毛爸我要瞓覺喇！

2013年10月1日（星期二）

毛毛宜家入到睡房可以打橫行（除咗上我哋張床），由於毛毛最鍾意瞓嗰個皇帝位喺正衣櫃前面，所以每晩我都放個「咕臣」喺度俾毛毛瞓（由於檔風膠櫃同咕臣會阻住衣櫃開門，所以我每日晚航朝拆）。

平日毛毛一入房唔理有冇咕臣就會「埋位」，但呢幾晚我入到睡房都發現毛毛坐喺度等我...乜事呢？點解呢？

最後...我先明白原來個衰仔係等我放好個「咕臣」先「埋位」...識嘆到咁...估佢唔到...

毛毛 : 毛爸你等乜野...鋪床喇...我要覺覺豬喇...

毛爸 : 嘩 ~ 衰仔你係唔係咁「大少爺」呀？

毛毛 : 我本來就係「大少爺」毛爸爽手啲啦，有個咕臣零舍好瞓啲...

毛爸 : 哀仔你咁寸...真係俾你吹漲...因住發惡夢呀！

玩具對狗狗嘅作用

2013年9月29日（星期日）

我一直都用零食獎勵方法嚟訓練毛毛...而且好受用。

我無意中睇到電視播嘅記錄片集...內容係講訓練「軍犬」，原來受訓嘅軍犬其中嘅獎勵係「玩具」，見到受訓嘅狗狗為咗有「玩具」玩就努力完成任務。

我留意到毛毛對玩玩具非常咁熱愛，我應考慮多啲用玩「玩具」獎勵毛毛...唔使佢經常食零食而變「肥仔毛」。

毛毛 : 其實我超鍾意玩玩具咖...就算獎我零食我都唔食...照玩玩具咖...

毛爸 : 一睇就知啦，講真就好囉...唔使食咁多零食...又唔使減肥...

毛毛的公平交易

2013年9月27日（星期五）

自從用咗「獎勵法」去教毛毛交還咬住嘅紙巾、毛巾...襪...之後...

毛毛就好績極咁周圍搵野擔、有時朝早仲好有耐性咁等你著襪等你唔覺意嗰陣突擊搶你隻襪，毛毛呢種行為已經成為朝早一個遊戲節目，雖然毛毛都算係聽教...但就將呢種行為變成習慣...有時都令人好煩，當毛毛擔住啲野好乖咁坐喺你面前...等你獎勵嗰陣...你會好開心同好自然咁俾零食獎佢...之後就覺得自己做咗個錯誤嘅教導。

毛毛 : 毛爸咁係唔係有得獎呀？以後我會好勤力咖喇...

毛爸 : 吓 ~咁我煩喇...毛仔呢啲野唔使咁勤力咖...

我的新玩具Instax 90即影即有相機

2013年9月24日（星期二）

我一直都有用Fujifilm嘅即影即有相機，而手上嘅Instax 100己經十幾年...而家仲用緊，新出嘅Instax 90増加咗好多新功能，保正咗影到靚相...所以...

或者各位會覺得有啲奇怪...即影即有嘅菲林咁貴又有限期日（平均每張6•5圓一張），而且啲相靚唔靚好受現場環境限制，點解唔用成本平又可以後期制作嘅數碼相機呢？

好耐好耐之前...同一班好朋友飯局...我用部Instax 100即影即有影咗張相...大家睇住張相慢慢顯影，當時現場嘅開心熱鬧氣昏即時升溫...由嗰陣開始就愛上...

毛爸 : 多咗B快門、雙重曝光、近攝...咁多新功能唔買都唔得...

毛爸 : 陪咗我十幾年...帶俾我好多好多開心嘅記憶...

毛毛聰明？焦慮？

2013年9月25日（星期三）

近排...每逢放假日同太太一齊出門...毛毛就會狂吠、狐叫、R門...睇書講呢啲係「分離焦慮症」嘅表現。但平日...我同太太出門返工...毛毛就好安靜...真係好奇怪。

太太：毛毛見到我哋唔係著返工衫出門...就會失控。

如果真係咁...毛毛就好聰明...識分我哋放假同返工，睇嚟我要多啲觀察毛毛...真正焦慮定十分聰明...

毛毛 : 你哋唔帶埋出街我會焦慮咖...

毛爸：嘩 ~ 毛仔宜家你算唔算同我哋講條件？

毛媽 : 衰仔...曳曳豬...都唔知你係唔係咁聰明...

