祝外母大人生日快樂!

2013年6月30日（星期日）

今日係外母大人嘅生日...首先祝外母大人生日快樂、壽比南山、身體健康。
今晚就訂咗枱約埋姨仔一家幫外母慶祝生日食晚飯，今晩食全素餐一共叫咗八道菜...全部食清，而估唔到最食得嘅係老人家同小朋友，睇住佢哋食開心過自己食，點解？聽好多人講...老人家同小朋友肯食野又開胃又乜都食係健康嘅表現，見到佢哋身體健康...係唔係應該開心呢？

Peter 祝 : 外母大人老如松栢、壽比南山、身體健康、生日快樂！

俾家長寵壞嘅Coffee

2013年6月30日（星期日）

由於阿妹出門趕唔到返屋企照顧Coffee...所以今朝一早就過去探Coffee。
聽阿妹話Coffee最近唔肯食狗糧（真係好奇怪近排毛毛都係咁），所以我煮咗啲雞柳帶俾Coffee食，Coffee一見我就狂吠...但估唔到Coffee除咗吠之外仲咬我，好彩佢咬住我嗰陣我冇旭仲用好兇嘅眼神望實佢...咁佢就放開我，Coffee咁嘅行為其中多數係俾阿妹縱壞，更好彩嘅係Coffee好快咁食晒啲雞肉同菜...仲Lam Lam脷。

毛爸 : 最開心係見到Coffee正經咁食晒份餐...

單車日誌...出去巡一巡

2013年6月30日（星期日）5 ：50 天睛 微風 28度

近排工作超忙觸動右手膊頭舊傷...痛楚令我瞓得唔好，所以今早四點幾就醒咗。
今日放假...咁...座言起行裝身出去踩單車，今朝因為太早街上好清靜連車都冇...踩住架單車喺街非常舒暢，但踩到去氹仔單車徑就見好多人喺度跑步（有啲奇怪）...佢哋都有同一個理由＂早啲出嚟跑冇咁熱呀!＂

毛爸 : 由於手痛...我都係踩吓停吓...慢慢踩...

毛爸 : 唔知點解清晨嘅風景會迷人到令人有啲唔想信...

毛爸 : 太陽先生亦都一早返工...


毛爸 : 我細個時嘅幻想「樹屋」...平時都唔覺間樹屋係咁靚...

毛少唔肯俾工人姐姐幫佢擦牙

2013年6月29日（星期六）

最近毛媽同工人姐姐對毛毛有好多投訴，而毛毛唔肯擦牙最麻煩。
毛媽話毛毛最近經常發脾氣，幫佢清潔耳仔嗰陣想咬人，工人姐姐話毛毛食飽餐之後唔肯擦牙，抹咀嗰陣毛毛仲會發嬲咬佢...毛毛咬人呀!搞到全家人心皇皇...。
我都有發覺毛毛對於硬嘅零食都會唔願意食，可能口腔有傷...而嗰啲傷係由唔正確擦牙引起（我估咖咋），所以對擦牙反感，但由我親自幫毛毛擦牙...毛毛就好乖咁順從。

毛毛 : 我要毛爸幫我擦牙...
毛媽 : 毛爸，阿仔擦牙呢樣野...以後就由你代勞喇...拜托...

玩「捉迷藏」毛毛出「矛招」

2013年6月28日（星期五）

平日晚飯後我都會同毛毛玩一陣...但好多時都會俾毛媽制止，因為毛毛實在太投入...通屋不停咁亂跑，毛媽怕毛毛受傷。
噚日我就同毛毛玩「捉迷藏」呢個遊戲大家都冇贏過，而今次...我喺廚房、洗手間、書房、睡房都揾唔到毛毛...直到我而話「輸咗喇」，毛毛先喺床下底走出嚟（毛毛絕少呢喺床底角落所以我冇去嗰度揾），毛毛唔簡單識出「矛招」...我就俾屋企人笑到面黃。

毛毛 : 毛爸，我贏咗...係唔係有得加餸咖...
毛爸 : O咀...

