毛爸毛媽毛毛豬: 5月 2014

2014年5月31日星期六

六‧一兒童節2014

2014年6月1日(星期日)

今日係每年一度「未來主人翁」嘅節日「兒童節」。

祝各位小朋友…前途遠大、健康幸福...

祝各位少爺仔…豐衣足食、快樂成長…

兒童節快樂！

毛毛：祝各位朋友仔、粉絲...兒童節快樂！今日係我哋話事既嘅日子...

毛爸：知喇...要食三文魚餐...

毛毛：毛爸，你真係一個醒目嘅大兒童...

2014年5月30日星期五

蟬叫聲喺邊度來咖？

2014年5月29日（星期四）

雖然每日早晚散步都會行經氹仔南京街、拉哥斯街⋯季節轉換夏季嘅來臨街周圍嘅樹木都有好大改變，呢個時間全條街都充滿淡淡嘅白蘭花香，仲有連毛毛都好奇嘅蟬叫聲。

呢個百厭星毛毛會坐喺樹下周圍望⋯研究吓啲蟬叫聲喺邊度來⋯

毛毛：嗰種叫聲又嘈又長氣...

毛爸：呢啲係蟬叫聲...咁...即係話夏天來喇...你又有西瓜食喇...

2014年5月27日星期二

高溫熱浪，人都癲

2014年5月27日（星期二）

我哋人類對大自然嘅要求真係冇止境⋯

天氣咁熱，落番場雨降下溫就好喇，落雨～雖然涼快但周圍濕濕出街又唔方便⋯悶爆。

日日都落雨，邊度都唔去得出太陽就好喇，睛天～烈日32度高溫（我工作嘅機房溫度有成38度人都癲）熱棘棘⋯局住留喺屋企嘆冷氣⋯又係悶爆。

我都好難明自己想點⋯天氣熱對於狗狗嚟講係辛苦嘅事尤其係長毛狗真係有口難言⋯

毛毛：毛爸，咁熱咁猛太陽我唔落街喇...毛爸，散步對健康有益呀...你應該落街，但唔好咁晏返嚟喎...要煮早餐俾我食喎，遲咗食早餐對我唔健康咖...

毛爸：毛仔，你好孝順喎...

毛毛：瞓正喺冷氣機風口係最舒服...涼夾爽...

毛爸：毛仔瞓低嘆冷氣嗰陣...想佢陏都幾難...

2014年5月26日星期一

毛毛：有外敵入侵！打到嚟喇！

2014年5月26日（星期一）

話說前日朝早⋯我煮緊早餐，太太開著電視做早操⋯毛毛喺度等緊「執死鷄」，毛毛突然「扎晒馬」向大門口方向不停咁狂吠（門口旁邊就係大電視機），當初我同太太都以為毛毛係吠電視機發出嘅聲⋯但電視已經轉晒畫面內容⋯毛毛仲好緊張咁繼續吠，我細心聽⋯原來係「門鈴聲」仲下停咁響⋯叮噹叮噹叮噹⋯檢查之下⋯門鈴痴咗線，毛毛真係機警⋯要讚。

毛毛：毛爸，有人嚟「踩場」呀！

毛爸：毛仔，你諗多咗喇...係門鐘壞咗咋...

2014年5月25日星期日

毛毛笑？親眼見到都未必係真

2014年5月26日（星期一）

今朝散步嗰陣⋯位掃地阿姨離遠同我打招呼⋯仲勁讚毛毛呢排好開心成日都笑笑口，我都笑笑口咁同阿姨講：毛毛個百厭星扮嘢咋，妳唔好信佢呀！哈哈哈。

實情呢輪成個星期都持續高溫天氣太熱，狗狗就申脷仔散熱好似我哋人類出汗咁。

毛爸：毛毛咁嘅樣...俾入感覺好開心咁笑...其實毛毛係覺得好熱...

毛爸：呢個樣就真係開心笑...因為就嚟有藍梅食...

續⋯2014年4月23日（星期三）自己鍾情「飲茶」係深受母親大人影響，當自己有經濟能力就好想去見識下茶園、種茶、製茶⋯啱啱嘅臺灣旅行太太就安排咗喺阿里山茶園l民宿度假。

當親眼見到成座山翠綠嘅茶樹同滿山採茶大姐⋯令我大開眼界，接近海拔3000尺⋯每日清晨4：30～8：30喺大濃霧或者微微雨中採茶大姐們企喺好斜嘅山坡採茶好似玩「雜技」咁...

