2016年難忘記的⋯⋯

2016年12月29日（星期四）

時間飛逝2016年好快就會成為過去，好多難忘的⋯⋯

毛毛九月份一而再再而三咁腰椎受傷。
為咗毛毛康復同改變行為習慣家人忙咗两個月...

一年內 "十月之星 "兩次（十月、十一月）一齊去旅行。
期待咗一年真係感恩同開心...

小孫女QQ喺我屋企食晚飯後就勁嘔吐...嚴重腸胃炎...仲入醫院住咗三日。
屋企一家人擔心咗一個禮拜，唔敢問阿女QQ情況，怕...增加阿女嘅精神壓力...

單車操練創咗最勤力嘅一年，更到臺灣踩單車（三月份由好朋友安排及領航，鳴謝）。
勤力還勤力但...仲未達標...

今年做義工（攝影師、音響師、物流）嘅次數同時數都破紀錄嘅多。
影到自己都唔知影過幾多張，更驚喜嘅係 "中心 "將我影嘅相放上 "中心 "網頁...缘

2017年好快就到...我祝願各位嚟緊呢一年 "難忘記的 "全部都係好開心嘅事...

祝各位快年快樂...

毛毛，你要叻啲，唔好再受傷喇...

十月之星，今年係結缘嘅一年...我好貪心...希望年年有今日...

QQ：阿公，你煮咗啲乜野俾我食呀？我...好肚痛呀...

幫 "中心 "做義工攝影師( 做影相佬)係我強項...

繰練雖然超勤力，但...離目標仲差好遠...

澳門2016光影節

2016年12月23日（星期六）

光影活動係澳門用好多種形式出現，第一次係喺大三巴牌坊。

有好多人講今年嘅光影節冇舊年咁靚，實情係⋯因為環境裝飾藝術燈比例少咗，相對增加光影投影藝術，視覺上少咗一種震撼。

食市裝飾...

水幕投影...

做形燈飾...

湖景燈飾...

教堂燈飾...

難忘的聖誕節2016

2016年12月25日（星期日）

今日係普天同慶嘅日子聖誕節，祝願大家聖誕快樂⋯⋯

今日接咗Coffee返屋企玩，Coffee呢個小朋友性格內向、警戒心好大、有極強嘅護物行為、有攻擊性。

毛毛同Coffee一見面就互吠，而Coffee帶來第一份禮物係⋯喺梳化毛毛瞓覺嘅地方便便...

喺毛家嘅全日Coffee一直都痴實我仲要扭抱，由於Coffee得寵毛毛勁嬲⋯兩個小朋友全日都搵機會打交，Coffee臨走都要喺梳化同一位置尿尿完先走，今次搞到毛媽勁嬲⋯

今日照顧毛毛同Coffee令家人超忙同驚喜，今日攰到一個點，真係特別嘅聖誕禮物...

睇嚟Coffee嘅行為喺毛家令佢變成一位不受歡迎嘅小朋友...

Coffee 全日跟出跟入，我煮餐嗰陣Coffee好有耐心咁一直都喺廚房門口等我...

Coffee得寵毛毛就全日都嬲嬲豬....

Coffee：舅父，收聖誕禮物喇...  (又便便又尿尿)

毛爸：咁大劑...

毛毛有大哥哥作風...守住Coffee妹食餐...

平安夜2016

2016年12月24日（星期六）

今日⋯全人類都認同係一個大日子⋯平安夜、聖善夜⋯

毛家祝福各位同你哋嘅家人、親人、愛人⋯⋯平安夜⋯平安幸福、開心快樂⋯⋯。

平安夜、聖善夜....

咀刁嘅毛毛，我要飲暖湯

2016年12月7日（星期三）

毛毛早、晚食餐⋯食晒主量就等飲肉湯，近排毛毛食餐有啲奇怪⋯對肉湯只係飲兩啖就行開，然後又再飲兩啖之後就唔飲，通常毛毛唔舒服就會咁嘅反應，我會倒落掌心⋯毛毛都會慢慢飲晒，但呢排毛毛一到飲湯就好似冇興趣咁，就算倒落掌心都吸引唔到，都唔知係乜野原因。

有次啲湯未凍就比毛毛飲⋯佢出奇哋自動飲清，宜家一到毛毛食餐就要座暖啲湯⋯暖湯毛毛就乖乖咁食晒。

毛毛好鍾意飲肉湯咖...

