你好嗎？好想寫低日常嘅生活點滴，開心、傷心、溫馨...做個實錄，作為日後寶貴嘅精神食糧...
毛媽尋晚吩咐：肥仔聽朝一早毛毛狐叫，你唔好理佢呀…最好閂埋度房門呀…
朝早毛毛又狐叫…un…un…un…毛媽終於忍唔住出廳同毛毛裝身出去散步…
落到街毛毛走得好快，仲好大力搶繩…咁條狗繩我就甩左手…毛毛就一直走，走到街口轉左彎…我反應都黎唔切就已經見唔到毛毛…我追到街口就見到毛毛企定定喺度等我…喺當時我個心……
今朝打war game，去到game場見番個隊友阿達，其他啲全部都生面口，全場大約30幾人(有菲律賓人同巴西人)。
今日嘅戰果可以用啲四字詞黎形容…我落去打左四場，啲對手玩得 “極不君子”；啲巴西仔同啲賓仔好似學左神打咁“絕不死亡”；我隊友啲武器“極重火力”；而我就“場場陣亡”。因為對手非常頼皮，掃極佢都唔死，唯有自己行出黎被殺啦…
我隻手錶、左手右手共四隻手指都俾人打爆左，真係“老猫燒鬚”…
我喺個籠度叫毛爸，宜家朝早6點38分。聽到毛媽喺度鬧：毛毛你咁早就嘈生晒…你曳曳…
毛爸一放我出籠，我就尿尿左少少…真係好急呀。
毛媽吟吟噚噚同我換左件新外套…好似話外面好凍，着件厚衫暖啲喎。
毛爸抱住我落到街，我等唔切喇…咁就一大督尿尿同三堆便便…好…舒…服…呀…呀…，仲有啲肚餓添。毛爸話我good boy，仲獎我零食。
返到屋企好肚餓呀… “咦” 毛爸入廚房煮野喎，好野有愛心通粉食…
毛毛：毛爸幾時先有得食…
今朝毛毛玩玩吓執波波突然間衝左出騎樓望街，毛毛搞乜野呀…有得玩有得食都唔做去望街？
跟住就狂吠，真係好奇怪…我行出騎樓，見到喺街有兩隻白松鼠狗同埋金毛bobo，隻白松鼠BB吠緊金毛bobo。可能毛毛聽到熟識嘅狗狗吠聲…
毛毛梗係同佢地前世撈亂骨頭喇…
毛毛越黎越有個性…呢排因為天氣涼左，毛媽要毛毛着衫，毛毛就唔係好願意，成日同毛媽玩着衫遊戲。一入籠就除衫，工人阿美都話每次上到屋企都見毛毛除左件衫。
毛媽話毛毛啲腳仔好有力，要捉住佢好唔容易。
啲毛又長左好多…
今朝出門同毛毛戴勁圈，發現要戴鬆一格，原本兩格太緊喇…毛毛又大隻左…
當我喺貨場忙緊嘅時候聽到有人叫Peter…Peter…我回頭一望，原來係無見好耐嘅安嫂，啱啱喺葡國返黎公幹，特登黎探我。
見到安嫂咁有我心實在太開心喇，安嫂仲帶左一個壞消息同一個好消息過黎。壞消息…安生病左，好嚴重，訓左三個月床（安生係我幾十年嘅朋友同打game前輩），所以今年唔會返黎。好消息…安生開始復原，不過仲要休息3個月，出年會返黎度假。
聽到呢啲消息心情大起大落，希望安生快啲好番…
尋日好偶然見番阿都，又講開啲射擊活動。阿都係我教練（實彈實戰射擊），宜家佢組織左一隊氣槍WAR GAME隊，每逢星期六朝早九點半都有WAR GAME打。阿都就叫埋我参加，仲約左今個星期六開戰，我又再披甲上陣喇…
