蘇梅島不一樣的旅程之接通外界

2011年3月30日(星期三)

尋晚一點幾又停電...我同太太都熱醒左，外面雨仲未停仲好大風一直到朝早。早上大家出去餐廳食早餐同時到接待處收風...結果係壞消息，機場跑道水浸所有航班全面停飛，有成千幾人滯留喺機場。

由於市區水浸情况好轉，大家就約定出街揾嘢食、掃貨...但大停電有好多舖頭都冇開門做生意。中午飯就喺街邊檔食...食物質素一啲都唔差...

大家食飽飯行街，遇到一檔流動「特式班戟檔」大家就好似發癲咁...梗係狂食啦...朱古力班戟、加蛋、加香蕉、加煉奶每人一份...又再加一份，呢個甜品大家食得非常滿足開心 (旅遊書介紹必食)。

返到酒店大家就留喺房傾計，講起上黎都好奇怪...呢啲情况之下先有機會大家坐埋一齊傾心事。我帶銅銅準備落泳池游水影相....

個Canon G12專用嘅潛水盒終於有用喇...

喺水底影人我都係第一次...

銅銅嘅作品...

游水運動係BB嘅強項...

水中花...

啲水好凍我地好快就上水。

又到晚飯時間，大家去接待處收風...好消息...機場重開已經有班機升降，大家心情即時轉好。酒店仲安排專車帶我地出街揾嘢食，大家個心願係食「海南雞飯」...咁...司機哥哥兜左好耐...終於車左我地去"Big C"超市，連日黎大家第一次見咁多野買咁多野食...梗係發狂啦...

更重要嘅係有免費WiFi，大家開心到失常...不停咁上網同打電話報平安，通知公司如果聽日走唔到要請假同安排工作。我就好忙咁幫大家買嘢食海南雞飯、魚蛋粉、牛肉粉、果汁、汽水...咁多日黎大家最滿足嘅一晚，重頭節目...掃貨、上網...大家玩到超市閂門都仲依依不捨...