製茶係需要時間⋯聽「賴正一製茶批發中心」嘅賴師傅講製茶係要經過⋯曬茶、發酵、揉茶、烘焙等等⋯而呢個過程係要製茶師傅不停工作30個小時⋯「茶」真係得來不易。

民宿前面就係一望無邊嘅茶樹海...

呢啲就係馳名中外嘅「高山烏龍茶」，而現在係採「春茶」...季尾...

呢啲係採茶大姐今早嘅收獲...

性格爽朗豪邁嘅採茶大姐...非常好客...

今次我最大收獲係「阿里山紅茶」賴師傅極力推薦...茶濃香極甘甜...

2014年5月24日星期六

趕時間！趕時間！

2014年5月25日（星期日）

原本今日計劃帶毛媽毛毛去行山、野餐⋯之後返屋企幫毛毛沖涼，但阿頭突然話趕工程今日要開工⋯咁⋯今日嘅節目就要全部取消，唯一唔可以取消嘅係要幫毛毛沖涼。

今朝一早帶毛毛落街散步，凌晨落過雨⋯地面好濕，咁⋯毛毛反而玩得好開心，返到屋企毛毛啲腳仔全部濕晒⋯冇所為啦⋯都要洗白白囉～

毛爸：毛仔，我要返工...所以一早就要幫你洗白白...

毛毛：毛爸，唔緊要啦...咁你記得...我有「三文魚」餐未食喎...

毛爸：得喇...我已經記低咗...

毛毛：我毛爸冇記性又籟貓....所似...

2014年5月19日星期一

毛毛心聲…夏天到啦！

2014年5月20日（星期二）

今朝六點幾落到街陽光已經好猛烈，毛爸越來越早帶我落街散步，因為夏天到啦！晏咗就會好熱。

而家日常嘅氣溫都去到31度⋯真係行幾步都"且晒蝦"，雖然好熱但我都好鍾意夏天，因為⋯會有凍冰冰嘅西瓜食⋯

毛毛：嘩～好熱呀！熱C狗咩？

毛毛：好彩毛爸整塊地磚俾我瞓...涼陣陣...好C服呀！

毛毛：好曬呀！太陽...高高掛於天空上...人人話那太陽香橙變...

2014年5月18日星期日

單車日誌…大自然嘅力量

2014年5月18日（星期日）

5點幾6點個天就光晒⋯今朝有條件出去操練踩單車，大自然嘅力量只可以用"準確、奇妙"嚟形容，冇操練只係三星期⋯緣途嘅小黃菊已經開花⋯而叫人驚訝嘅係小黃菊好似約定時間咁一齊開花。

今早天氣變化叫人意外⋯落街嗰陣風和日麗⋯當我踩到20公里（目標踩40公里）就開始落雨，唔使講梗係變咗"落湯雞"啦⋯真係「天有不測之風雲」。

毛爸：大眾踩單車郊野上...

毛爸：見到一大片小黃菊...心情開朗...

毛爸：雨中踩咗３公里...都唔便避兩啦...已經全身濕晒...

2014年5月17日星期六

改變對毛毛行為嘅管理

2014年5月18日（星期日）

今朝我沖完涼行出大㕔就見到⋯毛毛喺梳化咬緊報紙，仲將報紙咬到變成紙碎，實情毛毛係貪玩要引起我注意。

以往屋企人第一個反應係好緊張好大陣象咁即時搶番啲報紙（專家話咁突然嘅反應係令小朋友好緊張）⋯實情係擔心毛毛會食咗啲報紙而影響健康，但好多次嘅經驗發覺⋯毛毛會加快速度碎紙同將碎紙食咗...令人激心。

我參考「熊爸」建議嘅方法"獎勵、讚賞"⋯冷靜平和咁叫毛毛交出報紙然後奬佢零食讚佢叻，呢種方法好有功效⋯更想唔到嘅係⋯毛毛會將所有嘅紙碎都擔番俾我。

毛爸：平日啲報紙...擺晒係食飯抬、梳化...毛毛好少去咬...我唔理佢嗰陣...佢就去搞搞震...