單車日誌...迎風

2013年9月22日（星期日）5：50分 天陰密雲 1號風球 27度

凌晨五點幾就起床...發覺天氣都唔差，只係密雲有陣風...裝身出發踩單車。

唔知點解街上嘅車比平日多（黑、黃的士），今朝雖然氣溫清涼...但有強風...仲一直都係逆強風，令單車好慢咁前進...平均時速7〜11公里，我好努力咁踩咗90分鐘...路程只係緊緊20公里...仲感覺前所未有嘅...勞累。

毛爸 : 澳門仲有小溪？

毛爸 : 氹仔圖書館，唔同時段有唔同嘅感覺...

毛爸 : 氹仔好有特色嘅街燈...

毛爸 : 去過路環好多次呢間天后廟第一次影..

秋天、去行山

2013年9月23日（星期一）

啱啱過咗嘅星期日全家人一早去咗大譚山郊野公園行山...實情對一般人嚟講...放假要比返工仲要早起床...咁係對心理關口嘅極大桃戰。

自己對戶外活動、運動都好熱愛同績極又可以増強身體健康...一放假就晨早起身出門，但家庭成員未必認同你嘅睇法...

其實行山只係一個代號...真正嘅原意係成家人一齊出去享受大自然...

毛毛 : 行山呀！

毛爸 : 行過好多次都冇發現呢度有山水...仲有人專程去攞水...

毛爸 : 天氣極好...唔似打風...

毛爸 : 毛毛小朋友最貪玩...

毛爸 : 毛毛小朋友...我哋夠鐘走喇...下次我哋再嚟過...

毛毛 : 吓...下次...咁...即係幾時？

颱風「天兔」帶來嘅回響

2013年9月23日（星期一）

颱風「天兔」備美國譽為三十年嚟嘅超級颱風，本地嘅政府各部門、市民都嚴陣以待，今次「天兔」颱風路線改變令政府有關緊急支援部門都覺得＂冇乜大事發生真係行運＂，市民覺得＂香港掛緊八號風澳門就一直都係三號，天文台點搞咖...＂。

一般大眾都持兩種心態，有啲開心...有一日額外假期、有啲擔心...颱風帶俾佢哋意外損失。

而打風對我嚟講係負面...打完風我工作會超忙、打亂我操練安排、毛毛冇得出街散步而搞破壞、一啲無家可歸嘅人同狗狗唔知受幾大影響而令我不安...

毛爸 : 颱風「天兔」掠過嘅地區都做成極度嘅破壞，臺灣8萬幾戶停電...

毛爸 : 為迎接「天兔」全城戒備...(圖片來自蘋果日報)

令我充滿回憶嘅「溫泉蛋」

2013年9月22日（星期日）

今日中午飯...太太整咗一隻溫泉蛋俾我食，煮嘅時間掌握得十分準，蛋白似山水豆腐花蛋黃啱啱熟好糖心...非常精彩...要勁讚。

「溫泉蛋」...就諗起細個嗰陣母親經常整俾我哋食，由於當時物資少食物珍貴...咁...蛋就成為最有營養嘅食物，好佩服母親對食物嗰種態度，經常有句口頭禪：鍾意食嘅食物食多啲...但唔可以浪費，唔鍾意食嘅食物食少啲...但唔可以唔食。

毛爸 : 食番媽媽煮嗰種味道...好感動...太太好多謝妳呀...

單車日誌...烈日當空挑戰40公里

2013年9月21日（星期六）14：45分 陽光猛烈 有涼風 30度

颱風「天兔」來勢洶洶...影響來緊嘅工作同操練安排，嚫天氣還好打算出去踩單車...目標係40公里挑戰自己。

因為最近定咗個新目標...臺灣環島單車旅遊，聽講成個旅程要踩單車兩星期先完成。

今日晏晝陽光好猛烈同髙温...不過冇想像中咁浩熱...可能周圍吹緊啲凍嘅風，但喺太陽同逆風下踩車一啲都唔爽...費極大嘅體力，我踩咗一個半小時(28公里)...啲水飲晒連電話都冇電而停機...最終...好唔份氣咁返屋企...

毛爸 : 陽光猛烈...水又飲晒...最後...差啲中暑...

毛爸 : 佢哋就越曬越堅強...能夠學到佢哋咁就好囉...

令毛毛極度驚怕嘅單車鈴聲

2013年9月21日(星期六)

毛毛細個受瞓嗰陣…有一件訓練工具「單車鈴」…作用係引起狗狗嘅注意力，當時我只係用咗一次就停用…原因係毛毛好怕嗰啲好高音嘅鈴鈴聲，我記得嗰件工具可以DIY…我做咗好多件送俾朋友。

估唔到呢個童年陰影直到而家對毛毛都咁大影響，一有「單車鈴」鈴鈴聲…毛毛就會驚到Dup晒尾…仲頭Dup Dup咁走返入房...

