日夜有別嘅毛毛

2010年11月10日 (星期二) 晚上

睇完毛爸寫佢尋日朝早帶毛毛散步嘅情況，我簡直覺得夜晚跟我散步嘅係另外一隻狗。

尋晚我因為有飯局所以夜左帶毛毛去散步，點知原來9點幾出去會見倒咁多狗狗。我地一開始喺Dog One Life附近街角見倒幾個賓賓圍埋一齊，一路傾偈一路放狗，有一隻歌基、一隻混種狗、三隻貴婦狗 (其中兩隻係毛毛識嘅，仲一見倒面就打招呼)。我見倒佢地，先叫毛毛sit，再獎佢零食。隻歌基同混種狗成日想埋黎聞毛毛，毛毛有少少想避開佢地，至於嗰三隻貴婦就好平靜，毛毛同佢地打過招呼，我地就繼續向前行。

跟住毛毛便便嗰陣見倒隻雪橇喺大廈走出黎，毛毛靜係望住佢，冇扯繩又冇吠，即刻獎佢零食。我地跟住隻雪橇行，毛毛反應平靜。

之後我地沿途都離遠見倒其他狗狗，我有時會用召喚鈴引開毛毛，所以佢一直都冇吠。到回程時又再撞番雪橇，今次係迎面相遇，毛毛有少少想向走前，我用召喚鈴引佢然後俾佢零食，跟住繼續向前行。

一直去到華峰，離兩個舖位見倒廢紙廠黑狗同黃白狗行緊過黎，我即刻叫毛毛坐低，响鈴鈴、叫佢個名，佢就望住佢地胡左一聲好想吠，我又再叫佢個名，佢就一直坐喺度望住佢地但冇吠。嗰兩隻狗行到一半停低左望住毛毛，跟住佢地兩個好似人地交頭接耳咁傾左兩三秒就行番轉頭。我正喺度諗緊點樣帶住毛毛行過佢地，見佢地走開，就繼續餘下嘅路程番屋企。毛毛就向前行得好快，好似想揾佢地咁。之後番到大廈門口都冇見到其他狗狗。

毛毛日與夜嘅行為分別咁大，究竟係乜野原因呢？係因為環境嘅唔同 (日與夜) 抑或因為人物嘅唔同 (朝早毛爸帶，夜晚係我帶)？又或者因為佢回程時已經消耗左一定嘅精力所以比較平靜？

毛毛 : 毛媽好留意我練習嘅一舉一動咖...好嚴咖...

毛毛 :早晚有唔同咩????我都唔知咖.........

 

 

---

• 留言者: Patpat
• Email: patpatpig2006@yahoo.com.hk
• 網址:
• 日期: 2009-11-13 03:24:00

豆豆：會唔會毛媽惡Ｄ，而毛爸就"林善"(好烚)Ｄ呢？ hehe.......
 
[版主回覆11/13/2009 06:44:00]呢個情况機會好大...............By毛媽

---

• 留言者: Mobear
• Email: morrisamkl@yahoo.com.hk
• 網址:
• 日期: 2009-11-11 12:56:00

Dog trainer 點講?唔通毛毛怕黑....唔敢吠?
[版主回覆11/12/2009 09:21:00]怕黑可能係原因，或者毛媽喺毛毛心目中係強者....By毛爸