毛毛心聲…罷行

2014年5月17日（星期六）

今朝早又落雨⋯又要落去又焗又臭又暗嘅停車場散步，因為咁⋯我知毛爸做咗好多嘢，每次落停車場散步只要我乖乖跟住行就有零食獎勵。

雖然我好快就便便同尿尿⋯但毛爸堅持要我繼續行，毛爸咁無理嘅要求⋯今日我決定⋯罷行。

毛毛：我毛爸強權唔合理嘅要求我係唔係應該"罷行"丫？你哋係唔係撐我先？

毛爸：我家毛毛大少爺好有性格...

2014年5月14日星期三

狗狗後雙腳站立

2014年5月14日（星期三）

有好多家長會覺得自家狗狗會雜耍而讚美佢哋⋯由其係後雙腳站立，有專家指出⋯狗狗將全身嘅重量集中喺後雙腳，係會令後腳肌肉、關節、腰椎⋯都會受到好大嘅壓力，令受壓部分好易受傷⋯就算冇事都會令受壓部分好快出現"老化"，由其係大型狗⋯年紀一大就會影響步行。

毛毛已經有一段時間都經常都係後雙腳站立，睇嚟要毛毛立即改正⋯

毛爸：我每日放工返到屋企...毛毛都會好激動咁企起身歡迎我...

毛爸：毛毛好似習慣咗咁...而家好難改正行為...頭痛...

2014年5月13日星期二

毛毛心聲…烏龍嘅毛爸 II

2014年5月13日（星期二）

呢排一直都落雨⋯所以每日早、晚散步多數都係停車場，而每次我會便便2次尿尿3次，由於停車場冇垃圾桶⋯啲便便毛爸就用紙巾執起用報紙包住帶返樓層垃圾房處理。

今朝毛爸行為奇怪一出到廳就⋯大力咁索氣周圍聞⋯好似要搵野咁，原來係成個大廳都好臭便便味，仲質問我係唔係喺枱底便便⋯後尾先發現毛爸個袋仲袋住兩包便便⋯

毛毛：毛爸，你唔可以第一時間懷疑自己人（我毛少）咖...

毛毛：毛爸，你睇...你仲袋住兩包便便呀，你年紀大又冇記性又烏龍...

毛爸：嘩～阿仔，我問下你啫...唔使一論咀喎...

毛毛：毛爸，你咁嘅態度唔係叫做"問"係叫"砌生豬肉"...

毛爸：阿仔，你啲態度都好差啫...

2014年5月10日星期六

毛毛心聲…「母親節」2014係一個重要日子

2014年5月11日（星期日）

每年除咗媽咪生日⋯母親節係重要嘅日子，每年我同毛爸都會花盡心思買禮物送俾媽咪氹佢開心。

但每年毛爸都向我反影⋯我啲錢唔夠買...嗰啲...呢啲⋯最後求其了事，今年我"重鎚"用晒啲「利是」錢買咗份禮物希望媽咪鍾意。

祝媽咪「母親節」快樂！

毛毛：法國名牌煲...希望媽咪鍾意...

毛毛：毛爸話佢買呢件野係好貴咖喎...（毛爸一定作大，應該大打斧頭）

毛毛：毛爸，我哋兩父子今年嘅...零食、出去威嘅"碼頭"...就要靠你咖喇...

祝全世界偉大嘅母親「母親節」快樂！2014

2014年5月11日（星期日）

我哋一日一日成長⋯一日一日明白事理想⋯最後離開屋企自立⋯

媽咪由你出世起越來越愛你⋯越來越關心你⋯最後時時都擔心你⋯你、妳嘅情況係唔係咁？

嚫今日「母親節」同媽咪講媽媽我愛妳，嚫今日「母親節」祝福媽媽一身體健康母親節快樂。

祝願全世界偉大嘅母親身體健康「母親節」快樂！

毛毛：今日係一個重要日子...祝各位母親「母親節」快樂！

毛爸：毛毛，咁你媽咪呢？

毛毛：毛爸，你放心...我咁醒點會唔記得...我另有安排...

