帶毛毛去海明灣畔前地玩

2013年9月15日（星期日）

喺海明灣畔旁近海邊有條好闊好長嘅走廊...以前好乾淨，亦有啲人帶狗去散步，嗰度地方比較偏...所以平日好少人去...

以前我哋週不時都帶毛毛去嗰度玩，貪少人少狗周圍環境靜...但噚日帶毛毛去到就發覺入口放滿一大堆大膠水管...入面就好似荒廢咗咁...

毛毛 : 我似唔似 "獅子皇"呀...

毛爸 : 似 " 羊仔"多啲喎...毛仔...

毛爸 : 嗰度影景好靚...由其係夜影...

毛爸 : 雜草叢生...

單車日誌...輕鬆操練變艱苦搏鬥

2013年9月13日（星期五）16：45分 陽光普照 强勁涼風 26度

噚日收到通知因工程地點約唔到時間今日放假...中午一場大雨打亂我全日嘅安排...原本打算5公里慢跑操練...

到下晝改踩單車，今次運咗部單車去西灣湖踩...可能落過大雨路面好乾淨又少車所以踩車嘅感受好爽。雖然之前落雨...宜家就有猛烈嘅陽光曬住...但唔覺十分熱，其中原因係迎面吹黎嘅風好涼好猛...計劃係慢慢踩20公里，但逆風踩車非常吃力平均時速只有13〜15公里...到半程衝次嗰段亦都衝唔過時速25公里...

最後只係拼咗13公里身體己經有休克嘅感覺...投降。

毛爸 : 雨後景物零舍清色

毛爸 : 成片草地啲草都有一粒粒發光嘅水珠...

毛爸 : 天氣同景色靚到...令人放下煩憂...

毛毛咬人事件

2013年9月13日(星期五)

六點幾帶毛毛出街散步…回程經過巴士站，毛毛突然衝埋去咬人…好彩人、狗都冇受傷...

首先要向伯伯道歉：對唔住好對唔住，係我隻狗唔啱...佢冇心咖...對唔住呀！

現場情况…今朝我帶毛毛行過巴士站…好多人喺度等車，有巴士埋站啲人就峯勇而上，其中有位伯伯喺候車凳急急起身舉手…然後又返回坐位坐番低(可能唔係搭嗰班車) ，嗰陣...毛毛突然向伯伯攻擊(咬)…雖然我快反應拉住毛毛…但毛毛啲牙已經衝擊到伯伯嘅手背骨…敗喇。

伯伯 : 嘩 ~ 拉實你隻狗呀！(好嬲)

毛爸 : 對唔住呀！我隻狗狗有冇咬嚫你呀…有冇受傷呀…(好緊張同低聲下氣)

伯伯 : 你有冇搞錯呀…唔拖實隻狗…狗係養唔熟咖…(好火爆)

毛爸 : 有冇事呀！使唔使同你去醫院做檢查呀…(好關心同好有誠意)

當時我指令毛毛坐低(雖然毛毛坐好但狐叫不滿亦都冇任何進一步嘅行動)，好多人睇到成件事發生…但眾人嘅眼神好似喺度講…隻狗咬人應該打佢同罰佢啦…等佢下次唔敢…

伯伯好嬲好火辣辣但好明顯係冇事只係好不滿…依依俄俄咁了事...

毛毛 : 嗰啲係我自然反應...惨喇！罰坐屎塔...唔知要坐幾耐添...

毛爸 : 我估係毛毛吾以為伯伯嘅動作係想打佢主人...對行為反感...

毛爸 : 毛毛受訓過...但係都仲有一定嘅野性...攻擊出於保衛主人........

毛爸 : 當眾人明白狗狗咬人真正原因，仲會唔會堅持要體罰隻狗狗呢？

用智慧解決問題

2013年9月12日（星期四）

喺日常生活中對某啲事、物持反對意見嘅人...淨係講「No」、「唔好」、「唔得」...我覺得喺現今社會...咁嘅思維...己經係過時，我嘅睇法係...了解事件...平衡利害...思巧解決難題。

前幾日講過毛毛好鍾意瞓喺睡房冷氣風口位，毛媽反對...毛毛就反抗...事件發展落去...毛媽經常入房Check毛毛...毛毛嚫毛媽唔留意就埋位...兩個鬥得火熱。

今早發現喺風口位前面有個膠櫃檔住啲冷氣...櫃後位有個咕臣...毛毛就好舒服咁瞓喺上面，我發覺呢件事解決得十分有智慧同完滿...以後毛媽唔使擔心毛毛俾冷氣吹嚫，而毛毛唔使驚再俾毛媽驅逐，雙贏...

毛爸 : 毛媽巧妙咁將 "用膠櫃阻住" 改做 "用膠櫃護住" 毛毛...

祝忠良義兄中秋節快樂！

2013年9月12日(星期四)

今朝出門嘅時間…收到忠良兄嘅電話…提我去佢公司攞月餅，每年中秋義兄都有月餅留俾我過節。

唔知義兄邊度收到風得知我身體不適…今年除咗送月餅之外仲送咗盒名貴嘅「霍山石斛」俾我保健...真令我感動同意外，多謝義兄…

我嚫呢個機會…祝忠良義兄全家 “人月兩團圓、中秋節快樂”

毛爸 : 其實乜嘢藥材保品都唔及 "心藥"咁有效...多謝義兄...

          毛爸 : 預祝大家都 "中秋節快樂"

戰地勇將...無名英雄

2013年9月11日（星期三）

英國陸軍去邊度服役都會帶埋一群與別不同嘅「無名英雄（軍犬）」喺身邊，喺阿富汗「軍犬」係喺最前缐工作，佢哋壘建奇功避免人命傷亡。

每隻「軍犬」都由經過10星期嚴格受訓嘅領犬員帶領執行任務，「軍犬」嘅工作係非常辛苦每星期7日每日24小時執勤。

戰場上嘅軍犬分為兩類，一種係「護衛犬」付責巡邏、請救、保衛、攻擊，另一種係「搜索犬」付責搜查爆炸品、土制炸彈、槍械武器、檢查車輛，佢哋喺前缐出生入死、勇敢出色嘅表現為軍隊化解受恐怖攻擊危機，佢哋由於身處險境秒秒鐘生命都受到死亡威脅，亦都有軍犬執行任務嘅時候陣亡...

而我哋平民根本無辦法了解「軍犬」付出生命完成任務係救番無數人嘅使命...「軍犬」...戰場上嘅另類「無名英雄」。

資料及圖片來自TVB

毛毛心聲...吓 ~ 有得出去玩？

2013年9月11日(星期三)

噚日毛爸放工返黎嗰陣神神秘秘要幫我裝身出街…原來帶我去小廣場玩，奇怪…黄昏出黎玩次數唔多...

毛爸講過…經過全日嘅太陽曬地面會好熱温度高，我哋狗狗喺度喪玩係好易出事咖，今日雖然有得出去玩…但大懵嘅毛爸居然唔記得帶我最鍾意玩嘅…波波...

毛毛 : 黃昏我好少出黎玩咖...好開心呀...

毛毛 : 最失望係...好似玩咗一陣就要走，毛爸玩多陣得唔得呀？