2008年10月29日．星期三 (Part C)
喺街頭買左啲零食同手信。我地喺7仔便利店見到特別包裝嘅温泉蛋，買左熱粟米罐頭湯同明太子飯團、雜菜蛋三文治、午後の紅茶喺火車度食。
有間叫“籠清”嘅舖頭好特別架，門口擺左個燒烤爐同水機，仲有兩大盒魚乾免費俾遊客燒黎食，另有昆布湯贈飲，只係差啲飯就十分完美喇。另外有間賣蜜糖嘅舖頭，啲蜜糖水有得試飲架，個姐姐好好招呼架，我同太太試飲左一杯就即刻幫佢買兩支，搞到個姐姐好開心又手忙腳亂。
我地搭番Romance Car番新宿，太太特別訂展望席睇風景同影相，車頭位置180度望前面，睇風景好似坐過山車咁好high架。雖然車程要個幾鐘，喺車上影吓相食吓野，啲座位又舒服好快就到站。
我地仲要轉車去池袋番酒店check in放低啲行李。上房途中因為我太大意唔小心整跌太太（好彩冇整親），上到房由於件小事又同太太嗌交。
我地換左衫再出上野買手信同食飯（鰻魚飯）。去到上野買野食野大家都冇出聲，沿途太太喺“百果園”買生果食（太太食菠蘿我就食哈蜜瓜），喺街邊仲買左燒年糕食。太太喺間藥房買左好多套“魔術髮貼”用黎做手信喎，我地喺手信鋪買左好多糖果同和果子準備分俾啲朋友做手信。我地好早就返左酒店休息，要统計吓仲要買幾多手信…最後梗係食宵夜（杯麵同生果），跟住梳洗舒舒服服覺覺豬…
沒有留言:
張貼留言