左自己。
事件2：星期四朝早，我用部450D相機同毛毛影完相，將相機放左o係梳化上面，俾毛毛拖左落地 (經檢查，部機重傷) ，要修理唔知幾錢。究竟係唔係自己貪方便造成呢？定係毛毛百厭？要體罰佢....毛毛唔識分事物輕重應該原諒佢。
以上兩件事都係自己大意做成。其實我地應該注意生活細節，唔好咁大意犯下大錯。 呢輪好黑，經濟重傷.............(肥仔，以後睇你仲會唔會咁大意)。
前日工人阿美煮完晚飯後，太太發覺個石油氣爐有一邊唔正常（右邊按制左邊撻火）。
太太：肥仔你睇吓個爐，撻唔到火呀。
經我檢查，個爐嘅撻火器座爛左所以撻唔着火，應該要換（其實可以揾鐵線扎番正個位就用得）。太太約左聯X行啲師傳上門維修（星期六早上9:00~11:00）。
以下成個過程都幾搞笑吓，太太因為趕住出門而師傅10:45都未到，打左兩個電話去佢公司催佢黎，師傅覆電話…
師傅：請問係唔係大中華叫師傅整爐呀？
肥仔：係呀……..
師傅：我宜家即刻上黎（已經11:00，一上到黎就吹牛）。
師傅：今朝好多野做，成11單柯打，單單都係9:00~11:00，公司當我會分身（呢樣野同我講都冇用，係你嘅能力問題）。
師傅檢查之後就講….
師傅：阿生你個爐舊電可能冇電喎（你檢查清楚未呀？阿叔）。
師傅又整一輪，出埋鉗仔又講（佢整到滿頭大汗）….
師傅：阿生個爐嘅撻火座爛左（我都知喇，叫你上黎係要你整番好佢麻）。
肥仔：師傅咁有冇得整架？
師傅：有嘅…用啲鐵線扎住，可以繼續用架（咁都得）。
師傅攞段電線出黎係咁倚繞兩個圈就開始試爐（阿叔條電線有膠包住架，你係唔係求其左啲呀？）。結果時得時唔得，師傅又出動鉗仔出力咁掹個撻火器，掹 “爛左”用鐵線都救唔番（阿叔你識唔識整石油氣爐架，會爆炸架）。
師傅：阿生你個爐爛左喇，不過仲用得嘅（爛成咁都話仲用得）。喺超市買個點火器點火就得喇，冇問題嘅…
跟住嗱嗱聲執野走人…維修結果就係……我同太太即刻去聯X行買個新石油氣爐……（激氣）
因為同毛毛剷毛我特登買左把新電剪，準備好就叫埋太太幫手。淨係同毛毛修四隻腳仔都要搞好耐（全身剷晒唔知幾耐）。
太太滿頭大汗，我就週身痕。太太幫手捉住毛毛個頭，可能毛毛唔慣同覺得唔舒服，毛毛就搏命掙扎，搞到成枱面同地下都係毛。
我地放左毛毛落地，毛毛嘅反應有啲奇怪。太太大叫肥仔你睇吓，毛毛唔識企呀…我見毛毛猛Lam啲腳仔，同爬喺地下收埋啲腳仔唔願起身。其實我都好擔心毛毛唔慣（我同太太開始好驚），宜家毛毛個樣似羊咩。
冇可能淨係剪四隻腳架…咁就剪晒全身。完左放毛毛落地，佢直頭一支箭咁衝埋佢張床仔度，埋個頭入"咕臣"底郁都唔郁（毛毛好可憐呀）。太太獎佢零食先行番出黎（識得行番出黎咁都放心啲）。
太太就攞件衫仔俾毛毛着，等佢覺得自然啲。 “咦”十二點幾喇，要快啲鎖番毛毛入籠訓覺。太太特登喺個籠鋪條毛巾，等毛毛暖啲。早抖喇毛毛………
噚晚搞到好夜先訓，今朝妟左起身，我嗱嗱聲放佢出騎樓。太太又大叫肥仔，毛毛個樣好靚仔呀，成隻史納莎咁呀…哈哈…