噚日仲誇張電視劇有幕踩單車響鈴…咁…毛毛就驚到唔敢旭同成身震晒好耐都未能平復，每晚毛媽睇劇一見有單車畫面就嗱嗱聲轉台…

毛毛 : 啲鈴鈴聲...好得人驚呀...怕怕...

毛爸 : 我做咗好多個送俾人做禮物...

一份令我愛不惜手嘅禮物

2013年9月19日（星期四）

後生嗰陣因工作需要修讀過室內設計課程，由於畫畫方面自知唔係嗰種材料...最後退學。

當時導師講：要客人滿意你嘅設計，除咗口講嘅完美配套之外，就要靠你哋嘅畫功將空想變成現實（嗰陣全部都要用人手畫，而家有電腦幫手）。由嗰陣開始...我好羨慕有畫畫天份嘅人（由其係畫鉛筆畫）...

十幾年前一次旅行，有位畫師幫我同我太太畫咗一幅鉛筆畫，而家成為我嘅珍藏。自從毛毛嚟咗屋企（5年幾），我一直都冇緣遇到位畫師幫毛毛畫幅畫...

直到幾日前，有位網友（灰媽）傳咗一張畫毛毛大頭嘅鉛筆畫俾我，當時我有啲懷疑...係真咖真咖！呢份禮物我一定愛不惜手，多謝灰媽。

毛爸 : 如果呢幅畫中冇毛毛幅相同毛毛兩個字就會更完美。多謝灰媽！

毛爸 : 呢幅畫有十幾年歷史...

單車日誌…氹仔早晨

2013年9月20日(星期五) 6 : 10分 陰天密雲 有風 27度

今日係法定假期…所以Mi Mi Mo Mo晏咗出去踩車。

經市區踩去氹仔單車徑…一直咁踩…發覺路面車少人少非常清靜(可能全氹仔嘅人今日放假，而家仲覺覺豬緊)，去到單車徑直頭見唔到人…啲人啲車去晒邊？

令朝冇太陽曬、少車、少人、有涼風…輕描淡寫…20公里…踩 1個鐘…爽呀。

毛爸 : 令我不快嘅狗狗告示牌...

毛爸 : 今朝包場...大爺咁...

煙花會演2013

2013年9月19日(星期四)

每年嘅煙花會演我都執齊「架生」去霸位影煙花，初初同太太一齊去…跟住帶埋毛毛去…呢幾年自己一個人去…

有人講 : 啲煙花年年都咁上下咖啦，影一次就夠啦…

而我嘅感覺就唔一樣…煙花呢樣野…每個形態都千變萬化，而我享受嘅係熱鬧震撼嘅場面同眾影相發燒友交流攝影心得…

長跑準備...跑唔晒 5公里，未逹標

2013年9月19日（星期四）6：10分 陽光第一線 涼微風 26度

淩晨五點幾就醒咗...無心睡眠...裝身出去跑步。

冇練習跑步已有一段時間，其實係有一個憂慮...有運動常識嘅人一定知道如果感冒未清係唔適宜做强烈運動。

而呢排自覺身體(感冒)好似尚未完全好清...所以除咗日常辛勤工作外都冇計劃操練，今朝雖然一口氣跑咗40分鐘，感覺幾流暢快...但總路程只係跑咗4•8公里...尚未逹標。

雖然自己係運動狂熱份子但都會嚴格堅守運動聖言「好好休息、勤力操練」。

毛爸 : 大家早晨...我出發喇...

毛毛心聲...2013祝各位中秋節快樂！

2013年9月19日（星期四）

毛爸經常講中國人每年都有好多節日，而其中「中秋節」係大節日，當日每個家庭嘅成員都返屋企一齊食飯同嘗月。

呢啲節日點可以少咗祝毛爸、毛媽、家姐、姑姐、姑丈、表姐、表哥、Coffee中秋節勁樂呀!

我毛毛呢幾年都陪住毛爸毛媽一齊過，最開心嘅梗係有大餐同月餅食啦。

中秋大節毛毛祝各位姨姨、叔叔、哥哥、姐姐、Sunny Sir、師兄、師弟、各位狗狗朋友...人月兩團圓、中秋節快樂 ! (毛爸 : 嘩 ~ 阿仔，你年年嘅祝福句都咁 "行貨"嘅...好趕時間？)

毛毛 : 俾毛爸捉咗去做新款 "燈籠"...閃爆...

毛毛 : 呢啲梗係媽咪準備俾我今晚....

毛爸 : 毛毛...正經啲同人講...

毛毛 : 係係...祝各位長輩、狗狗朋友...中秋節快樂...

