毛毛心聲⋯係我叫醒媽咪咖！媽咪早晨呀！

2014年3月11日（星期二）

 

 

今朝我同毛爸散完步返屋企⋯發覺媽咪未起床（平日會喺廳做運動咖），我第一時間入睡房叫醒媽咪⋯原來媽咪瞓過龍。

平日我同媽咪朝早一起床⋯除咗做運動之外就係等食早餐...

 

毛毛：媽咪瞓過龍...係我叫媽咪起床咖...

 

毛媽：好彩毛毛叫醒我，毛毛好叻呀...醒目仔...

毛媽整餅…豬扒包

2014年3月9日（星期日）

我噚晚臨瞓前太太同我講⋯肥仔，聽朝食豬扒包做早餐好唔好？⋯我，好好好⋯自從太太去咗學整「豬扒飯」返嚟之後⋯屋企就多咗機會食煎豬扒、肉片、雞⋯

今朝煎豬扒做豬扒包⋯除咗"好食同好味"之外出品更保持水準⋯真正令人驚喜嘅係太太親自落廚煮早餐俾我食⋯

 

毛爸：加咗蘋果嘅豬扒包...味道更夾更好食...

地獄（開工）見聞…等同操練

2014年3月9日（星期日）

過去一個星期嘅工作係拆除「流動電話發射機站」同運走物資。

現場係一個「曲尺形」面積十分廣闊嘅天台（100公尺 X 100公尺），由於面積大攞工具、補給、拆除同搬運物資就要花啲時間，情況係咁⋯將拆除物資托去機樓（100公尺遠），由機樓托去運貨電梯（行兩層 11級嘅樓梯），到地層托去卸貨區搬上貸車⋯

我計過工作量⋯每日行超過 4000公尺、行上 40層樓、行落 40層樓仲要負重（10幾公斤不等）⋯連我自己都覺得不可思議⋯勁過正常操練（人都癲）。

 

毛爸：由於天氣唔穩定令工作加倍辛苦...

 

毛爸：面積好大...掃乾凈施工嘅地方要花成個上晝...

毛毛御用嘅日籍美容師引退了！

2014年3月8日（星期六）

毛毛細個剪裝開始⋯都由兩位日籍美容師操刀（一位靚姐姐、一位肥姐姐），佢哋兩位嘅技術了得每次毛毛剪嘅裝我哋都好滿意，兩位美容師除咗國籍一樣之外⋯大家屋企都有「貴賓」狗，其中肥姐姐嗰隻灰色貴賓同毛毛非常相似（餅印一樣）。

幾年前靚姐姐離職去美國⋯毛毛剪裝由肥姐姐接手⋯四月份肥姐姐都會離職返日本，佢哋嘅離開…毛家就好似少咗對朋友咁⋯

我哋可能要花一段時間先物色到同毛毛夾嘅美容師，呢段其間毛毛剪裝可能係件「辛苦嘅事」。

 

毛爸：今次剪嘅裝手工好差...

 

毛爸：毛毛嘅包包咀唔夠圓...仲邊大邊細...

天然杜蟲藥

2014年3月6日(星期五)

 

毛媽對毛毛既餐食、零食、生果、藥品、玩具嘅安全性健康性規格都有非常嚴格要求...

 

三個月前毛毛開始轉食天然杜蟲藥，呢種藥嘅服用方法…早晚餐服3小滴，要連續服食6星期…停藥7星期，基本上唔會有問題…但呢種天然杜蟲藥…藥味好濃毛毛好抗拒嗰陣味，咁…毛毛食餐就成為慘事…但小朋友唔明乜嘢叫「苦口良藥」。

 

毛爸：我哋試過用肉湯、蘋果汁...俾毛毛送口都失敗，而家用酸奶...算Ok啦...

 

毛爸：每次毛毛聞到嗰陣藥味就扁晒咀，對住兜餐...誓願咁...見到佢咁...心痛

 

 

約咗夢娜、麗沙去水塘晨運

2014年3月5日（星期三）

 

 

戶外社交同運動對於狗狗嚟講係非常重要嘅事⋯所以我每放假都會同家人帶毛毛出去玩同行山散步，今次好開心可以約小姨帶埋盈盈、夢娜、麗沙一齊出嚟玩。

講開又講⋯以我嘅見解⋯帶狗狗出外活動唔係單方面對狗狗有好處，仲係對狗主恆心、毅力、愛心嘅考驗，如果你係每日風雨不改帶狗狗散步⋯咁⋯等於你自己都日日做運動⋯對自己健康有正面嘅得益⋯

 

毛爸：睇下班主人同狗狗...就知到佢地係幾咁開心(個個都四萬咁口)...

毛爸：盈盈同夢娜係一對最佳拍擋...

 

毛爸：呢位係夢娜小姐...(肥咗啲啫)

 

 

毛爸：呢位係麗沙小姐...(佢又瘦過龍喎)

 

毛爸：呢～呢毛少就啱啱好喇...(但係好沙陳呢)

 

夢娜：我好少落街玩咖，宜家有少少緊張...我好深歸咖...

 

毛毛：唔怪得知妳哋有啲驚驚青青啦...第日多啲出嚟"行"習慣"浦浦"...

一個驚喜嘅飯局

2014年3月4日（星期二）

啱啱過咗嘅星期日⋯由於某種原因同時間錯配⋯終於有機會同老友湯氏夫婦食飯（我同老友們都會有空閒嘅時候但硬係夾唔啱大家一齊嘅時間）。

每次同班老友飯局傾計談心⋯都開心暢所欲言，講唔盡嘅旅遊新經歷、講唔盡嘅開心事、講唔盡嘅八卦事⋯非常窩心，飯菜都係其次⋯

有人講現今社會人與人之間嘅「信任」越來越薄弱，自己就起一度牆與人保持分隔...好難有真心朋友，我都有同感⋯

我覺得自己幸運哋有班好朋友，所以好重視身邊班老友，亦都有人講佢哋願意花一生時間同班老友傾計...我都願意。

 

Peter(毛爸)：多謝湯生請食飯...我會＂料理＂一席＂私房菜＂回敬你哋...