毛爸毛媽毛毛豬

2008年8月3日星期日

今朝太太親自同毛毛沖涼，毛毛好乖一切都順利。

太太放假成日都陪住毛毛，太太鐘意坐喺梳化度睇報紙同睇書，毛毛就爬上梳化扒喺太太旁邊訓覺。個百厭仔越黎越識嗲人喇……

小朋友盈盈今日晏晝開生日會，唔知係唔係佢生日正日呢？祝妳生日快樂！盈盈小朋友。

太太同我講姨仔屋企養嗰隻牧羊狗好乖同好叻但好怕陌生人架。太太話隻狗見到佢一直狂吠（可能隻狗狗聞到毛毛啲味）。由於太太要參加生日會，毛毛就冇人陪，要孤零零喺屋企喇。

多謝姨丈, 係正日生日呀.
我隻狗狗咁怕陌生人,皆因少帶佢去街,佢好細膽架,得把聲,所以有人黎親我屋企,佢就當人入尋佢地盤,睇黎要叫媽咪帶多D佢出街,或者多D叫朋友仔上黎玩,等佢習慣下先得

呢幾日一早就起身，因啲同事放假超多野做，做到個人好攰好攰。喺屋企都冇心機同毛毛玩，毛毛就死纏唔放一定要同佢玩（對唔住呀我攰死喇）……太太大聲講：肥仔，你早啲訓覺喇，唔好同毛毛玩喇（太太好多謝妳關心）。

毛毛今日開始，由一日食四餐改做一日食三餐（但總份量唔變只係分三餐食）。

今朝九點先餵毛毛第一餐，第二餐要工人阿美黎先有得食（要隔九個鐘），唔知毛毛慣唔慣呢？

尋日朝毛毛整跌部相機落地之後（當時佢坐喺度好驚咁望住我，猛吞口水），我大聲鬧毛毛，不過我冇體罰佢。跟住毛毛就走返去佢張床仔度，趴低唔敢望我。到我返工鎖佢入籠，佢只係狐叫左幾聲…

今朝毛毛成朝都要我同佢玩，玩到攰，自己爬上我大肶訓覺，直到我返工…

我唔開心就會想起屋企人同身邊啲好朋友仲有銅銅 (我外娚女)，我特別錫佢同關心佢。

由銅銅“BB”講起，佢細細個已經好得意。有一次銅銅發燒，肺部受感染入左山頂醫院深切治療部3日 (阿妹唔敢同我講)。之後住左40日醫院，住院期間“BB”背脊插滿膠喉，食野同訓覺都好辛苦 (當時我好心痛，點解一個天真o既小朋友要受咁大折磨)。

我日日都去醫院探銅銅，買左好多野俾佢，氹佢開心。由嗰陣開始銅銅就好黐我，每次見我就會撲埋我度：PETER 舅父抱抱。臨走要 GOODBYE KISS...

眨吓眼銅銅大個女喇，唔洗我抱佢喇，宜家見到佢咁健康我都好開心...

事件1：某日將自己隻皇冠牌手錶 (係信物黎架) 調較番準確時間，但大意未閂好錶冠，第日落大雨隻錶入左水，送去維修，報價換件同修理費$4000-$5000。令自己付出咁大代價，係唔係要體罸自己定係賴天氣唔好落大雨，所以令隻錶入左水？好冇理由咁就原諒左自己。

事件2：星期四朝早，我用部450D相機同毛毛影完相，將相機放左o係梳化上面，俾毛毛拖左落地 (經檢查，部機重傷) ，要修理唔知幾錢。究竟係唔係自己貪方便造成呢？定係毛毛百厭？要體罰佢....毛毛唔識分事物輕重應該原諒佢。

以上兩件事都係自己大意做成。其實我地應該注意生活細節，唔好咁大意犯下大錯。呢輪好黑，經濟重傷.............(肥仔，以後睇你仲會唔會咁大意)。

毛毛都好曳, Mona從來唔會係檯,梳化度(即係佢手既地方)攞野咬架, 佢只會係偷盈盈d玩具,文具咬. 揀人來"蝦". 不過做錯事,佢會"dup"耳擺尾唔出聲.

今朝一早，毛毛已經喺個籠度狐叫。原來好急，一放佢出黎就走出騎樓便便。之後就黐住我要我同佢玩，我同毛毛玩左一陣就整野俾佢食。

聽太太講尋日同毛毛洗耳仔，佢好百厭唔聽話，差啲搞唔掂（我發覺毛毛唔鍾意俾人搞耳仔）。

毛毛換左食另一種狗糧同分量都加左，便便都多左（平時一早去一次今朝就便便左三次），唔知係唔係啲新狗糧問題呢………….…

驚人嘅事發生喇!!!!我疏忽將部相機（價值一萬二仟大元）放左喺梳化度，俾毛毛拖左落地……可能報銷….嗚嗚嗚嗚…