今早毛毛心情特別好,6點幾就叫我起身,喺床邊擾攘左40分鐘 (我投降起床)…
裝身同毛毛出去散步,毛毛好快就便便左兩次…第二輪啲便便係軟嘅,過成型(平時唔會咁軟嘅) …唔知毛毛腸胃有冇問題呢?
今朝舖定張膠枱布整牛尾俾毛毛食,毛毛好緊張擔住舊牛尾周圍食…咬剩啲硬骨,本來我想攞番,毛毛就本能反應以為我搶佢啲食物,好急咁吞左。
毛媽就發晒火 : 肥仔你睇住毛毛嘛!毛毛有冇鯁親呀?
節牛尾骨好細舊咋,鯁得落應該冇問題架…
毛毛:我搶你啲野,睇你俾唔俾我?
今早毛毛心情特別好,6點幾就叫我起身,喺床邊擾攘左40分鐘 (我投降起床)…
裝身同毛毛出去散步,毛毛好快就便便左兩次…第二輪啲便便係軟嘅,過成型(平時唔會咁軟嘅) …唔知毛毛腸胃有冇問題呢?
今朝舖定張膠枱布整牛尾俾毛毛食,毛毛好緊張擔住舊牛尾周圍食…咬剩啲硬骨,本來我想攞番,毛毛就本能反應以為我搶佢啲食物,好急咁吞左。
毛媽就發晒火 : 肥仔你睇住毛毛嘛!毛毛有冇鯁親呀?
節牛尾骨好細舊咋,鯁得落應該冇問題架…
毛毛:我搶你啲野,睇你俾唔俾我?
由4月1號開始工人阿美就放大假...一連8日 (返菲律賓探親),會有個替工 (太太同事介紹架) 代阿美幫手打理家頭細務同照顧毛毛。由於未相處同了解過,我對替工始終唔係好放心...唔知佢做啲野太太滿唔滿意呢?唔知佢識唔識照顧毛毛同煮野俾毛毛食呢?唔知毛毛又習唔習慣呢?
参加完銅銅生日會之後就番屋企,順便去寵物店攞風機同去超市入貨。去到凍肉部毛媽見到啲牛尾同羊膝,就決定買牛尾俾毛毛試食 (毛媽睇過啲網頁話咁對狗狗有益)。
番到屋企就將牛尾解凍飛水俾毛毛食…毛毛瘋狂咁咬到舊牛尾變形,周圍都係血水 (好彩舖左膠枱布)…咬…咬…到最尾食剩啲硬骨毛媽就攞番…毛毛就唔滿意…仲 “胡” 毛媽…
銅銅呢個星期日下晝3點至5點半喺利奥酒店開生日會,咁啱嗰日有個貴婦狗聚會,時間都一樣,今次唔知去邊度喇…
銅銅生日會一定唔可以缺席…但係毛媽就好想毛毛見多啲狗狗朋友…真頭痛…唔知點安排…
今朝早又落大雨,我狗狗聚會可能會取消…
今早太太一早起身準備同毛毛落街做實習,今次個指令係“sit”,但係地下好多水,毛毛啲腳仔都濕晒,如果坐低個pat pat實濕晒…都係番屋企練習會好啲…
今朝抱左毛毛同我地一齊去買餸,毛毛對於肉枱上嘅豬肉好有興趣,生果檔嘅老闆娘:隻狗仔大隻左…對眼仔好精伶 (同毛毛講)…唔…你梗係食左好多藍梅喇…哈哈哈…
下晝毛毛要返學,今次主要學sit。太太話毛毛見到其他狗都係狂吠,但都有少少改善,主要係因為個trainer喺度。
上堂之前有好多姐姐請毛毛食零食,有好多人都讚毛毛個新look得意 (係個日本妹美容師幫毛毛剪架)。
個trainer吩咐番到屋企要勤力同毛毛練習先會有成績架…
前兩日去左銅銅表姐屋企玩,因為我吠,俾毛媽話我冇禮貌。其實係因為coffee佢成晚都追住我黎咬…我吠只係叫coffee唔好咬我咋。
今朝又落雨喇…落到街我除左便便同尿尿之外,全程毛爸都抱住我。
今日星期六要同毛媽去買餸,晏晝仲要返學。因為天氣唔好,毛媽好擔心…唔知駛唔駛返學呢?毛媽話返學學做有禮貌嘅乖狗狗…
阿Mi來電:阿哥你上黎未呀?我啲餸就黎煮好喇…你快啲啦…
餐晚飯好豐富,有白切雞、蒜茸炒西洋菜、椒鹽蝦、醃扎肉、花膠炆冬菇、瑤柱花膠湯…白飯任裝。
去到門口已經聽到銅銅同coffee把聲…好快就埋枱食飯…
食飽飯,銅銅、毛毛、coffee玩到癲晒。同阿Mi傾開偈話coffee己經好番晒,銅銅只係小問題冇事。
今晚啲餸好好味同食得好開心…見到銅銅佢地玩得咁開心,我都唔使擔心啦。
毛毛:coffee好鍾意咬人架...