毛毛腰椎問題

2016年12月5日（星期一）

12月3日（星期六）帶毛毛去見臺灣寵物骨科專家李學文醫生，檢查結果⋯毛毛腰骨有兩個點係傷處⋯但已經好番晒。

李醫生亦都講：狗狗年紀大咗呢啲病症好容易就會復發，由其係貴賓狗，因為佢哋生性熱情活潑，有時候過度興奮活躍就好容易出事。

我哋作為關心小朋友嘅家長，見專家都有個強烈嘅心願希望醫生有個專業意見同有效方法...可以盡量避免病症復發，等小朋友開心生活唔使受苦。

毛毛：毛爸毛媽，我都話好番晒...冇事咖啦...

毛爸：都係你成日跳、成日用後腳企先出事咋，乖啲啦百厭星...

2016澳門銀河娛樂國際馬拉松

2016年12月4日（星期日）

今年嘅馬拉松大賽已經完滿結束⋯今年多謝超哥（四眼仔）幫我報名，今年所有級別都增加咗名額（總人數達到一萬人）迷馬仲增長咗路程，賽跑路線有幾段正在維修，所以⋯出現塞人現象。

每年比賽都有種 "感動"嘅感覺，今年要用震撼來形容⋯原因⋯往年3千人一齊跑今年就5千人一齊跑。

今年帶著背傷上陣⋯由於渴望盡速到終點⋯加快步速⋯結果背痛引發左腳過勞拉傷⋯因快變慢⋯最後用盡無比嘅毅力堅持完成賽事。

终於帶傷完成賽事...

政府高層主持起步禮...

開始了...各位加油...

沮喪的早上

2016年12月3日（星期六）

今早天色好灰仲雨粉粉⋯背脊痛到差啲起唔到床。

三日前開始背脊作痛⋯初初以為「瞓禮頸」，但越來越嚴重，到今朝無意中搬生果嘅動作令背部疼痛⋯先想起可能星期三開工嗰日搬電線嗰陣拉傷背脊肌肉。

聽日就係跑馬拉松嘅日子，背痛⋯真令人沮喪。

花咗長時間操練同準備.......

Sir，你跌咗野呀！

2016年12月2日（星期五）

有日下晝⋯我帶毛毛散完步返屋企⋯過馬路嗰陣⋯好似聽到跌野落地嘅聲音（我唔係好肯定所以冇留意），突然隱若聽到對面街電信大樓門口保安叫：Sir你跌咗嘢呀！我好懷疑咁檢查自己個袋⋯電話、鎖匙、銀包⋯都冇遺失，我回頭一望見到馬路中間有一包用報紙包得好靚嘅「包裹」，我定一定神，呀～係我跌咖，唔該晒，我嗱嗱聲過馬路執番。其實嗰個包裹係⋯毛毛啲便便⋯即係包屎...

毛毛：嗰個「實招」哥哥真係好心喇...講真嗰個「包裹」包得實在太靚...

令人憂心嘅毛毛...真係失禁？

2016年11月29日(星期二)

2016年11月25日（星期五）噚晚當工人走咗之後⋯毛媽抱毛毛去做親子嘅時候⋯發現有一行滴水漬由騎樓一直去到食飯枱，經查實後係毛毛啲尿尿⋯點解會係咁？唔通毛毛真係失禁？

到第二日早帶毛毛散步嗰陣發現毛毛未尿尿完就繼續行⋯形成一條尿路，咁除左解開謎團之外仲勁擔心⋯毛毛出事喇（毛媽第一時間建議即刻帶毛毛去見醫生）。

經一個下晝同第二日上晝嘅細心觀察⋯毛毛又正常番，之後幾日都冇咁嘅情況再發生，屋企人都放心番⋯件事真神奇⋯⋯

毛毛：小事啫，毛爸毛媽你哋過份緊張咋...

十月之星團隊...嘅產生

2016年11月24日(星期四)

好耐之前…一位音響店嘅高級打雜(余生)、一位電訊旗艦店嘅店長(湯生)、一位名咀DJ司儀(蔡生)，三位喺任何方面毫無共通嘅人…

唔知點樣走埋一齊，互相見証住奮鬥成長，多年嚟節日一齊飯局，到大家慶祝生日嗰陣先發覺…原來大家都係十月份生日，都唔記得幾時開始十月份會約埋一齊慶祝生日，之後仲約埋一齊去旅行...

由於咁…太太們就叫我哋班人做 “十月之星” 亦都唔記得幾時開始成為我哋嘅行動代號。

唔知係唔係人人交朋友都會咁嘅過程？定係我特別幸運交到呢班好朋友呢...

十月之星嘅陣容...

