毛爸毛媽毛毛豬: 4月 2015

2015年4月30日星期四

毛毛俾人"點相＂

2015年4月30日（星期四）

今朝同平日一樣帶毛毛去散步⋯由於遲咗落街就遇到平日少見嘅狗狗朋友，有位阿姨帶住隻「茶色貴賓仔」以前離遠見毛毛就會轉頭走，今早⋯唔知點解佢哋大家聞鼻打招呼，最後又係俾毛毛狂吠嚇走。

我哋行到街口毛毛開始表現緊張⋯原來街尾有隻「深灰色史納沙仔」由位姐姐帶住行緊過嚟⋯唔使講兩隻狗狗大家見面就鬥吠，我哋做家長嘅唯有急急拉緊狗狗離開⋯而且大家有眼神接觸仲有啲唔好意思，擦身而過一剎那⋯位姐姐就話：我記得喇⋯你就係好惡嗰隻灰色貴賓毛毛⋯嘩～好靚仔呀！

毛爸：毛仔，原來你咁出名咖？

毛毛：使乜講...

毛爸：人哋話你惡冇禮貌呀...失禮家長呀...

毛毛：毛爸，你唔低得...妒忌我...

2015年4月26日星期日

令人憂心嘅毛毛...擔心嘅事一樣接一樣

2015年4月27日（星期一）

噚晚毛媽親子時間發現毛毛右後腳掌損晒又紅晒，毛毛呢種腳掌損傷情況雖然周不時會發生⋯但今次傷勢比以往大...令我擔心...

曾經問過醫生⋯醫生講：如果狗狗日日外出散步、尿尿、便便⋯呢種磨損腳掌傷係好普遍，因為狗狗便便完會用對後腳擦地下⋯經常會磨傷腳掌，家長無需太擔心⋯當然傷勢嚴重就要帶毛毛嚟見我喇⋯

毛爸：毛毛腳掌下方傷口有一毫子咁大...

毛毛：毛爸我又要帶喇叭頸圈喇，你又失職喇...如果有肉乾獎勵我....

我...會考慮...唔告發你...識做啦毛爸...

朝早散步都趕時間

2015年4月26日（星期日）

今個星期日要開工⋯一早就起床準備⋯毛毛嘅早、晚餐⋯之後⋯趕時間帶毛毛去海邊散步，回程買早餐俾家人。

講起上嚟毛毛好似習慣咗逢星期日家人就會帶佢出去玩咁⋯今早毛毛搞玩對抗，除咗唔聽話搶繩之外⋯仲行幾步就假裝尿尿⋯由於冇得玩「執波波」毛毛行到一半就唔肯行要抱抱，我為咗趕時間⋯維有...

毛毛：有得去海邊玩喇...

毛毛：毛爸好趕時間喎...

毛毛：冇得玩執波波又要行咁遠...我唔行喇...

地獄(開工)見聞...趕工趕工

2015年4月26日（星期日）

自上星期正式入大型地盤開工就開始趕工⋯趕工又趕工，除咗佬闆親自帶隊之外仲加人加班。過去嘅一個星期朝九晚六中午直落連星期日都要返工，今日開工開到連中午飯都忘記咗食。佬闆亦非常「識做」平日開工請食中午飯⋯仲講低星期日開工唔使加班⋯早啲收工。

過去嘅一星期...工作辛苦到"極點"...連星期日都要開工...

令人憂心嘅毛毛...我自己可能係「帶蚤者」

2015年4月22日（星期四）

前幾日返工場攞物料嘅時候⋯聽到隔離啲師傅講：近排周圍都好多「蚤」，手、腳、面都俾蚤釘到又痕又紅。原因係附近有好多流浪貓貓而且近排天氣暖又濕⋯令蚤同蟲蟻特別昌狂，如果呢件係事實⋯而我又經常喺嗰度出出入入⋯咁我極有可能係「帶蚤者」，將蚤帶返屋企傳俾毛毛。

嘩～諗下諗下越來越驚⋯

毛毛：毛爸，今次俾你累死喇...慘...

毛爸：毛仔我都估唔到....無奈...毛仔你放心我架車己經做咗滅蚤...

2015年4月21日星期二

嵐山．天龍寺

2015年4月22日(星期三)

續2014年11月10日…天龍寺同京都其他有名嘅寺院好大分別，天龍寺以花園天然風景為主，你會感受到山水園林都好原始但佈局十分精緻，入去天龍寺好似係去遊花園都唔似去參觀寺院。

當日我遇到一位外國遊客…由於用同一型號相機…所以大家做咗經驗交流…結論係天龍寺嘅風景好靚一般鏡頭係影唔晒「全景」….............待續。

毛爸：呢度叫「厙裏」聽講係廚房...嘩～豪華廚房

呢啲係屋頂裝飾...