毛毛:做客人要斯文啲架...
原本打算去探銅銅、銘銘、coffee,同問吓銅銅喺邊度開生日會…同阿Mi通電話先知coffee病左,仲送左佢返鋪頭住左幾日 (便便有血同整親隻腳)。銅銅都唔舒服,阿Mi仲請左假同銅銅睇醫生…我都幾擔心佢地。咁樣就約左阿Mi 7點半上去佢屋企食飯,順便探佢地…
coffee:我好番哂喇...
銅銅:我都冇事喇...
同毛毛練習左幾日,成績好好,已經冇以前咁搶繩同亂咁標…但我總係覺得毛毛少左份跳皮同勇猛行為。
今朝入到K仔買早餐,毛毛好靜咁坐低 (平時要抱住,因為毛毛會亂咁搞野),啲姐姐話:毛毛今日唔使抱…仲冇吠人喎…毛毛你冇事丫嗎?
返到屋企毛媽問起…肥仔你唔好心軟呀…要一直堅持呀…
毛毛:毛爸...開始未呀?
毛毛:跟住行丫嗎?係唔係呀?
毛毛嘅新look好平如潮,工人阿美見到毛毛:呀…so cute, very handsome...毛毛走埋去“乍嬌”要抱。毛媽就改口叫毛毛做 “靚仔毛” 。
隔離座嘅叔叔:隻狗仔剪左毛呀…個樣冇咁英,睇落乖左喎…
司機哥哥:咦…隻狗乖左喎,識得跟住行…
K仔姐姐:毛毛剪左毛喎,係唔係自己幫佢剪架?個樣好 “BB” 呀…
咁毛毛又幾大改變嘅,新形象行為又規規矩矩…應該得寵。
由毛毛落左堂返到屋企開始,毛媽就要我注意對毛毛嘅教導。唔可以成日抱毛毛、唔可以成日冇節制咁俾零食毛毛食、朝頭早出去散步要對毛毛唔啱嘅行為嚴格執行改正、仲有唔可以…、仲有…
宜家變左毛爸上堂喇!
毛媽:努力呀!肥仔…
今朝毛媽帶左我同毛毛出去實習…毛媽話我啱啱合格。
毛毛剪左個新裝,啲 “粉絲” 見到都嘩嘩聲…
K仔哥哥:係唔係毛毛黎架?
華峰姐姐:隻狗仔剪左毛好得意呀…好靚仔呀…
毛毛:咁樣係唔係好斯文呀?
毛毛:我個新look...
毛毛:招牌look...
毛毛:大頭look...
毛毛:毛爸最愛look...
今日個blog由我mo媽負責寫,點解?因為今日係由我帶毛毛去上堂囉。
首先講下點解毛毛要上堂先。你地唔好俾毛毛個樣呃倒,其實佢好曳架…出街搶繩、見狗吠狗、見跑緊嘅人就吠人、有人喺屋企出面行過又吠 (半夜聽到都會吠架)、聽到附近啲狗吠佢又吠。帶親佢出街人地會以為佢冇家教,其實係我地唔識點教。
言歸正傳,等我講下毛毛今日上第一堂嘅情況先。毛毛等緊上堂嗰陣見到其他狗又係狂吠,冇哂佢乎。到個trainer黎到,佢一見到毛毛就話我地唔應該用頸帶,跟住佢就攞左條chock chain出黎幫毛毛戴上同埋示範俾我睇點用,跟住我地就開始行街喇。
個trainer教我一定要俾毛毛行喺我左手邊,要佢同我並排而行,如果佢一超前就chock一chock佢同時講heel。個trainer先示範一次,毛毛果然好聽話唔敢超前。跟住就到我試下,毛毛真係聰明,一教就識。我地行左大約半個鐘,毛毛都好乖跟住我行,只係超前 一兩 次。真係要俾10個叻佢。希望聽朝帶佢落街嗰陣可以保持到,因為我始終懷疑佢咁乖係因為個trainer喺到。
毛媽:毛毛好乖咁跟住行...
