帶狄狄落街

2018年3月31日（星期六）

呢幾日都帶狄狄落街睇驗同見識，熟習周圍環境，唔知點解狄狄對嘈雜嘅街道無興趣，仲有啲恐懼感，喺屋企樓下大堂將狄狄放繩自由行嘅情況，咁佢就玩得好開心。當上繩⋯情況就完全唔同，狄狄會周身唔自然仲唔識點行⋯⋯

對嘈雜環境聲好驚青嘅狄狄小朋友...

狄狄連續三日食早餐都嘔吐⋯令人憂心嘅狄狄

2018年3月30日（星期五）

狄狄前日食早餐後十分鐘⋯就開始嘔吐，噚日⋯同一情況，以我哋觀察可能狄狄隔咗一晚非常肚餓食糧食得太急太多引起，所以家人嘗試制定訂方法⋯減少第一餐嘅份糧同慢速人手餵食。

今早狄狄餐後又嘔吐⋯將所食嘅糧全部嘔返晒出嚟，令人擔心狄狄身體出現毛病，回想問題所在，其中一個原因係⋯自己太冇記性，唔記得狄狄第一餐要減量同慢食，結果好負面⋯除咗搞一輪大清潔衞生之外⋯仲好擔心狄狄小朋友...

狄狄你食餐食得太急喇...

毛毛凌晨嘔呀！...令人憂心嘅毛毛

2018年3月27日(星期二)

毛毛同狄狄每日嘅食物包括...正餐、小食，當中嘅食材、份量、種類、食法...都會受家人嚴格監察，事關知道食物對狗狗腸胃、皮膚都能引發敏感不適到時情況可大可小。

凌晨兩點幾...毛毛突然由憩睡變不安仲嘔吐，嘔吐物中有...蘋果、藍梅、木瓜、香蕉...，由其蘋果粒數量最多，仲係未經消化...

照我哋觀察估計引發毛毛嘔吐係與食材無關，可能份量太多不能消化導致...

毛毛：毛媽，我聽朝係唔係要禁食呀？

毛媽：你話呢？

毛毛：慘慘慘....

2018聯賽第一回合

2018年3月25日(星期日)

2018年3月18日(星期日)過去嘅 3 星期...因為屋企來咗一名新家庭成員 (余狄狄)要照顧而非常忙碌，所以除咗物理治療操練之外...所有體能操、踩單車、跑步練習...都暫停。

今日聯賽第一回合，路程跑 10 k，自己由於近日梳於練習對完成賽事都欠缺信心。

比賽開始...當跑到 3 k...右腳就開始抽筋...勁痛...跑道上邊行邊跑，經過身邊嘅隊友、對手、工作人員不斷為我打氣加油，實在好唔容易跑完全程，路程上心中不斷出現成千成百個放棄借口...腳抽筋好痛、右膝關節痛、操練不足、睡眠不足......等等，但我還是堅持到最後...衝線嗰一刻...更得到旁邊一位外籍女士幫我一把一齊過終點...

多謝攝影師

多謝所有為我打氣嘅隊友，由其係團長 JOE

行為失控嘅狄狄

2018年3月22日(星期四)

2018年3月2日(星期五)今日有工程要開工，今朝狄狄要暫時隔離喺廚房，臨出門要餵狄狄食餐同飲水...要做嘅事太多，在準備不足嘅情況下又趕住返工......要等到中午放飯時間先返得屋企餵狄狄。

到屋企門口只係準備開門...入面毛毛同狄狄已經興奮狂吠(大家互相鬥大聲)，一入屋...先抱毛毛、獎勵，再抱狄狄、獎勵，毛毛就好開心好自覺咁走出騎樓尿尿(叻仔)，我入廚房準備餐...狄狄就行近廚房門口跟住回頭望實我...噢～太遲了...狄狄就地尿尿咗。

當時令我手忙腳亂，要備餐又要搞衛生，我分神忙緊嘅時候...狄狄就玩失縱？我又忙住周圍揾佢。原來狄狄走咗去隔離洗手間便便，我喺門口望到咁嘅情況都呆咗，唉～又要搞衛生喇。到我冷靜落嚟...想下想下...發覺狄狄好神奇同聰明...識得去洗手間便便.....好搞笑。

狄狄係醒目嘅小朋友...

真係擺個靚堆...

我再踏上羽毛球運動場

2018年3月22日（星期四）

今日早要去做物理治療操練，經過羽毛球場⋯我停留旁邊場地做泳前熱身，場中有兩男兩女(混雙)在雙打，其中一名男高手（三哥）熱情邀請讓我一齊落場熱身試打羽毛球。

實情⋯自從6年前打羽毛球令右邊膊頭受傷後一直都冇信心從拾羽毛球拍，今次一試結果令我滿意⋯⋯係時候從返羽毛球場。

羽毛球係我其中一項最愛嘅運動...

我毛家新成員⋯余狄狄(迪迪)

2018年3月21日(星期三)

2018年3月1日（星期四）重要日子⋯下午...

我親自到朋友家接毛家新成員「余狄狄」。

現時狄狄三個月大黑色男仔，排行第三，喺兄弟中算係弱者，個性⋯怕事、細膽、文靜、聰明⋯返到毛家狄狄對新環境非常害怕，加上大哥哥毛毛施下馬威⋯狄狄只有瞓喺枱底角落遠離毛毛，一直到晚飯時間...毛毛嘅反應只係對黑嘛嘛嘅狄狄產生好奇。

雖然過咗半日受驚嘅狄狄連口喝都唔敢去飲水，可憐。傍晚⋯我用手餵水餵糧好彩狄狄還願意合作接受，到瞓覺⋯又係另一個問題，由於要同毛毛隔離，狄狄要臨時瞓喺洗手間，呢個小朋友安靜到令我哋擔心⋯一直到凌晨四點，我終於忍唔住過去睇狄狄，狄狄小朋友坐喺門口用渴望嘅眼光望實我，主動問我攞野食、玩玩具，自己行去門口邊便便同尿尿⋯⋯狄狄咁嘅行為係好開始，加油呀小朋友...

狄狄：大家好，我個名叫余狄狄，男仔，三個月大...

特別嘅日子⋯毛毛生日

2018年3月16日（星期五）

三月十六日⋯係一個令毛家開心又憂心嘅日子，毛毛10歲生日。

毛爸毛媽：祝毛毛身體健康、活潑百厭、開開心心、生日快樂！十年時間對狗狗就等於佢哋生命嘅四份之三。

現時令毛家開心嘅係⋯毛毛仲健健康康、食得瞓得、百厭唔聽話活潑聰明嘅小朋友，感恩。

今日令毛家憂心嘅係⋯毛毛仲可以陪伴我哋幾多時間？有咁嘅憂慮係因為我哋好貪心。

無論將來係點，往後嘅日子我哋會更珍惜更愛錫毛毛。

生日快樂啊毛毛！

毛毛生日快樂！我哋愛你...