2014年5月9日星期五

毛毛心聲…原來係預早慶祝「母親節」

2014年5月10日（星期六）

今朝一早⋯雖然落過雨地下又濕⋯但毛爸都帶我出街散步（呢幾日⋯日夜都係行停車場咋），返到屋企毛爸又准我自己玩藍色波波，今朝仲有我最鍾意嘅羊肉餐食⋯

吓～今日我生日咩？（我好似兩個月前已經慶祝咗生日啦）。

哦～原來事情係咁⋯聽日係「母親節」毛爸今日開始慶祝，除咗媽咪梗係我毛少爺最著數啦！

毛毛：年年慶祝母親節我都好著數咖...爽呀！

毛毛：一早就同毛爸出去行街街...舒服呀！

毛毛：嘩～嘩～嘩～羊肉做早餐...富貴呀！

毛爸：喂～喂～「母親節」係你媽咪嘅節日喎...毛仔，你係唔係過份咗少少呀？

向偉大的母親至敬（感受媽媽嘅辛勞）2014

2014年5月9日（星期五）

過兩日就係母親節⋯好多人都識咁講：媽媽會「照顧」好家人咖，但好多人唔知道「照顧」呢句說話背後真正嘅辛勞⋯

我家嘅家務助理放10日大假⋯家務同照顧少奶（太太）、少爺（毛毛）嘅責任就由我頂上，你會估計唔到原來「照顧」好家人係花全日嘅時間同全部嘅心血，真係人都癲。

當年媽媽無論冬天定夏天一起床就要準備早餐、準備好送返學、準備午餐、準備接放學、準備晚飯、準備同我哋溫習、準備氹我哋瞓、準備⋯日復日無盡咁⋯咁嘅工作量真係令「人都癲」，宜家我領略到「照顧」背後嘅辛勞，做媽媽嘅仲要無條件花一生嘅時間照顧我哋⋯真係好佩服媽媽可以輕鬆應付。

媽媽我愛妳，母親節快樂！

媽媽，我真的愛妳...

2014年5月8日星期四

整夜淺睡嘅毛毛

2014年5月9日（星期五）

噚晚到今朝一直都落雨⋯仲係好大雨、閃電、行雷，毛毛由BB開始好怕行雷聲同討厭落雨（冇得出街要行停車場）。

但⋯呢種天氣仲係令毛毛不安，成晚都房、廳、騎樓行出行入，每每行雷、閃電毛毛都嚟床邊叫醒我，而家毛毛對呢種情況冇吠已經係一大進步，唯一嘅問題係我同毛毛成晚都瞓得唔好⋯都幾辛苦。

毛爸：呢種天氣亦都令我想起"流浪狗狗"佢哋辛苦又冇助...

毛毛皮膚病又爆發？

2014年5月7日（星期三）

上星期毛毛剪完妝返嚟之後⋯我發現毛毛成日Lam右手膊頭，經檢查之後⋯有一撻仔紅咗，睇清楚係一粒「肉粒」，我即時聯想到會唔會係毛毛主診醫生所講嘅「皮膚瘤」？

毛媽幫毛毛搽藥⋯經過個幾星期⋯紅色部分已經消退，但⋯「肉粒」仲係唔散。醫生都講過要留意「肉粒」有冇增大⋯如果正常冇乜變化⋯咁⋯係唔需要過份擔心咖。

毛爸：生、老、病、死...係定律，但家長一定好心痛個小朋友病...無奈...

毛爸：呢個毛毛小朋友有時都令家人好擔心佢嘅健康...

2014年5月6日星期二

單車日誌…人家唔小心嘅真實個案

2014年5月6日(星期二)

績...對上嘅星期六我踩單車差啲出意外⋯朝早6：00我踩到路環警察訓練營（雙行缐）⋯啱啱踩完上斜坡部單車開始落斜坡加速，斜坡中段有個路口⋯唔係馬路係間村屋入口，意識上冇諗過有私家車駛出（我經常踩單車經過從未見到有車出入）...

今朝就有部私家車喺路口駛出過對面缐(司機係要先睇自己條行車線有冇來車)⋯佢駛架車打橫停喺路中間望對面缐有冇來車⋯準備過缐（呢個情況只係一剎那間），當時我見到部私家車嗰陣⋯部車只係離我10米⋯我急剎車（由於正在落斜加速）單車＂缐"軚同甩尾⋯最後關頭好運哋「停咗」，嗰種電光火石發生嘅過程⋯令我全身打冷震⋯差啲暈低。

毛爸：我部單車嘅制動系統「油壓碟剎」...制動能力極強...

毛爸：每次出車操練都會花長時間做安全檢查...每次落到街都打醒十二分精神...

但...就冇能力做到...提醒大意嘅司機"小心駕車"要顧及大衆安全使用路面...好無奈...

