毛毛心聲...對付風筒嘅辦法

2013年7月6日（星期六）

我細個開始就好憎恨「風機」，每次沖完涼之後毛媽就用「風機」幫我吹乾啲毛，由其係喺冬天...因為「風機」啲風好勁...但佢啲聲會令我隻耳仔嗢嗢聲，毛媽都話部風機聲浪好大...後尾改用「風筒」，不過我對於風機、風筒都非常反感。
今日我就用咗錫錫咁方法對付「風筒」，毛爸幫我吹腳仔嗰陣我猛Lam佢塊面同條頸，毛爸幫我吹頭嗰陣我猛Lam佢隻手...搞到毛爸手忙腳亂...

毛毛 : 今日又係洗白白嘅日子...


毛爸 : 毛仔，你都好搞野喎...係咁Lam我...搞到我花咗成個鐘先吹完個裝...
毛毛 : 毛爸，我愛你咋...咁得唔得先？
毛爸 : 你扮野...真係估你唔到...

學藝之旅...清邁嘅古城牆

2013年7月5日（星期五）

續...2013年5月21日當太陽落山熱浪減退...又係出去「蒲」嘅時候，我地到清邁古城牆影相、餵魚、餵白鴿。
古城牆...喺清邁嚟講係地標，係皇朝嘅代表，座城牆係用紅磚砌成...有段城牆旁邊仲有條好闊嘅護城河，河裏面有好多魚而且啲魚好大條...黃昏有好多巿民喺度憩休、餵魚、餵白鴿，有一段就有城門同城樓...城門前面有一個大廣場，平日上午同中午都有好多人喺度玩「兩個轆嘅電動車」...一到星期六、日晚上就係非常熱鬧多人多到睇唔到前面嘅「步行街夜市」...
影完相就去揾餐廳食晚飯...待續。

毛爸 : 古城牆一定係技術高超嘅工匠興建...啲紅磚砌得精巧又靚...


毛爸 : 護城河好闊...下晝有好多人喺旁邊嘅小路慢跑、餵魚、抖涼、踩單車...

毛爸 : 有城門嘅一段宜家就水靜河飛...對開嘅廣場就有好多白鴿喺度揾食...

毛爸 : 啲白鴿好鬼叻咖...有野食嗰陣...嚇佢哋都唔會飛...咁...唯有我扮飛囉...

毛爸 : 呢段係最古老嘅一段...咁先似古代遺址...


毛爸 : 護城河旁邊種咗好多鳳凰木...我哋去嗰陣啱啱開花...一片紅超靚...


毛爸 : 呢度係我哋食晚飯嘅餐廳，最出名係甜品，而呢位甜品大師係佬闆嘅媽媽(我叫佢做Auntie)。由於我哋一次過叫咗兩款Auntie嘅代表作，佢特登出黎陪我哋食甜品要我哋俾意見，佢仲請我哋食佢自家種嘅特別品種香芒...Auntie非常好人...待續。

毛毛突然狂吠狗狗

2013年7月5日（星期五）

噚日朝...我帶住毛毛搭落街散步，當去到低層至地下嘅時候...毛毛突然向住門札行馬...一開門就衝出去狂吠，原來有隻白狗狗同主人等返屋企，白狗狗俾毛毛咁兇悍嘅行為嚇到向大門方向跑。
今朝喺街尾轉彎上又遇到隻白狗狗，隻狗狗一見毛毛驚到亂吠拉住主人向街頭狂跑，隻白狗狗俾毛毛嚇怕咗。
其實毛毛有啲咁嘅行為係危險咖，因為會引起對方反撃，我哋做家長嘅就要留裏同教道狗狗...毛毛梗係要改呢種行為啦...

毛毛 : 唔~哈~哈哈哈~嗰隻「豆靚」寸寸貢...所以嚇吓佢咋

毛爸 : 毛仔你咁係叫做「挑戰」人哋...係壞分子行為...

學藝之旅...享受不一樣的優閒

 

2013年5月21日(星期二)

續...食飽飯就返酒店休息，由於天氣太熱...有乜野好得過玩水同嘆凍飲...我哋就去咗酒店泳池游水曬太陽。
我每次去泰國旅行都會去酒店泳池游水，經驗中酒店泳池某啲時段係好少客人...有時直頭「包場」你可以享受寧靜、休息...好好咁為自己充電。

毛爸 : 酒店嘅泳池喺低層...但景觀都好靚...

毛爸 : 泳池落水嘅地方有啲小水柱噴落嚟...好似歡迎你咁...

毛爸 : 泳池旁邊有好多雞蛋花樹...宜家先發覺「水中(雞蛋)花」係咁靚...