除左heel,我仲教左毛毛行緊嗰陣停低,佢都好快上手。
毛媽:斑馬線前叫毛毛停低...
個trainer話最主要係我地要每日都用嗰啲command等毛毛習慣,咁自然就會可以控制到你想佢點。真係易學難精啊。
上完堂之後我就擺低毛毛沖涼同剪毛,不過由於太多狗狗剪毛,我4點放低佢,到宜家都未搞掂呀。毛毛今日一定好攰架喇…
毛毛:終於可以休息吓喇...
毛毛:好攰呀!
毛媽由舊年開始就物色啲狗狗訓練課程,諗住送毛毛去受訓等佢有家教同唔好失禮,卒知等到開班喇。毛毛星期六下晝就開始上堂喇 (毛媽有啲啲緊張)...毛毛返學喇...努力呀毛毛...
其實毛媽半年前話報左名,但排期要排成幾個月架,因為好多狗狗参加但得一個trainer...無他嘅好多狗主都想自己隻狗狗聽教聽話啫,毛媽咁錫毛毛梗係要毛毛受訓啦...
毛媽:咁係唔得架...
毛媽:聽住...教你乜野係規矩。
近排毛毛臨瞓都會纏住我地玩一輪先至肯去瞓,過程之中佢會從廳到騎樓來回狂跑,跟住就喺騎樓便便。
毛媽呢排臨瞓都困毛毛出騎樓尿尿,等毛毛習慣尿完先瞓覺。因為夏天我地會閂埋房門開冷氣瞓覺,如果毛毛喺房瞓就出唔到去尿尿。毛毛有幾日好合作,一出騎樓就尿尿…但尋日就好硬頸,後尾俾毛媽罰佢坐騎樓…
毛毛:我俾毛媽罰
罰坐...
毛毛:毛媽...
尋日見到阿Mi,佢好擔心咁同我講:阿哥…coffee屙軟便便,係唔係有問題呀?
肥仔:啲便便係唔係好爛?
阿Mi:coffee每日屙3次便便,每次便便開始就硬嘅成形,之後就軟嘅…
肥仔:咁係正常架,唔係屙爛屎就冇事…唔好亂咁俾零食佢食就得喇。
阿Mi忽然養狗又冇經驗,都唔知識唔識照顧coffee。仲有…銅銅當coffee係玩具咁玩…你都咪話唔擔心…
coffee:全家人都好錫我架...
毛毛自從長番長啲毛之後毛媽又開始擔心…
毛媽:夏天咁熱要勤啲同毛毛清潔同冲涼喇,肥仔我地要買個吹風機喇。宜家同毛毛洗咀仔手仔,都要用風筒吹好耐先乾…就快風筒都燒埋喇。
肥仔:買吹風機?好呀…橫掂需要,買個好啲嘅。話唔定第日要照顧埋coffee黎我地屋企沖凉…哈哈哈…
太太上個禮拜二喺寵物店訂左個芝士味嘅蛋糕,3月16號 早上11點攞。由於寵物店職員疏忽忘記左落 “柯打”,太太發晒火...個老闆娘話啲蛋糕係喺香港分店造嘅,今次為左趕時間,會搭5點班直升機運過黎,最遲下晝5點50分可以送到我地屋企,最後6點40分先送到。
原先諗住接埋銅銅 (銅銅同阿Mi臨時過左香港) 同coffee過黎開生日會架...種種原因宜家剩番毛媽、阿美、我同毛毛開生日會...毛毛 “生日快樂”...
毛毛:有毛爸毛媽同我過生日已經好開心喇...仲有亞美唱生日歌添