節能

2013年6月26日（星期三）

上星期...一個夜晚睇電視...主持講有關節能嘅問題，聽講有啲人為響應節約用水一改習慣...幾日先沖一次涼、一個星期洗一次頭（用一種乾洗方法保持清潔），我自問呢啲方法接受唔到。
其實節能...屋企好耐之前己經將照明改用省電電燈泡、夏天〜冷氣機臨瞓先開、冬天〜暖風機太太同毛毛沖涼先開、水喉改用省水水龍頭、分好啲舊報紙雜誌、气水鋁罐、膠樽包好俾收垃圾阿姐賺外快。
以上啲簡單方法好多人都識做但唔知點解佢哋堅持唔到，節約能源唔係掛喺口邊成日講...重點係要持之以恆，而將呢種行為變成自己嘅習慣...先至會達成最終目標。

毛毛心聲...毛爸，你唔記得加餸呀！

2013年6月24日（星期一）

前日食餐有狗量同雞脾肉（慶祝毛媽回歸特別菜單），噚日食餐有狗糧雞柳同雜菜（逢星期日例牌菜單），但今朝...點解浄係得狗糧咁...削？毛爸你係唔係太忙唔記得加餸呀？使唔使我提提你加番啲雞肉？

毛毛 : 今朝搞乜野呀？又冇雞肉又冇肉湯...唔係呀？


毛毛 : 毛爸梗係唔記得咗加餸，冇辦法...毛爸年紀大，記性壞...

毛毛的新玩具

2013年6月24日(星期一)

上星期一過咗香港…因利成便買咗條靚頸帶俾Coffee，買零食俾毛毛…咁啱我見到近排大受歡迎嘅牙齒印花膠波波，咁…我就買咗一個藍色波俾毛毛玩，其實毛毛已經有個橙色波玩。
又係上星期又係咁啱睇到有關狗狗視覺嘅電視節目講…原來狗狗只能夠睇到 “兩重”色，而對狗狗最佳嘅顏色係藍色。
由於我買咗好多野店員就另外送多兩嗰玩具俾毛毛…

毛爸 : 毛毛玩藍波波嗰陣個樣好兇好搞笑....全家人都笑到轆地...

毛爸 : 呢個玩具毛毛非常愛玩...用零食都引唔到佢...

毛爸 : 毛毛嘅新竉 "牛牛"....

---

• 留言者: O媽
• Email: ruby_hoi@yahoo.com
• 網址:
• 日期: 2013-06-25 13:25:41

我都想買呢個波比Oo咖, 不過好似好大個, 驚佢咬唔到
[版主回覆06/27/2013 19:34:48]個波波算係中形喇...毛毛都係啱啱咬到...如果係細形狗狗就咬唔到...By毛爸

學藝之旅...素貼寺(雙龍寺)相片集

2013年6月23日(星期日)

續...每去一個景點都影大量嘅相...所以...

毛爸 :要登上雙龍寺金頂...要行300級樓梯...但對我黎嚟講濕濕碎...

毛爸 : 非常華麗嘅碧畫...

毛爸 ; 咦~太太做乜喺度行嚟行去嘅？

毛爸 : 呢度係金頂下面嘅走廊...好多善信喺度念經兜圈...

毛爸 : 呢座鐘樓好特別...除咗中間座大鐘左右仲有兩座細鐘...

毛爸 : 呢間廟喺正熱鬧嘅走廊...等咗好耐先至冇人行過...影番張相...

毛爸 : 好靚嘅裝飾工藝...

毛爸 : 呢專佛像做形好特別...

毛爸 : 願眾善信能夠達成心願.......(待續)

特別嘅早餐敘會

2013年6月23日（星期日）

今朝太太同事Calvin （Boy家長）打電話嚟約食早餐...我哋帶埋毛毛連Calvin另外 3 位朋友一共 6 個人迫埋一部私家車...去咗路環近船廠嗰間漢記食早餐。
漢記最出名係手打咖啡...地方同環境就好原始，雖然簡單嘅食物...油多、公仔麵...但大家嘅重點係有共同話題...旅行、食野、運動...。
毛毛就好忙咁狂吠周圍嗰啲狗狗，喺度食早餐有個好處...你可以衣著好除便鍾意用乜野姿勢坐都冇人理你，感覺內心同身體都好自由，最開心嘅都係有朋友請食早餐同大家感性咁暢所欲言。

毛爸 : 好難想像以前係幾咁熱鬧...

毛爸 : 現在係影相發燒友創作聖地...

毛爸 : 毛毛全程都興奮開心到爆...

學藝之旅...素貼寺(雙龍寺)

2013年5月21日（星期二）

續...今朝約咗八點出發...但啫哥一早已經喺大堂等我哋。
今朝係去雙龍寺，車程要45分鐘。我哋去到雙龍寺，啫哥同我地講要行300級石級先上到佛寺...太太一聽到300級石級已經耍晒手，亦都可以搭電梯直逹（我講服咗太太上山搭電梯落山行石級）。山上嘅金頂好靚，我哋參拜、參觀、影相都要花1個半鐘先兜咗一個圈。
回程嗰陣啫哥車我哋去食魚蛋粉同雞飯，晏晝由於天氣勁熱我地返咗酒店休息。下晝...出去做按摩、影相、直到食飽晚飯......待續

毛爸 : 金頂非常華麗莊嚴...更令人心曠神宜心境平靜...