毛爸 : 天氣超熱，水中暢泳...係好爽咖...

毛爸 : 咁嘅優閒環境...又點少得啲冰凍嘅飲品呢...

毛爸 : 酒店游水嘅地方唔算大...但勝在清靜舒服...仲係我「包場」添...

毛爸 : 泳池邊仲種咗好多好靚嘅蘭花...我攞住部相機...啲手指就失控...對住啲花狂影...

毛爸 : 宜家應該係發「白日夢」時間...............待續

學藝之旅...下晝自由時間

2013年5月21日

續...我哋參觀完雙龍寺...阿啫哥就車我哋去近住三皇博物館嘅地方食午餐，嗰度有地道嘅「魚蛋粉」同「雞飯」。
泰式魚蛋粉...魚蛋雖然唔係特別彈牙，而湯嘅味道就酸酸辣辣非常過引，仲有樣一定要試嘅「炸魚皮」十分香趣令人食唔停口。
泰式海南雞飯...雞、飯、醬、湯都冇乜驚喜（澳門雀仔園有間模式一樣嘅泰式飯店，味道同配答都差唔多，我哋經常食，但價錢就好貴），但舖頭好出名連泰國皇窒成員都嚟幫嚫，唯一驚喜嘅係每份飯餸都細細碟，品種任你配答...價錢平到你會有啲懷疑。待續...

毛爸 : 三皇博物館...入場費都幾貴...有啲地方唔俾影相...所以冇入去...

毛爸 : 差唔多每條街都有寺廟...呢座寺廟非常華麗...格離係古遺址...


毛爸 : 寺廟週圍有啲好得意嘅紅土和尚仔...

毛爸 : 呢碗魚蛋粉係舖頭嘅代表作...

毛爸 : 非常旺場...但啲客一食飽就走...所以好快有檯...

毛爸 : 呢啲一包包嘅係炸魚皮，超好食，食一包計一包錢，我差啲過格離檯攞埋人哋嗰包...

毛爸 : 又湯又沙律又沙爹又雞飯...都唔知由邊度開始食...

毛爸 : 廚房嘅主帥切雞都切到手軟...仲要應付不斷加單嘅外賣...真係超犀利...待續

信任與安全

2013年7月2日（星期二）

工人姐姐話佢隻狗狗俾同屋住客體罰，宜家隻狗狗一見啲人有所動作（舉手、起腳）就會好驚慌...要揾地方呢埋，我估呢啲情況多數都係狗狗受到重創...對人類失去信心嘅反應。
毛毛由細個到宜家雖然經常犯錯、百厭、搞破壞...但屋企人從冇對毛毛施過體罰，如果係罰多數都係罰「坐屎塔」，毛毛BB嗰陣我哋會用報紙卷成條形...作打狀用嚟嚇佢，到宜家屋企人攞起雞毛掃、衣架、報紙卷條...毛毛都冇意識會怕亦都唔會揾地方呢。
我相信咁係只有一個原因就係「絕對信任」，至於個「籠」...除咗瞓覺...平時好少會走入個籠度，毛毛鍾意走上梳化痴住我哋...我睇...呢種情形毛毛覺得係最「安全」嘅時候。

毛爸 : 毛毛最鍾意跳上梳化嗲我哋...

---

• 留言者: 毛之家
• Email: leungmomobaby@yahoo.com.hk
• 網址:
• 日期: 2013-07-03 15:49:31

毛之家都係鐘意痴住我哋
[版主回覆07/03/2013 20:04:26]咦~你哋啲小朋友都係咁？啲小朋友好真咖你錫佢哋佢哋會更錫你...By毛爸

籠

2013年7月1日(星期一)

毛媽大嗌 ：老公呀 ！ 毛毛走咗入個籠度唔肯出嚟呀 ！ 仲想咬我呀。
好奇怪...毛毛BB嗰陣嚟到屋企...我哋為咗佢有安全感，就放佢入籠...但當夜晚瞓覺、我哋出門返工、出街...就發現毛毛可憐嘅眼神...佢好似求我哋：唔好鎖住我喺個籠度，俾我自由行啦 ！
到毛毛大個仔...喺屋企非常自由，宜家每晩瞓覺、或者做錯事、逃避俾毛媽捉佢清潔耳仔...就會自己走返入個籠...捉佢都唔出嚟，嗰陣會發現毛毛堅決嘅眼神...佢話俾我哋知：你哋唔使諗，我係唔會出嚟咖。
我望住瞓到好甜嘅毛毛...真係好難明...細個嗰陣憎個籠，宜家籠就係安全地帶。

毛爸 : 瞓覺瞓到腳震震...似豬仔多過狗仔...