2008年10月30日．星期四 (Part B)
花左一段時間先入到主殿裝香影相，之後又係買野食野嘅時候喇。我地買左特濃抹茶雪糕，串燒三兄弟、炸饅頭同特式小食…食到唔停口，又買左精品、磁貼、電話繩、筷子，仲有啲小擺設番去做手信。
中午我地喺車站附近間叫“麵屋武藏”嘅舖頭食拉麵，係用買票方式架，服務員帶左我地到吧枱坐等食（太太叫左特濃味噌湯拉麵，我就特濃豬骨湯拉麵）。呢間店啲服務員清一色俊男，個個都用條黑白色嘅頭巾包住個頭，好有禮貌好有型架。太太碗麵好大份，湯同麵係分開上架，太太食左兩啖就講，肥仔啲麵好好食呀。入面做野啲哥哥見到我地咁大嘅反應，個個係度笑，後尾仲同我地加湯飲。食飽走嘅時候個個都同我地揮手拜拜，呢餐麵食得好開心。
跟住又搭火車“去高尾山錯視美術館”，今次都幾複雜，要轉兩次車搭成個幾鐘頭嘅車程先到步，到高尾山站已經係下晝3點鐘。
今次間美術館好易揾，一出站就喺正門口。美術館嘅外牆裝飾都好得意架，啲公仔好立體架。
太太出發前已經喺佢地個網站download左折扣券，館入面有職員講解點影相。美術館有兩層同6間房，全部都劃哂3D畫，我同太太玩到忘晒形。現場光線唔夠，影相有啲難度，閃燈會反光，呢批相我都唔係好有把握。係咁e玩一玩，影一影相要成兩個鐘先行晒全館，最後喺小露台飲完杯贈飲，就行過對面車站搭火車返新宿，都係要轉一次車先到步。
我地行出車站行到肚餓就揾野食，行過“松屋”就入去食豚肉定食，個set有一大碗飯、一碟生姜豚、一碗湯、一兜沙律，份餐好平味道都唔錯。
時間都就黎8點，記起有啲手信買少左，我地決定趕番池袋掃貨。太太買左T裇、頸巾、浴鹽，我就買左啲和式襪。啲手信未齊但好多舖頭已經閂門，唯有聽朝先最後衝刺啦。宜家最緊要嘅係去“小田急百貨”食街掃宵夜，我地買左燒雞串、生果、donut、梗係仲有杯麵啦。
要返酒店執野喇，執野先記得無買零食俾毛毛。今次我地買左好多禮物同手信，
“幣喇”…要執好啲行李，除左兩個o急爆滿之外仲要開多個後備手提袋先裝晒…