望著呢度令人心靜平和...

左手邊你「大方丈」重要文化遺產...

「曹源池庭園」被稱為名園中的名園...超靚

呢度係山景一角...

寺嘅周圍都有好靚嘅小花

上山嘅梯級公整又潔淨...

呢棵紅葉樹...好受龍友歡迎...

呢種綠色小植物...滿山都有...好靚...

寺院外圍...

天龍寺出口...................待續

2015年4月20日星期一

單車日誌...健康無價

2015年4月20日（星期一）

自己俾「感冒」纏繞咗大半個月⋯總係覺得仲未完全好清。噚日凌晨出去踩單車⋯只不過短短十幾分鐘就非常「索氣」同狂咳，腰部、手臂、手指發麻，腳部、大腿發軟冇力⋯被迫停車休息。

後生嗰陣感冒只要瞓一晚就㑹冇事，到年紀大一染感冒⋯就算休息幾日都難以完全康復，能夠保持身體健康係一件幸福嘅事⋯健康冇價。

毛爸：年紀大咗...體能走下波...係事實...

毛爸：現實嘅嘢...想唔承認都唔得...

毛爸：到咗一把年紀，運動操練只係減慢身體老化...

玩番夠本

2015年4月20日（星期一）

毛毛腳傷事件係一場虛驚，雖然毛毛腳仔冇事⋯毛媽都係覺得喺好滑嘅木地板上玩追執波波⋯係有危險，呢幾日毛媽仲禁止毛毛玩一切追、跑活動。

星期日⋯又係一家人出去玩嘅日子，毛媽特準毛毛有得玩執波波，毛毛今朝四隻腳好似裝咗「摩打」咁有用唔盡嘅體力⋯由落車玩到上車⋯

毛毛：終於有得玩喇...爽

毛媽：阿仔你唔好玩到咁癲呀...

毛爸：小朋友有得玩零舍醒神...

2015年4月19日星期日

令人憂心嘅毛毛...毛毛令人虛驚一場

2015年4月20日（星期一）

毛毛右後腳唔俾人掂，行路周不時遞起右腳韓背垂尾⋯有佬友提示「Poodle好易膝蓋移位，係一種病態」，可能毛毛玩嗰陣傷咗膝蓋，本來第二朝帶毛毛去見吳醫生。

清晨⋯毛毛一直跟著我行出行入，冇垂尾、冇韓背好正常，裝完身落街散步毛毛表現冇事。

返到屋企再幫毛毛檢查⋯毛毛已經冇痛楚嘅反應，一切回復正常⋯今次真係一場虛驚...

毛爸：呢位毛毛小朋友經為家人帶來"驚""喜"...已經被家人寵壞咗...

地獄(開工)見聞...新地盤開工！入場。

2015年4月19日（星期日）

過去嘅星期四⋯一早起床返工場運工具同物料去新地盤⋯作「入場」準備，我哋入去工作嘅大形地盤出名以「工地安全」行先而且仲嚴格執行，基於安全原則⋯施工物料進場過程同手續非常煩覆⋯入閘、吊運⋯只係運一部份物料都要喺烈日當空下等半日。

但諗深一層⋯為咗安全工作啫，收工嗰陣要"開心平安＂咁返屋企⋯呢個先至係重點⋯

毛爸：由早上烈日當空曬到中午...

毛爸：見到出閘處嘅標語...就知到管理公司幾咁重視「工業安全」...

2015年4月16日星期四

令人憂心嘅毛毛...毛毛垂晒尾

2015年4月17日（星期五）

毛毛由昨晚晚餐之後就一直都冇「樹」起尾巴，而且行路「韓」起腰部，當抱毛毛而接觸右邊腳部⋯毛毛會狐叫發惡咬人，不時行路會「遞」起隻右腳。

照我哋估計可能餐前工人同毛毛玩執波波遊戲嗰陣受傷，大㕔地面係光滑嘅木地板加上新工人同毛毛玩得過激所至。

以上只係懷疑⋯毛毛情況行得走得只係垂低條尾⋯會不會真係受傷？或者其他原因？

毛爸：毛毛冇晒心機嘅表情...好難怪家人咁擔心...