單車日誌...擔心體力不繼

2016年11月24日(星期四)

前一段日子己經開始加強踩單車操練…每星期2課改為每日都操練，路程每日約20幾公里，體能反應令我意外…感覺吃不消。

今次到台臺灣了解環臺行程，令我擔心嘅係每日嘅路程由40公里～100公里不等…最短嘅路程要連續踩5日、最長踩11日，照路程推算…我可能頂唔，人年紀大咗…真係無奈...

日踩 40 公里...係冇問題...

但...日日都咁踩就可能...頂唔順...

睇嚟除咗要更改計劃行程之外...仲要認真加強操練先得...

毛毛開心到失禁

2016年11月23日(星期三)

星期一由臺北旅行完返屋企…同想象中一樣毛毛見到我哋極度興奮，仲開心到失禁，我哋真係唔使懷疑毛毛心中最愛是誰。

家務助理話毛毛喺我哋旅行期間都好乖好聽話，有心機玩、乖乖地便便同尿尿，到我哋喺屋企毛毛就唔聽工人指令…原來毛毛識得乜野叫做 “靠山” 真係世界仔。

毛仔大少爺作風...冇佢符...

令人憂心嘅毛毛...視力退化

2016年11月18日（星期五）

視力退化…人年紀大咗係會必定會發生嘅事，黑暗環境工作、睇圖纸…視力問題自已感受最深。

三個月前毛毛做全身健康檢查嗰陣…醫生話毛毛有 “白內障 ” ，另一位幫毛毛檢查眼睛嘅醫生話…毛毛只係年紀大 “視力退化” 唔係 “白內障”。

曾經睇過紀錄片…強光會令視力加速老化同產生白內障，近期留意到毛毛平日曬太陽都鍾意望住太陽強光…擔心。

毛毛鍾意曬太陽...但係屋企人冇留意毛毛個頭仔經常向住太陽方向咁曬...

毛毛已經個多月冇出外活動了

2016年11月1日（星期二）

毛毛腰部受傷後⋯醫生建議困籠兩星期或停止戶外活動一個月。

期間毛毛要強行改變習慣而產生問題，由於精力過盛⋯經常“反叛擴指”，到底毛毛係一個乖巧聽話嘅小朋友，我相信毛毛已經康復⋯所以由上星期日開始回復每日早、晚散步及假日行山活動，俾毛毛改善行為同健康。

帶定背囊孭毛毛...

毛毛開心到狐叫....小朋友真係簡單...

充滿人性的GPS

2016年11月1日（星期二）

2016年10月24日（星期一）已經有經驗到日本自駕旅行，到外地自駕最重要嘅設備係導航系統，而日本（豐田）嘅導航系統資訊非常完善，除咗有地圖及路面圖雙顯示、路程、到逹時間之外、其他提示包括入隧道、路面有幾多條行車線、提示左線有來車、注意減速⋯⋯等等，配合安全完善嘅高速公路令駕駛者舒適及安全。

上次自駕遊係喺北海道，由於高速公路路面靚可以極速 (時速120里 )飛馳⋯不自覺哋做出高速爬頭、高速出灣⋯等危險嘅行為令團友受驚。

今次和歌山之旅自駕已經改進及加強專注，但⋯可能長時間集中精神令反應遲鈍、車速過快未能配合GPS嘅顯示，入錯線又差點逆線行車及入灣車速太快⋯等，再令團友、道航員一額汗。

今個旅程係一次難得經驗，好多謝各位十月之星團友冒住危險及極大包容...對我駕駛技術絕對信任...而令我十分感動。

多謝各位老友。

十月之星嘅主車手湯先生 (百搭)，第二身份係非常出色嘅導航員...

十月之星嘅副車手毛爸 (隧道王)，另一個身份係隨團攝影師...

十月之星嘅女將車手 (直路王)，另一個身份係團隊嘅財政大臣...

大阪早晨…

2016年10月22日(星期日)

早晨呀！大阪。

晚上熱鬧嘅商業區…到清晨之後就完全改變，街上變得冷清好似戒嚴。大阪呢個城市早上同晚上都有無比嘅活力…今早天氣變化好大一時陽光普照、一時密雲陰天，尋日只係啱啱到步…各成員己經開始行動…仲有豐富嘅收獲，

日本大阪隱藏住一種可怕嘅吸引力，令人不可抗拒。

代表大阪購物嘅地標...心齋橋

朝聖地...

我哋出發了！

2016年10月22日（星期六）

每次去旅行都會有一個艱難時刻，交毛毛俾工人照顧，由其係今次，因為我同太太都擔心工人管唔住百厭嘅毛毛失控周圍跳跑，再度令啱啱好番嘅腰椎舊患受傷，現在只有相信毛毛已經百分百復原，亦都要相信工人能夠細心照顧好毛毛，真係一切都⋯⋯隨緣。

毛毛年紀長了，身體健康問題令我哋更關注...