單車日誌…真係安全？

2014年5月5日（星期一）

凌晨⋯路面車少人少氣溫又比較清涼⋯踩單車係最安全同適合嘅時間。

但⋯屋企人同一少部分嘅人就唔係咁睇，佢哋都認為呢段凌晨時間係「夜貓族」"浦"完返屋企，佢哋亂咁飛車、超速、甚至醉駕...

曾經喺西灣湖凌晨⋯有醉酒人士揸私家車撞倒踩單車嘅阿叔之後不顧而去，更令阿叔失救而死亡嘅個案發生⋯所以我呢段時間出去操練踩單車⋯少不免屋企人會為我擔心。

毛爸：講真...所有戶外戶內嘅體育運動都會有唔同程度嘅"危險"...

好多時自己小心但人哋唔小心...咁...係叫＂意外＂好難避免，自己都感到好無奈...

2014年5月3日星期六

毛毛的信心動搖了！

2014年5月4日（星期日）

自從旅行完返嚟⋯第二日帶毛毛去陌生美容院剪妝之後⋯毛毛對我哋一連串放低佢⋯令佢獨自面對陌生人嘅行為⋯，毛毛對我哋嘅信任有啲動搖。

每日我哋返工毛毛都會用可憐嘅又無奈嘅眼神目送我哋出門，毛毛小朋友怕我哋又唔返屋企又或者要佢同陌生人相處，睇嚟我哋重創咗毛毛嘅信心⋯

毛爸：宜家我出街或者返工出門...都唔敢同毛毛有眼神接觸...

毛爸：毛毛要無時無刻咁痴實我先安心...可憐的毛毛小朋友...

單車日誌…從未達標

2014年5月3日（星期六）5：50 天晴有陽光微風 23度

自從三月份自己接納醫生建議放棄「馬拉松」長跑之後⋯開始轉戰「環島單車」，經搜集資料同向前輩取經，經驗人士建議分段操練⋯開始每星期1至5終共踩100公里（短行程目的地），如果目標係長程（要踩幾百公里或者踩幾日至一個禮拜）咁⋯每日就要操練踩50公里。

斷斷續續踩咗兩個月⋯但一星期操練從未達到最低目標（最接近目標嗰次都係75公里），睇嚟要加油喇。

毛爸：家人認為我過份操練...要我自律...

毛毛：好耐都冇見過...藍天、白雲、紅陽、綠樹...感恩...

毛爸：踩住好多花花嘅草地...講唔出既幸福感覺...

毛爸：今日只係完成33公里......

2014年5月1日星期四

本性難移嘅毛毛

2014年5月2日（星期五）

假象、假象⋯毛毛經過一日嘅安靜，今朝又變番我哋熟悉嘅「百厭星」，雖然家人一相情願咁希望毛毛變成「乖孩子」，但⋯實情又係另一種令人失望嘅結果。

我本人認為⋯狗狗只需要有「家教」就已經足夠，狗狗應該永遠保持番小小百厭、活潑、搞搞震嘅個性⋯

毛爸：雖然又安靜又乖...但係表現冇晒心機嘅毛毛小朋友...

毛爸：今朝又係另一種嘅煩惱...搞搞震嘅百厭星毛毛少爺仔...

毛爸：講真...我鍾意毛毛咁...

臺中．阿里山

2014年5月1日（星期四）

續⋯2014年4月24日（星期四）今日係喺臺中最後一日⋯今早會上阿里山，遊完之後搭高鐡返回臺北。

朝早九點幾阿里山各景點已經人山人海，聽司機大哥講平日遊覽區停車場同路邊會停泊50部旅遊巴士⋯假期會多逹80部⋯大部份都係接載「強國人」嚟阿里山旅遊。

由離開車站開始就俾包圍嘅風景迷住，眼前樹林啲樹棵棵部有20層樓咁高⋯令我大開眼界同吃驚，且家先見識到乜野係叫「森林」。

經小路行入森林，有種前所未有嘅感受靈靜、涼快、淡淡樹香⋯令人忘記有時間嘅存在，但⋯每到一個景點站呢啲感覺就會消失⋯因為每個點都滿布「強國人」而且一定會聽到導遊嘅口頭禪「請大家不要吸煙不要除地吐痰」、「大家跟著大隊不要走失」非常嘈雜⋯真係大剎風景⋯