2008年10月28日．星期二 (Part A)
今朝一早我出左去影相，6點幾就番酒店梳洗同執啲簡單行李，太太就要花啲時間裝身。7點半到大堂退房，將啲大件行李寄存喺酒店，出發去新宿。
喺新宿車站食左個簡單嘅早餐，一份三文治、麵包、豆奶。跟住行過去“小田急線”入閘。喺車站我見到對香港情侶影相，佢地部機係“Cannon 30D”，裝左支17-40mm鏡。個哥哥行過黎叫我幫佢地影張合照，我影完睇張相好有問題，再睇番之前佢地影啲相全部又矇又曝晒光，原來部機set左全手動，快門行緊8份1秒。我幫佢地補影一張，較番部機全自動，個哥哥話佢唔識用部機架，多謝我幫佢較番部機。
我地搭嗰部Romance Car係Exe型号，聽講有5個型號咁多架。
今日個行程都幾緊迫，火車到箱根湯本站就即刻轉登山電車去“強羅”。一到步我地就揾野食，太太plan左去“田むら銀かつ亭へ”食豆腐かつ煮定食，點知間食店出面人山人海，最後喺轉角間“春本”等左半個鐘先有得食“手打蕎麥麵”，勁煙韌勁貴勁少。其實上強羅公園嗰條斜路有好多間食店同特色野食，無奈我地趕時間而放棄。
跟住就坐登山纜車去早雲山再轉登山吊車去大涌谷，喺大涌谷影左啲相同買手信，唔少得嘅梗係買温泉蛋啦，除左自己鍾意食之外，食一隻仲會長壽七年架。仲買左啲和果子、梅干、味鹽、生果（大吉）。
之後又趕搭登山吊車去“桃源台”搭“海賊船”遊船河。太太為左我要喺甲板影相唔使同人迫，將船票upgrade到頭等艙（每人要加收400 Yen架），太太真細心。
...待續
沒有留言:
張貼留言