受到攻擊

今朝好晏先同毛毛落街散步，經過廢紙場有兩隻大唐狗走出黎 (黑色同黄色)。毛毛就狂吠…兩隻大狗依牙鬆鋼，先同毛毛對陣，之後黑狗衝埋毛毛度，黃狗就向我撲過黎...我用手一擋，好彩着長袖衫。

當時我顧住抱番毛毛，黄狗又向我攻擊...嗰一刹那我本能反應係起飛腳踢 (踢唔中佢)。之後我企定用殺敵嘅眼光望住啲狗…兩隻狗停左攻擎，帶啲唔忿氣嘅眼光返入廢紙場。毛毛就出力掙扎狂吠，一場虛驚...

街尾有個姐姐拉住隻金毛同貴婦狗，見咁嘅情況就拿拿林調頭走…

毛毛：我唔可以俾狗大架...

 

毛毛：我同毛爸係最佳拍檔...

---

• 留言者: Angel
• Email: ywkangel@yahoo.com
• 網址:
• 日期: 2009-03-08 02:59:00

你的狗狗毛毛好可愛, 毛爸你好厲害!! 可惜我家不能養狗.... 你們家 5月去台灣, 以下連應該很有用 台幣兌換資料 (含匯率資訊) p.s. 我朋友告訴我, 他收不到訂閱新網誌的電郵, 已向 yahoo blog 反映, 他們說如用戶收不到, 請本人自行與 yahoo blog 聯絡 (私隱關係), 不知道你有沒有收到訂閱電郵? 我最近也收不到朋友的訂閱電郵真奇怪呢~

皮膚病

呢排潮濕又大霧...今朝大霧到連對面街啲大廈都睇唔到。毛毛就成身啲毛都鋪左一層水粉...可能潮濕，毛毛成日都R身R勢。毛媽就好緊張，怕毛毛會有皮膚病，又話要約時間幫毛毛沖涼，就算我幫毛毛洗手仔腳仔嘴仔，毛媽都有意見...話個風筒唔夠大風，毛毛啲毛乾唔透，可能引起皮膚病...

毛毛：地下好濕呀！

毛毛好硬頸

平時阿美上到屋企 (下晝6點)，第一時間就放毛毛出騎樓尿尿，毛毛食飯前後都會尿尿同便便架。近排阿美話佢放毛毛出黎佢都唔去尿尿，忍到食完飯之後先去，有時急得滯等唔切出騎樓就會喺廳度賴尿。

由於咁...尋晚太太就困左毛毛出騎樓，要佢尿尿完先食飯。等到過晒食飯時間，毛毛都唔肯尿尿...好硬頸。卒知飯都要喺騎樓食，食飽飯尿尿左，太太先放返毛毛入黎...

臨訓太太又困左毛毛出騎樓，要佢尿尿完先准瞓覺。毛毛寧願瞓喺騎樓都唔尿尿...我見毛毛甘可憐，唯有放返毛毛入房瞓。臨天光毛毛自己出去尿尿，但就屙喺尿板邊......激死!!!

毛毛：拉我都冇用...

 

毛毛：我唔行架...

起身喇！

今日毛毛都係喺門檻度尿尿…可能嗰度啲尿味未散。

毛毛今朝一早就叫我起身（6點半），聽毛媽講毛毛尋晚成晚喺房同廳之間行黎行去，一直等天光。唔知道原因，可能係尋日日頭瞓得好…

散完步返到屋企，毛毛就走出騎樓咬報紙同食報紙…俾我發現。毛毛你好曳曳…要受罰喇。

 

好臭好臭

前日毛媽發現毛毛又喺門檻度尿尿，啲尿尿滲到成條路軌都係，仲發出一陣陣臭味。毛媽用稀釋左既漂白水、醋、水清潔都仲有味。

毛媽發晒脾氣：肥仔…點樣教毛毛唔喺門檻度尿尿呢？？？

我就放左塊尿板喺門檻度，臨瞓毛媽大叫…肥仔，毛毛喺梳化到尿尿呀，你出黎睇吓…

毛毛可能唔習慣尿板喺門口，所以唔出騎樓尿尿。毛媽就差啲俾毛毛激暈，毛毛個樣就好可憐…又要受罰喇…

毛毛：好對唔住呀毛媽...

 

毛毛：我唔知可唔可以行出去呢？

 

毛毛：pat pat又要受罪喇...

修毛毛

今晚太太有飯局，我要喺外面食飯。我返到屋企先知太太未返，毛毛就喺個籠度掙扎幾乎想拆左隻門。

放左毛毛出黎就一直黐住我要我同佢玩，我發覺毛毛手掌腳掌啲毛長左，毛媽話毛毛啲手仔腳仔成日都踩落啲尿度濕晒…襯我得閒同毛毛修毛，毛毛好合作好快就修完。我諗住獎佢食藍莓，不過盒藍莓有好多粒都爛左…揀到幾粒係好嘅，剩番嗰啲就垃圾桶食晒。毛毛你唔好彩喇…

返風落雨

晨早起身感覺天氣涼左仲雨粉粉，同毛毛落街散步，毛毛見地下有水就走去玩水。

毛毛好快就便便同尿尿完，但唔肯返屋企，絕招就係坐喺度唔肯行…最尾要抱住佢返屋企。

今朝一早毛媽就吟吟尋尋（教極你都唔識…），原來毛毛喺騎樓門檻度尿尿，啲尿滲晒落路軌，仲有積晒喺趟門入面，尿味臭到攻鼻…