香港霧之旅

晨早心兒起身唱歌，我都醒左，六點半起身，裝香，出去露台企左一陣。嘩！好大霧，不過唔係好凍，大約二十度。

今早要九點鐘去做驗身、做掃瞄，做完醫生話，你個肝膽冇乜大變化，你冇事既，放心，驗血報告會送去鄭醫生度。

我搭十點九船過香港，宜家好好太陽，好暖但好大霧。船上我幫左個唔識字既婆婆填入境表，佢好多謝我〈能幫到人自己都好開心〉。

目的地銅鑼灣、旺角。午餐紫菜墨丸河，食飽就去HMV買碟，Jesse Cook "One Night at the Metropolis"，冇貨要訂。買雜誌Oggi，揾左全香港報紙檔都冇〈可能唔係人睇既雜誌〉。去百老滙睇機頂盒，"O"字頭全線冇貨，去"三軍"買護耳罩又係冇貨。經過投注站買左兩張星期日開既六合彩，賣飛個姐姐叫我買張"三T"，佢話中左成千萬架，我都唔識落注。

係時候要走喇，返澳門重有野做。去到碼頭先知因撞船同大霧全線停航，一直到八點才重開。我落八點，十點幾先到澳門，見好多救護車在排隊。