毛爸 : 雙龍寺(當地人叫素貼寺)個名來由...係因為入口有兩隻龍...

毛爸 : 呢位係好出名嘅鎮山高僧...唔識寫佢嘅聖號...

毛爸 : 寺內有好多碧畫...內容係講有關佛祖嘅故事...

毛爸 : 金頂週圍嘅寺廟都好靚...

毛爸 : 呢個裝飾喺西藏最多...但呢度都有？

毛爸 : 咁有氣勢嘅鐘陣都係第一次見...

毛爸 : 金頂下層都好熱鬧...好多善信黎参拜...

毛爸 : 上金頂週圍嘅建築群係工匠心血嘅精品...

毛爸 : 寺內有巨形佛祖像，可以影相但室內好暗又唔可以閃燈...咁要影相就要講技術喇...(待續)

班馬線事件

2013年6月22日（星期六）

細個嗰陣睇電視宣傳行人過馬路要用班馬線，行人〜要企定喺馬路邊，等駕車司機睇到你後停車讓你過馬路。
大個仔考車牌嗰陣師傅教...司機〜見班馬缐同步行線就要收油見有人就要停車讓人，我作風大多數都讓車讓人。
而家...過班馬缐有兩種人...
 1•搵命愽，見有車都照行（心中信念班馬線車一定壤人，但佢唔記得佢可能遇到啲失魂司機，佢分分去賣咸鴨蛋）。
2•一定要安全，就算停車壤佢佢都唔肯過馬路，甚至示意讓車行先（心中信念有車停低讓佢過馬路都覺得唔安全，最好冇車，佢應該唔熟識交通規則...行人準備過班馬線而司機唔停車讓人，會即時收告票罰600蚊咖）。
遇到第一種人...可能你要急停，你架車會俾後面架車撞，遇到第二種人...可能會做成塞車同唔見錢...O咀。

毛爸 : 澳門街路面有好多班馬線咖...各位車手要打醒十二分精神呀...

毛毛揾媽咪

2013年6月22日(星期六)

太太噚日做常規身體檢查所以要入醫院住一晚，噚日亦都係忙到「甩轆」嘅日子。
除咗買餸煮飯、煲粥、照顧毛少之外…仲要做 司機送 太太去醫院、送報紙雜誌俾太太解悶、送保礦力、送晚餐、送宵夜…一直到夜晚九點(太太叫我返屋企…如果我再唔走醫院就會收我 “陪人費”)…忙過開工。
而毛毛就由深夜到清晨都喺度揾媽咪…搞到我成晚冇覺好瞓…攰死。

毛毛 : 毛爸 , 媽咪呢？佢去咗邊？
毛爸 : 媽咪好快會返黎咖喇...你快啲覺覺豬...唔好再嘈住我瞓覺喇...

清晨落廚

2013年6月19日（星期三）

近排太太飲食要清淡...來緊嘅幾日仲以粥、粉為主。
而太太鍾意食我煮嘅鑼絲粉...但呢大半個月因為趕工程每日六點幾先收工，根本冇時間煮晩餐。
為有一早起身落廚，今朝早餐食咸肉粥、晚餐食葡式鑼絲粉、飲青、紅羅白湯...

毛爸 : 今日一早出門返工...所以五點幾就起身煲湯煮野...

毛媽廚房嘅粉絲

2013年6月17日（星期一）

自從毛媽送咗部「麵包機」俾我做禮物之後...屋企就經常有麵包食（一星期一次至兩次）。
每次麵包機傳出香味...毛毛就會好開心而且知到好快有麵包出爐，毛毛呢啲時間特別有耐性同聽話。毛媽已經掌握到做「好食麵包」嘅要決，成品出神入化...
「好食麵包」嘅制成要全家出動咖...毛媽附責選材同味道，我就附責清潔麵包機同切麵包，毛毛附責搞搞震同等食。

毛爸、毛毛 : 睇相就知...唔使我哋強調係毛媽廚房嘅忠實粉絲...