令人憂心嘅毛毛...終於有所發現

2015年4月16日（星期四）

呢排發現毛毛經常R耳仔同R頸，我同毛媽都覺得唔尋常⋯昨天⋯毛媽幫毛毛檢查耳仔嘅時候⋯發現一隻「蚤」，當然係即時將佢處死啦，更發現毛毛頸紅咗一噠⋯應該係俾蚤咬同R嘅結果。

捉到隻蚤好似放心咗⋯但⋯又係擔心嘅開始，毛毛身上仲有冇蚤呢？啲蚤會唔會跳到屋企周圍都有呢？⋯唉～人都癲。

毛爸：毛毛有蚤患...全家都為佢檐心...

令人憂心嘅毛毛...毛毛頭頂又發現「蚤屎」

2015年4月16日（星期四）

大前日親子時間⋯毛媽幫毛毛梳毛嘅時候⋯喺毛毛頭頂發現最討厭「蚤屎」，毛媽咪地氈式搜尋⋯但冇結果。

天氣回暖又潮濕係蚤蟲活躍嘅季節，雖然毛媽為毛毛做好防範措施⋯但防不聲防，又要做大規模滅蚤運動喇⋯又係麻煩嘅開始。

毛爸：最近毛毛小朋友都好少熟睡...因為帶住喇叭頸圈又R唔到痕...陰公豬...

2015年4月12日星期日

京都嵐山遊

2015年4月12日（星期日）

續2014年11月10日⋯京都嵐山俾我第一個印象⋯風景秀麗令我喜悅忘憂，嗰種美麗充滿原始大自然。

大堰川流水平和如鏡，令人深刻印象嘅地標「渡月橋」，到處都係古建築，居民純真友善仲有「人力拉車」、「盛裝打扮嘅藝妓」加上紅葉⋯好似自己身在古代日本。

而當地人講喺古代日本貴族已經將呢度作為遊樂玩耍嘅地方。..............待續

嵐山車站

渡月橋側景

呢個小朋友叫"太郎"非常溫純可愛...體重有46kg連主人都俾佢拉跌...

大堰川好壯觀

嵐山公園內一條小橋...

公園內有單車專用車道...非常現代化同環保...

公園內嘅小溪有好多魚仔咖...

慢慢變紅嘅山景

地標渡月橋

舉子端莊優雅艷裝嘅㙯妓

拉車嘅車夫全身古代裝飾非常專業...令人好似進入時光隧道

..................待續。

今早散步水同紙都唔夠用

2015年4月12日（星期日）

話說⋯呢排天氣時冷時熱又潮濕，毛毛腳仔出現紅疹⋯而毛毛就好勤咁Lam到腳仔又紅又濕，毛媽梗係狂鬧⋯要毛毛剪毛揸藥同帶喇叭頸圈。

噚晚毛毛帶住喇叭頸圈瞓覺⋯唔肯出騎樓尿尿⋯死忍，今早毛毛一落到街由巴士站開始尿尿一連8次⋯我淨係搞事後衛生就用晒啲水同報紙⋯最後毛毛便便我都係用紙巾續粒執...

今次毛仔真大整蠱⋯

毛毛：毛爸，我唔係有心咖...只喇叭頸圈頂住騎樓門出唔到去咋...

我三急...強忍都好辛苦咖...

毛爸：咁...即係我唔啱啦...

2015年4月11日星期六

失而復得嘅感受係當時人先睇會

2015年4月11日（星期六）

前兩日我喺梳化度寫緊日誌嘅時候⋯毛毛急急腳咁喺書房擔咗樣紅色小物件出嚟⋯跳上梳化喺我隔離玩（通常毛毛會玩到咬爛啲野咖）...

原來佢玩緊係我3個月前唔見咗嗰隻USB記憶棒（內有大板旅行日誌同相），好耐之前地我氈式搜索書房都搵唔到⋯最後放棄（所以大板旅行日誌停咗）...激死。

最後毛毛有零食獎勵做交換⋯

毛爸：可能毛毛都覺得好奇怪？？點解檐野玩唔使涯鬧仲有零食獎？...

毛毛亂搞亂走幫我揾番隻USB...開心嗰種心情係我自己先明白...

2015年4月10日星期五

嵐山～溫泉酒店

2015年4月10日（星期六）

續2014年11月9日⋯到日本旅遊其中一個重點節目⋯住溫泉酒店，日本嘅溫泉酒店多數都係帶有當地傳統文化，房間佈置、食物、浴衣、侍應制服都傳統日式化。

今次入住「花伝抄」酒店令我有新體驗⋯入到酒店大堂範圍⋯侍應會招呼你除鞋同挑選自己喜歡嘅日式浴衣，由酒店大堂至房間都唔使著鞋，浴場除咗有大眾藻堂同露天風呂之外⋯仲有私人風呂，令人靜靜咁盡情享受浸浴嘅樂趣⋯真係有星級的家嘅感覺...............待續。