十月之星去日本

2016年10月22日（星期六）

對上一次十月之星3家人一齊去旅行已經係好多年前嘅事，每年生日飯局大家都有同一樣嘅目標＂搞一次大家一齊去旅行＂但好奇怪咁多年來未試過成事，今年年初飯局大家只係＂講一講提一提＂就成功約定今年十月一齊去旅行，緣呢樣野就係咁奇妙，期待。

起飛了...

相敍時刻係人生幸福嘅事...飲勝

單車日誌...迎接颱風 “海馬”

2016年10月20日(星期四) 15 : 30陽光普照 一號風球 30度

十日前先打完風…宜家又開始打風，今次颱風嘅名叫 “海馬”… 仲來勢洶洶，個個朋友話聽日一定掛八號風球。

嚟緊幾日可能天氣會轉壞，今日下晝就抽咗時間出去單車徑踩單車，奇怪…風都未打全條單車徑都係黃葉同落花，平日熱鬧嘅租單車區今日非常冷清，除咗少人之外仲冇風…

今日嘅日落景色好靚...

月亮都出來了...

令人憂心嘅毛毛...引發另一種問題

2016年10月17日（星期一）

兩星期前⋯毛毛再度受傷⋯在康復期間⋯由於毛毛有跳梳化、跳凳、跳床嘅習慣，我將梳化改為＂坐地下 "將按摩椅" 封存" 毛毛除咗亱晚瞓覺之㚈其餘時間唔可以入睡房。

現在毛毛雖然康復⋯但又有另一種問題 "過度活躍症" 好百厭，家人經常都好勞氣咁鬧毛毛 "唔準企"  "唔準跳 " "唔準跑"，毛媽同工人⋯妳一句我一句令家嘈屋閉，可以形容為 "另一種熱鬧 "。

毛毛宜家變得更百厭更蠱惑...令我擔心...

十月之星旅遊會議

2016年10月17日（星期一）

人生⋯期中必須要做一次嘅事⋯係同一班十月之星嘅老友一齊去旅行，終於噚日喺氹仔開會。

三個家庭一共七名成員今次係由旅遊達人左小姐策劃及領軍，行程極精彩，包括⋯自駕、喪拼、運動及美食⋯。可以同一班老友們相聚一齊去玩係極開心嘅事，心裡面有一種筆墨難以形容嘅幸福⋯⋯感動了。

今次嘅目的地......

毛毛要停止一切活動

2016年10月12日（星期二）

自從毛毛覆診⋯醫生話唔使食藥建議困籠之後，家人對毛毛出外活動全部停止，為防毛毛用雙後企高同跳上梳化⋯大廳梳化作出嚴密改動部署，毛毛已經冇落街散步，便便同尿尿都係喺騎樓解決，假日又冇得去行山去玩，冇得玩追波波...，毛毛嘅生活行為亦都出現好大嘅變化⋯⋯對毛毛嘅限制家人覺得好狠心...

屋企所有會令毛毛企高、跳嘅地方都加以阻攔，而大廳嘅改變令家人十分唔方便...

單車日誌...一號颱風戒備信號

2016年10月10日（星期日）4：30 晴朗 一號風球 氣温26度

唔記得上次係幾時出去踩單車，今日凌晨檢查好裝備出動，毛毛由我起床開始一直跟著我（呢樣令我好安心），出到馬路有強烈逆風迎面而來，雖然全程都吃力⋯但回程嗰陣不知不覺⋯原來自己已經踩咗30幾公里，辛苦到一個點，回想⋯原來一部份路段已經維修好加上自己心情好所以⋯⋯踩多咗。

逆風而上，應該人人都要有嘅決心...

先兆

2016年10月6日（星期四）

相信兩個幾月前⋯毛毛已經浮現有腰痛即象(我哋冇留意到)，由其係長程散歩，例如...每當假日行山毛毛行咗一半路程就唔肯再行，而平日落街散上、下午相加總時間約40分鐘，近日因自己遲放工⋯所以將毛毛早上散步時間加長，但到回程嗰陣毛毛都有唔願行嘅情況，而傍晚只落街尿尿同便便就返家。

估唔到我哋大意之下引發毛毛舊患腰椎痛復發⋯"大意"呢樣野可大可小...自己真失敗...

我哋都怪毛毛唔肯行係...毛毛"咋嬌"要抱抱，實情係"腰椎痛"...

呢個大吾會...十分抱歉，對唔住呀毛毛...