---

• 留言者: 蕃薯可樂FAMILY
• Email: yelinpeggy@yahoo.com.hk
• 網址:
• 日期: 2013-06-20 11:00:23

毛毛個胃食樣子好可愛。
[版主回覆06/22/2013 14:59:00]胃食豬真係有樣睇咖....By毛爸

父親節2013

2013年6月15日（星期六）

首先祝各位爸爸「父親節」快樂、心想事成。
我對爸爸嘅印象己經有啲模糊，但對爸爸嘅教道就時時刻刻銘記於心，細個每次我做錯事嗰陣爸爸都會同我講：做人要醒目、待人要老實。
到我做咗人哋爸爸...喺現今經濟同物質發達嘅社會...我要對佢哋講：要生活得開心就要...學識待人、對事都要多啲包容，唔如意、唔開心事始終都會過去...

毛毛 : 毛爸「父親節」都要開工...祝毛爸父親節快樂！

毛毛心聲...開心嘅端午節

2013年6月13日（星期三）

毛爸、毛媽噚日下晝帶咗我去行海邊同玩執波波，晚餐仲有得加餸，原來端午節係咁開心咖。
毛爸話呢係傳統，仲會年年都係咁，各位狗狗朋友你哋嘅端午節係點過咖？

毛毛 : 追波追到索晒氣...


毛毛 : 靜雞雞話你知...毛爸唔追波都好索氣呀...水皮毛爸。

長跑準備...「撞牆」

2013年6月12日（星期三）

經過一連9日朝9:00晚6-7:00嘅趕工...今日應該好好休息。
但心思思...都係裝身出去跑步，今日天氣相當唔錯，有陽光但唔猛烈，氣溫差唔多30度但有風，跑步...感覺非常舒服，今日就偏偏「撞牆」最後要急行完成路程。
「撞牆」係跑步嘅術語...運動員遇到呢種情況就會感覺呼吸困難好索氣，心口好似有嚿大石壓住，感覺前面有度隱形牆檔住就算你幾出力都跑唔過去，第一流嘅跑手都會遇到呢啲問題...

毛爸 : 已經瞓過晏覺...但體能就不在狀態...


毛毛 : 毛爸，雖然我好想笑你水皮...但就算係咁...我都撑硬你...加油Yes！
毛爸 : 衰仔幾識擦鞋...感動。

毛毛有潔癖

2013年6月12日（星期三）

前一排有聽工人姐姐講...佢清潔完騎樓、換咗墊地報紙、抹乾淨尿板...毛毛就出去尿板度尿尿，毛少有時眼界差咗就會射到地台都濕晒，搞到工人姐姐又要執手尾。
近排都發現...我哋食飯嗰陣（尿板已經有尿）毛毛就扮晒野咁出騎樓尿尿，兜個圈就埋嚟領獎（好少真係尿尿），宜家我朝早洗完尿板啱啱放低一個轉身...毛毛就好似好急咁走上尿板放低啲啲尿...毛毛真係患咗潔癖？

毛毛 : 毛爸，你知唔知...洗乾淨塊尿板又唔放低嗰啲人係好冇禮貌咖...？咁叫我點尿尿喎？
毛爸 : 毛毛你好野...哀仔...玩野...係唔係？

端午節2013

2013年6月12日（星期三）

端午節到啦...祝各位「端午節」快樂! 
記憶中...細個嗰陣今日媽媽會按地方習俗烚雞蛋俾我哋食，仲會全家到海灘玩，正午就會行落海邊游「龍舟水」...聽長輩講呢啲「食雞蛋」、「游龍舟水」傳統習俗活動係會為家人帶嚟平安、健康、幸福、好運，你地都試試...

毛爸 : 食過五月糭...幸福樂陶陶...祝各位「端午節」快樂...

曲直向前福慧雙全迎端陽

2013年6月10日（星期一）

 

星期日下晝4：00我同毛媽帶埋毛毛去咗塔石廣場參加I dog大比拼，雖然天氣好熱...但都有好多狗狗支持參加。
大會除咗有大法師、居士、政府高官、保護動物界、寵物界代表...領大眾祈福預賀端午節之外...仲安排狗狗技能表演、寵物I dog大比拼...節目精彩之餘...梗係仲有豐富嘅禮物啦，人人有份，美中不足嘅係太陽太曬氣溫高...好彩仲有啲風還有大會提供嘅大帳篷擋太陽...唔使啲狗狗同家長咁辛苦。

毛爸 : 眾嘉賓準備剪彩...


毛爸 : 毛毛見到姑丈就狂吠...見表姐同Coffee就笑到見脷唔見眼(因為有零食獎)...


毛爸 : Coffee囡囡今日靚到 "氹"一聲...仲攞咗個獎添...


毛爸 : 呢幾位係幸福嘅小朋友...