我差啲唔認得佢呀，宜家發覺毛毛真係有啲似，剷左毛後毛毛變左成隻灰色。呢個百厭仔毛毛又喺廳度亂咁咬野，仲週圍跑玩左成個上晝（毛毛玩得好開心）。更重要嘅係毛毛有番自信，太太唔洗再擔心毛毛…一切復原……
今早拖地消毒，發覺毛毛對地拖有強烈反應。我一路拖地佢一路吠，一直到我拖完 (勁嘈)。
上星期六毛毛做保健時，獸醫話毛毛過幾日可以o係屋企沖涼喇，我以往同阿BOY沖涼o既經驗宜家大派用場喇。
今日毛毛第一次o係屋企沖涼，太太叮囑唔好沖咁耐呀，記得要用護毛素呀 (狗狗o的毛會靚o的)。以下就係毛毛沖涼過程：
先準備膠盤、狗帶 (縛住毛毛唔俾佢週圍走)、沖涼液、護毛素、吸水布、毛巾、風筒、電剪。
我先較好盤熱水，放左毛毛落水，佢好似唔鐘意，後來發覺o的水太熱 (毛毛，我怕你冷親，o的水較熱左，好對唔住)。
終於沖濕o的毛同搽左沖涼液喇…“呀”…唔記得影相。入房攞部相機，瞄左好耐，影得o個幾張 (全部效果都唔滿意)。
都沖左好耐喇，要快o的同毛毛沖乾淨個身、抺乾同吹乾。毛毛見到個風筒，又亂咁跳，今次搞到書房濕晒。
吹乾左個身就同毛毛修剪o下咀仔、耳仔、下爬o的毛，修剪完之後毛毛成個醒目晒 (好靚仔呀!)。 “大獲”…唔記得左用護毛素同毛毛沖涼…(一定俾太太鬧死)……
由7/7至10/7一連四日工人阿美放假，為左解決毛毛午餐o既問題，太太同我分別攞左三日假陪毛毛。
今日因家人有事要幫忙，特別放低手頭上工作同請多左半日假為屋企人辦事 (事件好彩順利完成)。順路去五金舖買膠網做圍欄，俾毛毛多o的地方活動。
毛毛今日特別生猛，一放佢出黎就通屋亂咁走。講起上黎好得意，毛毛好似裝左導航系統咁雖然亂咁走，又走得快、又掟彎、又飄移、又線呔，都冇撞到野 (佢好叻仔呀)。
我地足足玩左半個鐘…………太太就大叫…你睇佢玩到過晒龍喇！肥仔我警告你呀，唔好同毛毛玩咁癲呀……“車”玩下唔得咩…
今日要帶毛毛去見獸醫，佢例牌見到個籃色外出袋就高興到發狂。聽太太講毛毛o係診所見到隻史立沙大狗，佢全身都震晒仲吠人地，但見到o的細狗就唔吠 (可能驚大狗)。
個醫生好錫佢架，毛毛o係診所都好受歡迎架 (去得多熟晒o的工作人員)。今次毛毛去做保健同滴蚤水 (醫生話兩日內都唔可以沖涼架)。姑娘同毛毛磅體重，1.9kg又重左0.1kg、肩高20cm又高左 (梗係喇！好食好住太太同阿美都咁錫佢)。
毛毛近排鐘意亂咁咬野，太太就買左舊牙膠俾佢咬 (第一日已經咬爛左，激壞太太)。
尋晚毛毛玩到失控，隨處o係廳度便便 (擺好個姿勢)。俾太太發現，咁個情況就飛咁快的毛毛去o的報紙度，但係便便過程完左，毛毛淨係o係報紙上面保持便便咁o既姿勢。之後o既情況…太太就抱起毛毛去o的便便度，質佢個頭埋去…大聲咁教佢…毛毛你唔可以o係呢度便便架，曳曳豬，便便要係報紙上面，你知唔知呀？後來睇書先知咁做係錯o既，狗狗肯定便便之後就會俾主人罰，第日狗狗會呢埋便便或者會食左o的便便架，咁你仲麻煩……
毛毛今日戇居居，唔知乜事？？？