祝大家中秋節人月兩團圓

2013年9月18日（星期三）

一年容易又中秋...每逢大時大節...就會想起唔喺身邊同遠方嘅親人，如果你係安排咗中秋節一家人一齊食飯，跟住約一大班朋友一齊慶祝...咁...你就係最有福同最幸運嘅人，珍惜呀！

祝各位朋友喺中秋節：人月兩團圓、中秋節快樂...

毛爸 : 祝各位有個愉快嘅中秋假期...

毛毛令人憂心嘅事...毛毛原全康復了!

2013年9月16日（星期一）

首先多謝...一直以嚟為毛毛擔心嘅親友同朋友，多謝大家關心同支持毛毛...

遲咗話俾大家知毛毛好番晒嘅原因係...毛毛主診法醫生去渡假旅行九月份先返澳門...最後約定法醫生14號星期六幫毛毛做最後覆診檢查。

毛毛精神狀態、手術傷口、牙齒...都良好...但肚仔對上個位置仲有一舊肌肉明顯凸起，法醫生話嗰啲係脂肪，如果唔増大係唔會影響健康（嗰啲脂肪痴埋肌肉層如果係做手術個傷口會好大好深同好痛，仲需要比較長時閒先好番，現時冇任何變化所以唔使考慮做手術）...

總結果係令大家都好開心放心，毛毛完全康復。

毛毛 : 我已經冇晒事喇...

毛爸 : 睇見毛仔啲眼神咁精靈就知佢好番晒啦...

毛爸毛媽 : 手術同復原期間好多謝各位朋友咁關心毛毛...感動

秋風起、涼涼哋

2013年9月16日(星期二)

今朝天氣好明顯涼咗…一早帶毛毛出街散步，感覺非常舒服。毛毛一切同平日一樣…仲比平日醒神…放心晒。

噚日毛毛行為有啲唔正常嘅表現…由我哋食飽飯之後開始…毛毛就走番入房個籠度，連有生果食都唔出嚟…到毛媽入房…毛毛都冇任何反應…手軟腳軟連最鍾意瞓嘅「皇帝位」都唔過去瞓…毛媽極擔心毛毛唔舒服，

今朝毛毛生猛番…

毛毛 : 好野呀！毛爸話天氣涼就可以多啲帶我出去玩...

單車日誌...歷史、現代、將來

2013年9月16日（星期一）5：45分 陽光普照 微風

一晚前已經準備好...第日凌晨運單車過澳門探路踩車。

凌晨五點幾...出門之後先發覺唔記得帶工程車鎖匙，咁...今個星期日只好當平時咁輕鬆操練...

放鬆心情就有不一樣嘅觸覺，平日只係騎單車經過嘅地方原來係歷史遺址(我哋冇留意可能係自己一出世佢已經存在）、現代先進前衛嘅建築物（我哋冇注意到佢哋咁快完工）、同科幻般好似浮喺水面嘅城市（呢啲景係喺特別好天氣同時間嗰陣先出現，我哋平時遇唔到或者錯過咗）或者好多人都同我一樣為生活忙碌而忽略佢地嘅存在...

毛爸 : 細個嗰陣來路環竹灣海灘玩就係喺呢度上岸...

毛爸 : 宜家可以踩單車嚟...

毛爸 : 現代經濟基石...

毛爸 : 現代強人嘅燒金煱...

毛爸 : 水上城市...

毛爸 : 夢幻城市...

毛毛心聲...好彩噚日有得出去玩

2013年9月16日（星期一）

又係呢啲時間落雨...又係例牌行停車場...真係狗都癲。

好彩噚日朝早有得出去行山玩，噚日媽咪雖然放假但都好早起身陪我準備去大譚山...途中因時間關係媽咪建議去小廣玩，今朝特別趕時間...

原來係要方便毛爸早啲去排隊投票...

毛毛 : 天氣超正...媽咪話好曬...玩一陣就要休息下...

毛毛 : 風車山呀！好多風車呀...

毛爸 : 上次見到花海...今日只剩番一朵...珍惜眼前係最重要...

2013立法會選舉...我投咗票喇!

2013年9月15日（星期日）

澳門立法會選舉越嚟越深入人心，有人形容選民嘅一票係會影響民生、經濟、將來...我深信「人類」呢種生物有種本能基因...就係「利益當前」佢就會「講一套做一套」，有朋友同我講過選出嚟嘅「代表」係要平衡各方面嘅利益，未必合你理念（吓〜自己冇著數？仲要選佢做「代表」？）所以我一向都政治冷感...

但現今時世人人都講民主、平等...做乜野都要有「代表」，生活喺呢個羣體社會就要守呢種遊戲規則...我去投票係要盡公民責任。

毛爸 : 我去投票喇...